Jelemiya

36 Co mu mwaka wa mu ciwana wa ciyulo ca Jehoyakimu muna Josiya, mwene wa Juda, Yehova walekele Jelemiya ngwendi: 2 “Ambata libulu usonekemo majwi oshe a kusompa anjakulekele kutalesa kuli Isalele na Juda na mafuti oshe, kutunda ha litangwa lya kulibanga linjendekele nobe mu matangwa a Josiya kweta na lelo. 3 Hamo bakunjibo ya Juda mubaziba bukalu bwoshe bunjishaka kubanenela, baseza bingila byabo byabibi mangana njikonekele milonga yabo na bubi bwabo.”

4 Co Jelemiya wasanene Baluki muna Nelaya na kumuleka majwi oshe amulekele Yehova, co Baluki wawasonekele mu libulu lya kuzenga. 5 Co Jelemiya washikile Baluki ngwendi: “Yange bananjibindika kukobela mu njibo ya Yehova. 6 Ngeci yobe unapande kuyamo na kukatanda mu kutambeka majwi a Yehova ali mu libulu lya kuzenga liunasoneka muje muli majwi anjinakala na kukuleka ngwange usoneke. Unapande kukawatandela banu ku njibo ya Yehova ha litangwa lya kulibindika kulya. Unapande kuwatandela banu ba Juda boshe baje banatunda mu binganda byabo na kwija ku njibo ya Njambi. 7 Hamo mubalomba Yehova ngwabo abatetele, abatolilila, co lalo hamo umo na umo wabo atenguluka na kuseza bingila byendi byabibi, mwafwa Yehova nendeka laja ngwendi nalubalela manene aba banu.”

8 Ngeci, Baluki muna Nelaya walingile byoshe byamushikile kapolofweto Jelemiya. Watandele mu kutambeka majwi a Yehova aje akele mu libulu lya kuzenga ku njibo ya Yehova.

9 Co mu ciyulo camucitanu ca Jehoyakimu muna Josiya, mwene wa Juda, mu ngonde ya bu 9, banu boshe ba mu Jelusalema na banu boshe baje bezile mu Jelusalema kutunda mu binganda bya Juda balibindikile kulya ku mesho a Yehova. 10 Co Baluki watandele mu kutambeka majwi a Jelemiya aje akele mu libulu lya kuzenga. Wawatandelele ku njibo ya Yehova, mu mulili wa kulila wa Gemaliya muna Shafani muka-kusononona,* mu lilapa lya helu, ku bukobelelo bwa ku cikolo caciha ca ku njibo ya Yehova oku banu boshe bali na kuziba.

11 Mikaya muna Gemaliya, Gemaliya muna Shafani, mwazibile majwi oshe a Yehova a mu libulu lya kuzenga, 12 waile ku njibo ya mwene, mu mulili* wa muka-kusoneka. Bamyata boshe batumamene kuje bapwile: Elishama muka-kusoneka, na Delaya muna Shemaya, na Eunatani muna Akibo, na Gemaliya muna Shafani, na Zedekiya muna Hananiya, na bamyata bakwabo boshe. 13 Mikaya wabalekele majwi oshe aje azibile kuli Baluki mwakele na kutanda mu libulu lya kuzenga oku banu boshe bali na kuziba.

14 Co bamyata boshe batumine Jehudi muna Nethanaya, Nethanaya muna Shelemiya, Shelemiya muna Kushai, bamutumine kuli Baluki ngwabo: “Ija na libulu lya kuzenga lije liunakala na kutandela banu.” Baluki muna Nelaya wambatele lije libulu lya kuzenga mu liboko lyendi na kuyako. 15 Bamulekele ngwabo: “Tumama oho ututandelelyo mu kutambeka.” Ngeci Baluki wabatandelelelyo.

16 Co mubazibile awa majwi oshe balitalele umo na mukwabo oku bali na kuziba lyoba, co balekele Baluki ngwabo: “Tunapande kuleka mwene awa majwi oshe.” 17 Co behwile Baluki ngwabo: “Tuleke, unasonekele bati awa majwi oshe? Kuma Jelemiya ikeye nakala na kukulekawo ndi?” 18 Baluki wabakumbulwile ngwendi: “Eyo, ikeye nakala na kunjileka awa majwi oshe, co njinawasonekele na inki omu mu libulu lya kuzenga.” 19 Bamyata balekele Baluki ngwabo: “Yeni mukalishweke, yobe na Jelemiya, co keti kukale munu azibuka kumulishweka.”

20 Co basezele lije libulu mu mulili wa Elishama muka-kusoneka, co baile kuli mwene uje wakele mu lipela, co bakamulekele byuma byoshe bibazibile.

21 Ngeci mwene watumine Jehudi ngwendi akambate lije libulu lya kuzenga, co Jehudi wakalyambatele mu mulili wa Elishama muka-kusoneka. Jehudi watandele lije libulu oku mwene na bamyata boshe baje bemanene kuyehi na mwene bali na kuziba. 22 Mwene watumamene mu njibo yakele na kukala ha simbu ya cisika. Ei yapwile ngonde ya bu 9,* co mwene wakele na kwota tuhya ha mbaula. 23 Jehudi mwakele na kutandako mitamba itatu nambe iwana, mwene wakele na kuteta ije mitamba na moko ya muka-kusoneka na kumbila ije mitamba mu tuhya tuje twakele ha mbaula. Walingile ngoco kweta noho henyekelele lije libulu lya kuzenga lyoshe mu tuhya tuje twakele ha mbaula. 24 Mwene na bangamba bendi boshe baje bazibile awa majwi oshe kubazibile lyoba, co kubatabwile bizalo byabo. 25 Nameme Eunatani na Delaya na Gemaliya balambelelele mwene ngwabo keti enyeke lije libulu lya kuzenga, oloni kabatolililile. 26 Kutundaho, mwene washikile Jelamele muna mwene na Selaya muna Aziliele na Shelemiya muna Abudele ngwendi bakwate Baluki muka-kusoneka, na kapolofweto Jelemiya, oloni Yehova wabashwekele.

27 Co mwene mwenyekele libulu lya kuzenga lije lyakele na majwi asonekele Baluki aje amulekele Jelemiya, Yehova walekele Jelemiya ngwendi: 28 “Ambata libulu lya kuzenga likwabo usonekemo majwi oshe aje anakala mu libulu lya kuzenga lya kulibanga lije lyanenyeka Mwene Jehoyakimu wa Juda. 29 Co unapande kuleka Mwene Jehoyakimu wa Juda awa majwi a kusompa ngwobe, ‘Yehova nendeka ngwendi: “Unenyeka eli libulu lya kuzenga na kwendeka ngwobe, ‘Bika biunasonekelaho ngwobe: “Cili bene mwene wa Babiloni aija na kunyongesa lino lifuti, co kumukakala munu nambe kasitu”?’ 30 Ngeci Yehova nendeka kutalesa kuli Mwene Jehoyakimu wa Juda ngwendi, ‘Naumo wahi wa ku naanga yendi akatumama ha litanda lya Devidi, co cibimbi cendi cikakala lika hangacije, mutanya cikenya na litanya, co butsiki cikashinuka na lisika. 31 Co njikamwana kashitiko hamolika na batekulwila bendi na bangamba bendi mwafwa ya milonga yabo, co njikanena bukalu hali bakebo na hali baje bakala mu Jelusalema na ha banu ba mu Juda. Njikanena bukalu bwoshe buje bunjendekele ngwange njibanenela mwafwa kubanjitolililile.’”’”

32 Co Jelemiya wambatele libulu lya kuzenga likwabo na kulyana Baluki muka-kusoneka, muna Nelaya, co wasonekele majwi oshe amulekele Jelemiya aje akele mu libulu lya kuzenga lije lyenyekele Mwene Jehoyakimu wa Juda. Co babwezeleleleko majwi amangi a kutunda kuli Njambi.