Jelemiya
9 Ngwe mutwe wange wapwile ngwe lisima,
Na mesho ange ngwe apwile ngwe kabwelu-bwelu ka misozi,
Ngwe njilila butsiki na mutanya
Mwafwa ya banu bange babanatsii.
2 Ngwe njakele na mwela wa kwetela mu mambo
Ngwe njiseza banu bange na kuya kulako nabo
Mwafwa boshe banapu bikoi,
Banapu mbunga ya banu ba kujeneka kulongwa.
3 Beteka ndaka yabo ngwe buta bwa lusipa
Mu lifuti munashulu makuli keti kulongwa.
“Bubi bwabo buli na kulibwezelela,
Co kubesi na kunjitolilila,” mukemwo mwanendeka Yehova.
4 “Mubaboshe nyanyameni na baje bamwatunga nabo,
Co keti mukulahele nameme ndolome yeni
Mwafwa bandolome beni boshe bapwa baka-kwenda bungungu,
Co banu boshe bamwatunga nabo bapwa baka-kubiisa bakwabo mazina.
5 Umo na umo akakwisi uje yatunga nendi,
Co naumo wahi akendeka busunga.
Banalongesa bindaka byabo kwendeka makuli,
Bakalijukisa bakebo babenya ha kulinga byuma byabibi.
6 Uli na kuyoya mukati ka banu bali na makuli.
Bali na kukwisa, co banabyana kunjizibuka,” mukemwo mwanendeka Yehova.
7 Ngeci, Yehova wa maswalale nendeka ngwendi:
“Njikabasongonona na kubeseka
Mwafwa bika binjasa kulingila lalo bana ba banu bange?
8 Bindaka byabo bije bikendeka makuli binapu ngwe mikili ije itsiya.
Ha kanwa endeka mu kwoloka kuli uje yatunga nendi,
Oloni mu mbunge ayongola kumubandamena.”
9 Yehova nendeka ngwendi: “Kuma kubapandele kulitabela kuli yange mwafwa yebi byuma ndi?
Kuma kunjapandele kwana muyati wa cifwa eci kashitiko ndi?
10 Njikalila na kuziba busiwa mwafwa ya malundu,
Co njikemba mwaso wa busiwa mu mambo mwa kulisila,
Mwafwa banenyekamo, ngeci naumo wahi asa kwitamo,
Co kukwesi bimuna batuli na kuzibamo.
Tuzila na bikashama banatewemo boshe banai.
11 Njikapwisa Jelusalema mutumbo wa mamanya, njikaipwisa limbo lya bimbanje,
Co binganda bya Juda njikabipwisa bingundu, wahi akakalamo.
12 Iya ali na mana a kuzibisisa ebi?
Yehova nendeka kuli iya mangana abyambulule?
Bika bilinabihila lifuti?
Bika bilinenyela ngwe mambo
Mangana lilinge nou aitamo wahi?”
13 Yehova wakumbulwile ngwendi: “Mwafwa banabyana lishiko lyange linjinabanene, co lalo mwafwa kubalikabangeyeye na kwononoka lijwi lyange. 14 Oloni batindibalele na kukabangeya bimbunge byabo, co lalo bakabangeyeye tumponya ba Bale ngwe mubabalongesele baishabo. 15 Ngeci Yehova wa maswalale Njambi ya Isalele nendeka ngwendi, ‘Hano njilingisa aba banu balye cimena ca kulula na kubalingisa banwe mema ali na bushungu. 16 Njikabashandwela mu mafuti muje bakebo na bakukulwila babo kubazibukile na kubatumina mukwale kweta noho hanjikabanyongesela.’
17 Yehova wa maswalale nendeka ngwendi,
‘Pweni baka-kuzibisisa,
Saneni banakazi baje bakembi myaso ya busiwa,
Co saneni banakazi ba bitongwe baije,
18 Mangana bazambwile kuno baije na kutukatwila mbimbi
Mangana mesho etu acopotoke misozi,
Co na biñapeyo byetu bindweke mema.
19 Mwafwa bali na kuziba mbimbi mu Siyone ya banu bali na kulila ngwabo:
“Banatunyongesa,
Shwamwa yetu inama
Mwafwa tunaseze lifuti lyetu, co banasiula binjibo byetu.”
20 Eni banakazi, tolilileni ku lijwi lya Yehova.
Matwi eni atolilile lijwi litunda mu kanwa kendi.
Longeseni bana beni ba banakazi ou mwaso wa kulila,
Co lilongeseni umo na mukwabo ou mwaso wa busiwa.
21 Mwafwa kutsa cinakobelela mu mawindo etu,
Cinakobela mu binganda byetu bya kukola
Mangana cakwambate banike mu bitapalo
Na bakwenje mu myela ya mbunga.’
22 Endeka ngwobe, ‘Yehova nendeka ngwendi:
“Bibimbi bikajalakana hasi ngwe bwilo buli hasi,
Bikalundama ngwe tiliku ibanalundika hamo,
Yanalundika muka-kuteja, co wahi akaikungulwila hamo.”’”
23 Yehova nendeka ngwendi:
“Muka-mana keti alishashele mana endi,
Co muka-nzili keti alishashele nzili yendi,
Co muka-kufuka keti alishashele bufuko bwendi.”
24 “Oloni uje alishasha, alishashe mwafwa yeci cuma:
Ngwendi asa kunanguka byange na kunjizibuka
Ngwendi yange Yehova uje akamwesa cizemo cije kucesi kutenguluka, na kwakula mwamubwa na kulinga byuma mu kusungama ha lifuti-libu,
Mwafwa njashaka ebi byuma,” mukemwo mwanendeka Yehova.
25 Yehova nendeka ngwendi: “Taleni! Matangwa ali na kwija, co njikana kashitiko boshe baje banai ku mukanda, oloni baje kanda baye ku mukanda 26 njikabana kashitiko hamolika na baka-Ijipiti na baje bali mu Juda na mu Edomu na baAmoni na baMowabi na boshe baje banakamba binkambu bya ha mbakatwi,* baje bali na kuyoya mu mambo mwafwa mafuti oshe kuwaile ku mukanda, co na bakunjibo ya Isalele boshe kubaile ku mukanda mu mbunge.”