Jelemiya
18 Yehova walekele Jelemiya ngwendi: 2 “Katuka uye ku njibo ya muka-kumunga byuma bya buma, co muuketa kuje, njikakuleka majwi ange.”
3 Ngeci njaile ku njibo ya muka-kumunga byuma bya buma, co njakamuwanene ali na kumungila byuma bya buma ha liwili lya kumungila. 4 Oloni ndeho yakele na kumunga yabihilile mu liboko lyendi. Ngeci wamungile cuma ceka cije camwene ngwendi cinapande.
5 Co Yehova wanjilekele ngwendi: 6 “‘Eni bakunjibo ya Isalele, kuma kunjasa kumilinga ngwe mwanalingi muka-kumunga byuma bya buma ndi?’ mukemwo mwanendeka Yehova. ‘Taleni! Ngecilika mwa buma buje buli mu liboko lya muka-kumunga byuma bya buma, neni mukemwo mumunapu mu liboko lyange, eni bakunjibo ya Isalele. 7 Nga njendeka bya kutukula na kusiula na kunyongesa muyati nambe bumwene, 8 co uje muyati wecela byuma byabibi binjinaubindika, co nange njitengulula biyongola byange bya kuwana kashitiko. 9 Oloni nga njendeka bya kutunga na kukuna muyati nambe bumwene, 10 oloni ulinga byuma byabibi mu mesho ange na kujeneka kwononoka lijwi lyange, co kunjilingi byuma byabibwa binjinayongwele kuulingila.’
11 “Njikulomba uleke banu ba Juda na banu bakala mu Jelusalema ngwobe, ‘Yehova nendeka ngwendi: “Njili na kuyongola kuminenela bukalu na kumyana kashitiko. Njimilomba museze bingila byeni byabibi na kutengulula bingila byeni na bilinga byeni.”’”
12 Oloni bakumbulwile ngwabo: “Ulisina ngoco. Mwafwa tulinga muje munai bisinganyeka byetu, co umo na umo wetu atindibala na kulinga muje munai mbunge yendi yaibi.”
13 Ngeci Yehova nendeka ngwendi:
“Njimilomba mulihwile yeni babenya mukati ka miyati.
Iya wazibaho laja cuma ca kufwa ngacije?
Mumbanda wa Isalele uje kanda alilaleho laja na munalume nalingi cuma ca kukomokesa manene.
14 Kuma mema a kukonda a ha minkinda ya ku Lebanoni asa kusangunuka ha mamanya ayo ndi?
Kuma mema ayo a kutonola aje akatundu kulako asa kuma ndi?
15 Oloni banu bange bananjibala.
Mwafwa bali na kwana milambu ku byuma byangoco.
Co bali na kulingisa banu batanuke mu bingila byabo, mu bingila bya kusañulu,
Mangana bende mu bingila byeka bya kujeneka kulambesa, bya mandunga-mandunga,
16 Mangana bapwise lifuti lyabo kupwa cuma ca kukomokesa
Na cuma cibakumbila banu milozi myaka yoshe.
Co woshe akaitako akacitala mu kukomoka na kupikisa mutwe wendi.
17 Njikabashandola kulutwe lwa bitozi babo ngwe lihunzi lya ku butuhukilo bwa litangwa.
Ha litangwa lya bukalu, njikabakengesa nima, co kunjikabamwesa cihanga cange.”
18 Co bendekele ngwabo: “Ijeni tutumbe butumbe bwa kulinga mwamubi Jelemiya, mwafwa lishiko litwalelelaho kutunda ku tupilistu betu, co cinangulo citwalelelaho kutunda kuli banalume ba mana, co lijwi litwalelelaho kutunda ku tupolofweto. Ijeni tumwendeke mwamubi, co keti tutolilile ku byuma byendeka.”
19 Njitolilile, obe Yehova,
Tolilila byuma bibali na kwendeka baje bali na kunjilwisa.
20 Kuma byuma byabibwa banapande kubifweta na byuma byabibi ndi?
Mwafwa bananjindila bwina mangana banjitsiye.
Anuka munjemanene kulutwe lwobe na kwendeka byuma byabibwa hali bakebo
Mangana butenu bwobe keti bubepukile.
21 Ngeci lingisa bana babo batse ku njala,
Balingise batse ku nzili ya mukwale.
Banakazi babo batsise bana babo, co lalo bapwe bifwile.
Banalume babo batse ku mushongo uje utsiya,
Bakwenje babo batse ku mukwale mu nzita.
22 Bakatetubuke mu binjibo byabo
Muukabanenela bikenya mu kukasumuna.
Bananjindila mbulu mangana njikuyukilemo, co banjikwate,
Co banatela mendi ange miheto.
23 Oloni yobe, obe Yehova,
Uzibuka mwamubwa matumbe abali nawo a kunjitsiya.
Keti ufwike milonga yabo,
Co keti uzimangane bubi bwabo ku mesho obe.
Balingise batanuke kulutwe lwobe
Muubana kashitiko mwafwa ya butenu bwobe.