2 Tesalonika

1 Yange Paulu, njili hamo na Siuvenasi* na Timothi. Njili na kusonekela cikungulukilo ca baka-Tesalonika cije cinalikwatasana na Njambi Tate yetu na Mwata Yesu Kristu ngwange:

2 Ngozi yakama na kwoloka bya kutunda kuli Njambi Tate na Mwata Yesu Kristu bikale neni.

3 Bandolome, simbu yoshe tukakandelela Njambi mwafwa yeni. Kulinga ngoco kunapande, mwafwa likulahelo lyeni lili na kukanyama manene, na cizemo ca umo na umo weni cili na kulibwezelela kuli umo na mukwabo. 4 Mukemwo tuli na kulishashela hali yeni mu bikungulukilo bya Njambi mwafwa ya kukolesa kweni na likulahelo lyeni mu tuyando tweni twoshe na mu bukalu bumuli na kumona.* 5 Ebi binapu bukaleho bwa kusompa kwa Njambi kwa kusungama, bije bimilingisa bamimone ngwabo munafwila kukala mu Bumwene bwa Njambi buje bumuli na kuyandela.

6 Oku kusompa kwa Njambi kunapu kwa kusungama, mwafwa elwisila kayando kuli baje bali na kumiyandesa. 7 Oloni yeni muli na kuyanda, mukawana kuhwima hamolika netu ha simbu yakajomboloka Mwata Yesu kutunda mwilu na tungelo bendi ba nzili 8 mu milangi ya tuhya, mwakalinga shambandinga kuli baje kubazibuka Njambi na kuli baje kubesi na kwononoka muzimbu waubwa wa Mwata wetu Yesu. 9 Aba banu bakabasompa kuli Mwata wetu, co kashitiko kabo kakapwa kubanyongesa myaka yoshe mangana batunde ku mesho endi na ku bumpau bwa nzili yendi. 10 Co ha litangwa lije omwo akaija na kutambula bumpau mu kulikwatasana na bakujela bendi, boshe baje bamukulahelele bakamukomoka, co yeni mwakulahelele bukaleho butwamyanene mukapwa bamo babo.

11 Ngeci simbu yoshe tukamilombelela ngwetu Njambi yetu amimone ngwendi munafwila kumisana, co mu nzili yendi alinge byuma byoshe byabibwa bije byashaka na kumilingisa mumanese bipangi byoshe bimukapanga mwafwa ya likulahelo lyeni. 12 Eci cinafu ngacije mangana Mwata wetu Yesu bamwane bumpau kwitila muli yeni, co neni lalo mu kulikwatasana nendi kwesekesa na ngozi yakama ya Njambi yetu na ya Mwata Yesu Kristu.