Jelemiya
8 Yehova nendeka ngwendi: “Ha simbu oyo, bitsiya bya bimyene ba Juda, bitsiya bya bamyata, bitsiya bya tupilistu, bitsiya bya tupolofweto na bitsiya bya baje bakala mu Jelusalema bikatunda mu bihilo byabo. 2 Bikajalakana mwisi ya litangwa na ngonde na bingongonosi bije bibazemene na kupangela na kukabangeya na kutonda na kutsikamena. Kubakabikungulula hamo nambe kubitsinda. Bikapwa ngwe bwilo hasi.”
3 “Co baje bakasala oku ku naanga yaibi, baje bakoboka kuje kunjibashandwela, bakangula kutsa kutubakana kuyoya,” mukemwo mwanendeka Yehova wa maswalale.
4 “Co unapande kubaleka ngwobe, ‘Yehova nendeka ngwendi:
“Nga banu bawa, kuma kubasa kwinduka lalo ndi?
Nga munu atengulula biyongola byendi, kuma mukwabo kasa kutengulula byanayongola kulinga ndi?
5 Mwafwa bika aba banu bakala mu Jelusalema banatwalelelaho kupwa ba kujeneka kulongwa?
Banalizamenena ha makuli,
Shabo kutenguluka.
6 Njakele mbunge ku byuma bibakele na kwendeka, co njatwaleleleleho kubatolilila, oloni mubakele na kwendekelamo keti mukemwo.
Naumo wahi watengulukile ku bubi bwendi nambe kwihula ngwendi, ‘Bika binjinalingi?’
Umo na umo wabo wakele na kwiluka lika mu ngila ibakele na kwenda bakwabo ngwe kabalu ashatukila ku nzita.
7 Nameme tunyangenyange bazibuka simbu yabo.*
Tutela na tumbyasa na bimpolyo* bakanyungu simbu ya kwiluka.*
Oloni banu bange kubazibisisa kusompa kwange Yehova.
8 ‘Mwasa kwendeka bati ngweni: “Tuli na mana, co lalo tuli na lishiko lya Yehova”
Okuni cisonekeso ca baka-kusoneka cili na kusoneka lika makuli?
9 Baka-mana banabazibisa shwamwa.
Banazibi lyoba, co babakwata.
Taleni! Banabyana lijwi lya Yehova,
Co mana mukoni abali nawo?
10 Ngeci njikana banakazi babo ku banalume beka,
Na mahya abo ku banu beka,
Mwafwa kutunda ku wamundondo kutwala ku wakama, boshe bali na linyanyamena.
Kutunda ku kapolofweto kutwala ku kapilistu, boshe bali na kunyanyamena bakwabo kupangesa makuli.
11 Bali na kulikwisa kusaka bana ba banu bange* baje banabetwa ha kubaleka lika ngwabo,
“Kuli kwoloka! Kuli kwoloka!”
Okuni kwoloka kwahi.
12 Kuma bali na kuziba shwamwa mwafwa ya byuma bya bunyengwe bibanalingi ndi?
Kubesi na kuziba shwamwa nambe kamandondo
Kubazibuka nambe mukuzibikila kuziba shwamwa.
Ngeci bakawila mukati ka baje banau laja.
Munjikabana kashitiko bakatanuka,’ ngwendi Yehova.
13 ‘Munjikabakungulula, njikabanyongesa,’ mukemwo mwanendeka Yehova.
Kukukakala bushuka bwa binyu bukasala ku muti wa binyu nambe mikuyu ikasala ku miti ya mikuyu, co maputa akajujwama.
Co binjabanene bakabizimbalesa.’”
14 Bika bitunatumamena hano?
Tulikungululeni na kukobela mu binganda bya kukola tukanyongelemo.
Mwafwa Yehova Njambi yetu akatunyongesa,
Co akatwana mema ali na bushungu ngwendi tunwe,
Mwafwa tunalingi bubi kuli Yehova.
15 Twalabelelele ngwetu kukala kwoloka, oloni nabimo byabibwa binaijako byahi,
Twalabelelele ngwetu kukala kukanguka, oloni kuli lyoba.
16 Tuli na kuziba tubalu bendi bali na kuhwimangana ku Dani.
Tubalu bendi mubohya,
Lifuti lyoshe lininganga,
Baija na kubwabwanya lifuti na byoshe bilimo,
Baija na kubwabwanya nganda na boshe balimo.”
17 “Mwafwa njimitumina manyoka,
Manyoka ba bushungu baje kubabwaha kubashasheya,
Co cili bene bakamishuma,” mukemwo mwanendeka Yehova.
18 Busiwa bwange kubwasa kuhwa,
Mbunge yange ili na kubinja.
19 Njili na kuziba banu bali na kulila na kulomba bukwasi kutundilila ku lifuti lya kulako.
Njili na kuziba bana ba banu bange* bali na kulila ngwabo:
“Kuma Yehova kesi mu Siyone ndi?
Kuma mwene wayo wahimo ndi?”
Bika bibananjilubalesela na tumponya babo ba kushonga
Na binjambi babo beka ba kujeneka seho?”
20 “Simbu ya kuteja ineti, ntondwe inahu,
Oloni anga kutwobokele!”
21 Njili na kuziba kubabala ku mbunge mwafwa ya bimbandu bya bana ba banu bange.
Njinazeye.
Njili na kuziba manene lyoba.
22 Kuma mu Giliyadi kumwesi bosamu ndi?
Indi kumwesi muka-kusaka?
Mwafwa bika bana ba banu bange kubabakangwisile?