Samu
Kuli muka-kutwamenena. Mwaso wa Devidi.
31 Obe Yehova, njinatewela kuli yobe.
Keti bakanjizibiseho shwamwa.
Njamene mwafwa ya kusungama kwobe.
2 Jendekela litwi lyobe* kuli yange.
Ija bwasi wakunjamene.
Pwa munkinda wange wa kubanda.
Pwa mwela wa kukola mangana unjobole.
3 Mwafwa yobe limanya lyange na cimpaka cange.
Unjitwamenena na kunjimwesa ngila mwafwa ya lizina lyobe.
4 Unjipatula mu bwanda bubananjitela mu bushweke,
Mwafwa yobe mwela wange wa kubanda wa kukola.
5 Njaka sipilitu yange mu maboko obe.
Unanjipatula, obe Yehova, Njambi wa busunga.*
6 Njazinda baje bakapangela tumponya bangoco ba kujeneka seho,
Oloni yange njakulahela Yehova.
7 Njibwahelela manene mwafwa ya cizemo cobe cije kucesi kutenguluka,
Mwafwa unamono kayando kange.
Uzibuka bukalu bwange bwakama.
8 Kuwanjanene mu maboko a citozi cange,
Oloni unanjilingisa njimane mu mwela wa kunyungilila.
9 Njizibileko ngozi, obe Yehova, mwafwa njili mu bukalu.
Kayando kakama kanatsitsibalesa mesho ange na kuzeyesa mubila wange woshe.
10 Buyoye bwange bunashulu na busiwa,
Co myaka yange inashulu na miteto.
Nzili yange ili na kutepuluka mwafwa ya bubi bwange.
Bitsiya byange bili na kuzeya.
11 Bitozi bange bali na kunjishendumuna,
Maneneni baje banjatunga nabo.
Banu banjalizilila nabo bali na kunjijujwisa.
Mubanjimona ku mbunga banjijenjuka.
12 Bananjiyengula na kunjibala ngwe njinatsi.
Njinapu ngwe njaba ya kutsa.
13 Njinazibi mizimbu yaingi yaibi.
Lyoba linanjizengeleka.
Mubanjikungulukila mangana banjilwise,
Bayongola kunjitsiya.
14 Oloni njakulahela yobe, obe Yehova.
Njendeka ngwange: “Yobe Njambi yange.”
15 Matangwa ange ali mu liboko lyobe.
Njamene ku bitozi bange na kuli baje bali na kunjiyandesa.
16 Lingisa cihanga cobe citwile ceke ngamba yobe.
Njobole na cizemo cobe cije kucesi kutenguluka.
17 Obe Yehova, keti unjecelele banjizibise shwamwa munjitambeka kuli yobe.
Lingisa baka-bubi bazibe shwamwa.
Bolwese kulu mu Cihilo.*
18 Tunwa tuje tukwisa twoloke kulu,
Kulumbununa tunwa tuje twendeka hali baka-kusungama mu kulijundula na kulyalesa na kushaula.
19 Bubwa bwobe bwapwa bwakama manene.
Unabutulikila baje bakakuzibila lyoba
Co unabumwesa banu boshe mwafwa ya baje bali na kutewela kuli yobe.
20 Ubashweka mu mwela wa bushweke muyehi nobe
Mangana ubanyungilile ku matumbe a banu.
Ubashweka mu tenti yobe
Mangana ubanyungilile kuli baje babendeka mwamubi.
21 Yehova bamushangazale
Mwafwa nanjimwesa cizemo cendi cije kucesi kutenguluka mu ngila ya kukomokesa mu nganda ibanazengeleka bitozi.
22 Oloni yange njalishoshomwenene na kwendeka ngwange:
“Njinyonga halutwe lwobe.”
Oloni yobe wazibile kulambelela kwange kwa kulomba bukwasi omwo njatambekele kuli yobe.
23 Zemeni Yehova yeni boshe bakulongwa.
Yehova akanyungilila banu ba kulongwa.
Oloni ana kashitiko kakama woshe uje alyalesa.
24 Simpeni, co bimbunge byeni bikanyame,
Yeni boshe muli na kubandamena Yehova.