Samu
Kuli muka-kutwamenena; ha Gitithi.* Mwaso wa bana ba Kola.
84 Njazema manene tabanakele yobe yakama,
Obe Yehova wa maswalale!
Mbunge yange na situ yange bitambeka mu kubwahelela kuli Njambi wa kuyoya.
3 Nameme kazila akalamo,
Co kambyasa atungamo lishwa,
Muje mwanyungila bana bendi
Kuyehi na mutula wobe wakama, obe Yehova wa maswalale,
Mwene yange na Njambi yange.
4 Banabwahelela baje bali mu njibo yobe.
Batwalelelaho kukushangazala. (Sela)
5 Banabwahelela baje bawana nzili kuli yobe,
Bimbunge byabo bili ku bitapalo bije biya ku njibo yobe.
6 Mubaita mu Cinema ca Bakka,*
Bacilingisa cipwe mwela wa tubwelubwelu,
Co nyonzi yakulibanga ibezikisa eci cinema.
7 Batwalelelaho kwenda, oloni kubajuka.
Umo na umo wabo asholoka ku mesho a Njambi mu Siyone.
8 Obe Yehova Njambi wa maswalale, ziba lilombelo lyange,
Tolilila, obe Njambi ya Jakobu. (Sela)
9 Tala, obe ntelo yetu na Njambi yetu,*
Tala cihanga ca wakubwabesa wobe.
10 Mwafwa kukala mu malapa obe litangwa limo kwakubwa kutubakana kukala kweka matangwa 1,000.
Njalyangwila kwimana ku cikolo ca njibo ya Njambi yange
Kutubakana kukala mu bitenti bya banu bababi.
11 Mwafwa Yehova Njambi wapwa litangwa na ntelo.
Akazibila banu ngozi na kubana bumpau.
Yehova komina cuma cacibwa
Baje benda mu kulongwa.
12 Obe Yehova wa maswalale,
Nabwahelela munu uje akukulahela.