2 Tesalonika
3 Mukumanesa bandolome, twaleleleniho kutulombelela mangana lijwi lya Yehova litwaleleleho kujalakana bwasi na kukala na bumpau ngwe mulili na kulingila okwo kuli yeni, 2 co lalo mangana twoboke ku bikelemi, baje banapu banu bababi, mwafwa keti banu boshe bali na likulahelo. 3 Oloni Mwata wapwa wa kulongwa, co amikolesa na kuminyungilila kuli uje wamubi. 4 Co lalo twakulahela bene muli Mwata ngwetu muli na kutwalelelaho kukabangeya mashiko atunamyana, co lalo mutwalelelaho kulinga ngoco. 5 Mwata atwaleleleho kutwamenena mwamubwa bimbunge byeni ku cizemo ca Njambi na ku kukolesa mwafwa ya Kristu.
6 Hano tumyana mashiko, bandolome, mu lizina lya Mwata wetu Yesu Kristu, ngwetu shondolokeni kuli ndolome woshe wa liwayanga, uje kesi na kukabangeya byuma* bimwatambwile kuli yetu. 7 Mwafwa neni babenya muzibuka mumunapande kututembwininina, mwafwa mutwakele neni kutwapwile banu ba liwayanga, 8 co lalo kutwalile cakulya ca munu ca bwana. Oloni twafwitanganene na kuundangana butsiki na mutanya mangana keti tupwe citele ca kulema nambe kuli umo weni. 9 Keti ngwabo hamo kutwesi na moko embwe, oloni twashakele kulyana yetu babenya mangana tupwe mwanja umunapande kutembwinina. 10 Mutwakele neni, twakele na kumyana eli lishiko ngwetu: “Nga kuli umo kashaka kupanga, na kulya bene keti alye.” 11 Mwafwa tuli na kuziba ngwabo kuli bamo mukati keni bali na liwayanga, kubesi na kupanga nambe kamandondo, oloni bali na kulikobelesa lika mu biñanda bije kubyabakundamene. 12 Banu ba cifwoco tubashika na kubakanyamesa mu lizina lya Mwata Yesu Kristu ngwetu banapande kupanga mu kwoloka na kulya byakulya bibanawana bakebo babenya.
13 Oloni yeni bandolome keti mujuke kulinga byuma byabibwa. 14 Oloni nga kuli umo kononoka lijwi lyetu litunasoneka omu mu mukanda, munangukeni, co likeleni kulikwatasana nendi mangana shwamwa imukole. 15 Nameme ngoco, keti mumwambate ngwe citozi, oloni twaleleleniho kumunangula ha kupwa ndolome.
16 Mwata wa kwoloka amyane kwoloka simbu yoshe mu byuma byoshe. Mwata akale neni mubaboshe.
17 Yange Paulu, tambuleni mitende yange injinasoneka na liboko lyange. Eci cikeco cizibukiso cange mu mikanda yange yoshe. Omu mukemwo munjikasonekela.
18 Ngozi yakama ya Mwata wetu Yesu Kristu ikale neni mubaboshe.