Jelemiya
1 Awa akewo majwi ange Jelemiya* muna Hilikiya, umo wa tupilistu ba mu Anatoti mu lifuti lya Benjamini. 2 Yehova wendekele nange mu matangwa a Josiya, muna Amoni, mwene wa Juda mu mwaka wa bu 13 wa kuyula kwendi. 3 Wendekele lalo nange mu matangwa a Jehoyakimu, muna Josiya, mwene wa Juda. Wendekele nange kweta na ku mamaneselelo a mwaka wa bu 11 wa kuyula kwa Zedekiya, muna Josiya, mwene wa Juda, kweta bene noho habaililile banu ba mu Jelusalema mu bunzinda mu ngonde yamucitanu.
4 Yehova wanjileka ngwendi:
Njakupwisile kapolofweto ku baka-mafuti.”
6 Oloni yange njendekele ngwange: “Kekange, Mwata Wahakamwa ya Byoshe Yehova.
Kunjizibuka kwendeka mwafwa njicili nji mwanike wamundondo.”
7 Co Yehova wanjikumbulwile ngwendi:
“Keti wendeke ngwobe, ‘Nji mwanike wamundondo.’
Mwafwa unapande kuya ku banu boshe kunjikutuma,
Co unapande kukendeka byuma byoshe binjikushika.
8 Keti uzibe lyoba mwafwa ya sholwesi yabo,
Mwafwa ‘Njili hamo nobe mangana njikwobole’ mukemwo mwanendeka Yehova.”
9 Co Yehova wolwele liboko lyendi na kunjikwata ku kanwa. Co Yehova wanjilekele ngwendi: “Njinaka majwi ange mu kanwa kobe. 10 Tala, lelo njinakwana moko ha mafuti na ha bumwene. Moko ya kushimbula na kusiula, ya kunyongesa na kubujula, ya kutunga na kukuna.”
11 Yehova wendekele lalo nange, co wanjihwile ngwendi: “Jelemiya, bika biuli na kumona?” Co njakumbulwile ngwange: “Njili na kumona munango wa muti wa omondi.”
12 Yehova wanjilekele ngwendi: “Mukemwo, mwafwa njili na kutona mangana njishulisilile lijwi lyange.”
13 Yehova wendekele nange lwamucibali, co wanjihwile ngwendi: “Bika biuli na kumona?” Co njakumbulwile ngwange: “Njili na kumona ndeho ili na kutupuka, co kanwa kayo kaje kanatalesele ku kunto* banakatengulwila ku mbwela.”* 14 Co Yehova wanjilekele ngwendi:
“Bukalu bukatundilila ku kunto,*
Bukaija ku banu boshe baje bali ha lifuti.
15 Mwafwa ‘Njili na kusana binaanga byoshe bya bumwene bwa ku kunto’* mukemwo mwanendeka Yehova,
‘Co bikaija. Naanga na naanga yakutumbika litanda lyayo
Ku bikolo bya kukobelela mu Jelusalema
Na kuzengeleka bibumbe byayo byoshe
Na binganda byoshe bya Juda.
16 Co njikabaleka munjinabakwila mwafwa ya bubi bwabo bwoshe
Mwafwa bananjiseze,
Co bali na kwenyekela milambu binjambi beka
Na kutsikamena byuma bibanapanga na maboko abo.’
17 Oloni yobe unapande kulibwahesela kulingako bimo,*
Co unapande kuya na kubaleka byoshe binjikushika.
Keti ubazibile lyoba
Mangana keti njikuzibise lyoba ku mesho abo.
18 Mwafwa lelo njinakupwisa ngwe nganda ya kukola,
Ngwe ngunzi ya cikubo, co lalo ngwe bibumbe bya kopa mangana wase kukanyama mu lifuti lyoshe.
Njinakupwisa ngoco ku bimyene ba Juda na bamyata ba Juda,
Njinakupwisa ngoco ku tupilistu bendi na ku banu ba mu lifuti.
19 Co cili bene bakakulwisa,
Oloni kubakakuhyana,
Mwafwa ‘Njili hamo nobe mangana njikwobole,’ mukemwo mwanendeka Yehova.”