Jelemiya
37 Co Mwene Zedekiya muna Josiya washangumukile kuyula mu mwela wa Koniya* muna Jehoyakimu, mwafwa Mwene Nebukadineza* wa Babiloni wamupwisile mwene mu lifuti lya Juda. 2 Oloni ikeye na bangamba bendi na banu ba mu lifuti kubatolililile majwi a Yehova endekele kwitila muli kapolofweto Jelemiya.
3 Co Mwene Zedekiya watumine Jehukale muna Shelemiya na Zefaniya muna kapilistu Maseya kuli kapolofweto Jelemiya ngwendi: “Shukulu-kambu, tulombeleleko kuli Yehova Njambi yetu.” 4 Jelemiya wakele na kulyendela mu kuzituka mukati ka banu, mwafwa te kanda bacimwake mu kamenga. 5 BaKaudiya baje bazengelekele Jelusalema mubazibile ngwabo maswalale ba Falo bali na kwija kutunda ku Ijipiti, baKaudiya batundile ku Jelusalema. 6 Co Yehova walekele kapolofweto Jelemiya ngwendi: 7 “Yehova Njambi ya Isalele nendeka ngwendi, ‘Ebi bikebyo bimunapande kuleka mwene wa Juda uje namitumu ngwendi mwakwihule kuli yange. Yeni mukamuleke ngweni: “Maswalale ba Falo baje bali na kwija na kukukwasa banapande kwiluka ku lifuti lyabo ku Ijipiti. 8 Co baKaudiya bakeluka na kulwisa ei nganda na kuifungulula na kuyenyeka na tuhya.” 9 Yehova nendeka ngwendi, “Keti mulikwise ha kwendeka ngweni, ‘BaKaudiya banaililila,’ mwafwa bakeluka lalo. 10 Nameme ngwe mwasele kuhyana maswalale boshe ba baKaudiya baje bali na kumilwisa na kusezako lika baje banabulumuka, obo bene basalako ngwe anga bakatuka kutunda mu bitenti byabo na kwija na kwenyeka ei nganda.”’”
11 Maswalale ba baKaudiya mubatundile ku Jelusalema mwafwa ya maswalale ba Falo, 12 Jelemiya watundile ku Jelusalema na kuya ku lifuti lya Benjamini mangana akatambule mutamba wendi mukati ka banu bendi. 13 Oloni mwetele ku Cikolo ca Benjamini, mukulunu wa baka-kunyunga wa lizina lya Ilija muna Shelemiya, Shelemiya muna Hananiya, wakwatele kapolofweto Jelemiya na kumuleka ngwendi: “Uli na kutewela ku baKaudiya.” 14 Oloni Jelemiya wamukumbulwile ngwendi: “Embwe, keti mukemwo. Kunjesi na kutewela ku baKaudiya.” Oloni Ilija kamutolililile, ngeci wakutile Jelemiya na kumutwala ku bamyata. 15 Bamyata balubalelele Jelemiya, co bamupupile na kumukutila mu njibo ya Jehonatani muka-kusoneka, ije ibapwisile kamenga. 16 Jelemiya bamwakele mu kamenga ka mwisi ya libu, mu kamulili kamo kakandondo, co wakelemo matangwa amangi.
17 Co Mwene Zedekiya watumine banu ngwendi bakamushake, co mwene wamwihwilile ku bushweke mu njibo yendi, ngwendi: “Kuli bimo byanendeka Yehova ndi?” Jelemiya wamukumbulwile ngwendi, “Kubili.” Co watwaleleleleho kwendeka ngwendi, “Bakakwana mu maboko a mwene wa Babiloni.”
18 Jelemiya walekele lalo Mwene Zedekiya ngwendi: “Bika binjinakubiisila nebi binjinabiisila bangamba bobe, nebi binjinabiisila aba banu mangana munjake mu kamenga? 19 Bali kuli oni tupolofweto bobe baje bapolofwetele kuli yobe ngwabo, ‘Mwene wa Babiloni kaija na kukulwisa na kulwisa lino lifuti’? 20 Njikulomba unjitolilile obe shukulu yange, mwene yange. Njilomba unjitetele. Keti unjilwise lalo ku njibo ya Jehonatani muka-kusoneka, keti ngoconi njikatsilako.” 21 Ngeci Mwene Zedekiya washikile ngwendi Jelemiya bamwake mu kamenga mu Lilapa lya Baka-kunyunga, co bakele na kumwana likende lya mubundungulu ha litangwa na litangwa. Awa makende akele na kutunda mu tapalo ya baka-kwoca makende. Bakele na kumwana awa makende kweta noho hawahwililile oshe mu nganda. Co Jelemiya wakele muje mu Lilapa lya Baka-kunyunga.