Samu
Kuli muka-kutwamenena; mwaso wa kwimba na cilumo ca Sheminithi.* Mwaso wa Devidi.
12 Obe Yehova, njobole, mwafwa kukwesi munu wa kulongwa,
Banu ba kulongwa banahu.
2 Banu bali na kwendeka makuli kuli umo na mukwabo,
Bali na kulikwisa kushangazala bakwabo na tunwa twabo na kwendeka makuli mu bimbunge byabo.
3 Yehova abatula tunwa twa banu baje balikwisa kushangazala bakwabo
Na bindaka bya banu baje balishasha,
4 Baje bendeka ngwabo: “Tuhyana na bindaka byetu.
Tupangesa tunwa twetu mwoshe mutushakela.
Iyajo apwa shukulu yetu?”
5 Yehova ngwendi: “Njimana na kulingako bimo,
Mwafwa baka-kuyanda bali na kubalyatelela,
Tuhutu bali na kulinyenga,
Njibobola kuli baje bali na kubashendumuna.”
6 Majwi a Yehova apwa a kujela,
Anapu ngwe siuva ibanabwahesa mwamubwa mu lutengo, ibanajelesa bisimbu 7.
7 Ubanyungilila, obe Yehova,
Unyungilila umo na umo wabo kushwa ku cisemwa cino kutwala ku myaka yoshe.
8 Banu bababi bali na kulyendela mwoshe mubashakela,
Mwafwa bana ba banu bali na kukundwiya bilinga byabibi manene.