Samu
Kuli muka-kutwamenena. Mwaso. Samu.
66 Yeni boshe mwatunga ha lifuti-libu, tambekeni kuli Njambi mu kulisamba.
2 Imbeni myaso ya kushangazala lizina lyendi lya bumpau.
Mushangazaleni na kumwana bumpau.
3 Lekeni Njambi ngweni: “Bipangi byobe byapwa bya kukomokesa.
Mwafwa ya nzili yobe yakama,
Bitozi bobe bakaziba lyoba ku mesho obe.
4 Banu boshe ba ha lifuti-libu bakakutsikamena.
Bakemba myaso ya kukushangazala.
Bakemba myaso ya kushangazala lizina lyobe.” (Sela)
5 Ijeni mwakumone bipangi bya Njambi.
Byuma byanalingila bana ba banu bikomokesa.
6 Watengulwile kalunga-ndonga kupwa libu lya kuma.
Bajabukile ndonga na mendi.
Co twabwahelelele mwafwa yendi.
7 Ayula myaka yoshe mwafwa ya nzili yendi.
Mesho endi atwalelelaho kutala baka-mafuti.
Banu ba kutindibala keti balijundule bakebo babenya. (Sela)
8 Shangazaleni Njambi yetu eni banu,
Co majwi a kumushangazala anapande kuzibika.
9 Akatunyungilila mangana tutwaleleleho kuyoya.*
Kesi kutabesa mendi etu atanuke.*
10 Mwafwa unatwilula, obe Njambi.
Unatujelesa ngwe mubakajelesela siuva.
11 Watujebelele mu bwanda.
Watutwikile citele ca kulema manene.
12 Watabesele banu batulyatangele.
Twetile mu tuhya na mu mema,
Co watunenele ku mwela wa kuhwimina.
13 Njikaija mu njibo yobe na bwana bwa mutunu bwa kwenyeka.
Njikalinga binjinalikumiiya kuli yobe,
14 Kulumbununa bikakulahesele kanwa kange
Nebi bikendekele kanwa kange munjakele mu bukalu.
15 Njikwana bwana bwa kwenyeka bwa tusitu ba kununa
Na bwisi bwa mulambu wa bimanga ba nkomba.
Njana bwana bwa bingombe ba nkomba hamolika na bimembe ba bizamba. (Sela)
16 Ijeni mwakuzibe, yeni boshe mukazibila Njambi lyoba,
Co njakumileka byananjilingila.
17 Njatambekele kuli ikeye na kanwa kange
Na kumwana bumpau na ndaka yange.
18 Ngwe njatulikile cuma cimo cacibi mu mbunge yange,
Ngwe Yehova kanjizibile.
19 Oloni Njambi wanjizibile,
Watolililile mwamubwa ku lilombelo lyange.
20 Shangazaleni Njambi uje kabyanene lilombelo lyange
Nambe kujeneka kunjimwesa cizemo cendi cije kucesi kutenguluka.