Jelemiya
20 Co Pasha muna Ima, kapilistu uje wapwile lalo ntwama wakama wa baka-kupanga mu njibo ya Yehova, wakele na kutolilila Jelemiya mwakele na kupolofweta ebi byuma. 2 Co Pasha wapupile kapolofweto Jelemiya na kumwaka mu tukunju tuje twakele ku Cikolo ca Helu ca Benjamini kuyehi na njibo ya Yehova. 3 Oloni lya mukwabo, Pasha mwatundisile Jelemiya mu tukunju, Jelemiya wamulekele ngwendi:
“Yehova nakutundisa lizina lya Pasha, nakuluku ngwendi yobe Lyoba Kwoshe. 4 Mwafwa Yehova nendeka ngwendi, ‘Byuma bikalingiwa kuli yobe bikakuzibisa lyoba na kuzibisa babusamba bobe lyoba, co bakatsa ku mukwale wa bitozi babo oku uli na kulimwena. Co njikana Juda mu maboko a mwene wa Babiloni, co akabatwala mu bufunge mu Babiloni na kukabatsiya na mukwale. 5 Co bufuko bwoshe buli omu mu nganda, na byuma byoshe bilimo, na byuma byoshe bya seho bilimo, na bufuko bwa bimyene ba Juda, byoshe njikabyana mu maboko a bitozi babo. Co bakabipukula na kubyambata na kubitwala ku Babiloni. 6 Co yobe Pasha na boshe bali mu njibo yobe mukaya mu bufunge. Ukaya ku Babiloni na kukatsilako, co kukekwo kubakakutsinda na babusamba bobe boshe, mwafwa unapolofweta makuli kuli bakebo.’”
7 Unanjikomokesa obe Yehova, co njinakomoka.
Unapangesa nzili yobe hali yange, co unahyana.
Njinapu cuma cibali na kujola litangwa lyoshe lya mutunu.
Banu boshe bali na kunjishendumuna.
8 Mwoshe munjendekela kubanga njitambeke ngwange,
“Lwozi na Kunyonga!”
Mwafwa bali na kunjitukila lijwi lya Yehova na kunjishendumuna litangwa lyoshe lya mutunu.
9 Co njendekele ngwange: “Kunjimutumbula lalo,
Co kunjendeka mu lizina lyendi.”
Oloni lijwi lyendi lyakele na kushukuma mu mbunge yange ngwe tuhya, lyapwile ngwe milangi ya tuhya mu bitsiya byange,
Co kunjasele kulitulikilalyo.
Kunjasele kukolesa.
10 Mwafwa njinazibi lingwabo lyalingi lya byuma byabibi.
Kwoshe kunjitila njili na kuziba lyoba.
Bali na kwendeka ngwabo: “Mulwiseni, tuyeni tumulwise.”
Banu boshe baje bakele na kunjishungwiya kwoloka bali na kubandamena kumona munjiwa. Bali na kwendeka ngwabo:
“Hamo tumumona asebuka na kulinga byuma bya bulema,
Co tumuhyana na kumulinga shambandinga.”
11 Oloni Yehova wakele hamo nange ngwe muka-kulwa wa kutewesa.
Mukemwo baje bali na kunjiyandesa batanuka, co kubanjihyana.
Bakaziba manene shwamwa, mwafwa kubakanjihyana.
Shwamwa yabo ikakalako myaka yoshe, co banu kubakaibala.
12 Oloni yobe, obe Yehova wa maswalale, ukelula muka-kusungama.
Ukamono bisinganyeka byendi bya kuloba, na mbunge yendi.
Njitabese njmone muubalinga shambandinga,
Mwafwa njinanene ñanda yange kuli yobe.
13 Imbileni Yehova. Shangazaleni Yehova.
Mwafwa nobola kahutu mu maboko a baka-kulinga byuma byabibi.
14 Litangwa linjasemukile lipwe lya kusinga.
Litangwa libanjikitile banana keti lipwe lya kubezika.
15 Apwe wa kusinga munalume uje waile na kuleka batate muzimbu waubwa ngwendi:
“Banakukitila mwana wa munalume,”
Na kubalingisa babwahelele manene.
16 Ou munalume apwe ngwe binganda bije byananyongesa Yehova kwa kujeneka kulibeya.
Azibe banu batambeka mutondo na kuziba cilumo ca nzita mutanya-mwelu.
17 Bika kanjitsiilile mwimo lya banana,
Mangana limo lya banana lipwe cihilo cange,
Co ngwe banatwalelelaho kukala na cikute?
18 Kuma njatundile mwimo lya banana
Mangana njakumone bukalu na kuziba busiwa
Na kutsa oku njinapaye ndi?