Isaya
28 Lubinda lwa cilongo* ca kulimwesa* ca bitakwa ba Efremu
Na ntemo yaco yaibwa manene ije ili na kujujwama,
Ije ili helu lya cinema ca bwilo ca baje bakapende binyu!
2 Taleni! Yehova atuma munu wa nzili, wa kukanyama.
Akumbila eci cilongo hasi na nzili
Ngwe nyonzi ya mamanya ije iluma na lihunzi lyakama lije libiisa byuma,
Ngwe nyonzi yakama ya cililimo ije ikopotoka.
3 Bilongo bya kulimwesa* bya bitakwa ba Efremu
Bakabilyatangela.
4 Co ntemo yabyo yaibwa manene ije ili na kujujwama,
Ije ili helu lya cinema ca bwilo,
Ipwa ngwe bushuka bwa mukuyu buje bulibanga kuhya simbu kanda ntondwe yete.
Munu acibumona lika, abupotola na kubulehula.
5 Ha litangwa olyo, Yehova wa maswalale akapwa cilongo ca bumpau na cilongo ca bintemo byabibwa ku banu bendi baje banasalaho. 6 Akalingisa maako bakale na lishungu lya kwakula mwamubwa na kwana nzili baje basheka bitozi ku cikolo ca nganda.
7 Co aba nabo bongumuka mwafwa ya binyu,
Bwala bubalingisa batalyangele.
Tupilistu na tupolofweto bongumuka mwafwa ya bwala,
Binyu bibatanganesa,
Co batalyangela mwafwa ya bwala,
Bimona bibali na kumona bili na kubongumuna,
Co kubesi na kusompa mu kusungama.
8 Mwafwa ha bimesa byabo hanashulu bishanjo,
Nahamo hahi kuhesi bishanjo.
9 Iya yalongesa byuma bya mangana,
Co iya yalumbunwina ou muzimbu?
Baje banashumuka ololo ndi?
Baje batunda ololo ku mabele ndi?
10 Mwafwa ali na kulinga “atunda ku lishiko eli, aya ku lishiko eli, atunda ku lishiko eli, aya ku lishiko eli,
Mukana na mukana, mukana na mukana,*
Twatundondo aha, twatundondo haje.”
11 Ngeci, Njambi akendeka naba banu kupangesa banu ba cikukuma, baje bendeka ndaka yeka. 12 Wabalekele ngwendi: “Ou ukewo mwela wa kuhwimina. Uje najuka ahwime, ou ukewo mwela wa kulishubulwisila,” oloni kubamutolililile. 13 Ngeci kuli bakebo, lijwi lya Yehova likapwa ngacije:
“Kutunda ku lishiko eli, kuya ku lishiko eli, kutunda ku lishiko eli, kuya ku lishiko eli,
Mukana na mukana, mukana na mukana,*
Twatundondo aha, twatundondo haje.”
Mangana mubenda,
Batanuke na kuwa busetanima,
Co bapokoka na kutsa mu muheto na kubakwata.
14 Ngeci, zibeni lijwi lya Yehova, yeni baka-kulyalesa,
Yeni baka-kuyula banu ba mu Jelusalema,
15 Mwafwa eni banu muli na kwendeka ngweni:
Tunalikumiiya na kutsa,
Na kulizibasana na Cihilo.*
Mema a libazi lya kutewesa muweta,
Kuwatungumbula,
Mwafwa tunalingisa kukwisa kupwe butewelo bwetu,
Co tunabanda mu makuli.”
16 Ngeci, Mwata Wahakamwa ya Byoshe Yehova nendeka ngwendi:
Njijala limanya libaneseka, lipwe lubula lwa Siyone,
Limanya lya seho lya mu mbango lya lubula lwa kukola.
Naumo wahi akulahela eli limanya alijujukila.
17 Kwakula mwamubwa njikacipwisa ngwe mukole wa kusetekesa,
Co kusungama njikacipwisa ngwe mukole wa kusungamesa.
Nyonzi ya mamanya ikakomba butewelo bwa makuli,
Co mema a libazi akangumbula mwela wa kubanda.
18 Cikumiiyo cimunalikumiiya na kutsa, cihwa,
Co lizibasano limunalizibasana na Cihilo,* kulikalako.
Mema a libazi lya kutenuka muweta,
Amisanyozola.
19 Simbu yoshe muweta,
Amyungumuna,
Mwafwa aita mutondo na mutondo,
Mutanya na butsiki.
Kubanga kulijujukila kukekwo kubalingisa bazibisise bibanazibi.”*
20 Mwafwa mwela wawihi manene, munu kasa kutandabalaho,
Co nanga ya kulifwika yaindondo manene, munu kasa kulibungutiyamwo.
21 Mwafwa Yehova akakatuka ngwe mwalingilile ku Munkinda wa Pelazimu,
Akemana ngwe mwalingilile ku cinema* ca kuyehi na Gibioni,
Mangana amwese bilinga byendi, bilinga byendi bya kukomokesa,
Na kupanga bipangi byendi, bipangi byendi bya kukasamesa.
22 Ngeci keti musembulule,
Mangana malyenge eni keti bawakute manene,
Mwafwa Mwata Wahakamwa ya Byoshe, Yehova wa maswalale, nanjileke ngwendi,
Nayongola kunyongesa lifuti* lyoshe.
23 Jendekeni matwi eni na kutolilila ku lijwi lyange,
Tolilileni mwamubwa ku byuma binjendeka.
24 Kuma muka-kulima atwalelelaho lika kukekela kwa kujeneka kukuna mbuto ndi?
Kuma atwalelelaho lika kukipula na kupupulula masinde ndi?
25 Nga namanesa kubwahesa libu,
Kuma kakubu kumini ya kuzibala na kukuna kumini yeka,
Na kukuna tiliku na mashangu na mbali mu myela yabyo,
Na kukuna speuti* kumukulo wa lihya ndi?
26 Mwafwa Njambi ali na kumulongesa* ngila yaibwa,
Njambi yendi ali na kumulongesa.
27 Mwafwa kumini ya kuzibala kubesi kuitsena na cilei ca kujungwisa,
Co liwili lya litemba kubesi kulitisa ha kumini yeka.
Oloni kumini ya kuzibala bakaipupu na mbweti,
Co kumini yeka bakaipupu na mulamu.
28 Munu mwakajungula, kuma akatiki binona mangana apangeho likende ndi?
Embwe, kesi kutwalelelaho kujungula mangana abitike.
Mwaketisaho liwili lya litemba lyendi libali na kukoka tubalu,
Kesi kubitika.