Samu
Kuli muka-kutwamenena. Mwaso wa kwimba na bisanzi bya mikole. Masikiu.* Mwaso wa Devidi.
55 Tolilila ku lilombelo lyange, obe Njambi,
Co keti uyengule kulomba kwange kwa kulomba kunjitetela.*
2 Njitolilile na kunjikumbulula.
Bishoti byange bili na kunjonowesa kumona tulo,
Co njinombwa,
3 Mwafwa ya byuma byali na kwendeka citozi cange
Na bishoti byali na kunjinenela munu wamubi.
Mwafwa bali na kulundika bukalu hali yange,
Co banalubala na kunjitulikila nkulundundu.
4 Mbunge yange ili na kubabala,
Co njili na kuziba manene lyoba lya kutewa kutsa.
5 Lyoba na kujaja binanjiwana,
Co munjunju unanjikwata.
6 Njatwalelelaho kwendeka ngwange: “Ngwe njakele na mambaba ngeci mwa liyembe
Ngwe njapulwila kweka mangana njikakale mu kwoloka.
7 Taleni! Ngwe njinatewela kulako.
Ngwe njinakakala mu mambo. (Sela)
8 Ngwe njinazambwila ku mwela wa kubanda,
Kulako na lihunzi lya kutenuka, kulako na nyonzi ya lihunzi lyakama.”
9 Bake mu ciluwaluwa, obe Yehova, na kutanganesa matumbe abo,*
Mwafwa njinamono lwozi na mpindangano mu nganda.
10 Butsiki na mutanya bali na kwenda ha bibumbe byayo.
Mukati kayo muli bukenya na bukalu.
11 Kunyonga kuli hakati kayo.
Kulyatelela na kukwisa kubikatundu mu mwela wa mbunga.
12 Mwafwa keti citozi ali na kunjishendumuna.
Ngwe mukemwo, ngwe njinakolesa.
Keti citozi nanjikatukila mangana anjilwise.
Ngwe mukemwo, ngwe njinalishweke.
13 Oloni yobe unalingimo, yobe mukwetu munu ngwe yange,*
Kabusamba kange injizibuka mwamubwa.
14 Twapwile babusamba bakama
Twakele na kuya hamo na mbunga ku njibo ya Njambi.
15 Kunyonga cibawane.
Basikumukile mu Cihilo* oku bayoya
Mwafwa bubi buli hakati kabo na mu bimbunge byabo.
16 Oloni yange njitambeka kuli Njambi,
Co Yehova anjobola.
17 Mutondo na mutanya na mangwezi, njili na kulishoshomwena na kuteta,
Co ali na kuziba lijwi lyange.
18 Anjamena* na kunjana* kwoloka ha kunjitundisa kuli baje bali na kunjilwisa,
Mwafwa mbunga ya banu bali na kwija na kunjilwisa.
19 Njambi aziba, co abakumbulula,
Uje natumama ha litanda kushwa kusañulu. (Sela)
Baje kubazibilile Njambi lyoba,
Bakabyana kutenguluka.
20 Nalwisile* baje banakele nendi mu kwoloka.
Napokwele cikumiiyo cendi.
21 Majwi endi apwa amabotsi kutubakana barta,
Oloni mu mbunge yendi muli bicokota.
Majwi endi apwa amabotsi kutubakana mazi,
Oloni apwa a kubambuka ngwe mikwale.
22 Umbila citele cobe hali Yehova,
Co akukwasa.
Katabesa munu wa kusungama awe.*
23 Oloni yobe, obe Njambi, ubasikumwisa mu bwina bwa kuloba.
Baje bali na mulonga wa maninga, co lalo baka-kukwisa kubete nameme hakati ka matangwa abo a kuyoya.
Oloni yange njikukulahela.