Samu
Kuli muka-kutwamenena. Cilumo ca mwaso cibasana ngwabo: “Bintemo.” Mwaso wa Devidi.
69 Njobole, obe Njambi, mwafwa mema ashaka kwitula mwonyo wange.
2 Njinandipukila mu mandoba a kuloba muje kumwesi naha ha kulyata.
Njakobela ha nzinga,
Co ndonga ya cingungumuta* inanjungumuna.
3 Njajuka mwafwa ya kutambeka.
Ha milibu yange hoshe shoo.
Mesho ange anazeye mwafwa ya kubandamena Njambi yange.
4 Baje banjizinda kwa kujeneka mulonga
Babangi manene kutubakana binkambu bya ku mutwe wange.
Baje bashaka kunjitsiya,
Bitozi bange ba bingungu, banapu babangi.
Banjisindiiye kwilwisa bije kunjebile.
5 Obe Njambi, uzibuka bulema bwange,
Co milonga yange kuyalishwekele ku mesho obe.
6 Baje bakukulahela keti bazibe shwamwa mwafwa yange,
Obe Mwata Wahakamwa ya Byoshe, Yehova wa maswalale.
Baje bakutonda, keti bashauke mwafwa yange,
Obe Njambi ya Isalele.
7 Bali na kunjishaula mwafwa yobe.
Kushauka cinafwiki cihanga cange.
8 Njinapu nji mungenzi ku bandolome bange,
Nji munu wa kutunda ku lifuti lyeka ku bana ba banana ba banalume.
9 Ntwima injili nayo ha njibo yobe inanjili,
Co kushaula kubali na kukushaula kunaija hali yange.
10 Munjalibindikile kulya mangana njimwese kulikehesa kwange,*
Banjishawile,
11 Munjakele na kuzala cikeleya,
Bakele na kunjijola.
12 Yange ibasimutwiya baje banatumama ku cikolo ca nganda,
Co bitakwa bali na kunjimba mu myaso yabo.
13 Oloni lilombelo lyange lyete kuli yobe, obe Yehova,
Ha simbu iunjizibila ngozi.
Mwafwa ya cizemo cobe cakama cije kucesi kutenguluka, obe Njambi,
Njikumbulule na bilinga byobe bya kwobola.
14 Njitundise mu mandoba.
Keti unjecelele njimbwitamemo.
Njamene kuli baje banjizinda
Na kunjamena ha nzinga.*
15 Keti wecelele mema a libazi a cingungumuta* anjungumune,
Nambe nzinga* injingumbule
Nambe lisima* linjifwike.
16 Njikumbulule, obe Yehova, mwafwa cizemo cobe cije kucesi kutenguluka capwa cacibwa.
Njitale kwesekesa na kutetela kwobe kwakama,
17 Co keti ushwekele ngamba yobe cihanga cobe.
Njikumbulule bwasi mwafwa njili mu bukalu.
18 Njishwene na kunjamena.
Njipatule ku bitozi bange.
19 Uzibuka mubali na kunjishawila na kunjombwanesa na kunjizibisa shwamwa.
Ukamono bitozi bange boshe.
20 Kunjishaula kunapokola mbunge yange, co mbandu yange kuyolo.*
Njinasinganyekele ngwange kukala umo anjizibilako mema ku mbunge, oloni wahi,
Ngwange hamo kuli bamo banjizembeleka, oloni bahi.
21 Kutubakana kunjana byakulya bananjanene bushungu,*
Co munjinatsile lihwila bananjanene vinega ngwabo njinwe.
22 Mesa yabo ipwe nganjo kuli bakebo,
Co kubezika kwabo kupwe muheto.
23 Mesho abo azibale mangana keti bamone,
Co lingisa bintungi byabo bijaje simbu yoshe.
24 Bamwese kulubala* kwobe,
Co butenu bwobe bwakama bubawane.
25 Cilombo* cabo cipwe ngundu.
Mu bitenti byabo keti mukale munu.
26 Mwafwa bali na kusheka uje iunapupu
Na kutwalelelaho kwanuka kubabala kwa baje bawabulumwine.
27 Bwezelela milonga ku milonga yabo,
Co keti ubamone ngwobe banapu baka-kusungama.
28 Batundise mu libulu lya baka-kuyoya,*
Co keti ubasoneke hamo na baka-kusungama.
29 Oloni njili na kuyanda na kuziba kubabala.
Nzili yobe ya kwobola injinyungilile, obe Njambi.
30 Njimba myaso ya kushangazala lizina lya Njambi,
Co njimwamesa oku njimukandelela.
31 Kulinga ngoco kuzibisa Yehova kubwaha kutubakana kumwana ngombe wa nkomba,
Kutubakana kumwana muna ngombe wa nkomba uje ali na mambinga na bimbemba.
32 Banu bababotsi bakamona nzili ya Njambi ya kwobola, co bakabwahelela.
Yeni muli na kutonda Njambi, bimbunge byeni bikanyame.
33 Mwafwa Yehova ali na kutolilila ku tuhutu,
Co kayengula banu bendi baje bali mu bundungo.
34 Lilu na lifuti-libu bimushangazale,
Tulunga-ndonga na byoshe bili na kwendamo bimushangazale.
36 Batekulwila ba bangamba bendi bakaiswana,
Co baje bazema lizina lyendi bakakalamo.