Samu
Mwaso. Samu ya Devidi.
108 Mbunge yange inakanyama, obe Njambi,
Njimba myaso na kukushangazala na mwonyo wange woshe.
2 Induka, obe cisanzi ca mikole nobe kalyalya.
Njinduka mutondo-tondo.
3 Njikushangazala mukati ka miyati ya banu, obe Yehova,
Njikwimbila myaso ya kukushangazala mukati ka baka-mafuti.
4 Mwafwa cizemo cobe cije kucesi kutenguluka cakama, cinaketa na mwilu,
Co kulongwa kwobe kunaketa na mu bukambwila.
5 Mwesa bukama bwobe helu lya melu, obe Njambi.
Bumpau bwobe bukale ha lifuti-libu hoshe
6 Mangana wamene banu bobe bawazema.
Twobole na liboko lyobe lya cilyo na kunjikumbulula.
7 Njambi nendeka mwafwa ya kujela kwendi* ngwendi:
“Njibwahelela munjana banu bange Shekemu kupwa buswana bwabo.
Co njitepa Cinema* ca Sukothi.
8 Giliyadi napu wange ngeci mwa Manase,
Co Efremu napu tepa ya ku mutwe wange.
Juda napu mulamu wa kapitau kange.
9 Mowabi ikeye lilonga lyange lya kutanena.
Njasha lisanda lyange hali Edomu.
Njitambeka mu kulisamba hali Filistiya.”
10 Iya anjitwala ku nganda ya kukola?
Iya anjitwamenena kuketa na ku Edomu?
11 Kuma keti yobe, obe Njambi, uje natubyana,
Njambi yetu uje nalikele kuya na maswalale betu ndi?
12 Tukwase mu bukalu bwetu,
Mwafwa kwobola kwa banu kwapwa kwangoco.
13 Njambi atwana nzili,
Co alyatangela bitozi betu.