Samu
33 Tambekeni mu kubwahelela mwafwa ya Yehova, eni banu ba kusungama.
Banu ba kusungama banapande kumushangazala.
2 Kandeleleni Yehova na kalyalya.
Mwimbileni myaso ya kumushangazala, na cisanzi ca mikole 10.
3 Mwimbileni mwaso wauha.
Imbeni mu butongwe na mikole hamolika na myaso ya kubwahelela.
4 Mwafwa lijwi lya Yehova lyapwa lya kusungama,
Co byuma byoshe byakalingi byapwa bya busunga.
5 Wazema kusungama na kwakula mwamubwa.
Lifuti-libu lyoshe linashulu na cizemo ca Yehova cije kucesi kutenguluka.
6 Melu bawatangele na lijwi lya Yehova,
Co byoshe byakalamo babitangele na sipilitu* ya mu kanwa kendi.
7 Akakungulwila mema a mu kalunga-ndonga mu mashali
Na kukungulwila mema a cingungumuta* mu bishete.
8 Lifuti-libu lyoshe lizibile Yehova lyoba.
Baje batunga ha lifuti-libu bamuzibile lyoba.
9 Mwafwa wendekele, co byuma byoshe byakeleko.
Washikile, co byoshe byalingiwile.
10 Yehova nazeyesa matumbe* a baka-mafuti.
Natanganesa biyongola* bya miyati ya banu.
11 Byuma byanayongola* Yehova bikalako myaka yoshe.
Bisinganyeka bya mu mbunge yendi bikalako kutunda ku cisemwa cimo kuya ku cisemwa cikwabo.
12 Unabwahelela muyati uje Yehova napu Njambi yawo,
Banabwahelela banu baje banangula Njambi kupwa buswana bwendi.
13 Yehova akatala hasi oku ali mwilu,
Akamono bana ba banu boshe.
14 Akamono banu baje batunga hasi
Oku ali mu mwela wendi mwakala.
15 Ikeye akamungu bimbunge bya banu boshe.
Akelula bipangi byabo byoshe.
16 Kukwesi mwene oboka mwafwa ya kukala na maswalale babangi.
Munalume wa nzili koboka mwafwa ya nzili yendi yakama.
17 Kukulahela ngwobe kabalu akwobola* kunapu kulikwisa.
Nzili yendi kuyasa kulingisa munu oboke mu nzita.
18 Lisho lya Yehova linatala hali baje bakamuzibila lyoba,
Baje bali na kubandamena cizemo cendi cije kucesi kutenguluka,
19 Mangana abamene* ku kutsa
Na kubalingisa batwaleleleho kuyoya, mu simbu ya njala yakama.
20 Tunabandamena* Yehova.
Ikeye mukwasi wetu na ntelo yetu.
21 Njambi nalingisa bimbunge byetu bibwahelele
Mwafwa twakulahela lizina lyendi lya kujela.
22 Cizemo cobe cije kucesi kutenguluka cikale hali yetu, obe Yehova,
Oku tutwalelelaho kukubandamena.