EKIZODA

1 Co awa akewo mazina a bana ba Isalele ba banalume baje baile nendi* mu Ijipiti. Munu na munu waile na bakunjibo yendi: 2 Bapwile Rubeni, Simyoni, Levi na Juda. 3 Isakale, Zebuloni na Benjamini. 4 Dani na Nafutali, Gadi na Asha. 5 Co boshe basemukile kuli Jakobu bapwile 70, oloni Jozefu wakele laja mu Ijipiti. 6 Mu kwita kwa simbu, Jozefu watsile, co na bandolome bendi boshe batsile na ba mu cisemwa* cabo boshe batsile. 7 Co baIsalele bashangumukile kusemunwina na kushangumuka kutuma manene. Co batwaleleleleho kulibwezelela na kukala na nzili mu simbu yaindondo lika, co bashulile muje mu lifuti.

8 Mu kwita kwa simbu, kwakele mwene wamuha mu Ijipiti uje kazibukile Jozefu. 9 Co walekele banu bendi ngwendi: “Taleni! Banu ba Isalele banatumu manene, co lalo bali na nzili kututubakana. 10 Tunyanyameni nabo aba banu, keti ngoconi batwalelelaho kulibwezelela, co nga kukatuka nzita balikwatasana na bitozi betu na kutulwisa na kutunda muno mu lifuti.”

11 Co babangwilile bantwama baje batala bya kusindiya banu bipangi mangana babapangese bipangi byabikalu. Co baIsalele batungilile Falo binganda bya kutulikila byuma. Bamutungilile nganda ya Pithomu na Lamusesi. 12 Oloni mubakele na kubayandesela manene mukemwo mubakele na kutumina manene na kujalakana muje mu lifuti. Ngeci baka-Ijipiti bazibile manene lyoba mwafwa ya baIsalele. 13 Ngeci baka-Ijipiti bapwisile baIsalele bindungo, co babasindiiye kupanga bipangi byabikalu. 14 Bakaluwisile buyoye bwabo ha kubapangesa bipangi byabikalu. Bakele na kutika daka na kupanga mabrikisi na kupanga bipangi byoshe bya mu mahya. Cili bene babayandesele na kubapangesa bipangi byoshe bya bundungo.

15 Mu kwita kwa simbu, mwene wa Ijipiti wendekele na baka-kupapesa ba baHebelu, Shifula na Puwa. 16 Wabalekele ngwendi: “Nga mupapesa banakazi ba baHebelu, co mumona ngweni kunasemuka mwana wa munalume, munapande kumutsiya, oloni nga munakazi napande kuyoya.” 17 Oloni baje baka-kupapesa bazibilile Njambi wa busunga lyoba, co kubalingile byuma byabalekele mwene wa Ijipiti. Bakebo becelelele bana ba banalume bayoye. 18 Mu kwita kwa simbu, mwene wa Ijipiti wasanene baje baka-kupapesa na kubehula ngwendi: “Bika bimunecelela bana ba banalume bayoye?” 19 Baje baka-kupapesa bakumbulwile Falo ngwabo: “Banakazi ba baHebelu kubapwile ngwe baka-Ijipiti. Bakebo bapwa ba kukanyama, bakapapa simbu kanda muka-kupapesa aije na kubakwasa.”

20 Ngeci Njambi walingile mwamubwa baje baka-kupapesa, co banu batwaleleleleho kutuma na kukala manene na nzili. 21 Co mwafwa baje baka-kupapesa bazibilile Njambi wa busunga lyoba, mu kwita kwa simbu Njambi wabanene binaanga. 22 Mamaneselelo Falo washikile banu bendi boshe ngwendi: “Mwana woshe wa munalume uje asemuka ku kaHebelu munapande kumumbila mu Ndonga ya Nailo, oloni wa munakazi napande kuyoya.”

2 Ha simbu ije, munalume umo wa ku njibo ya Levi wambatele muna Levi. 2 Uje munakazi wakele na limo, co wakitile mwana wa munalume. Mwamwene ngwendi wapwile wamubwa, wamushwekele ha bingonde bitatu. 3 Mwamwene ngwendi kasele kutwalelelaho kumushweka, wambatele cizuma ca matebe na kucisata tala, co wakelemo uje mwana na kwaka cije cizuma mu mahongo aje akele ku ngenge ya Ndonga ya Nailo. 4 Oloni ndokazi ya uje mwana wemanenene halako mangana amone bilingiwa kuli uje mwana.

5 Muna Falo wa munakazi mwaile na kutana ku Ndonga ya Nailo, bindungo bendi ba banakazi bakele na kwenda kumukulo wa Ndonga ya Nailo. Co muna Falo wamwene cizuma mukati ka mahongo, co haje bene watumine ndungo yendi wa munakazi ngwendi akacambate. 6 Mwacifukwile, wamwene mwana, co uje mwana wa munalume wakele na kulila. Wamuzibilile mema ku mbunge, oloni wendekele ngwendi: “Ou mwana napu umo wa bana ba baHebelu.” 7 Co ndokazi yendi wehwile muna Falo wa munakazi ngwendi: “Ushaka ngwobe njikakusanene munakazi wa kaHebelu uje ali na kujamwesa mangana akukujamwesele ou mwana na kukulelelaye ndi?” 8 Muna Falo wamukumbulwile ngwendi: “Ya ukamusane.” Co haje bene uje mwanike wa munakazi waile na kusana ina ya uje mwana. 9 Co muna Falo walekele ina ya uje mwana ngwendi: “Ambata ou mwana ukanjijamweseleye na kunjilelelaye, co njikufweta.” Ngeci uje munakazi wambatele uje mwana na kukamulela. 10 Uje mwana mwakolele, ina wamutwalele kuli muna Falo, co wapwile munendi. Muna Falo wamulukile ngwendi Mosesa* na kwendeka ngwendi: “Njinamuluku eli lizina mwafwa njamujabwile mu mema.”

11 Co ha matangwa aje, Mosesa mwakolele waile kuli bandolome bendi mangana akamone bipangi byabikalu bibakele na kupanga, co wamwene muka-Ijipiti ali na kupupa kaHebelu uje wapwile umo wa bandolome bendi. 12 Ngeci watalele noku-noku, co mwamwene ngwendi wahi wakele hayehi, watsiile uje muka-Ijipiti na kumushitika mu libu.

13 Oloni lyamukwabo waile na kubamona lalo. Mwaketele kuje wakawanene banalume babali ba baHebelu bali na kulipupa. Co wehwile uje wabiisilile mukwabo ngwendi: “Bika biuli na kupupila mukweni?” 14 Uje munalume wakumbulwile ngwendi: “Iya nakwangula ngwendi upwe mwene na lyaako wetu? Kuma nange ushaka kunjitsiya ngwe muunatsiile uje muka-Ijipiti ndi?” Ngeci Mosesa wazibile lyoba, co wendekele ngwendi: “Kumani ei ñanda banaizibuka!”

15 Falo nendi wazibile ei ñanda, co washakele kutsiya Mosesa. Oloni Mosesa watewele kuli Falo, co waile na kukakala ku lifuti lya Midiani, co wakatumamene ku lisima. 16 Kapilistu wa ku Midiani wakele na bana ba banakazi ba kupwa 7, co aba bana baile na kutekula mema na kushulisa mangolengole mangana banwise bimuna ba ishabo. 17 Oloni tunyungi bezile na kubasheka ngwe mubakele na kulinga simbu yoshe. Ngeci Mosesa wakatukile na kukakwasa* baje banakazi na kutekwila bimuna babo mema. 18 Mubelukile kwimbo kuli ishabo Lewele,* wabehwile ngwendi: “Lelo bati muneluka bwasi ngacije?” 19 Bakumbulwile ngwabo: “Munalume umo wa ku Ijipiti ikeye natwamena ku tunyungi, co natutekwila mema na kutekwila mema bimuna betu.” 20 Wehwile bana bendi ngwendi: “Ali kuli? Bika bimunamusezela? Yeni mukamusane mangana akulye netu.” 21 Munima yebi, Mosesa watabele kukala na uje munalume, co uje munalume wanene munendi Zipola kuli Mosesa ngwendi amwambate. 22 Mu kwita kwa simbu, Zipola wakitile mwana wa munalume, co Mosesa wamulukile ngwendi Geshomu* mwafwa wendekele ngwendi: “Njinapu nji muka-kwija mu lifuti lya bungenzi.”

23 Mukwetile simbu yailaha, mwene wa Ijipiti watsile, oloni baIsalele batwaleleleleho kukemanga mwafwa ya kukala mu bundungo, co lalo bakele na kulila oku bayayabala. Co miteto yabo ya kulomba bukwasi mwafwa ya kukala mu bundungo yatwaleleleleho kuya kuli Njambi wa busunga. 24 Mu kwita kwa simbu, Njambi wazibile kukemanga kwabo, co wanukile cikumiiyo calikumiiye na Abrahamu, Isaki na Jakobu. 25 Ngeci Njambi watalele baIsalele, co wamwene tuyando twabo.

3 Mosesa wakapwile kanyungi wa bimuna ba ishemweno Jethiro uje wapwile kapilisitu wa baMidiani. Ha simbu yakele na kutwamenena bimuna ku bulahukilo bwa litangwa bwa mambo, wakwetele ku munkinda wa Njambi wa busunga ku Holebe. 2 Co kangelo ka Yehova wakusholokele kuli Mosesa mu milangi ya tuhya mukati ka ciputa ca mingonga. Mosesa mwakele na kutala, wamwene ngwendi cije ciputa ca mingonga cakele na kushukuma, oloni kucakele na kwenya. 3 Mosesa wendekele ngwendi: “Njiyako mangana njikamone bili na kulingisa cije ciputa ca mingonga cijeneke kwenya.” 4 Yehova mwamwene ngwendi Mosesa nashwene hayehi, Njambi wamusanene kutundilila mu ciputa ca mingonga ngwendi: “Mosesa! Mosesa!” Co Mosesa wakumbulwile ngwendi: “Yange uno mwane.” 5 Co wamulekele ngwendi: “Keti ushwene kuyehi. Shulula masanda obe, mwafwa ha mwela haunemana hanapu ha mwela wa kujela.”

6 Njambi watwaleleleleho kwendeka ngwendi: “Yange Njambi ya bakukulwila* bobe, Njambi ya Abrahamu, Njambi ya Isaki na Njambi ya Jakobu.” Co Mosesa walifwikile ku mesho mwafwa wazibile lyoba kutala Njambi wa busunga. 7 Yehova wendekele lalo ngwendi: “Njinamono tuyando twa banu bange baje bali mu Ijipiti, co njinazibi miteto yabo mwafwa ya baje bali na kubasindiya kupanga. Njizibuka mwamubwa kubabala kubali na kuziba. 8 Njiyako mangana njikabobole mu maboko a baka-Ijipiti na kubatundisa muje mu lifuti mangana njibanene mu lifuti lyalibwa, mu lifuti muje mwalisala mabele na buki, mu citingitingi ca baKanana, baHethi, baAmoli, baPerizite, baHivite na baJebusi. 9 Tala! Miteto ya banu ba Isalele inete kuli yange, co njinamono lalo mubali na kubayandesela manene kuli baka-Ijipiti. 10 Ija njikutume kuli Falo, co ukatundisa banu bange baIsalele mu lifuti lya Ijipiti.”

11 Oloni Mosesa wakumbulwile Njambi wa busunga ngwendi: “Yange iyajo mangana njiye kuli Falo na kutundisa baIsalele mu Ijipiti?” 12 Co Njambi wendekele ngwendi: “Njikala nobe, co eci cikeco cizibukiso cikamwesa ngwaco yange njinakutumu. Muukapatula banu bange mu lifuti lya Ijipiti, mukaija na kupangela* Njambi wa busunga hano bene ha munkinda.”

13 Oloni Mosesa wehwile Njambi wa busunga ngwendi: “Nga njiya kuli baIsalele na kukabaleka ngwange, ‘Njambi ya bakukulwila beni ikeye nanjitumu kuli yeni,’ co bakanjihula ngwabo, ‘Ikeye iya lizina lyendi?’ Njikabaleke bati?” 14 Co Njambi walekele Mosesa ngwendi: “Njikapwa Binjangula* Kupwa.”* Co wendekele lalo ngwendi: “Unapande kukaleka baIsalele ngwobe, ‘Njikapwa nanjitumu kuli yeni.’” 15 Njambi walekele lalo Mosesa ngwendi:

“Unapande kukaleka baIsalele ngwobe, ‘Yehova Njambi ya bakukulwila beni, Njambi ya Abrahamu, Njambi ya Isaki na Njambi ya Jakobu nanjitumu kuli yeni.’ Eli likelyo lizina lyange myaka yoshe, co omu mukemwo mumunapande kunjanukila kutunda ku cisemwa cimo kuya ku cisemwa cikwabo. 16 Ngeci ya ukakungulule bakulunu ba Isalele na kubaleka ngwobe, ‘Yehova, Njambi ya bakukulwila beni nasholokele kuli yange, Njambi ya Abrahamu, Isaki na Jakobu, co nanjilekele ngwendi: “Njinamimono, co lalo njinamono nomu mubali na kumilingila mu Ijipiti. 17 Ngeci njimileka ngwange njikamitundisa mu tuyando tubali na kumimwesa baka-Ijipiti na kumitwala ku lifuti lya baKanana, baHethi, baAmoli, baPerizite, baHivite na baJebusi, mu lifuti muje mwalisala mabele na buki.”’

18 “Cili bene bakatolilila ku lijwi lyobe, co yobe na bakulunu ba Isalele mukaya kuli mwene wa Ijipiti, co munapande kukamuleka ngweni: ‘Yehova, Njambi ya baHebelu nendeka netu. Ngeci tutabese tuye bungenzi bwa matangwa atatu mu mambo mangana tukane milambu kuli Yehova Njambi yetu.’ 19 Oloni njizibuka mwamubwa ngwange mwene wa Ijipiti kakamitabesa kuya kubanga liboko lya nzili limusindiye kulinga ngoco. 20 Ngeci kubanga njolole liboko lyange na kupupa Ijipiti na bikomokeso byange byoshe bya kulitila binjikalinga muje mu lifuti, co munima asina akamitabesa ngwendi muye. 21 Co njikalingisa baka-Ijipiti batetele banu bange, co mumukaya, kumukai maboko-boko embwe. 22 Munakazi woshe napande kulomba byuma bya siuva na bya goldi na bizalo kuli munu yatunga nendi na kuli munakazi uje naija na kukala mu njibo yendi, co mukabizike bana beni ba banalume na ba banakazi. Mukaya na bufuko bwa baka-Ijipiti.”

4 Oloni Mosesa wakumbulwile ngwendi: “Batico nga kubakanjitaba na kunjitolilila? Mwafwa bakendeka ngwabo, ‘Yehova kasholokele kuli yobe.’” 2 Ngeci Yehova wehwile Mosesa ngwendi: “Bika biunakwata mu liboko lyobe?” Mosesa wakumbulwile ngwendi: “Mulamu.” 3 Co wamulekele ngwendi: “Umbile hasi.” Ngeci waumbilile hasi, co watengulukile kupwa linyoka, co Mosesa watewele uje linyoka. 4 Co Yehova walekele Mosesa ngwendi: “Olola liboko lyobe umukwate ku mukila.” Co wolwele liboko lyendi wamukwatele, co uje linyoka watengulukile kupwa mulamu mu liboko lyendi. 5 Njambi wendekele lalo ngwendi: “Obu bukebwo bukaleho mangana batabe ngwabo Yehova Njambi ya bakukulwila babo, Njambi ya Abrahamu, Njambi ya Isaki na Njambi ya Jakobu nasholoka kuli yobe.”

6 Yehova wamulekele lalo ngwendi: “Njikulomba ukobelese liboko lyobe mu cikobelo cobe.” Co wakobelesele liboko lyendi mu cikobelo cendi. Mwalitundisilemo, liboko lyendi lyakele na mbumba ngwe mbundu. 7 Co wamulekele ngwendi: “Kobelesa lalo liboko lyobe mu cikobelo cobe. Co wakobelesele lalo liboko lyendi mu cikobelo cendi. Mwalitundisilemo lyakele mwamubwa ngwe mubila wendi woshe. 8 Co Njambi wamulekele ngwendi: “Nga kubakakutaba nambe kwaka mbunge ku cizibukiso cakulibanga, co bakaka mbunge ku cizibukiso camucibali. 9 Oloni nga kubakataba ebi bizibukiso bibali, na kubyana kutolilila ku lijwi lyobe, co ukatekule mema mu Ndonga ya Nailo na kuwetila ha nunda. Co aje mema aukatekula mu Ndonga ya Nailo akatenguluka kupwa maninga haje ha nunda.”

10 Co Mosesa walekele Yehova ngwendi: “Njikonekeleko Yehova. Yange keti nji muka-kwendeka wa mutongwe kushwa bene kunima na ha simbu ino bene iunendeka na ngamba yobe, mwafwa kunjizibuka kwendeka mwamubwa,* co lalo njikalikoko kwendeka.” 11 Yehova wamukumbulwile ngwendi: “Iya watangele kanwa ka munu? Co iya asa kumupwisa kabebebe, kasinda-matwi, muka-kumona mwamubwa nambe kapuputwa? Kuma keti yange Yehova ndi? 12 Ngeci katuka uye, njikakala nobe muukendeka, co njikakulongesa biunapande kwendeka.” 13 Oloni wakumbulwile ngwendi: “Njikonekeleko Yehova, shukulu kambu tumako weka, woshe iushaka kutuma.” 14 Ngeci Yehova walubalelele Mosesa na kumuleka ngwendi: “Batico ndolome yobe Aloni wa kaLevi? Njizibuka ngwange ikeye asa kwendeka mwamubwa. Co hano ali mu ngila ali na kwija kuli yobe. Ngeci mwakumona, mbunge yendi ibwahelela. 15 Ngeci unapande kusimutwiya nendi na kumuleka byakwendeka, co njikakala hamolika nobe na ikeye mumukendeka, co njikamilongesa bimunapande kulinga. 16 Ikeye akakwendekelako ku banu, co akapwa muka-kukwendekelako, yobeco ukapwa ngwe Njambi kuli ikeye.* 17 Co ukambata ou mulamu mu liboko lyobe na kulinga nawo bizibukiso.”

18 Co Mosesa welukile kuli ishemweno Jethiro na kukamuleka ngwendi: “Njishaka kuya ku Ijipiti, njiluke ku bandolome bange bali mu Ijipiti mangana njikamone mubanendukila.” Jethiro wakumbulwile Mosesa ngwendi: “Ya mu kwoloka.” 19 Mosesa mwacikele ku Midiani, Yehova wamulekele ngwendi: “Katuka, iluka ku Ijipiti mwafwa boshe baje bashakele kukutsiya banatsi.”

20 Co Mosesa wambatele munakazi wendi na bana bendi ba banalume na kubalondeka ha donki,* co washangumukile bungenzi bwendi bwa kwiluka ku lifuti lya Ijipiti. Co lalo wambatele mulamu wa Njambi wa busunga mu liboko lyendi. 21 Co Yehova walekele Mosesa ngwendi: “Muukeluka ku Ijipiti unapande kukalinga bikomokeso byoshe kuli Falo binjinakwana nzili ngwange ubilinge. Oloni njikatabesa Falo akaluwise mbunge yendi, co kakatabesa banu ngwendi baye. 22 Unapande kukaleka Falo ngwobe, ‘Yehova nendeka ngwendi: “Isalele wapwa munange, munange wa ntwatwa. 23 Njikuleka ngwange, ecela munange aye mangana akanjipangele. Oloni nga ubyana kumwecela, co njikatsiya munobe wa munalume, munobe wa ntwatwa.”’”

24 Mwakele mu ngila, wahwiminineko hamo, co Yehova waliwanene nendi, co washakele kumutsiya.* 25 Co Zipola wambatele limanya lya kubambuka na kubatula cikoba ca ku bunalume bwa munendi na kwasha cije cikoba ku mendi endi* na kwendeka ngwendi: “Unapu u munalume wange kwitila muli awa maninga.” 26 Ngeci wamwecelele aye. Co ha simbu ije Zipola wendekele ngwendi, “unapu u munalume wange kwitila muli awa maninga,” mwafwa ya mukanda.

27 Co Yehova walekele Aloni ngwendi: “Ya mu mambo ukaliwane na Mosesa.” Ngeci waile, co wakaliwanene nendi ku munkinda wa Njambi wa busunga, co wamumenekele na kumutsemba. 28 Co Mosesa walekele Aloni majwi oshe a Yehova uje wamutumine na bizibukiso byoshe bije byamushikile ngwendi alinge. 29 Munima yebi, Mosesa na Aloni baile, co bakakungulwile bakulunu ba baIsalele boshe. 30 Aloni wabalekele majwi oshe endekele Yehova kuli Mosesa, co walingile bizibukiso ku mesho a baje banu. 31 Ngeci banu batabele. Co mubazibile ngwabo Yehova nanuka baIsalele, co lalo namono tuyando twabo, batsikamene na kukulamena hasi.

5 Munima yebi, Mosesa na Aloni baile kuli Falo na kumuleka ngwabo: “Yehova Njambi ya Isalele nendeka ngwendi, ‘Tabesa banu bange baye mangana bakanjilingile cilika mu mambo.’” 2 Oloni Falo wakumbulwile ngwendi: “Yehova ikeye iya mangana njononoke lijwi lyendi na kutabesa baIsalele baye? Kunjimuzibuka Yehova, co lalo na kubatabesa bene kunjibatabesa ngwange baye.” 3 Oloni bamukumbulwile ngwabo: “Njambi ya baHebelu nasimutwiya netu. Shukulu kambu, tushaka kuya bungenzi bwa matangwa atatu mu mambo mangana tukane mulambu kuli Yehova Njambi yetu, keti ngoconi atupupa na mushongo nambe na mukwale.” 4 Mwene wa Ijipiti wabalekele ngwendi: “Obe Mosesa na Aloni, bika bimuli na kutangwila banu ha bipangi byabo? Ilukeni ku bipangi byeni.” 5 Co Falo wendekele lalo ngwendi: “Taleni aba banu mubanatumu muno mu lifuti. OIoni yeni mushaka mubatangule ha bipangi byabo.”

6 Co ha litangwa lije, Falo washikile bantwama na tupitau babo ngwendi: 7 “Eceleni kwana banu mwila wa kupangesa mabrikisi. Beceleni bakalitondele mwila bakebo babenya. 8 Oloni anga banapande kupanga namba ya mabrikisi ibakele na kupanga ha kulibanga. Keti mubatepulwileko mwafwa bali na bulwa. Mukemwo bali na kutatoka ngwabo, ‘Tushaka kuya, tushaka kuya na kwana mulambu kuli Njambi yetu.’ 9 Bapangeseni manene na kubazezamesa mangana keti batolilile ku makuli.”

10 Co bantwama na tupitau babo, baile na kuleka banu ngwabo: “Falo nendeka ngwendi, ‘Kunjimyana lalo mwila. 11 Yeni mukalyambatele yeni babenya mwila kwoshe-kwoshe kumukauwana. Oloni ku cipangi cenini kututepululako nambe kamandondo.’” 12 Co banu bashandokelele mu lifuti lyoshe lya Ijipiti na kuya na kutonda bishati mangana babitenge ngwe mwila. 13 Co baje bantwama balekele banu ngwabo: “Munu na munu napande kumanesa cipangi cendi ca ha litangwa na litangwa ngwe mumwakele na kulingila ha simbu ibakele na kuminenela mwila.” 14 Co bantwama ba Falo bapupile tupitau ba baIsalele baje babangwile ngwabo batwamenene bakwabo baIsalele. Babehwile ngwabo: “Mwafwa bika izau na lelo kumwetele ha namba ya mabrikisi imukapanga?”

15 Baje tupitau ba baIsalele baile kuli Falo na kukayayabala. Bamwihwile ngwabo: “Bika biuli na kulingila bangamba bobe ngacije? 16 Bangamba bobe kuwabanene mwila, oloni bali na kutuleka ngwabo, ‘Pangeni mabrikisi!’ Bangamba bobe bali na kubapupa okuni banu bobe bakebo bali na mulonga.” 17 Oloni wabakumbulwile ngwendi: “Muli na bulwa, muli na bulwa! Mukemwo muli na kwendeka ngweni, ‘Tushaka kuya, tushaka kuya na kwana mulambu kuli Yehova.’ 18 Ngeci ilukeni ha bipangi. Wahi amyana mwila, oloni munapande kupanga namba ya mabrikisi ngwe ije imwakele na kupanga ha kulibanga.”

19 Ngeci tupitau ba baIsalele bamwene ngwabo bakele mu bukalu bwakama mwafwa ya lishiko lya kwendeka ngwalyo: “Kumwapandele kutepulula nambe kamandondo ku namba ya mabrikisi imupanga ha litangwa na litangwa.” 20 Munima yebi, tupitau baliwanene na Mosesa na Aloni baje bemanene kuje mu kubandamena ngwabo baliwane na baje tupitau mubatunda kuli Falo. 21 Co haje bene tupitau balekele Mosesa na Aloni ngwabo: “Yehova amimone na kumisompa mwafwa munalingisa Falo na bangamba bendi batuzinde,* co lalo munaka mukwale mu liboko lyabo mangana batutsiye.” 22 Co Mosesa watengulukilile kuli Yehova na kumuleka ngwendi: “Yehova bika biunayandesela aba banu? Bikoni biunanjitumina kuno? 23 Kutunda lika hanjaililile kuli Falo na kukendeka mu lizina lyobe, nayandesa manene aba banu, co lalo yobe kuwobwele banu bobe.”

6 Yehova walekele Mosesa ngwendi: “Hano ukamona binjikalinga kuli Falo. Liboko lyange lya nzili likamusindiya mangana ecele banu bange, co lalo liboko lyange lya nzili likamusindiya mangana asheke banu bange mu lifuti lyendi.”

2 Co Njambi walekele Mosesa ngwendi: “Yange Yehova. 3 Njakele na kulisholola kuli Abrahamu, Isaki na Jakobu ngwange yange Njambi Muka-nzili Yoshe. Oloni kutalesa ku lizina lyange lya Yehova, kunjabajombolwelelyo mu kushula. 4 Co lalo njalingile nabo cikumiiyo ngwange njikabana lifuti lya Kanana, lifuti lije mubayoyele ngwe baka-kwija. 5 Njinazibi kukemanga kwa banu ba Isalele baje babanapwisa bindungo kuli baka-Ijipiti, co njinanuka cikumiiyo cange.

6 “Ngeci, ya ukaleke baIsalele ngwobe: ‘Yange Yehova, co njikamitundisa ku bipangi byabikalu bibali na kumyana baka-Ijipiti na kumipatula mu bundungo. Njikamitundisamo na liboko lyange lya nzili na kwana baka-Ijipiti kashitiko kakama. 7 Mukapwa banu bange, yangeco njikapwa Njambi yeni, co mukazibuka mwamubwa ngweni yange Yehova Njambi yeni uje ali na kumitundisa ku bipangi byabikalu bya baka-Ijipiti. 8 Njikamitwala mu lifuti lije linjalisingile* ngwange njilyana Abrahamu na Isaki na Jakobu, co njikamyanalyo kupwa buswana bweni. Yange Yehova.’”

9 Mu kwita kwa simbu, Mosesa wakulekele baIsalele ou muzimbu, oloni kubatolilile ku byuma byabalekele Mosesa mwafwa bazeyele, co lalo mwafwa bamwene kailaila mu bundungo.

10 Co Yehova walekele Mosesa ngwendi: 11 “Ya kuli Falo, mwene wa Ijipiti, ukamuleke ngwobe napande kutabesa baIsalele batunde mu lifuti lyendi.” 12 Oloni Mosesa wakumbulwile Yehova ngwendi: “Tala! Nga baIsalele kubanjitolililile, kuma Falo akanjitolilila yange kunjizibuka kwendeka mwamubwa ndi?” 13 Oloni Yehova walekele lalo Mosesa na Aloni mashiko abapandele kukaleka baIsalele na mashiko abapandele kukaleka Falo, mwene wa Ijipiti, mangana apatule baIsalele mu lifuti lya Ijipiti.

14 Awa akewo mazina a mitwe ya binaanga: Ku muyati wa Rubeni bapwile Hanoki, Palu, Hezroni na Kami. Aba bakebo bapwile bana ba Rubeni ba banalume, ntwatwa ya Isalele.

15 Bana ba Simyoni ba banalume bapwile: “Jemuele, Jamini, Ohadi, Jakini, Zoha na Shaulu uje yakitile na munakazi wa kaKanana. Aba bakebo bapwile bana ba Simyoni ba banalume.

16 Awa akewo mazina a bana ba Levi ba banalume kwesekesa na bikota bya binaanga byabo. Bapwile Geshoni, Kohathi na Melali. Myaka yayoyele Levi yapwile 137.

17 Bana ba Geshoni ba banalume kwesekesa na bikota bya binaanga byabo bapwile Libunai na Shimei.

18 Bana ba Kohathi ba banalume bapwile Amuramu, Iza, Hebroni na Uziele. Myaka yayoyele Kohathi yapwile 133.

19 Bana ba Melali ba banalume bapwile Mali na Mushi.

Ebi bikebyo byapwile binaanga bya Balevi kwesekesa na bikota bya binaanga byabo.

20 Co Amuramu wambatele Jokebedi ndokazi ya ishe kupwa munakazi wendi, co Jokebedi wamukitilile Aloni na Mosesa. Myaka yayoyele Amuramu yapwile 137.

21 Bana ba Iza ba banalume bapwile Kola, Nefegi na Zikilai.

22 Bana ba Uziele ba banalume bapwile Mishaele, Elizafani na Sitilai.

23 Co Aloni wambatele Elisheba muna Aminadabu ndokazi ya Nashoni kupwa munakazi wendi. Elisheba wamukitilile Nadabu, Abihu, Eliaza na Ithama.

24 Bana ba Kola ba banalume bapwile Asi, Elikana na Abiasafu. Aba bakebo bapwile mitwe ya binaanga bya baKola.

25 Eliaza muna Aloni wambatele umo wa bana ba Putiele kupwa munakazi wendi. Co wamukitilile Finihasi.

Aba bakebo mitwe ya binaanga bya Levi kuli baka-ishe kwesekesa na bikota byabo.

26 Ou ikeye Aloni na Mosesa baje balekele Yehova ngwendi: “Yeni mukatundise bana ba Isalele mu lifuti lya Ijipiti mu byendo.” 27 Aba bakebo balekele Falo, mwene wa Ijipiti, ngwabo atundise banu ba Isalele mu lifuti lya Ijipiti. Mosesa na Aloni bakebo balingile ngoco.

28 Ha litangwa lije Yehova mwendekele na Mosesa mu lifuti lya Ijipiti, 29 Yehova walekele Mosesa ngwendi: “Yange Yehova. Ya ukaleke Falo, mwene wa Ijipiti byuma byoshe binjikuleka.” 30 Co Mosesa wendekele ku mesho a Yehova ngwendi: “Yange kunjizibuka kwendeka mwamubwa, co Falo asa kukanjitolilila bati?”

7 Co Yehova walekele Mosesa ngwendi: “Tala, njinakupwisa ngwe Njambi* kuli Falo, co ndolome yobe Aloni akapwa ngwe kapolofweto kobe. 2 Unapande kukendeka byuma byoshe binjikuleka kuli Falo, co ndolome yobe Aloni akendeka na Falo, co Falo akatabesa baIsalele batunde mu lifuti lyendi. 3 Oloni yange njikecelela Falo akaluwise mbunge yendi, co njikalinga bizibukiso byange byabingi na bikomokeso byabingi mu lifuti lya Ijipiti. 4 Oloni Falo kakamitolilila, co njikapangesa liboko lyange mu kulwisa lifuti lya Ijipiti na kutundisa mbunga yange, banu bange baIsalele, mu lifuti lya Ijipiti na kwana kashitiko kakama kuli baka-Ijipiti. 5 Co baka-Ijipiti bakazibuka ngwabo yange Yehova munjikapangesa liboko lyange mu kulwisa lifuti lya Ijipiti na kutundisa banu bange baIsalele mukati kabo.” 6 Co Mosesa na Aloni balingile byuma byabashikile Yehova, balingile ngoco bene. 7 Mosesa wakele na myaka 80, co Aloni wakele na myaka 83 mubakendekele na Falo.

8 Yehova walekele Mosesa na Aloni ngwendi: 9 “Nga Falo akamileka ngwendi, ‘lingeni cikomokeso,’ co ukaleke Aloni ngwobe, ‘Ambata mulamu wobe na kuumbila kulutwe lwa Falo.’ Co uje mulamu ukatenguluka kupwa linyoka wakama.” 10 Co Mosesa na Aloni baile kuli Falo, co bakalingile muje bene mwabashikile Yehova. Aloni wombilile mulamu wendi hasi kulutwe lwa Falo na bangamba bendi, co uje mulamu watengulukile kupwa linyoka wakama. 11 Oloni Falo wasanene baka-mana na baka-kupanda na tupilistu ba manseno ba mu Ijipiti, co nabo balingile eci cuma na manseno abo. 12 Umo na umo wabo wombilile mulamu wendi hasi, co ije milamu yatengulukile kupwa manyoka bakama, oloni mulamu wa Aloni walehwile ije milamu yabo. 13 Nameme ngoco, Falo wakaluwisile mbunge yendi, co kabatolililile ngecilika mwendekele Yehova.

14 Co Yehova walekele Mosesa ngwendi: “Mbunge ya Falo inabyana kwononoka, nabyana kutabesa banu ngwendi baye. 15 Co imene mutondo uye kuli Falo. Akaya ku ndonga, co unapande kukamubandamena ku ngenge ya Ndonga ya Nailo na kukemana ha nunda, co unapande kwambata mulamu wobe mu liboko uje watengulukile kupwa linyoka. 16 Ya ukamuleke ngwobe, ‘Yehova Njambi ya baHebelu nanjitumu kuli yobe, co nendeka ngwendi: “Tabesa banu bange baye mangana bakanjipangele mu mambo.” Nabangele kukuleka, oloni yobe kuwononokele. 17 Yehova nendeka ngwendi: “Ukazibuka ngwobe yange Yehova ha cuma cinjilinga. Njipupa mema ali mu Ndonga ya Nailo na mulamu uli mu liboko lyange, co atenguluka kupwa maninga. 18 Co bisi ba mu Ndonga ya Nailo bakatsa, co ei ndonga ikanika, co baka-Ijipiti kubakasa kunwa mema a mu Ndonga ya Nailo.”’”

19 Co Yehova walekele Mosesa ngwendi: “Leka Aloni ngwobe, ‘Ambata mulamu wobe, co olwela liboko lyobe ha mema a mu Ijipiti aje ali mu bindonga, mu tupila,* mu mashali na mwoshe muje muli mema mangana atenguluke kupwa maninga, co mu lifuti lyoshe lya Ijipiti mukakala maninga, na mu bikwata bya kutulikila mema bya biti nebi bya mamanya.” 20 Co haje bene Mosesa na Aloni balingile byabashikile Yehova. Aloni wajundwile mulamu na kuupupa ha mema a mu Ndonga ya Nailo oku Falo na bangamba bendi bali na kumona. Co mema oshe a mu ndonga atengulukile kupwa maninga. 21 Bisi bakele muje mu ndonga batsile, co ije ndonga yashangumukile kunika. Baka-Ijipiti kubasele kunwa mema a mu Ndonga ya Nailo. Mu lifuti lyoshe lya Ijipiti mwakele maninga.

22 Oloni tupilistu ba manseno ba mu Ijipiti nabo balingile eci cuma na manseno abo. Ngeci Falo watwaleleleleho kukaluwisa mbunge yendi, co katolililile kuli Mosesa na Aloni ngwe mwendekele Yehova. 23 Co Falo welukile ku njibo yendi, oloni kombile lalo mbunge na ku cuma eci calingiwile. 24 Ngeci baka-Ijipiti boshe bakele na kwinda masima kumukulo wa Ndonga yoshe ya Nailo mangana bawane mema a kunwa mwafwa kubasele kunwa mema a mu Ndonga ya Nailo. 25 Co kwetile matangwa 7 kutunda hatengulwilile Yehova mema a mu Ndonga ya Nailo kupwa maninga.

8 Co Yehova walekele Mosesa ngwendi: “Ya kuli Falo ukamuleke ngwobe, ‘Yehova nendeka ngwendi: “Tabesa banu bange baye na kunjipangela. 2 Nga utwalelelaho kubindika banu bange baye, co njikwana kashitiko ha kukutumina mambotwe mu lifuti lyobe lyoshe. 3 Co mu Ndonga ya Nailo mukashula mambotwe, co bakaija na kukobela mu njibo yobe, na mu mulili wobe wa kulala, na ha mwela wobe, na mu binjibo bya bangamba bobe, na ku banu bobe, na muje muukocela makende, na muje muukatikila fulawa. 4 Mambotwe bakaija hali yobe na ha banu bobe na ha bangamba bobe boshe.”’”

5 Mu kwita kwa simbu, Yehova walekele Mosesa ngwendi: “Leka Aloni ngwobe, ‘Ambata mulamu wobe wolwele liboko lyobe ha bindonga na ha tupila tuje tutunda ha Ndonga ya Nailo na ha mashali mangana mambotwe bakanduke mu lifuti lya Ijipiti.” 6 Ngeci Aloni wolwelele liboko lyendi ha mema a mu Ijipiti, co mambotwe bashangumukile kukanduka na kujalakana mu lifuti lya Ijipiti. 7 Oloni tupilistu ba manseno nabo balingile eci cuma na manseno abo. Nabo balingisile mambotwe bakanduke mu lifuti lya Ijipiti. 8 Co Falo wasanene Mosesa na Aloni na kubaleka ngwendi: “Lambeleleni Yehova mangana atundise aba mambotwe kuli yange na ku banu bange mwafwa njishaka kutabesa banu beni baye na kwana milambu kuli Yehova.” 9 Co Mosesa walekele Falo ngwendi: “Njikulomba unjileke litangwa liushaka ngwobe njilambelele Njambi mangana atundise aba mambotwe kuli yobe na ku bangamba bobe na ku banu bobe na mu binjibo byobe. Bakasala lika mu Ndonga ya Nailo.” 10 Ngeci Falo wakumbulwile ngwendi: “Imene.” Co Mosesa wendekele ngwendi: “Kufwa ngoco bene, ngwe ku lijwi lyobe mangana uzibuke ngwobe kukwesi weka wa kufwa ngwe Yehova Njambi yetu. 11 Mambotwe bakatunda kuli yobe na mu binjibo byobe na ku bangamba bobe na ku banu bobe, co bakasala lika mu Ndonga ya Nailo.”

12 Ngeci Mosesa na Aloni batundile kuli Falo, co Mosesa walambelelele Yehova atundise mambotwe banenele hali Falo. 13 Co Yehova walingile byamulombele Mosesa, ngeci baje mambotwe bashangumukile kutsa mu binjibo na mu malapa na mu mahya. 14 Co bakele na kubalundika mitumbo-mitumbo, co muje mu lifuti mwashangumukile kunika. 15 Falo mwamwene ngwendi baje mambotwe banatsi, wakaluwisile mbunge yendi, co katolililile Mosesa na Aloni ngwe mwendekele Yehova.

16 Co Yehova walekele Mosesa ngwendi: “Leka Aloni ngwobe, ‘Ambata mulamu wobe uupupe hasi mangana likungu lya hasi litenguluke kupwa tungeningeni mu lifuti lyoshe lya Ijipiti.’” 17 Co balingile ngoco bene. Aloni wolwele liboko lyendi lije lyakwatele mulamu na kuupupa hasi, co tungeningeni bezile ku banu na ku bimuna. Likungu lyoshe lya muje mu lifuti lyatengulukile kupwa tungeningeni mu lifuti lyoshe lya Ijipiti. 18 Tupilistu ba manseno nabo besekele kulinga cuma ca kulifwa. Besekele kunena tungeningeni na manseno abo, oloni bonowele kulinga ngoco. Co baje tungeningeni bakele na kushuma banu na bimuna. 19 Co baje tupilistu ba manseno balekele Falo ngwabo: “Ei inapu nzili ya Njambi!”* Oloni Falo watwaleleleleho kukaluwisa mbunge yendi, co katolililile Mosesa na Aloni ngecilika mwendekelele Yehova.

20 Co Yehova walekele Mosesa ngwendi: “Imene winduke mutondo ukabandamene Falo simbu kanda aye ku ndonga, co unapande kukamuleka ngwobe, ‘Yehova nendeka ngwendi: “Tabesa banu bange baye na kunjipangela. 21 Oloni nga kuutabesa banu bange ngwobe baye, co njikakutumina mazimbe,* njikabatuma na kuli bangamba bobe na ku banu bobe na mu binjibo byobe. Mu binjibo bya baka-Ijipiti mukashula aba mazimbe, co bakashula na hasi hoshe. 22 Co cili bene ha litangwa lije njikanyungilila lifuti lya Gosheni muje mubali banu bange. Kumukakala mazimbe, co ha cuma eci mukazibuka ngweni yange Yehova njili muje mu lifuti. 23 Co njikamwesa kuliseza kuli mukati ka banu bange na banu bobe. Eci cizibukiso cisholoka imene.”’”

24 Co Yehova walingile ngoco bene. Ngeci njame ya mazimbe yashangumukile kukobela mu njibo ya Falo na mu binjibo bya bangamba bendi na mu lifuti lyoshe lya Ijipiti. Baje mazimbe babiisile lifuti. 25 Ngeci Falo wasanene Mosesa na Aloni na kubaleka ngwendi: “Yeni mukane Njambi yeni mulambu, oloni lingileni muno mu lifuti.” 26 Oloni Mosesa wamukumbulwile ngwendi: “Kukwapandele kulinga ngoco mwafwa mulambu utwana kuli Yehova Njambi yetu wapwa wa bunyengwe kuli baka-Ijipiti. Co nga twana mulambu uje uzibisa baka-Ijipiti bunyengwe oku bali na kutumona, ngwetu co batwasha mamanya. 27 Tukuta bungenzi bwa matangwa atatu bwa kuya mu mambo, co tukana Njambi yetu Yehova mulambu ngwe mwanatushiki.”

28 Co Falo wendekele ngwendi: “Njimitabesa muye mu mambo mangana mukane Njambi yeni Yehova mulambu. Oloni keti muye kulako. Njilambeleleniko kuli Njambi yeni.” 29 Co Mosesa wendekele ngwendi: “Hano njili na kuya, co njikalambelela Yehova, co aba mazimbe bakatunda kuli Falo na ku bangamba bendi na ku banu bendi imene. Oloni Falo kapandele kutwesesa ha kubindika banu ngwendi keti baye na kwana mulambu kuli Yehova.” 30 Ngeci Mosesa watundile kuli Falo, co wakalambelelele Yehova. 31 Ngeci Yehova walingile kwesekesa na lijwi lya Mosesa, co baje mazimbe batundile kuli Falo na ku bangamba bendi na ku banu bendi. Naumo wahi wasaleleko. 32 Oloni Falo wakaluwisile lalo mbunge yendi, co katabesele banu ngwendi baye.

9 Yehova walekele Mosesa ngwendi: “Ya kuli Falo ukamuleke ngwobe, ‘Yehova Njambi ya baHebelu nendeka ngwendi: “Tabesa banu bange baye mangana bakanjipangele. 2 Oloni nga utwalelelaho kubakakateya na kubyana kubatabesa ngwobe baye, 3 co liboko lya Yehova likana kashitiko bimuna bobe. Kukaija kashitiko kakama ha tubalu, ha bidonki,* ha tumele na ha bingombe na ha bimanga. 4 Co cili bene Yehova akamwesa kuliseza kuli mukati ka bimuna ba baIsalele na bimuna ba baka-Ijipiti, co ku bimuna ba baIsalele naumo wahi akatsa.”’” 5 Co lalo Yehova wangwile simbu, wendekele ngwendi: “Imene yange Yehova njilinga eci cuma mu lifuti.”

6 Co lije bene litangwa lyateleko, Yehova walingile eci cuma, co miyati yoshe ya bimuna ba baka-Ijipiti yashangumukile kutsa. Oloni ku bimuna ba baIsalele naumo wahi watsile. 7 Falo mwehwile bya bimuna ba baIsalele, bamulekele ngwabo naumo wahi ku bimuna ba baIsalele natsi. Nameme ngoco, mbunge ya Falo anga kuyononokele, co katabesele banu ngwendi baye.

8 Co Yehova walekele Mosesa na Aloni ngwendi: “Jomoneni maboko a kushula a lito lya mu lutengo, co Mosesa akashe lije lito mu lihunzi kulutwe lwa Falo. 9 Co lije lito likatenguluka kupwa likungu mu lifuti lyoshe lya Ijipiti, co lalo likatenguluka kupwa bimbandu bya masina ha banu na ha bimuna mu lifuti lyoshe lya Ijipiti.”

10 Co bambatele lito mu lutengo na kwimana halutwe lwa Falo, co Mosesa washele lije lito mu lihunzi, co lyapwile bimbandu bya masina ha banu na ha bimuna. 11 Co baje tupilistu ba manseno kubasele kwimana kulutwe lwa Mosesa mwafwa ya bimbandu bya masina, mwafwa bije bimbandu byakele na ku tupilistu ba manseno na kuli baka-Ijipiti boshe. 12 Oloni Yehova wecelelele Falo akaluwise mbunge yendi, co Falo kabatolililile ngwe Yehova mwalekele Mosesa.

13 Yehova walekele Mosesa ngwendi: “Imene mutondo ya ukemane kulutwe lwa Falo, co ukamuleke ngwobe, ‘Yehova Njambi ya baHebelu nendeka ngwendi: “Tabesa banu bange baye mangana bakanjipangele. 14 Njikanena tushitiko hali yobe na ha bangamba bobe na ha banu bobe mangana uzibuke ngwobe kukwesi weka lalo wa kulifwa nange ha lifuti-libu hoshe. 15 Simbu ino ngwe njinolola laja liboko lyange na kukwana kashitiko kakama na banu bobe, co ngwe unanyongo laja ha lifuti-libu. 16 Oloni njinakwecelela ngwange uyoye mangana njikumwese nzili yange na kulingisa lizina lyange balyambulule ha lifuti-libu hoshe. 17 Kuma ucili na kulijundula na kubindika banu bange ngwobe keti baye ndi? 18 Imene njikanyokesa nyonzi yakama ya mamanya ha simbu ino bene. Nyonzi ije kanda icinyokeho laja mu lifuti lya Ijipiti. 19 Ngeci, tuma miluwa ku bangamba bobe mangana bakanene bimuna bobe boshe na byuma byobe byoshe bili mu shwata mangana byakubande nyonzi. Banu boshe na bimuna baje baikawanena nyonzi mu shwata, baje kubezile na kubanda bakatsa omwo nyonzi ya mamanya ikabanyoka.”’”

20 Ngeci bangamba ba Falo baje bazibilile lijwi lya Yehova lyoba banenele bwasi bangamba babo na bimuna babo mangana babande nyonzi. 21 Oloni woshe uje wombwanesele lijwi lya Yehova wasezele bangamba bendi na bimuna bendi mu shwata.

22 Yehova walekele Mosesa ngwendi: “Olwela liboko lyobe mwilu mangana nyonzi ya mamanya inyoke mu lifuti lyoshe lya Ijipiti mangana inyoke banu na bimuna na bimena byoshe mu lifuti lya Ijipiti. 23 Ngeci Mosesa wenikile mulamu wendi mwilu, co Yehova watumine mihyato na nyonzi ya mamanya, co tuhya* twawililile ha lifuti-libu, co Yehova watwaleleleleho kunyokesa nyonzi ya mamanya mu lifuti lya Ijipiti. 24 Kwakele nyonzi ya mamanya, co lalo kwakele na mihyato yakele na kuhyatula. Yapwile yakama manene. Ije nyonzi kanda icikaleko mu lifuti lya Ijipiti kutunda lika halyapwililile lifuti. 25 Co ije nyonzi ya mamanya yatsiile byuma byoshe byakele mu shwata mu lifuti lyoshe lya Ijipiti, kushangumukila ku munu kutwala na ku bimuna, co yabiisile na bimena byoshe na kubiisa miti yoshe. 26 Kubanga mu lifuti lya Gosheni lika muje mubakele baIsalele mukemwo kumwanyokele nyonzi ya mamanya.

27 Co Falo watumine banu bakasane Mosesa na Aloni, co wakubalekele ngwendi: “Hano njinabiisa. Yehova wapwa wa kusungama, co yange na banu bange tunabiisa. 28 Lambeleleni Yehova emike ei mihyato na nyonzi ya mamanya, co njitabesa banu beni baye. Co kumukalamo lalo muno mu lifuti. 29 Co Mosesa wamulekele ngwendi: “Munjitunda lika muno mu nganda, njolwela maboko ange kuli Yehova. Co mihyato imana na nyonzi ya mamanya ilikela kunyoka, mangana uzibuke ngwobe lifuti-libu lyapwa lya Yehova. 30 Oloni njizibuka ngwange yobe na bangamba bobe nameme munamono ebi byuma, anga kumuzibila Yehova Njambi lyoba.”

31 Co fulakisi* na mbali byoshe byabihile mwafwa mbali yakele muyehi na kuhya, co fulakisi yakele na matindi. 32 Oloni tiliku na sipeuti* kubyabihile mwafwa byakele na kuhya munima. 33 Co Mosesa watundile mu nganda kuli Falo, co wolwelele maboko endi kuli Yehova, co mihyato na nyonzi ya mamanya byemanene, co nyonzi yalikelele kunyoka ha lifuti-libu. 34 Falo mwamwene ngwendi ije nyonzi ya mamanya na mihyato binemana, walingile lalo bubi, co ikeye na bangamba bendi bakaluwisile bimbunge byabo. 35 Co Falo watwaleleleleho kukaluwisa mbunge yendi, co katabesele baIsalele ngwendi baye ngecilika mwendekele Yehova kwitila muli Mosesa.

10 Co Yehova walekele Mosesa ngwendi: “Ya kuli Falo mwafwa njinecelela mbunge yendi na bimbunge bya bangamba bendi bijeneke kwononoka mangana njimumwese ebi bikomokeso byange, 2 co lalo mangana mukaleke bana beni na batekulyeni ngweni njanene baka-Ijipiti kashitiko kakama na kulinga bizibukiso mukati kabo, co mukazibuka ngweni yange Yehova.”

3 Co Mosesa na Aloni baile kuli Falo bakamulekele ngwabo: “Yehova Njambi ya baHebelu nendeka ngwendi, ‘Simbu ya kupwa hali iubyana kulyaka kwisi yange? Tabesa banu bange baye mangana bakanjipangele. 4 Nga utwalelelaho kubindika banu bange ngwobe keti baye, co imene njikutumina bimbimba mu lifuti lyobe. 5 Co bakashula hasi hoshe, co kumukasa kumona libu. Bakalya bije binoboka ku nyonzi ya mamanya bije binasaleleko. Co bakalya miti yobe yoshe ili na kumena mu shwata. 6 Bakashula mu binjibo byobe na mu binjibo bya bangamba bobe boshe na mu binjibo bya baka-Ijipiti boshe. Bakapwa babangi manene, na baisho bene na bakuku yobe kanda bacibamoneho laja muno mu lifuti.’” Ngeci watengulukile na kutunda kuli Falo.

7 Co bangamba ba Falo bamulekele ngwabo: “Ou munalume atwalelelaho kwaka kuyoya kwetu mu bushonde simbu ya kupwa hali? Tabesa aba banu baye mangana bakapangele Yehova Njambi yabo. Kuma na simbu ino kuwanangukile ngwobe lifuti lya Ijipiti linabihya ndi?” 8 Ngeci Mosesa na Aloni babelwisile lalo kuli Falo, co wabalekele ngwendi: “Yeni mukapangele Yehova Njambi yeni. Oloni beya baya?” 9 Co Mosesa wakumbulwile ngwendi: “Tuya na bakwenje na bambanda betu, na tukulukazi betu, na bana betu ba banalume, na bana betu ba banakazi, na bimanga betu, na bingombe betu, mwafwa tuya na kulingila Yehova cilika.” 10 Wabalekele ngwendi: “Nga yange bene ou njimitabesa ngwange muye na bana beni, co cili bene Yehova ali neni. Njinamono ngwange munayongola kulinga cuma cacibi. 11 Noku kumuya bene kwahi! Banalume lika mukati keni bakebo baya na kupangela Yehova mwafwa bikebyo bimunalombele.” Ngeci babatundisile ku mesho a Falo.

12 Co Yehova walekele Mosesa ngwendi: “Olwela liboko lyobe ha lifuti lya Ijipiti mangana usane bimbimba baije mu lifuti lya Ijipiti, co bakulye bimena byoshe bya mu lifuti, byoshe bije binasalele ku nyonzi ya mamanya.” 13 Co haje bene Mosesa wenikile mulamu wendi ha lifuti lya Ijipiti, co Yehova walingisile lihunzi lya ku butuhukilo bwa litangwa lihuwile mu lifuti lya Ijipiti uje mutanya woshe na butsiki bwoshe. Co ku mutondo, lihunzi lya ku butuhukilo bwa litangwa lyanenele bimbimba. 14 Co bimbimba bezile, co bakukele mu lifuti lyoshe lya Ijipiti. Bapwile babangi manene. Kanda kukaleho laja bimbimba babangi ngwe baje. Co kukukakala lalo bimbimba babangi ngwe baje. 15 Bashulile muje mu lifuti mwoshe, co lije lifuti lyazibalele na bimbimba. Balile bimena byoshe bya mu lifuti na bushuka bwoshe bwa ku miti buje bwasalele ku nyonzi ya mamanya. Kukwesi liputa lya bushompo lyasalele ku muti nambe ku cimena ca mu shwata mu lifuti lyoshe lya Ijipiti.

16 Ngeci bwasi-bwasi Falo wasanene Mosesa na Aloni na kubaleka ngwendi: “Njinalingi bubi kuli Yehova Njambi yeni na kuli yeni. 17 Co hano njimilomba ngwange munjikonekeleko bubi bwange olu lwa mamaneselelo, co mulambelele Yehova Njambi yeni mangana atundise aka kashitiko kakabi kuli yange.” 18 Ngeci watundile* kuli Falo, co waile na kulambelela Yehova. 19 Co Yehova walingisile lije lihunzi litenguluke. Co lyashangumukile kuhuwa kutunda ku bulahukilo bwa litangwa, co lyapekumwine baje bimbimba na kukabombila mu Kalunga-ndonga wa Kubenga. Co kukwasalele nambe mbimba umo mu lifuti lya Ijipiti mwoshe. 20 Oloni Yehova wecelelele Falo akaluwise mbunge yendi, co katabesele baIsalele ngwendi baye.

21 Co Yehova walekele Mosesa ngwendi: “Olwela liboko lyobe mwilu mangana mu lifuti lya Ijipiti mukale lisusulungu lya kuzibala manene-nene.” 22 Co haje bene Mosesa wolwelele liboko lyendi mwilu, co mu lifuti lyoshe lya Ijipiti mwakele lisusulungu lya kuzibala ha matangwa atatu. 23 Kubalimwene umo na mukwabo, co ha matangwa atatu na umo wahi watundile hakele. Oloni kuje kubakele baIsalele kwakele ceke. 24 Co Falo walekele Mosesa ngwendi: “Yeni mukapangele Yehova. Bimanga na bingombe beni lika bakebo basala. Mwasa kuya na bana beni.” 25 Oloni Mosesa wendekele ngwendi: “Yobe bene utwana* na milambu na bwana bwa kwenyeka, co tukabyana kuli Yehova Njambi yetu. 26 Bimuna betu nabo tuya nabo. Kukwesi cimuna asala kuno mwafwa tukapangesako bamo mu kulemesa Yehova Njambi yetu, co kutuzibuka bitunapande kukana mu kulemesa Yehova kubanga mutuketa kuje.” 27 Ngeci Yehova wecelelele Falo akaluwise mbunge yendi, co kabatabesele ngwendi baye. 28 Falo wamulekele ngwendi: “Tunda ku mesho ange! Keti wakweseke lalo kwa kusholoka kuli yange mwafwa litangwa liwakusholoka kuli yange, co kwobe ngu.” 29 Ngeci Mosesa wamukumbulwile ngwendi: “Kunjikasholoka lalo kuli yobe ngwe muunendeka.”

11 Yehova walekele Mosesa ngwendi: “Kucinasala kashitiko kamo kanjinapande kunena kuli Falo na ha lifuti lya Ijipiti. Kutundaho, akamitabesa ngwendi muye. Oloni mwakamitabesa ngwendi muye akalinga kumisheka. 2 Leka banu ngwobe banalume na banakazi boshe banapande kulomba byuma bya siuva na bya goldi ku banu babatunga nabo.” 3 Co Yehova walingisile baka-Ijipiti batetele baIsalele. Co lalo bangamba ba Falo na baka-Ijipiti basingimikile manene Mosesa mu lifuti lya Ijipiti.

4 Co Mosesa walekele Falo ngwendi: “Yehova nendeka ngwendi, ‘Hakati ka butsiki njikaita mukati ka baka-Ijipiti. 5 Co mwana wa ntwatwa woshe ali mu Ijipiti akatsa, kushangumukila kuli ntwatwa ya Falo uje natumama ha litanda kutwala na kuli ndungo wa munakazi uje ali na kulola bunga ha limanya kweta na kuli bana ba bimuna boshe bakulibanga. 6 Co mu lifuti lyoshe lya Ijipiti mukakala mbimbi ije kanda icikaleko, co kuikakalako nawa. 7 Co kukwesi nambe katali akabwoza baIsalele nambe bimuna babo mangana muzibuke ngweni Yehova asa kumwesa kuliseza kuli mukati ka baka-Ijipiti na baIsalele.’ 8 Co bangamba bobe boshe bakaija kuli yange na kunjitsikamena, co bakendeka ngwabo, ‘Yakaye na banu bobe boshe baje bali na kukukabangeya.’ Munima yebi njikaya.” Ngeci Mosesa watundile kuli Falo oku nalubala.

9 Co Yehova walekele Mosesa ngwendi: “Falo kakamitolilila mangana bikomokeso byange bitume mu lifuti lya Ijipiti.” 10 Co Mosesa na Aloni balingile ebi bikomokeso byoshe ku mesho a Falo, oloni Yehova wecelelele Falo akaluwise mbunge yendi. Ngeci katabesele baIsalele ngwendi batunde mu lifuti lyendi.

12 Co Yehova walekele Mosesa na Aloni mubakele mu lifuti lya Ijipiti ngwendi: 2 “Ino ngonde ikeyo ipwa mashangumukilo a bingonde kuli yeni. Co ikeyo ipwa ngonde ya kulibanga ku bingonde bya mu mwaka kuli yeni. 3 Leka mbunga yoshe ya baIsalele ngwobe, ‘Ha litangwa lya bu 10 mu ngonde ino, naanga na naanga inapande kwambata manga umo kwesekesa na naanga ya ishabo. Co ku njibo na njibo banapande kwambata manga umo. 4 Oloni nga kumwasa kumanesa manga mwafwa ya bundondo bwa naanga, co munapande kulipangela owo manga na bakweni bamunalyata nabo kwesekesa na namba ya banu. Mumulitepela owo manga munapande kumona mutamba wa manga wanasa kulya munu na munu. 5 Munapande kwangula manga wamubwa wa nkomba uje ali na mwaka umo. Munasa kwangula ku bana ba bimanga ba nkomba nambe ku bana ba bimembe. 6 Munapande kumunyunga kweta na ha litangwa lya bu 14 lya ino ngonde, co naanga na naanga ya baIsalele inapande kutsiya muna manga munima ya kulahuka kwa litangwa simbu kanda kuzibale. 7 Co munapande kwambata maninga amo na kuwashamwina ku bibuliko* bibali bya ku bikolo na ha bipamba* bya ku bikolo bya binjibo mumukalila aba bimuna.

8 “‘Munapande kulya oyo situ obwo bene butsiki, co munapande kuyoca ha tuhya na kuilya na likende lya kujeneka musima na bisapasapa bya kulula. 9 Keti mukailye bubishu nambe kuiteleka, oloni mukalinge ya kwoca ha tuhya na mutwe wayo na mendi ayo na bya mwimo byayo. 10 Kumwapandele kutulika ei situ kweta mutondo, co yoshe isalako kweta mutondo munapande kuyenyeka. 11 Co ei situ munapande kuilya oku munakutu miba mu bimbunda byeni na kuzala masanda ku mendi eni na kukwata milamu mu maboko eni, co munapande kuilya mu bwasi-bwasi. Inapu Paseka ya Yehova. 12 Mwafwa buje bene butsiki njikaita mu lifuti lya Ijipiti na kutsiya bantwatwa boshe ba muje mu lifuti, kushangumukila ku munu kutwala ku cimuna, co njikasompa na binjambi boshe ba Ijipiti, yange Yehova. 13 Aje maninga akapwa cimweso mu binjibo mumukakala. Munjikaita njikawamona na kumitubakana, co kaje kashitiko kukakaija hali yeni na kuminyongesa munjikana kashitiko lifuti lya Ijipiti.

14 “‘Eli litangwa lipwa canukiso kuli yeni, co munapande kulingila Yehova cilika ha litangwa eli bene mu bisemwa byeni byoshe. Munapande kulinga-linga eci cilika. Eli linapu lishiko lya myaka na myaka. 15 Munapande kulya makende a kujeneka musima ha matangwa 7. Ha litangwa lyakulibanga munapande kutundisa fulawa ya kutika ije ili na musima mu binjibo byeni mwafwa woshe alya cuma cili na musima kushangumuka ha litangwa lyakulibanga kweta ha litangwa lya bu 7, ou munu banapande kumutsiya mu Isalele. 16 Munapande kulinga ciwano ca kujela ha litangwa lyakulibanga na ha litangwa lya bu 7. Kumwapandele kupanga bipangi aha ha matangwa kubanga kubwahesa lika byakulya bimulya.

17 Munapande kulinga-linga Cilika ca Makende a Kujeneka Musima mwafwa litangwa eli bene likelyo linjikatundisa mbunga yeni mu lifuti lya Ijipiti. Co munapande kunyunga eli litangwa mu bisemwa byeni byoshe. Eli linapu lishiko lya myaka na myaka. 18 Mu ngonde ya kulibanga, ha litangwa lya bu 14 muje mu ngonde ku mangwezi, munapande kulya makende a kujeneka musima kweta na ha litangwa lya bu 21 muje mu ngonde ku mangwezi. 19 Kumwapandele kutulika fulawa ya kutika ije ili na musima mu binjibo byeni ha matangwa 7, mwafwa woshe akalya cuma cili na musima, ipwe muka-kwija nambe munu wa muje mu lifuti, ou munu banapande kumutsiya na kumutundisa ha mbunga ya baIsalele. 20 Kumwapandele kulya cuma coshe-coshe cili na musima. Munapande kulya makende a kujeneka musima mu binjibo byeni byoshe.’”

21 Co bwasi-bwasi Mosesa wasanene bakulunu ba Isalele. Wabalekele ngwendi: “Yeni mukangwile naanga na naanga muna cimuna,* co munapande kutsiya ou cimuna mangana mumupangese ku cilika ca Paseka. 22 Co munapande kumbwitika mukuta wa hisopu* mu maninga ali mu lilonga na kuwashamwina ha cipamba* ca cikolo na ha bibuliko* bya cikolo, co naumo wahi napande kutunda mu njibo yendi kweta mutondo. 23 Co Yehova mwakaita mu lifuti na kwana kashitiko baka-Ijipiti akamona aje maninga ali ha bipamba bya bikolo byeni na ha bibuliko bibali bya bikolo byeni, co Yehova akatubakana ha bikolo byeni. Kakatabesa kashitiko ka kutsa kakobele mu binjibo byeni.

24 Munapande kulinga-linga eci cilika. Eli linapu lishiko kuli yeni na kuli bana beni. 25 Co mumuketa mu lifuti lyakamyana Yehova ngwe mwanendeka, munapande kukalinga-linga eci cilika. 26 Co nga bana beni bakamihula ngwabo, ‘Bika bitukalingila eci cilika?’ 27 Munapande kubaleka ngweni, ‘Cinapu mulambu wa Paseka wa kwana kuli Yehova uje watubakanene ha binjibo bya baIsalele mu Ijipiti ha simbu yanene kashitiko kuli baka-Ijipiti, oloni wasezele banu bakele mu binjibo byetu.’”

Co banu batsikamene na kukulamena hasi. 28 Ngeci baIsalele baile, co bakalingile byoshe byashikile Yehova kuli Mosesa na Aloni. Balingile ngoco bene.

29 Co hakati ka butsiki Yehova watsiile bantwatwa boshe ba mu lifuti lya Ijipiti, kushangumukila kuli ntwatwa ya Falo uje watumanene ha litanda kutwala kuli funge uje wakele mu kamenga kuketa na ku bana ba bimuna boshe bakulibanga. 30 Falo wendukile buje butsiki na bangamba bendi boshe na baka-Ijipiti boshe, co kwakele mbimbi kuli baka-Ijipiti mwafwa ku njibo na njibo kwatsile munu. 31 Co buje bene butsiki, Falo wasanene Mosesa na Aloni na kubaleka ngwendi: “Katukeni, tundeni mukati ka banu bange na bakweni baIsalele. Yeni mukapangele Yehova ngwe mumunendekele. 32 Ambateni bimanga beni na bingombe beni muye ngwe mumunendekele. Oloni munapande kunjibezikisa.”

33 Co baka-Ijipiti balambelelele banu ba Isalele ngwabo batunde bwasi muje mu lifuti lya Ijipiti. Bakele na kwendeka ngwabo: “Tubaboshe tunapu lika ngwe tunatsi laja!” 34 Co banu bambatele fulawa yabo ya kutika ya kujeneka musima na malonga abo a kutikila fulawa, co babibungilile mu binanga byabo na kubyambatela ha bitsili. 35 Co baIsalele balingile byabalekele Mosesa, co balombele baka-Ijipiti byuma bya siuva na bya goldi na bizalo. 36 Yehova walingisile baka-Ijipiti batetele baIsalele. Ngeci babanene byuma bibalombele, co baIsalele baile na bufuko bwa baka-Ijipiti.

37 Co baIsalele bakatukile, batundile ku Lamusesi baile ku Sukothi. Banalume baje bakele na kwenda ha mendi betele ku 600,000 kutundisako banike. 38 Co mbunga ya banu ba kuliseza-seza* nabo baile nabo kwambateselela na bimanga na bingombe na bimuna babangi. 39 Bocele mikasha ibambatele kutunda ku Ijipiti. Bayocele kupwa makende a mubundungulu a kujeneka musima. Kuyakele na musima mwafwa babashekele bwasi mu Ijipiti, co kubasele nambe kubwahesako byakulya bya kulila mu ngila.

40 Myaka ibakele baIsalele mu Ijipiti yapwile 430. 41 Ku mamaneselelo a myaka 430 ha litangwa lije bene, mbunga ya Yehova yoshe yatundile mu lifuti lya Ijipiti. 42 Obu butsiki bukebwo bubakalingila Yehova cilika ca kubatundisa mu lifuti lya Ijipiti. Ha butsiki obu, banu boshe ba Isalele banapande kulinga-linga cilika kuli Yehova mu bisemwa byabo byoshe.

43 Co Yehova walekele Mosesa na Aloni ngwendi: “Lishiko lya Paseka eli: Wahi muka-kwija napande kulya Paseka. 44 Oloni nga kuli umo ali na ndungo yendi wa munalume uje yalandele na bimbongo, co napande kumutwala ku mukanda asina asa kulya Paseka. 45 Muka-kwija na muka-bipangi ibanakumuna kasa kulya Paseka. 46 Baje bali mu njibo imolika banapande kuilila hamo. Kumwapandele kutuhula ei situ hanja, co lalo kumwapandele kupokola bitsiya byou cimuna. 47 Mbunga yoshe ya Isalele inapande kulinga Paseka. 48 Nga muka-kwija akala neni, co ashaka kulingila Yehova Paseka, co munalume woshe wakunjibo yendi napande kuya ku mukanda. Nga nalingi ngoco, co asa kulinga Paseka, co lalo apwa umo wa babenya lifuti. Oloni munalume woshe kaile ku mukanda kapandele kulya Paseka. 49 Eli lishiko lipanga kuli babenya lifuti na kuli muka-kwija uje ali mukati keni.”

50 Ngeci baIsalele boshe balingile byashikile Yehova kuli Mosesa na Aloni. Balingile ngoco bene. 51 Ha litangwa lije bene, Yehova watundisile baIsalele na mbunga yabo mu lifuti lya Ijipiti.

13 Yehova walekele lalo Mosesa ngwendi: 2 “Njijeleseleni* mwana woshe wa munalume wa baIsalele. Ntwatwa woshe wa munalume napu wange, ipwe munu nambe kasitu wa kulibanga.”

3 Co Mosesa walekele banu ngwendi: “Anukeni eli litangwa limunatundu mu Ijipiti mu njibo ya bundungo mwafwa Yehova namitundisamo na liboko lya nzili. Ngeci kumwapandele kulya cuma cili na musima. 4 Litangwa lya lelo muno mu ngonde ya Abibu* likelyo limukatuka. 5 Yehova mwakamitwala mu lifuti lya baKanana, baHethi, baAmoli, baHivite na baJebusi, lije lyalisingile kuli bakukulwila beni ngwendi akamyanalyo, muje mwalisala mabele na buki, munapande kutwalelelaho kulinga eci cilika omu mu ngonde. 6 Munapande kulya makende a kujeneka musima ha matangwa 7, co ha litangwa lya bu 7 mukalingila Yehova cilika. 7 Munapande kulya makende a kujeneka musima ha matangwa 7, co kumwapandele kutulika cuma cili na musima, co lalo kumwapandele kutulika fulawa ya kutika ije ili na musima mu citingitingi ceni coshe. 8 Co ha litangwa olyo, munu na munu napande kuleka munendi ngwendi, ‘Njili na kulinga eci cilika mwafwa ya byuma byanjilingilile Yehova munjatundile mu Ijipiti. 9 Co eci cikapwa cizibukiso ha maboko eni na canukiso ha maholo eni mangana lishiko lya Yehova likakale mu tunwa tweni mwafwa Yehova wamitundisile mu Ijipiti na liboko lyendi lya nzili. 10 Munapande kunyunga eli lishiko mwaka na mwaka ha simbu ibanangula.

11 “Yehova mwakamitwala mu lifuti lya baKanana lije lyalisingile kumyana na bakukulwila beni, 12 munapande kukana Yehova ntwatwa woshe wa munalume hamolika na bana ba bimuna boshe bakulibanga ba nkomba ku bimuna bamukakala nabo. Bantwatwa ba banalume bapwa ba Yehova. 13 Munapande kupatula donki* woshe wa kulibanga ha kumwingisa na manga. Nga kumumupatula, co munapande kumupokola singo, co bana beni boshe ba banalume ba bantwatwa munapande kubapatula.

14 “Co nga kulutwe na matangwa bana beni bakamihula ngwabo, ‘Bika bitukalingila eci cuma?’ Munapande kubaleka ngweni, ‘Mwafwa Yehova watutundisile mu Ijipiti mu njibo ya bundungo na liboko lyendi lya nzili. 15 Falo mwatindibalele na kubyana kututabesa ngwendi tuye, Yehova watsiile bantwatwa boshe ba mu lifuti lya Ijipiti, kushangumukila ku bantwatwa ba banu kutwala na bana ba bimuna bakulibanga. Mukemwo tuli na kwana bantwatwa boshe ba banalume kuli Yehova na kupatula bana betu boshe ba banalume ba bantwatwa. 16 Eci cinapande kupwa ngwe cizibukiso ha maboko eni, co lalo cinapande kupwa ngwe nanga ya kukuta ha maholo eni mwafwa Yehova watutundisile mu Ijipiti na liboko lyendi lya nzili.”

17 Co Falo mwatabesele banu ngwendi baye, Njambi kabetisile ngila ije ita mu lifuti lya baFilistiya nameme yapwile ya mubatu, mwafwa Njambi wendekele ngwendi: “Hamo aba banu basa kutengulula bisinganyeka byabo na kwiluka ku Ijipiti nga babalwisa.” 18 Ngeci Njambi walingisile baje banu baite ngila ya kulizenga ya mu mambo ije ita ku Kalunga-ndonga wa Kubenga. BaIsalele batundile mu lifuti lya Ijipiti mu byendo ngwe maswalale baje baya ku nzita. 19 Mosesa wambatele lalo na bitsiya bya Jozefu mwafwa Jozefu walingisile bana ba Isalele balisinge, ngwendi: “Njambi mwakamikwasa na kumitundisa muno mu lifuti, mukambate bitsiya byange na kuya nabyo.” 20 Batundile ku Sukothi, co bakashimbikile cilombo ku Ethamu kuyehi na mambo.

21 Co ku mutanya, Yehova wakele na kwenda kulutwe lwabo kwitila mu lishelwa* mangana abatwamenene mu ngila. Co ku butsiki wakele na kubatwamenena na tuhya* mangana bakale mu ceke. Ngeci basele kwenda butsiki na mutanya. 22 Lije lishelwa kulyakele na kutunda kulutwe lwa baje banu mutanya, co lalo tuje tuhya kutwakele na kutunda kulutwe lwabo butsiki.

14 Co Yehova walekele Mosesa ngwendi: 2 “Leka baIsalele ngwobe beluke bakashimbike cilombo cabo kulutwe lwa Pihahilothi mukati ka Migido na kalunga-ndonga haje habamona Bale-zefoni. Munapande kushimbika cilombo ceni kutalesa ku kalunga-ndonga. 3 Co Falo akendeka hali baIsalele ngwendi, ‘Banazimbala. Bali na kuyebangela mu lifuti. Banonwa kwa kutuhukila mu mambo.’ 4 Njikecelela Falo akaluwise mbunge yendi, co akabakaba, co njikalyana bumpau munjikanyongesa Falo na maswalale bendi boshe, co cili bene baka-Ijipiti boshe bakazibuka ngwabo yange Yehova.” Ngeci baIsalele balingile bene ngoco.

5 Mu kwita kwa simbu, mwene wa Ijipiti bamulekele ngwabo baje banu banatewe. Co haje bene Falo na bangamba bendi batengulwile bimbunge byabo, co bendekele ngwabo: “Bika bitunalingilamo? Bika bitunapatwila bindungo betu baIsalele?” 6 Ngeci wabwahesele matemba endi a nzita, co waile na banu bendi. 7 Waile na matemba amabwa a kupwa 600 na matemba akwabo oshe a mu Ijipiti, co mu litemba na litemba mwakele baka-kulwa. 8 Ngeci Yehova wecelelele Falo mwene wa Ijipiti akaluwise mbunge yendi, co wakabele baIsalele. Oloni baIsalele bakele na kwenda mu kusimpa. 9 Baka-Ijipiti babakabele na tubalu ba Falo boshe na matemba endi oshe na banu bendi baka-kulonda tubalu na maswalale bendi, co bakele na kushwena hayehi na baIsalele baje bashimbikile cilombo cabo ku kalunga-ndonga ku Pihahilothi kulutwe lwa Bale-zefoni.

10 Falo mwakele na kushwena hayehi, baIsalele batalele, co bamwene baka-Ijipiti bali na kubakaba, co baIsalele bazibile lyoba na kushangumuka kulilila Yehova. 11 BaIsalele balekele Mosesa ngwabo: “Kuma mu Ijipiti kumwesi bihilo mangana wakututsiile muno mu mambo ndi? Bika biunatulingilamo? Bika biunatutundisila mu Ijipiti? 12 Kuma ebi keti bikebyo bitwakulekele mutwakele mu Ijipiti ngwetu, ‘Twecele tupangele baka-Ijipiti ndi’? Mwafwa cili kulutwe kupangela baka-Ijipiti kutubakana kutsila mu mambo.” 13 Co Mosesa walekele banu ngwendi: “Keti muzibe lyoba. Imaneni mbe mumone mwamyobwela Yehova lelo. Mwafwa aba baka-Ijipiti bamuli na kumona lelo kumukabamonoho lalo. 14 Yehova amilwila, co yeni mwoloka lika kulu.”

15 Co Yehova walekele Mosesa ngwendi: “Bika biuli na kunjitatokela? Leka baIsalele batwaleleleho na bungenzi bwabo. 16 Oloni yobe ambata mulamu wobe wolwele liboko lyobe ha kalunga-ndonga na kumutepa, mangana baIsalele baite hakati ka kalunga-ndonga ha libu lya kuma. 17 Co yange njecelela baka-Ijipiti bakaluwise bimbunge byabo na kubakaba. Co njikana lizina lyange bumpau ha kunyongesa Falo na maswalale bendi boshe, na matemba endi a nzita na banu bendi baka-kulonda tubalu. 18 Co cili bene baka-Ijipiti bakazibuka ngwabo yange Yehova munjikalyana bumpau omwo njikanyongesa Falo na matemba endi na banu bendi baka-kulonda tubalu.”

19 Co kangelo ka Njambi wa busunga uje wakele na kwenda kulutwe lwa mbunga ya Isalele waile kunima yabo, co na lishelwa lije lyakele kulutwe lwabo lyaile na kwimana kunima yabo. 20 Co lije lishelwa lyezile mukati ka mbunga ya baka-Ijipiti na mbunga ya Isalele. Ku mutambela umo lyazibalele, oloni ku mutambela ukwabo lyakele na kutwa ceke butsiki. Ngeci mbunga ya baka-Ijipiti kuyawanene mbunga ya baIsalele buje butsiki bwoshe.

21 Co Mosesa wolwelele liboko lyendi ha kalunga-ndonga, co Yehova walingisile lihunzi lya ku butuhukilo bwa litangwa lihuwe butsiki bwoshe, co mema alyangunwine, co ha masima a kalunga-ndonga hakele libu lya kuma. 22 Ngeci baIsalele betile hakati ka kalunga-ndonga ha libu lya kuma oku mema anemana ngwe cibumbe ku cilyo na ku cimoshwe. 23 Co baka-Ijipiti babakabele na tubalu ba Falo boshe na matemba endi a nzita na banu bendi baka-kulonda tubalu. Babakabele mu kalunga-ndonga. 24 Co ku mutondo simbu kanda kukye,* Yehova watalelele mbunga ya baka-Ijipiti mu tuhya na mu lishelwa, co wabatanganesele. 25 Njambi wakele na kushomona mawili ku matemba abo. Ngeci kwabakaluwilile kwendesa aje matemba. Co baka-Ijipiti bendekele ngwabo: “Tuteweni kuli baIsalele mwafwa Yehova ali na kubalwila, co ali na kutulwisa.”

26 Co Yehova walekele Mosesa ngwendi: “Olwela liboko lyobe ha kalunga-ndonga mangana mema angumbule baka-Ijipiti na matemba abo a nzita na banu babo baka-kulonda tubalu.” 27 Co haje bene Mosesa wolwelele liboko lyendi ha kalunga-ndonga. Ngeci mukwaile na kukya, kalunga-ndonga welukile muje bene mwafwile ha kulibanga. Co baka-Ijipiti mubakele na kutewa, Yehova wabombilile mu kalunga-ndonga. 28 Co aje mema elukile angumbwile matemba a nzita na baka-kulonda tubalu na maswalale ba Falo boshe baje bakabele baIsalele mu kalunga-ndonga. Naumo wahi wobokele.

29 Oloni baIsalele bendele ha libu lya kuma ha masima a kalunga-ndonga, co mema emanene ngwe bibumbe ku cilyo na ku cimoshwe. 30 Ngeci lije litangwa Yehova wobwele baIsalele mu maboko a baka-Ijipiti, co baIsalele balimwenenene baka-Ijipiti banatsi ku ngenge ya kalunga-ndonga. 31 BaIsalele bamwene lalo nzili* ya Yehova yakama yapangesele mu kunyongesa baka-Ijipiti. Co aba banu bashangumukile kuzibila Yehova lyoba na kukulahela Yehova na ngamba yendi Mosesa.

15 Ha simbu ije, Mosesa na baIsalele bembilile Yehova ou mwaso ngwabo:

“Njimbila Yehova, mwafwa banamuzumbangeya manene.

Nombila kabalu na muka-kulonda kabalu mu kalunga-ndonga.

 2 Jah* ikeye nzili yange na kukanyama kwange mwafwa ikeye napu mwobole wange.

Ou ikeye Njambi yange, co njimushangazala. Ikeye Njambi ya tate, co njimuzumbangeya.

 3 Yehova wapwa muka-kulwa wa nzili, Yehova likelyo lizina lyendi.

 4 Nombila matemba a Falo na maswalale bendi mu Kalunga-ndonga.

Co baka-kulwa ba Falo ba nzili banabombila mu Kalunga-ndonga wa Kubenga.

 5 Mankimba anabangumbula, co banaselyama kwisi ya kalunga-ndonga ngwe limanya.

 6 Obe Yehova, liboko lyobe lya cilyo lyakala manene na nzili.

Obe Yehova, liboko lyobe lya cilyo lyasa kubwabwanya citozi.

 7 Mwafwa ya nzili yobe yakama, wasa kuwisila hasi baje bakulwisa.

Ubatumina butenu bwobe buje buli na kushukuma, co bubenyeka ngwe bishati.

 8 Muku wa mu majulu obe unakungulwilile mema hamolika.

 9 Citozi nendekele ngwendi: ‘Njibakaba. Njikabawana.

Njikambata bufuko bwabo kweta noho hanjikajaukila.

Njikashomona mukwale wange. Liboko lyange likabahyana.’

10 Unahwimine mpunzi, co kalunga-ndonga nabangumbwile.

Banakaselyamene kwisi ya mema ali na kulwa na nzili, ngwe cikubo ca kulema.

11 Iya hakati ka binjambi napu ngwe yobe, obe Yehova?

Iya napu wa kujela manene ngwe yobe?

Yobe ibanapande kuzibila lyoba na kwimbila myaso ya kukushangazala. Yobe ukalingi byuma bya kukomokesa.

12 Unolwele liboko lyobe lya cilyo, co lifuti-libu linabalehwile.

13 Mwafwa ya cizemo cobe cije kucesi kutenguluka, unatwamenena banu baje baunapatula.

Mu nzili yobe, ubatwamenena ku mwela wobe wa kujela.

14 Banu banapande kuziba, co bakajaja.

Baje batunga mu Filistiya bakaziba lyoba.

Baje batunga mu Kanana boshe bakahezuka bimbunge.

16 Bakajaja na kuziba lyoba.

18 Yehova ayula ngwe mwene myaka yoshe.

20 Co Miriamu kapolofweto wa munakazi, ndokazi ya Aloni wakwatele kangoma mu liboko lyendi, co banakazi boshe bamukabele na tungoma twabo oku bali na kukina. 21 Miriamu watabeyeye banalume ngwendi:

“Imbileni Yehova mwafwa banamuzumbangeya manene.

Nombila kabalu na muka-kulonda kabalu mu kalunga-ndonga.”

22 Mu kwita kwa simbu, Mosesa watwamenene baIsalele kutunda ku Kalunga-ndonga wa Kubenga, co baile mu mambo ya Shuri. Bendele bungenzi bwa matangwa atatu mu mambo, oloni kubawanene mema. 23 Co bakwetele ku Maraha,* oloni kubasele kunwa mema a ku Maraha mwafwa apwile a kulula mukemwo walukile uje mwela ngwendi Maraha. 24 Ngeci banu bashangumukile kuyayabalela Mosesa ngwabo: “Tunwa bikoni?” 25 Mosesa walombele bukwasi kuli Yehova, co Yehova wamumwesele muti. Mwombilile uje muti mu mema, aje mema apwile amabwa.

Njambi wapangesele cije cuma calingiwile kupwa cakumwenako mangana amwese baje banu byuma byatonda kuli bakebo. Njambi wabesekele mangana amone indi bamwononoka. 26 Co wendekele ngwendi: “Nga mutolilila lijwi lyange Yehova Njambi yeni na kulinga byuma byabibwa ku mesho ange na kwononoka mashiko ange na kulinga binjishaka, co kunjikaminenela mishongo injanenelele baka-Ijipiti mwafwa yange Yehova njimikangwisa.”

27 Munima yebi, bakwetele ku Elimu kuje kwakele tubwelubwelu 12 twa mema na miti ya mashakabale ya kupwa 70. Co bashimbikile cilombo cabo ku mema.

16 Mubatundile ku Elimu, mbunga yoshe ya baIsalele yakwetele mu mambo ya Sini ije ili mukati ka Elimu na Sinai. Bakwetele kuje ha litangwa lya bu 15 mu ngonde yamucibali kutunda habatundilile mu lifuti lya Ijipiti.

2 Co mbunga yoshe ya baIsalele yashangumukile kuyayabalela Mosesa na Aloni mu mambo. 3 BaIsalele batwaleleleleho kwendeka ngwabo: “Cinesi kubwaha ngwe Yehova watutsiilile mu lifuti lya Ijipiti oku twatumama ku bindeho bya situ mu kulya makende na kukuta. Oloni watunene muno mu mambo mangana wakutsiye cikungulukilo coshe ca baIsalele na njala.”

4 Co Yehova walekele Mosesa ngwendi: “Hano njinyokesa makende kutunda mwilu, co ha litangwa na litangwa umo na umo waba banu napande kuya na kwambata byanasa kulya, mangana njibeseke na kumona indi bakabangeya lishiko lyange. 5 Oloni ha litangwa lya bu 6 mubakabwahesa byakulya bibakambata, banapande kukabwahesa biseteko bibali bya byakulya bibakambata ha matangwa akwabo.”

6 Co Mosesa na Aloni balekele baIsalele boshe ngwabo: “Ku mangwezi mukazibuka bene ngweni Yehova ikeye wamitundisile mu lifuti lya Ijipiti. 7 Ku mutondo mukamona bumpau bwa Yehova, mwafwa nazibi kuyayabala kweni kumunayayabalela Yehova. Yetu beyajo mangana mutuyayabalele?” 8 Ku mangwezi Yehova mwakamyana situ ngwendi mulye na ku mutondo mwakamyana makende ngwendi mulye na kukuta, mukamona ngweni Yehova nazibi kuyayabala kweni kumunakala na kumuyayabalela. Oloni yetu yetu beyajo? Kumwakele na kuyayabalela yetu, munakala na kuyayabalela Yehova.

9 Co Mosesa walekele Aloni ngwendi: “Leka mbunga yoshe ya baIsalele ngwobe, ‘Ijeni ku mesho a Yehova, mwafwa nazibi kuyayabala kweni.’” 10 Aloni mwamanesele lika kwendeka ku mbunga ya baIsalele yoshe, baIsalele batengulukile na kutala mu mambo, co bamwene bumpau bwa Yehova mu lishelwa.

11 Yehova walekele lalo Mosesa ngwendi: 12 “Njinazibi kuyayabala kwa baIsalele. Baleke ngwobe, ‘Munima ya kulahuka kwa litangwa simbu kanda kuzibale, mukalya situ, co ku mutondo mukakuta makende, co cili bene mukazibuka ngweni yange Yehova Njambi yeni.’”

13 Ku mangwezi makokwa bezile, bakushulile muje mu cilombo, co ku mutondo muje mu cilombo mwoshe mwakele lime. 14 Lije lime mulyomine, kwakele tuma twatundondo twamubundungulu tuje twajalakanene hasi mu mambo twa kufwa ngwe mema a kukonda. 15 BaIsalele mubabimwene, bashangumukile kulihula umo na mukwabo ngwabo, “Bikebi?” mwafwa kubabizibukile. Mosesa wabalekele ngwendi: “Awa anapu makende anamyana Yehova mangana apwe byakulya byeni. 16 Yehova nashiki ngwendi, ‘Umo na umo weni napande kwambata byakulya bije byanasa kulya. Munu na munu napande kwambata seteko imo ya oma* kwesekesa na namba ya banu bali mu tenti yendi.’” 17 BaIsalele bashangumukile kulinga ngoco. Bambatele bije byakulya, bamo bambatele byabingi bakwabo bambatele byabindondo. 18 Mubakele na kupima bije byakulya mu oma, bakele na kuwana ngwabo uje nakungulula byabingi kesi na byakutubakana, co na uje nangungulula byabindondo nendi napwisamo. Munu na munu wambatele byakulya byasele kulya.

19 Co Mosesa wabalekele ngwendi: “Naumo wahi napande kusezako ebi byakulya kweta na imene mutondo.” 20 Oloni kubatolililile Mosesa. Ngeci bamo mubasezeleko bimo kweta mutondo, byakele na mabuno, co byanikile, co Mosesa wabalubalelele. 21 Bakele na kwambata bije byakulya mutondo na mutondo. Umo na umo wambatele kwesekesa na seteko yasele kulya. Co litangwa mulyakele na kuya na kushaluka, bije byakulya byasangunukile.

22 Ha litangwa lya bu 6, bambatele byakulya bya matangwa abali, co munu na munu wambatele biseteko bya maoma abali. Ngeci bamyata boshe ba mbunga ya Isalele bezile na kuleka Mosesa ei ñanda. 23 Co Mosesa wabalekele ngwendi: “Yehova nendeka ngwendi litangwa lya imene linapu lya kuhwima.* Linapu Sabata ya kujela kuli Yehova. Ngeci oceni bimunapande kwoca na kuteleka bimunapande kuteleka, co bije bisalaho bitulikeni kweta imene mutondo.” 24 Ngeci, batulikile bije byakulya kweta ku mutondo, ngwe mwabashikile Mosesa, co kubyanikile nambe kukala na mabuno. 25 Co Mosesa wendekele ngwendi: “Bilyeni lelo, mwafwa lelo linapu litangwa lya Sabata kuli Yehova. Lelo kumubiwanaho hasi. 26 Mukabyambata ha matangwa 6, oloni ha litangwa lya bu 7, ha litangwa lya Sabata, kumukabiwanaho.” 27 Oloni ha litangwa lya bu 7, bamo baile ngwabo bakambate byakulya, oloni byahi bibakawanene.

28 Ngeci Yehova walekele Mosesa ngwendi: “Mwambata simbu ya kupwa hali oku mubyana kukabangeya binjimileka na kubyana kukabangeya mashiko ange? 29 Keti mwibale ngweni Yehova namyana Sabata mukemwo ha litangwa lya bu 6 akamyana byakulya bya matangwa abali. Mubaboshe munapande kukala hamuli, wahi napande kuya kweka ha litangwa lya bu 7.” 30 Ngeci banu banyungile Sabata* ha litangwa lya bu 7.

31 Banu ba Isalele balukile bije byakulya ngwabo manna.* Byapwile bya kutoka ngwe bimbuto bya koriyanda,* co kubilya byazibikile ngwe makende a kulipasha akwaka buki. 32 Co Mosesa wendekele ngwendi: “Yehova nendeka ngwendi: ‘Shuliseni oma imo ya manna mangana muitulike mu bisemwa byeni byoshe mangana bisemwa bije bija munima byakumone byakulya binjakele na kumyana ngwange mulye mu mambo munjakele na kumitundisa mu lifuti lya Ijipiti.’” 33 Co Mosesa walekele Aloni ngwendi: “Ambata njaba na kwakamo seteko imo ya oma ya manna na kuyaka kulutwe lwa Yehova mangana muitulike mu bisemwa byeni byoshe.” 34 Aloni wakele ije njaba kulutwe lwa Cikasha ca Bukaleho* mangana bainyungilile, ngecilika Yehova mwashikilile Mosesa. 35 BaIsalele balile manna ha myaka 40 kweta noho habakobelelele mu lifuti muje mwatungile banu. Balile manna kweta noho habetelele ku nginga ya lifuti lya Kanana. 36 Maoma 10 anapu hamo na efa* imo.

17 Mbunga yoshe ya baIsalele yatundile mu mambo ya Sini. Bakele na kwenda kutunda mu mwela umo kuya mu mwela ukwabo kwesekesa nomwo mwabashikile Yehova, co bakashimbikile cilombo cabo ku Lefidimu. Oloni kuje ku mwela kukwakele mema a kunwa.

2 Co banu bashangumukile kucokotesa Mosesa ngwabo: “Twane mema tunwe.” Oloni Mosesa wabalekele ngwendi: “Bika bimuli na kunjicokotesela? Bika bimuli na kwesekela Yehova?” 3 Oloni banu bazibile manene lihwila, co batwaleleleleho kuyayabalela Mosesa ngwabo: “Bika biunatutundisila mu Ijipiti? Kuma unashakele kwakututsiila muno mu mambo na lihwila hamolika na bana betu na bimuna betu ndi?” 4 Mamaneselelo Mosesa walambelelele Yehova ngwendi: “Njibalinga bati aba banu? Ololo banjasha mamanya!”

5 Co Yehova walekele Mosesa ngwendi: “Twama kulutwe lwa banu, co ambatako bakulunu ba Isalele bamo na mulamu wobe uje uwapupile ha ndonga ya Nailo. Wambate mu liboko lyobe mangana uye. 6 Tala! Njikemana kulutwe lwobe ha limanya ku Holebu. Ukapupe ha limanya, co likatuhula mema mangana banu banwe. Mosesa walingile ngoco ha mesho a bakulunu ba Isalele. 7 Co walukile uje mwela ngwendi Massa* na Meliba* mwafwa baIsalele bacokotesele Mosesa na kweseka Yehova mubendekele ngwabo: “Kuma Yehova ali mukati ketu indi wahimo?”

8 Co baAmaleki bezile na kulwisa baIsalele ku Lefidimu. 9 Ngeci Mosesa walekele Joshua ngwendi: “Angula banalume hakati ketu, co muye mukalwe na baAmaleki. Imene njikemana helu lya lilundu oku njinakwata mulamu wa Njambi wa busunga mu liboko lyange.” 10 Ngeci Joshua walingile byamulekele Mosesa, co waile na kulwa na baAmaleki, co Mosesa na Aloni na Hule baile helu lya lilundu.

11 Mosesa mwatwaleleleleho kujundula maboko endi mwilu, baIsalele bakele na kukala na nzili. Oloni mwakele na kuwawisa lika kamandondo, baAmaleki bakele na kukala na nzili. 12 Maboko a Mosesa muwajukile bamunenelele limanya, co watumameneho, co Aloni na Hule bakwatelelele maboko endi. Umo wakele ku mutambela umo, mukwaboco wakele ku mutambela ukwabo. Ngeci maboko endi kuwashwenene kweta noho halyalahukilile litangwa. 13 Ngeci Joshua wahyanene Amaleki na banu bendi na mukwale.

14 Co Yehova walekele Mosesa ngwendi: “Soneka ei ñanda mu libulu mangana ipwe canukiso, co unapande kuileka lalo Joshua ngwobe, ‘Njikanyongesa lizina lya baAmaleki ha lifuti-libu hoshe.’ 15 Co Mosesa watungile mutula na kuuluka ngwendi Yehova-nisi,* 16 co wendekele ngwendi: “Ha kuwana ngwe liboko lya Amaleki lili na kulwisa litanda lya Jah, Yehova akalwisa Amaleki kutunda ku cisemwa cimo kuya ku cisemwa cikwabo.”

18 Co Jethiro, kapilistu wa ku Midiani, ishemweno ya Mosesa, wazibile byoshe bije Njambi walingilile Mosesa na banu bendi ba Isalele nomwo Yehova watundisilile baIsalele mu Ijipiti. 2 Jethiro, ishemweno ya Mosesa wakele na Zipola munakazi wa Mosesa, uje yatumine Mosesa kwimbo, 3 hamolika na bana bendi babali ba banalume. Mosesa walukile munendi umo ngwendi Geshomu* mwafwa wendekele ngwendi, “Njinapu muka-kwija mu lifuti lya bungenzi,” 4 co mukwabo wamulukile ngwendi Elieza* mwafwa wendekele ngwendi: “Njambi ya tate ikeye mukwasi wange uje wanjobwele ku mukwale wa Falo.”

5 Co Jethiro, ishemweno ya Mosesa, hamolika na bana ba Mosesa ba banalume na munakazi wa Mosesa, bezile kuli Mosesa mu mambo kuje kwatulilile, ku munkinda wa Njambi wa busunga. 6 Co watumine majwi kuli Mosesa ngwendi: “Yange ishomweno Jethiro, njili na kwija kuli yobe na munakazi wobe na bana beni babali.” 7 Mosesa mwazibile lika ngoco, waile na kukaliwana na ishemweno, co wakatsikamene na kumutsemba, co balindwisile. Kutundaho, bakobelele mu tenti.

8 Mosesa walekele ishemweno byoshe byalingile Yehova kuli Falo na kuli baka-Ijipiti mwafwa ya baIsalele na bukalu bwoshe bubaliwanene nabwo mu ngila nomwo mwabobwelelemo Yehova. 9 Jethiro wabwahelelele mwazibile byuma byoshe byabibwa bije Yehova walingilile baIsalele ha kubobola kuli baka-Ijipiti. 10 Co Jethiro wendekele ngwendi: “Bashangazale Yehova uje namyobola mu Ijipiti na kuli Falo, uje lalo nobola banu mu liboko lya baka-Ijipiti. 11 Hanwoni njazibuka ngwange Yehova wapwa wakama kutubakana binjambi beka boshe mwafwa nanyungilila banu bendi ku bitozi babo ba kulijundula.” 12 Co Jethiro, ishemweno ya Mosesa, wanenelele Njambi bwana bwa kwenyeka na milambu, co Aloni na bakulunu boshe ba Isalele bezile na kulya byakulya na ishemweno ya Mosesa ku mesho a Njambi wa busunga.

13 Lyamukwabo, Mosesa watumamene na kusompa banu ngwe mwakele na kulinga simbu yoshe, co banu batwaleleleleho kwija na kwimana kuli Mosesa kutunda mutondo kweta mangwezi. 14 Ishemweno ya Mosesa mwamwene byoshe byakele na kulingila banu Mosesa, wendekele ngwendi: “Bika biuli na kulingila ngacije? Bika biunatumamena aha likalyobe banu boshe oku baija na kwimana halutwe lwobe kutunda mutondo kweta mangwezi?” 15 Mosesa wakumbulwile ishemweno ngwendi: “Mwafwa banu bali na kwija kuli yange mangana bakwihule Njambi. 16 Nga kukatuka ñanda, co bainena kuli yange, co njinapande kuisompa na kubaleka byashaka Njambi wa busunga na mashiko endi.”

17 Ishemweno ya Mosesa wamulekele ngwendi: “Biuli na kulinga kubyabwahele. 18 Eci cipangi cikujukisa, co naba banu bauli nabo bajuka mwafwa eci cipangi cinakwamena manene. Kuwasa kucipanga likalyobe. 19 Tolilila ku byuma binjikunangula, co Njambi wa busunga akala nobe. Yobe ukemanenako banu kuli Njambi wa busunga, co ukatwala biñanda kuli Njambi wa busunga. 20 Unapande kuleka banu byuma byashaka Njambi na mashiko endi na kubaleka ngila ibanapande kwendamo na bipangi bibanapande kupanga. 21 Oloni unapande kwangula banalume baje basa kusompa, baje bazibila Njambi lyoba, banalume ba kusungama baje bazinda profiti* ya linyanyamena. Unapande kubangula mangana bapwe bantwama ba banu 1,000 na bantwama ba banu 100 na bantwama ba banu 50 na bantwama ba banu 10. 22 Co aba bantwama banapande kusompa banu nga kukatuka biñanda. Banena-nena lika biñanda byabikalu kuli yobe, oloni biñanda byabindondo bakebo babisompa. Lyasiwisile cipangi ha kulipangela nabo cipangi. 23 Nga ulinga ngoco, co lalo nga Njambi atabesa ngwendi kufwe ngoco, co ukasa kupanga mwamubwa eci cipangi. Co munu na munu akeluka ku njibo yendi oku nazituka.”

24 Co haje bene Mosesa watolililile byamulekele ishemweno na kulinga byoshe byendekele. 25 Co hakati ka baIsalele boshe, Mosesa wangwile banalume baje basa kusompa, co wabangwile ngwendi batwamenene banu na kupwa bantwama ba banu 1,000, bantwama ba banu 100, bantwama ba banu 50 na bantwama ba banu 10. 26 Ngeci mukwakele na kukatuka biñanda, bakele na kusompa banu. Mukwakele na kukatuka biñanda byabikalu, bakele na kubitwala kuli Mosesa. Oloni biñanda byoshe byabindondo bakebo bakele na kubisompa. 27 Munima yebi, Mosesa wasindikiiye ishemweno, co ishemweno welukile ku lifuti lyendi.

19 Mu ngonde yamucitatu kutunda habatundilile baIsalele mu lifuti lya Ijipiti, bakwetele mu mambo ya Sinai ha litangwa lije bene. 2 Batundile ku Lefidimu na kwija mu mambo ya Sinai, co bashimbikile cilombo cabo muje mu mambo. BaIsalele bashimbikile cilombo cabo kulutwe lwa munkinda.

3 Co Mosesa waile ku munkinda mangana akasholoke kulutwe lwa Njambi wa busunga, co Yehova wendekele nendi kutundilila ha munkinda ngwendi: “Unapande kukaleka bakunjibo ya Jakobu, baIsalele ngwobe, 4 ‘Munalimwena yeni babenya binjinalingi kuli baka-Ijipiti mangana njimyambate ha mambaba ange ngwe ngonga na kuminena kuli yange. 5 Co nga mwononoka bene lijwi lyange na kunyunga cikumiiyo cange, co cili bene mukapwa banu bange ba kulitila* hakati ka banu boshe, mwafwa lifuti-libu lyoshe lyapwa lyange. 6 Mukapwa tupilistu bange baje bakapwa lalo bimyene na muyati wa kujela.’ Awa akewo majwi aunapande kukaleka baIsalele.”

7 Ngeci Mosesa waile, co wakasanene bakulunu na kubaleka awa majwi oshe amushikile Yehova. 8 Munima yebi, banu boshe bakumbulwilile hamo ngwabo: “Byoshe byanendeka Yehova tubilinga na mbunge imo.” Co haje bene Mosesa wakalekele Yehova bibakumbulwile banu. 9 Ngeci Yehova walekele Mosesa ngwendi: “Tala! Njija kuli yobe mu lishelwa lya kuzibala mangana banu bazibe munjendeka nobe mangana simbu yoshe nobe bakukulahele.” Co Mosesa walekele Yehova majwi abendekele banu.

10 Co Yehova walekele Mosesa ngwendi: “Ya kuli banu ukabajelese lelo na imene, co banapande kukusha bizalo byabo. 11 Banapande kulibwahesela litangwa lyamucitatu, mwafwa ha litangwa lyamucitatu Yehova akaija ha Munkinda wa Sinai ku mesho a banu boshe. 12 Unapande kwakela banu nginga kuzengulwisa munkinda woshe, na kubaleka ngwobe, ‘Keti mushwene ku munkinda nambe kukwatako. Woshe akakwata ku munkinda bakamutsiya. 13 Wahi napande kukwata ou munu, oloni bakalinga wa kwasha mamanya nambe mikili. Napande kutsa, ipwe cimuna nambe munu.’ Banu mubakaziba cilumo ca limbinga lya manga banapande kwija ku munkinda.”

14 Co Mosesa wasikumukile kutunda ha munkinda na kuya ku banu, co wakabajelesele, co lalo bakushile bizalo byabo. 15 Walekele banu ngwendi: “Libwaheseleni litangwa lyamucitatu. Keti mulilale na banakazi beni.”*

16 Ha litangwa lyamucitatu mutondo, kwakele cililimo na mihyato, co kwakele na lishelwa lya kuzibala helu lya munkinda. Kwazibikile na cilumo cakama ca limbinga, co banu boshe mu cilombo bashangumukile kujaja. 17 Co Mosesa watuhwile banu mu cilombo mangana bakaliwane na Njambi wa busunga, co bakemanene ku munkinda. 18 Munkinda woshe wa Sinai walingile bwisi kondakani mwafwa Yehova wezileho mu tuhya, co buje bwisi bwakele na kukakumuka ngwe bwisi butunda mu lutengo, co munkinda woshe wajajele manene. 19 Cije cilumo ca limbinga mucakele na kulibwezelela manene, Mosesa wendekele, co lijwi lya Njambi wa busunga lyamukumbulwile.

20 Ngeci Yehova wasikumukile helu lya Munkinda wa Sinai. Co Yehova wasanene Mosesa ngwendi aye helu lya munkinda, co Mosesa waile. 21 Yehova walekele Mosesa ngwendi: “Sikumuka ukaleke banu ngwobe keti bajomboke binginga mu kushaka kumona yange Yehova, keti ngoconi bwingi bwabo batsa. 22 Co tupilistu baje bakaija simbu yoshe kuyehi nange Yehova, balijelese mangana yange Yehova keti njibatsiye.” 23 Co Mosesa walekele Yehova ngwendi banu kubasa kwija ku Munkinda wa Sinai mwafwa unatunangwile laja ngwobe, ‘Akeni binginga kuzengulwisa munkinda na kuupwisa wa kujela.’” 24 Oloni Yehova wamukumbulwile ngwendi: “Sikumuka, co yakaije na Aloni, oloni keti utabese tupilistu na banu batubakane binginga na kwija kuli yange Yehova mangana keti njibatsiye. 25 Ngeci Mosesa wasikumukile ku banu na kukabaleka.

20 Co Njambi wendekele awa majwi oshe ngwendi:

2 “Yange Yehova Njambi yobe uje wakutundisile mu lifuti lya Ijipiti, mu njibo ya bundungo. 3 Keti ukale na binjambi beka kubanga yange lika.

4 “Keti ukalimungile kamponya nambe cuma coshe-coshe ca kulifwa na cuma ca mwilu nambe cuma ca ha lifuti-libu nambe ca mu mema. 5 Keti ubitsikamene nambe kutaba kukukokweya mangana ubipangele, mwafwa yange Yehova Njambi yobe nji Njambi uje watonda kumulemesa endilika. Kuli baje banjizinda, njikana kashitiko ku bana na batekulu na batekulwila mwafwa ya milonga ya baishabo. 6 Oloni ku banu baje banjizema na kunyunga mashiko ange, njikabamwesa cizemo cije kucesi kutenguluka kweta bene na ku cisemwa ca bu 1, 000.

7 “Keti wesese lizina lyange Yehova Njambi yobe, mwafwa yange Yehova njikana kashitiko woshe uje esesa lizina lyange.

8 “Anuka kunyunga litangwa lya Sabata na kulimona kupwa lya kujela. 9 Unapande kuundangana na kupanga bipangi byobe byoshe ha matangwa 6, 10 oloni litangwa lya bu 7 linapu sabata kuli Yehova Njambi yobe. Keti upange bipangi byoshe-byoshe, ipwe yobe, nambe munobe wa munalume, nambe munobe wa munakazi, nambe ndungo yobe wa munalume, nambe ndungo yobe wa munakazi, nambe cimuna wobe, nambe muka-kwija uje naija na kukala nobe. 11 Mwafwa ha matangwa 6, Yehova watangele melu na lifuti-libu na kalunga-ndonga na byoshe bilimo, co wahwimine ha litangwa lya bu 7. Mukemwo Yehova wabezikisile litangwa lya Sabata na kulipwisa lya kujela.

12 Singimika isho na noko mangana uyoye simbu yailaha mu lifuti lya kwana Yehova Njambi yobe.

13 “Keti utsiye munu.

14 “Keti ulinge bukoi.

15 “Keti wibe.

16 “Keti wane bukaleho bwa makuli nga banakusana ngwabo wane bukaleho hali mukweni.

17 “Keti ushungwiye njibo ya mukweni. Keti ushungwiye munakazi wa mukweni, nambe ndungo yendi wa munalume, nambe ndungo yendi wa munakazi, nambe ngombe yendi, nambe donki* yendi, nambe cuma coshe-coshe ca mukweni.”

18 Co banu boshe bakele na kulizibila cililimo na cilumo ca limbinga, co bakele na kulimwena mihyato na bwisi bwakele na kukakumuka ha munkinda. Mubamwene na kulizibila ebi byuma, bajajele na kwimanena halako. 19 Ngeci balekele Mosesa ngwabo: “Endeka netu yobe, co tukutolilila, tutewa ngwetu nga Njambi endeka netu, co tutsa.” 20 Ngeci Mosesa walekele banu ngwendi: “Keti muzibe lyoba mwafwa Njambi wa busunga naija na kumyeseka mangana mutwaleleleho kumuzibila lyoba, co keti mulinge bubi.” 21 Co banu batwaleleleleho kwimanena halako, oloni Mosesa washwenene kuje ku lishelwa lya kuzibala kuje kwakele Njambi wa busunga.

22 Co Yehova walekele Mosesa ngwendi: “Leka baIsalele ngwobe, ‘Munalimwena yeni babenya ngweni njinendeka neni kutundilila mwilu. 23 Keti mulimungile binjambi ba siuva na kubalemesa ngwe mumuli na kulemesela yange, co lalo keti mulimungile binjambi ba goldi. 24 Mukanjitungile mutula wa libu, co mukenyekeleho bwana bweni bwa kwenyeka na milambu yeni ya kulila hamo* na bimanga beni na bingombe beni. Njikaija na kumibezikisa mu myela yoshe injikangula ngwange munjilemeselemo.* 25 Mumunjitungila mutula wa mamanya, keti muutunge kupangesa mamanya amunatetanga na bikwata. Mwafwa nga mupangesa shinjo, co muujwalesa. 26 Co ku mutula keti mutungeko bindendelo, kutewa mumulondaho bushwamwa bweni busholoka.

21 “Unapande kubaleka awa mashiko ngwobe:

2 “Nga ulanda ndungo wa kaHebelu, co napande kukupangela ha myaka 6, oloni mu mwaka wa bu 7 unapande kumupatula kwa kujeneka kukufweta cuma coshe-coshe. 3 Nga wezile likalyendi, co eluka likalyendi. Nga wambata, co napande kwiluka na munakazi wendi. 4 Nga shukulu yendi ikeye amwana munakazi, co uje munakazi amukitila bana ba banalume nambe ba banakazi, co uje munakazi na bana bapwa ba shukulu yendi, co uje ndungo mwakapatuka akaya likalyendi. 5 Oloni nga uje ndungo akendeka ngwendi, ‘Njazema shukulu yange na munakazi wange na bana bange, kunjishaka kunjipatula,’ 6 co shukulu yendi akamunene kuli Njambi wa busunga. Kutundaho, akamunene ku lipito nambe ku cibuliko* lya cikolo, co shukulu yendi akamutube ku litwi na mumba, co akapwa ndungo yendi myaka yoshe.

7 Nga munu alandesa munendi wa munakazi kupwa ndungo, co uje mwana kubakamupatula ngwe mubakapatula ndungo wa munalume. 8 Nga shukulu yendi kamushakele, co lalo kamwambata kupwa munakazi wendi mukwabo, oloni amulandesa kuli munu weka, co keti amulandese kuli baka-kwija mwafwa kamulingile mwamubwa. 9 Nga amwambatela munendi wa munalume, co napande kumwambata ngwe munendi wa munakazi. 10 Nga ambata munakazi mukwabo, co kapandele kulikela kumwana byakulya na bizalo na byuma byanapande kumwana mu bulo ha kupwa munakazi wa kulibanga. 11 Nga kamwana ebi byuma bitatu, co napande kuliila kwa kujeneka kwecako nambe mbongo imo.

12 “Woshe apupa mukwabo na kumutsiya, nendi bamutsiye. 13 Oloni nga kalingilile shakelo, co na Njambi wa busunga ecelela eci cuma cilingiwe, co asa kutewela ku mwela unjikamyangwila. 14 Nga munu alubalela manene mukwabo na kumutsiila shakelo, co nendi munapande kumutsiya nameme bene nga munapande kumutundisa ku mutula wange. 15 Woshe apupa ishe nambe ina munapande kumutsiya.

16 “Nga munu aiba mukwabo munu na kumulandesa nambe nga mumuwana ali nendi, munapande kumutsiya.

17 “Woshe asinga ishe nambe ina munapande kumutsiya.

18 “Nga banu balicokota, co umo apupa mukwabo na limanya nambe na faindi,* oloni katsi, abinjila lika ha mwela, co munapande kulinga eci: 19 Nga asa kwinduka na kwendanganako hanja na mulamu, co uje namupupile kumwapandele kumwana kashitiko. Amufwetele lika ha simbu yajeneka kuya ku bipangi kweta noho hakakangukila, mwafwa ikeye namubulumuna.

20 “Nga munu apupa ndungo yendi wa munalume nambe ndungo yendi wa munakazi na citi, co uje ndungo atsila mu liboko lyendi, co shukulu yendi banapande kumwana kashitiko. 21 Oloni nga ayoyako litangwa limo nambe abali, co shukulu yendi kubapandele kumwana kashitiko, mwafwa wamulandele na bimbongo byendi babenya.

22 “Nga banalume balwa, co babulumuna munakazi uje ali na cikute, co apapa oku simbu yendi ya kupapa kanda icete, oloni naumo atsa* wahi, co uje nalingi mulonga napande kufweta byamutomena munalume wa uje munakazi, co napande kubifweta kwesekesa nomu mubakwila maako. 23 Oloni nga umo atsa, co uje nalingi mulonga nendi napande kutsa. 24 Lisho na lisho, liyo na liyo, liboko na liboko, lindi na lindi, 25 kwenya na kwenya, mbandu na mbandu, faindi na faindi.

26 “Nga munu apupa ndungo yendi wa munalume nambe wa munakazi mu lisho, co lije lisho litsa, co shukulu yendi napande kupatula uje ndungo mangana ipwe fweto ya lisho lyendi lyanatsii. 27 Co nga alukula liyo lya ndungo yendi wa munalume nambe wa munakazi, napande kumwecela aye mangana ipwe fweto ya liyo lyendi lyanalukula.

28 Nga ngombe alwisa munalume nambe munakazi na kumutsiya, co uje ngombe munapande kumutsiya na mamanya, co situ yendi kumwapandele kuilya, oloni babenyaye keti mumwane kashitiko. 29 Oloni nga uje ngombe wakele na kalingolingo ka kulwisa banu, co babenyaye banamunangula, oloni kamunyungililile, kutundaho uje ngombe atsiya munalume nambe munakazi, co uje ngombe munapande kumutsiya na mamanya, co lalo babenyaye nendi munapande kumutsiya. 30 Nga bamutomena ndando ya kupatula, napande kufweta byoshe bibamutomena mangana bipwe ndando ya kupatula mwonyo wendi. 31 Nga uje ngombe alwisa mwanike wa munalume nambe mwanike wa munakazi, babenya ngombe banapande bene kumulinga kwesekesa nomu mulyendekela eli lishiko. 32 Nga ngombe alwisa ndungo wa munalume nambe ndungo wa munakazi, co babenya ngombe napande kufweta shukulu ya uje ndungo mashekele* 30, co uje ngombe banapande kumutsiya na mamanya.

33 “Nga munu ofulula bwina nambe enda bwina, co kabwofwela, co muje mu bwina muwila ngombe nambe donki,* 34 babenya bwina napande kufweta. Napande kufweta babenya cimuna, co uje cimuna wa kutsa apwa wendi. 35 Nga ngombe ya munu abulumuna ngombe ya mukwabo na kumutsiya, co banapande kulandesa uje ngombe wa kuyoya na kulipangela bimbongo bibanamulandesa. Banapande kulipangela lalo na cimuna wa kutsa. 36 Oloni nga uje ngombe wakele na kalingolingo ka kulwisa bakwabo, oloni babenyaye kamunyungililile, co napande kufweta ngombe na ngombe, co uje ngombe wa kutsa apwa wendi.

22 “Nga munu aiba ngombe na kumutsiya nambe kumulandesa, co napande kufweta bingombe batanu. Oloni nga aiba manga na kumutsiya nambe kumulandesa, co napande kufweta bimanga bawana.

2 (“Nga mwizi bamukwata ali na kukobela mu njibo butsiki mangana aibe, co bamupupa na kumutsiya, co uje namutsii kesi na mulonga wa maninga. 3 Oloni nga ebi byuma bilingiwa munima ya kutuhuka kwa litangwa, co uje amutsiya akala na mulonga wa maninga.)

“Uje mwizi napande kufweta. Nga byahi byali nabyo, co banapande kumulandesa mwafwa ya byuma byanebi. 4 Nga cimuna yanebi bamuwana nendi oku aciyoya, ipwe ngombe nambe donki* nambe manga, co uje mwizi napande kufweta bimuna babali.

5 “Nga munu aya na kulisa bimuna bendi mu bulilo bwendi nambe mu lihya lyendi lya binyu, co abecelela baye na kulya mu lihya lya mukwabo, co napande kufweta mukwabo byuma byabibwa bya mu lihya lyendi nambe bushuka bwabubwa bwa mu lihya lyendi lya binyu.

6 “Nga munu ashwameka tuhya, co tuje tuhya tukakwata ku biputa na kwenyeka mikuta ya bimbuto nambe bimbuto bije kanda bateje nambe lihya lya munu, co uje nashwamekele tuhya napande kufweta bimbuto bije binenye.

7 “Nga munu ana mukwabo bimbongo nambe byuma byeka ngwendi amutulikilebyo, co babibila mu njibo yendi, co nga uje mwizi bamuwana napande kufweta lubali. 8 Nga mwizi kubamuwanene, co babenya njibo banapande kumunena ku mesho a Njambi wa busunga mangana bakumone indi ikeye nebi byuma bya mukwabo. 9 Nga munu bamwendeka ngwabo ali na cuma cambala, ipwe ngombe, nambe donki,* nambe manga, nambe cizalo, nambe cuma coshe-coshe ca kuzimbala cije camuwana naco mukwabo na kumuleka ngwendi, ‘Cuma cange eci,’ co boshe babali banapande kunena ñanda yabo kuli Njambi wa busunga. Woshe ibawana na mulonga kuli Njambi napande kufweta mukwabo lubali.

10 “Nga munu ana mukwabo donki* nambe ngombe, nambe manga, nambe cimuna woshe-woshe mangana amunyungileye, oloni uje cimuna atsa nambe atenguka nambe bamwambata oku wahi ali na kumona, 11 co uje nakala na kunyunga byuma bya mukwabo napande kulisinga hali Yehova ngwendi keti ikeye nakwatele ha byuma bya mukwabo, co na babenya byuma napande kutaba. Ngeci, uje nanyungile byuma kapandele kubifweta. 12 Oloni nga uje cimuna banamwibila kuli ikeye, co napande kufweta babenya cimuna. 13 Nga uje cimuna banamusanyozola ku cikashama wa mu shwata, co napande kumunena kuli babenya mangana apwe bukaleho. Kapandele kufwetela cimuna ibanasanyozola ku cikashama wa mu shwata.

14 “Oloni nga munu alomba cimuna kuli mukwabo, co uje cimuna atenguka nambe atsa oku kesi kuli babenyaye, co uje nalombele uje cimuna napande kumufweta. 15 Nga babenyaye hali, co uje nalombele cimuna kapandele kumufwetela. Oloni nga nalingile wa kukumuna, co bije bimbongo byanafwetele ha kumukumuna bikebyo bene bipwa fweto.

16 “Nga munalume akokweya mumbanda uje kanda alilaleho laja na munalume, uje lalo kubendekeyeye, co alilala nendi, co napande kumwondela mangana apwe munakazi wendi. 17 Nga ishe you mumbanda abyana kumwanaye kupwa munakazi wendi, co ou munalume napande kufweta bimbongo bya kupwa hamo na byonda.

18 “Keti mutabese munakazi wa kupanda ayoye.

19 “Munapande kutsiya munu woshe alilala na kasitu.

20 “Munu woshe ana milambu ku binjambi beka kutubakana kuyana lika kuli yange Yehova munapande kumunyongesa.

21 “Keti muyandese muka-kwija nambe kumulyatelela, mwafwa neni mwapwile baka-kwija mu lifuti lya Ijipiti.

22 “Keti muyandese fwile nambe mwana wa kujeneka ishe.* 23 Nga mumuyandesa, co atambeka kuli yange, cili bene njikaziba kutambeka kwendi, 24 co njikatenuka manene na kumitsiya na mukwale, co banakazi beni bakapwa bifwile, co bana beni kubakakala na baishabo.

25 “Nga mukolotesa bimbongo kahutu* uje ali mukati ka banu bange, uje imwatunga nendi, keti mutambwileho bimbongo bya helu ha bimbongo bimunamukolotesa.

26 “Nga wambata cizalo ca mukweni na kucikwatelamo mwafwa ya byuma byanambata kuli yobe, unapande kumwilwisilaco simbu kanda litangwa lilahuke, 27 mwafwa cikeco lika cizalo cali naco, cizalo cakalifwiki ha mubila wendi, co bika byalifwika mwalala? Nga atambeka kuli yange njimuziba mwafwa njakala na mema ku mbunge.

28 “Keti mushaule Njambi nambe mwata wa banu beni.

29 “Keti mukwata-kwate ku masinde kwana bwana kutunda ha bimbuto byeni byabingi bimunateje, na musozi wa binyu uje ukangongomoka mu bitikilo byeni bya binyu, na mazi mu bitikilo byeni bya mazi. Munapande kunjana bana beni ba bantwatwa ba banalume. 30 Ebi bikebyo bimunapande kulinga ku bingombe beni na ku bimanga beni: Muna ngombe na muna manga napande kukala na ina ha matangwa 7, oloni ha litangwa lya bu 8 munapande kunjanaye.

31 “Munapande kupwa banu ba kujela ku mesho ange, co keti mulye situ ya cuma coshe-coshe cimuwana mu shwata canasanyozola cikashama wa mu shwata. Munapande kuyana ku tutali.

23 “Keti mushandole ñanda ya makuli. Keti mulikwatasane na muka-bubi ha kwana bukaleho bwa makuli. 2 Keti mukabangeye mbunga mu kulinga byuma byabibi, co lalo keti muhengese ñanda ha kwana bukaleho bwa makuli mwafwa ya kukabangeya mbunga. 3 Mumutala ñanda ya kahutu, keti mumutetele lika mwafwa napu kahutu.

4 “Nga uwana ngombe ya citozi cobe nambe donki* yendi nazimbala, unapande kumwilwisa kuli babenyaye. 5 Nga umona donki* ya munu wakuzinda nawila hasi na citele cendi, co kuwapandele kumwongoloka na kumuseza. Unapande kukwasa babenyaye azitule cije citele canambata uje cimuna.

6 “Keti mukasompe ñanda ya kahutu mu ngila ya kuhenga.

7 “Keti mwimanene ñanda ya makuli, co keti mutsiye munu wa kujeneka mulonga na munu wa kusungama, mwafwa kunjikamono muka-bubi kupwa munu wa kusungama.

8 “Keti mutambule lizika-kanwa mwafwa lizika-kanwa likazibalesa mesho a banu baje bamona mwamubwa, co lalo lyasa kutanganesa majwi a munu wa kusungama.

9 “Keti muyandese muka-kwija. Muzibuka mukwafwa kupwa muka-kwija* mwafwa neni mwapwile baka-kwija mu lifuti lya Ijipiti.

10 “Ha myaka 6 munapande kulima bimbuto byeni mu mahya na kubiteja. 11 Oloni mu mwaka wa bu 7 kumwapandele kulima mu mahya eni, munapande kuwaseza ngacije bene. Co tuhutu bali mukati keni bakalya bije bikalimenena mu mahya, co bije bibakasezamo tuhutu, tusitu ba mu shwata bakabilya. Ebi bikebyo bimunapande kulinga na mu mahya eni a binyu nawa a olive.

12 “Munapande kupanga bipangi byeni ha matangwa 6, oloni ha litangwa lya bu 7 munapande kuhwima ku bipangi byeni mangana bingombe beni na bidonki* beni nabo bahwime, na bana ba bindungo beni ba banakazi na baka-kwija nabo bahwime.

13 “Munapande kumona ngweni mulinga byoshe binjinamileke, co keti mutumbule mazina a binjambi beka. Kuwapandele kutuhuka mu tunwa tweni.

14 “Munapande kunjilingila bilika lutatu ha mwaka. 15 Munapande kulinga Cilika ca Makende a Kujeneka Musima. Mukalya makende a kujeneka musima ha matangwa 7 ngwe munjinamishiki, ha simbu injinangula mu ngonde ya Abibu* mwafwa ei ikeyo simbu imwatundile mu Ijipiti. Naumo wahi napande kwija kuli yange maboko-boko. 16 Co lalo munapande kulinga Cilika ca Kuteja* bushuka buje bunalibanga kuhya buje bumwafwitanganene kulima mu mahya eni. Co ku mamaneselelo a mwaka mumukakungulula bimbuto bya mamaneselelo bimukateja, mukalinge Cilika ca Kukungulula.* 17 Co lutatu ha mwaka, banalume boshe hakati keni banapande kuya kuli Mwata wa busunga, Yehova.

18 “Mumwana mulambu wa maninga kuli yange, keti muwane na cuma coshe-coshe cili na musima. Co milambu ya mazi imunjana ha bilika byange kuyapandele kukala butsiki bwoshe kweta na mutondo.

19 “Munapande kunena bushuka bwabubwa ku njibo yange Yehova Njambi yeni buje bunalibanga kuhya mu mahya eni.

“Keti muteleke muna membe mu mabele a ina.

20 “Njituma kangelo uje atwama kulutwe lweni mangana aminyungilile mu ngila na kumitwala ku mwela unjinamibwahesela. 21 Mutolilileni na kwononoka lijwi lyendi. Keti mumutengulukile, mwafwa kakakonekela milonga yeni, mwafwa lizina lyange lili hali ikeye. 22 Oloni nga mwononoka bene lijwi lyendi na kulinga byoshe byamileka, co njikapwa citozi ca bitozi beni na kulwisa baje bamilwisa. 23 Mwafwa kangelo kange akatwama kulutwe lweni, co akamitwala ku baAmoli, na baHiti, na baPerizite, na baKanana, na baHivite, na baJebusi, co njikabanyongesa. 24 Keti mukatsikamene binjambi babo nambe kutaba bamikokweye mubapangele, co lalo keti mukatembwinine bilinga byabo. Co lalo munapande kukapujula tumponya babo na kutika bingunzi byabo bibakalemesa. 25 Munapande kupangela yange Yehova Njambi yeni, co njikamibezikisa ha kumyana byakulya na mema. Njikatundisa mishongo mukati keni. 26 Banakazi ba mu lifuti lyeni kubakapulumwisa nambe kujeneka kukita bana, co njikamilingisa muyoye myaka yaingi.

27 “Njikalingisa banu banjizibile lyoba simbu kanda mwete, co njikatanganesa banu boshe bamukaliwana nabo na kulingisa bitozi beni boshe bakatewe mumukabahyana. 28 Simbu kanda mwete, njikalingisa bitozi beni bazibe lyoba, co baHivite, na baKanana na baHiti bakatewa ku mesho eni. 29 Kunjikabatundisamo mu mwaka umolika mangana lifuti keti likapwe ngundu, co lalo tusitu ba mu shwata keti bakasemunwine na kupwa babangi. 30 Njikabatundisamo kamandondo-kamandondo kweta noho hamukapwila mu babangi na kuswana lifuti.

31 “Binginga byeni njikabishangumukila ku Kalunga-ndonga wa Kubenga kweta na ku kalunga-ndonga wa baFilistiya, na kutunda mu mambo kweta na ku Ndonga ya Yufreti, mwafwa njikana banu bomu mu lifuti mu maboko eni, co mukabasheka mu lifuti. 32 Keti mukalikumiiye nabo nambe kulikumiiya na binjambi babo. 33 Keti bakale mu lifuti lyeni kutewa bamyungumuna na kumilingisa mulinge bubi kuli yange. Nga mukapangela binjambi babo, co ukapwa muheto kuli yeni.”

24 Co Yehova walekele Mosesa ngwendi: “Yeni ku munkinda, yobe na Aloni na Nadabu na Abihu na bakulunu ba Isalele 70, co mukatsikamene halako. 2 Yobe lika Mosesa unapande kushwena kuli yange Yehova, oloni aba bakweni kubapandele kushwena kuno, co na banu boshe kubapandele kwija nobe.”

3 Co Mosesa waile na kuleka banu majwi a Yehova oshe na mashiko endi oshe, co banu boshe bakumbulwilile hamolika ngwabo: “Byoshe byanendeka Yehova tubilinga na mbunge imo.” 4 Co Mosesa wasonekele majwi a Yehova oshe. Co wendukile mutondo-tondo na kutunga mutula na kushimbika bingunzi 12 ku munkinda kwesekesa na miyati 12 ya Isalele. 5 Munima yebi, watumine bakwenje ba baIsalele, co banene bwana bwa kwenyeka na kutsiila Yehova bingombe ba nkomba kupwa milambu ya kulila hamo. 6 Co Mosesa wambatele hafu ya maninga na kuyaka mu malonga, co hafu ikwabo ya maninga waishamwinine ku mutula. 7 Co Mosesa wambatele libulu lya cikumiiyo na kulitandela banu. Co bendekele ngwabo: “Byoshe byanendeka Yehova tubilinga na mbunge imo, co lalo tumwononoka.” 8 Co Mosesa wambatele maninga na kuwashamwina banu, co wendekele ngwendi: “Awa anapu maninga a cikumiiyo canalikumiiya neni Yehova kwesekesa nawa majwi oshe.”

9 Ngeci Mosesa na Aloni na Nadabu na Abihu na bakulunu ba Isalele 70 baile, 10 co bamwene Njambi ya Isalele. Mwisi ya mendi endi mwakele cuma ca kufwa ngwe mamanya a safaya abanajala, co casholokele ngwe lilu lije linaki mwamubwa. 11 Njambi katsiile baje banalume ba kutsimana ba baIsalele, co bamwene cimona ca Njambi wa busunga, co balile na kunwa.

12 Co Yehova walekele Mosesa ngwendi: “Ija kuno ku munkinda wakukaleko. Njakukwana bimbazubwila bya mamanya haje hali mashiko na byuma binjishaka ngwange banu balinge bije binjibasonekela.” 13 Co Mosesa na Joshua uje wapwile muka-kumupangela bakatukile, co Mosesa waile ku munkinda wa Njambi wa busunga. 14 Oloni Mosesa simbu kanda aye walekele bakulunu ngwendi: “Tubandameneni hano kweta noho hatukelukila. Aloni na Hule aba. Woshe ali na ñanda asa kuinena kuli bakebo.” 15 Co Mosesa wakandukile ha munkinda oku lishelwa linafwiki uje munkinda.

16 Bumpau bwa Yehova bwatwaleleleleho kukala ha Munkinda wa Sinai, co lishelwa lyaufwikile ha matangwa 6. Ha litangwa lya bu 7, Njambi wasanene Mosesa kutundilila mu lishelwa. 17 Ku baIsalele baje bakele na kumona, bumpau bwa Yehova bwamonekele ngwe tuhya tuje tuli na kushukuma helu lya munkinda. 18 Co Mosesa wakobelele mu lishelwa na kukanduka ha munkinda. Wakele ha munkinda matangwa 40, butsiki na mutanya.

25 Co Yehova walekele Mosesa ngwendi: 2 “Leka banu ba Isalele ngwobe banjakele mulambu kumukulo. Njambateleni mulambu kuli munu woshe uje alyana kwana mulambu. 3 Mulambu umunapande kutambula ku banu ou: goldi, siuva, kopa, 4 bwanda bwa blu, bwanda bwa pepo, bwanda bwa kubenga, bwanda bwa lineni yaibwa, bwaka bwa bimembe, 5 bilambu bya bimanga ba nkomba bibanalombo bulombo bwa kubenga, bilambu bya binyundu, miti ya akesha, 6 mazi a mu bindeya, bosamu ya kupangesa mazi a kubwabesa na ya kupangesa isense ya lwengo lwalubwa, 7 na mamanya a onikisi, na mamanya akwabo abaka ha efodi na ha kananga ka ha nulo. 8 Banapande kunjitungila mwela wa kujela, co njikala mukati kabo. 9 Unapande kutunga tabanakele na bikwata byamwo byoshe. Unapande bene kukabangeya binjili na kukumwesa.

10 “Banapande kupanga cikasha ca muti wa akesha. Mu bulaha cipwe makyubiti* abali na hafu, mu bwihi cipwe kyubiti imo na hafu, co mu bulaha bwa kuya mwilu cipwe kyubiti imo na hafu. 11 Co munapande kucikwita goldi yaibwa. Munapande kucikwita mukati na hanja, co kwilu munapande kuzengulwisako mungilingili wa goldi. 12 Co munapande kucipangela makulo a goldi awana na kuwaka helu lya mendi awana eci cikasha. Ku sambwa limo kukale makulo abali, co ku sambwa likwabo nakwo kukale makulo abali. 13 Co munapande kushonga biti bya muti wa akesha na kubikwita goldi. 14 Munapande kushomeka bije biti mu makulo ali ku mitambela ibali ya cije Cikasha mangana mwase kwambatelaho cije Cikasha. 15 Ebi biti binapande kukala mu makulo a Cikasha. Kumwapandele kubishomonamo. 16 Unapande kwaka Bukaleho bunjikwana mu Cikasha.

17 “Unapande kupanga cifwiko ca goldi yaibwa. Mu bulaha cipwe makyubiti abali na hafu, co mu bwihi cipwe kyubiti imo na hafu. 18 Unapande kupanga bakerubi babali ba goldi. Unapande kulinga ba kufula na kubaka ku bishongo bibali bya cifwiko. 19 Aka baje bakerubi babali ku bishongo bibali bya cifwiko. Kerubi umo akale ku shongo imo, mukwabo akale ku shongo ikwabo. 20 Baje bakerubi banapande kujangumwina mambaba abo abali mwilu. Banapande kufwika cije cifwiko na mambaba abo, co banapande kulitala oku banakulamena ha cifwiko. 21 Unapande kufwika cije cifwiko ha Cikasha, co muje mu Cikasha unapande kwakamo Bukaleho bunjikwana. 22 Njikalisholola kuli yobe haje helu lya cifwiko na kusimutwiya nobe kutundilila haje ha cifwiko. Co njikakuleka byuma byoshe binjishaka ngwange baIsalele balinge kutundilila mukati ka bakerubi babali baje bali ha Cikasha ca Bukaleho.

23 “Unapande kushonga mesa ya muti wa akesha. Mu bulaha ipwe makyubiti abali, mu bwihi ipwe kyubiti imo, co mu bulaha bwa kuya mwilu ipwe kyubiti imo na hafu. 24 Unapande kuikwita goldi yaibwa na kuizengulwisa na mungilingili wa goldi helu. 25 Unapande kuzengulwisa ije mesa na libaya lya kupwa hamo na mbanda ya liboko,* co lije libaya ulizengulwise na mungilingili wa goldi kwisi. 26 Unapande kupanga makulo a goldi awana na kuwaka mu bimbango biwana bya mesa, haje hawanakwatela mendi ayo awana. 27 Makulo anapande kukala hayehi na lije libaya mangana bashomekemo biti bya kwambatesa ije mesa. 28 Unapande kushonga biti bya muti wa akesha na kubikwita goldi, co bikebyo bimukapangesa mu kwambata mesa.

29 “Unapande lalo kupanga malonga a ha mesa na binganja na binjaba na tumalonga, bije bibakapangesa ku bwana bwa byakunwa. Unapande kubipanga na goldi yaibwa. 30 Co simbu yoshe unapande kwaka makende a kumwesa kuli yange Njambi ha mesa ku mesho ange.

31 “Unapande kupanga citumbikilo ca bindeya ca goldi yaibwa. Eci citumbikilo ca bindeya unapande kulinga ca kufula. Lisanda lyaco, na ngunzi yaco, na minango yaco, na bintemo byaco, na matindi aco, na bishani byaco binapande kupwa cuma cimolika. 32 Co eci citumbikilo ca bindeya cinapande kukala na minango 6. Ku mutambela umo kunapande kukala minango itatu, co lalo na ku mutambela ukwabo kunapande kukala minango itatu. 33 Co munango na munango unapande kukala na bintemo bitatu bya kulifwa na bintemo bya omondi, na matindi na bishani mu kulishobasana. Co lalo munango na munango ku mutambela ukwabo unapande kukala na bintemo bitatu bya kulifwa na bintemo bya omondi, na matindi na bishani mu kulishobasana. Omu mukemwo muikapwa minango 6 ije itunda ha ngunzi ya citumbikilo ca bindeya. 34 Ha ngunzi ya citumbikilo ca bindeya hakale bintemo biwana bya kufwa ngwe bintemo bya omondi, na matindi, na bishani mu kulishobasana. 35 Mwisi ya minango ibali ya kulibanga ije itunda ha ngunzi ya citumbikilo ca bindeya mukale litindi, co litindi likwabo likale mwisi ya minango ibali ije inatako, co litindi likwabo lalo likale mwisi ya minango ibali ije inatako. Omu mukemwo muinapande kufwa minango yoshe ije itunda ha ngunzi. 36 Matindi na minango na citumbikilo ca bindeya byoshe binapande kupwa cuma cimolika ca kufula na goldi yaibwa. 37 Unapande kucipangela bindeya 7, co muukashwameka bije bindeya bikateteka kulutwe lwaco. 38 Bimana* byaco na bilahwilo byaco bya tuhya binapande kupwa bya goldi yaibwa. 39 Unapande kupanga eci citumbikilo ca bindeya hamolika nebi bikwata kutunda ha talenti* imo ya goldi yaibwa. 40 Unapande kumona ngwobe byoshe ebi ubipanga kwesekesa nomu munjakumweselelebyo ha munkinda.

26 “Unapande kupanga tabanakele na binanga 10 bya tenti ya bwanda bwa kwosa bwa lineni yaibwa, na bwanda bwa blu, na bwanda bwa pepo, na bwanda bwa kubenga. Unapande kutalekaho bakerubi. 2 Nanga na nanga ya tenti inapande kupwa makyubiti* 28 mu bulaha, co mu bwihi inapande kupwa makyubiti awana. Binanga byoshe binapande kupwa hamolika. 3 Unapande kunungakana binanga bya tenti bitanu mangana bipwe nanga imolika, co unapande lalo kunungakana binanga bya tenti bikwabo bitanu mangana bipwe nanga imolika. 4 Ku shongo ya ije nanga ya tenti iunanungakana unapande kutongelako tumakulo twa bwanda bwa blu, co unapande kulinga cuma ca kulifwa na ku shongo ikwabo ya nanga ya tenti haje habiliwanena. 5 Ha nanga imo ya tenti unapande kutongelaho tumakulo 50, co na ku shongo ikwabo ya nanga ya tenti tongelako tumakulo 50 mangana tulitale haje hatuliwanena. 6 Unapande kupanga bikwateso 50 bya goldi, co ukanungakane bije binanga bya tenti kupangesa bije bikwateso mangana ije tabanakele ipwe cuma cimolika.

7 Unapande lalo kutonga binanga bya maka a bimembe bya kufwika ha tabanakele. Unapande kutonga binanga 11. 8 Nanga na nanga ya tenti mu bulaha inapande kupwa makyubiti 30, mu bwihi inapande kupwa makyubiti awana. Binanga byoshe bya kupwa 11 binapande kupwa hamolika. 9 Unapande kunungakana binanga bitanu na kunungakana binanga bikwabo 6, co unapande kweteka nanga ya bu 6 kulutwe lwa tenti. 10 Co ku shongo ya nanga imo ya tenti ije iunanungakana, unapande kutongelako tumakulo 50, na tumakulo 50 ku shongo ya nanga ikwabo ya tenti haje habiliwanena. 11 Unapande kupanga bikwateso bya kopa bya kupwa 50 na kukobelesa bije bikwateso muje mu tumakulo na kubinungakana hamolika, na kunungakana bije bitenti mangana bipwe cuma cimolika. 12 Nanga ya tenti ije ikasalako ikajenjele. Hafu ya ije nanga ya tenti ikasalako ikajenjele kunima ya tabanakele. 13 Co ku mutambela na mutambela kunapande kujenjela binanga bya tenti bya bulaha bwa kweta ku kyubiti imo, co unapande kubyecela bijenjele mangana bifwike tabanakele.

14 “Co lalo unapande kutonga cibubo ca bilambu bya bimanga ba nkomba na kucilomba bulombo bwa kubenga mangana ucifwike hakamwa ya tenti. Unapande lalo kutonga cibubo ca bilambu bya binyundu na kucifwika hakamwa.

15 “Unapande kupanga mafremu a tabanakele a muti wa akesha. Akapwe a kuya mu bulaha. 16 Fremu na fremu inapande kupwa makyubiti 10 mu bulaha bwa kuya mwilu, co mu bwihi ipwe kyubiti imo na hafu. 17 Fremu na fremu ikale na mendi abali aje abananungakana. Omu mukemwo muwanapande kufwila mafremu oshe a tabanakele. 18 Unapande kupanga mafremu 20 aje akala ku mbwela* ya tabanakele. Atalese ku mbwela.

19 “Unapande kupanga mena a siuva 40 muje mukobela aje mafremu 20. Mena abali a siuva akale mwisi ya fremu imo mangana mendi ayo abali akobelemo, co mena abali a siuva akale mwisi ya fremu na fremu inatako mangana mendi ayo abali akobelemo. 20 Ku mutambela ukwabo wa tabanakele, ku kunto,* pangelako mafremu 20, 21 na mena awo a siuva 40, co mena abali a siuva akale mwisi ya fremu imo, co mena abali a siuva akwabo akale mwisi ya fremu na fremu inatako. 22 Co kunima ya tabanakele, ku bulahukilo bwa litangwa unapande kupangelako mafremu 6. 23 Unapande kupanga mafremu abali mangana apwe bingunzi bibali bya kunima bya mu bimbango bya tabanakele. 24 Awa mafremu anapande kupwa abali kutunda kwisi kweta kwilu, co anapande kuketa na ku likulo lya kulibanga. Omu mukemwo muunapande kulinga ku mafremu oshe abali, co akapwa bingunzi bibali bya mu mbango. 25 Co kukale mafremu 8 na mena a siuva 16. Mena abali a siuva akale mwisi ya fremu imo, co mena abali akwabo a siuva akale mwisi ya fremu na fremu imo inatako.

26 Unapande kushonga mabalo a muti wa akesha. Atanu apange ku mafremu a ku mutambela umo wa tabanakele, 27 co mabalo akwabo atanu apange ku mafremu a ku mutambela ukwabo wa tabanakele, co mabalo akwabo atanu apange ku mafremu a ku mutambela wa tabanakele wa ku bulahukilo bwa litangwa ku mutambela wa kunima. 28 Libalo lya hakati lije lita hakati ka mafremu, linapande kutunda kushongo imo kuketa na kushongo ikwabo.

29 “Aje mafremu unapande kuwakwita goldi, co unapande kupangelaho makulo a goldi muje mukobela mabalo, co aje mabalo nawo unapande kuwakwita goldi. 30 Unapande kutunga tabanakele kwesekesa na muje munjakumweselele ha munkinda.

31 “Unapande kutonga nanga na bwanda bwa blu, na bwanda bwa pepo, na bwanda bwa kubenga, na bwanda bwa kwosa bwa lineni yaibwa. Unapande kutalekaho bakerubi. 32 Unapande kuishukika ha bingunzi biwana bya akesha bya kukwita goldi. Bimbambo bya kushukikaho nanga binapande kupwa bya goldi. Ebi bingunzi unapande kubishimbika mu mena a siuva awana. 33 Unapande kushukika nanga mwisi ya bikwateso na kunena cikasha ca Bukaleho muje mukati ka nanga. Ije nanga ikangununa Mwela wa Kujela na Mwela wa Kujela Manene. 34 Co unapande kufwika cifwiko ha cikasha ca Bukaleho na kucaka mu Mwela wa Kujela Manene.

35 “Unapande kwaka mesa ku sambwa lya nanga, co citumbikilo ca bindeya cikale ku mbwela* mu tabanakele, co cilitale na mesa. Co mesa ikale ku kunto.* 36 Co unapande kutonga nanga ya ha cikolo ca tenti. Uitonge na bwanda bwa blu, na bwanda bwa pepo, na bwanda bwa kubenga, na bwanda bwa kwosa bwa lineni yaibwa. Unapande kubitongela hamolika. 37 Unapande kushonga bingunzi bitanu bya muti wa akesha ha kwaka ije nanga, co ubikwite goldi. Bimbambo byabyo bipwe bya goldi, co unapande kupanga mena a kopa atanu muushimbika bije bingunzi.

27 “Unapande kupanga mutula wa muti wa akesha, co mu bulaha ou mutula unapande kupwa makyubiti* atanu, mu bwihi namwo upwe makyubiti atanu. Ou mutula unapande kupwa hamolika mu mitambela yoshe iwana, co mu bulaha bwa kuya mwilu unapande kupwa makyubiti atatu. 2 Unapande kupanga mambinga awo mu bimbango byawo biwana. Aje mambinga anapande kupwa mutamba wa mutula, co uje mutula unapande kuukwita kopa. 3 Unapande kupanga maleki a kukundwila lito* na mafosholo na malonga na binguto bya mishomo na bilahwilo bya tuhya, co bikwata bya ku mutula byoshe binapande kupwa bya kopa. 4 Unapande kupanga bwalo bwa mutula, bwa mishele ya kopa ya kushelasana, co mu bimbango byabwo biwana mukale makulo a kopa awana. 5 Unapande kubushomeka mwisi ya mungilingili wa mutula, co bukakala hakati ka mutula. 6 Unapande kushonga biti bya mutula bya muti wa akesha na kubikwita kopa. 7 Ebi biti ukabishomeke mu makulo mangana bikakale ku mitambela ibali ya mutula mumukawambata. 8 Unapande kupanga mutula wa mabaya wa kufwa ngwe cikasha ca mupulungwa mukati. Ukaupange ngwe muje bene munjakumweselele.

9 “Unapande kutunga lilapa lya tabanakele. Ku mbwela,* eli lilapa linapande kukala na binanga bya kutonga na bwanda bwa lineni bwa kwosa. Ou mutambela unapande kupwa makyubiti 100. 10 Linapande kukala na bingunzi 20 na mena a kopa 20. Bimbambo bya bije bingunzi na bikwateso* byabyo binapande kupwa bya siuva. 11 Mutambela wa ku kunto* unapande kukala na binanga bya makyubiti 100, na bingunzi 20 na mena 20 a kopa na bimbambo bya siuva na bikwateso* bya bingunzi. 12 Mu bwihi bwa lije lilapa ku bulahukilo bwa litangwa, linapande kukala na binanga bya makyubiti 50, na bingunzi 10 na mena a kopa 10. 13 Eli lilapa mu bwihi ku butuhukilo bwa litangwa lipwe makyubiti 50. 14 Ku mutambela umo kukale binanga bya makyubiti 15 na bingunzi bitatu na mena a kopa atatu. 15 Co ku mutambela ukwabo nakwo kukale binanga bya makyubiti 15 na bingunzi bitatu na mena a kopa atatu.

16 “Ha cikolo ca lilapa hanapande kukala nanga ya makyubiti 20 mu bulaha, ya kutonga na bwanda bwa blu, na bwanda bwa pepo, na bwanda bwa kubenga, na bwanda bwa kwosa bwa lineni yaibwa bubanatongela hamo. Co kunapande kukala na bingunzi biwana na mena awana. 17 Bingunzi byoshe bije bikazengeleka lilapa binapande kukala na bikwateso bya siuva na bimbambo bya siuva, oloni mena abyo anapande kupwa a kopa. 18 Eli lilapa linapande kupwa makyubiti 100 mu bulaha, na makyubiti 50 mu bwihi, na makyubiti atanu mu bulaha bwa kuya mwilu. Co binanga byalyo munapande kubitonga na bwanda bwa kwosa bwa lineni yaibwa, co linapande kukala na mena a kopa. 19 Bikwata byoshe na byuma bibapangesa ku tabanakele na bimbambo bya ku tenti na bimbambo bya ku lilapa byoshe binapande kupwa bya kopa.

20 “Unapande kuleka baIsalele ngwobe bakunenele mazi amabwa a olive a kwaka mu bindeya mangana ebi bindeya bishukume simbu yoshe. 21 Aloni na bana bendi banapande kumona ngwabo bindeya bishukuma ku mesho a Yehova kutunda mangwezi kweta mutondo, co ebi bindeya binapande kukala mu tenti ya kuliwanena, ku sambwa lya nanga ije ili kuyehi na cikasha ca Bukaleho. BaIsalele banapande kutwalelelaho kunyunga eli lishiko mu bisemwa byabo byoshe.

28 “Sana ndolome yobe Aloni na bana bendi ba banalume, co ubangunune ku baIsalele mangana bapwe tupilistu bange. Sana Aloni hamolika na Nadabu na Abihu na Elieza na Ithama, bana ba Aloni. 2 Unapande kutongela ndolome yobe Aloni bizalo bya kujela byabibwa bije bimwana bumpau. 3 Leka bitongwe boshe baje banjinashulisa na sipilitu ya mana batongele Aloni bizalo bya kumujelesa mangana apwe kapilistu wange.

4 “Banapande kutonga ebi bizalo: kananga ka ha nulo, efodi, mukanjo wa kujeneka maboko, mukanjo wa mifunda ya kulikikasana, nanga ya ku mutwe, na mwiba. Ebi bikebyo bizalo bya kujela bibanapande kutongela ndolome yobe Aloni na bana bendi ba banalume mangana bapwe tupilistu bange. 5 Baka-kupanga ba bitongwe banapande kupangesa goldi, na bwanda bwa blu, na bwanda bwa pepo, na bwanda bwa kubenga, na bwanda bwa lineni yaibwa.

6 “Efodi banapande kuitonga kupangesa goldi, na bwanda bwa blu, na bwanda bwa pepo, na bwanda bwa kubenga, na bwanda bwa kwosa bwa lineni yaibwa, co banapande kutalekaho mwamubwa. 7 Inapande kukala na mitamba ibali. Mutamba wa kulutwe na mutamba wa kunima banapande kubinungilila ha bitsili. 8 Mwiba wa nanga ubanatongela ha efodi, uje ubatongelaho mangana mubaukuta, efodi ikale mwamubwa, nawo banapande kuutonga na bwanda bubanatongesa efodi. Banapande kuutonga na goldi, na bwanda bwa blu, na bwanda bwa pepo, na bwanda bwa kubenga, na bwanda bwa kwosa bwa lineni yaibwa.

9 “Unapande kwambata mamanya abali a onikisi na kusonekaho mazina a bana ba Isalele ba banalume. 10 Unapande kusoneka mazina 6 ha limanya limo, co mazina 6 akwabo uwasoneke ha limanya likwabo, kushangumukila na mukulunu kukamanesa na mwanike. 11 Muka-kucakula mamanya akacakula mazina a bana ba Isalele haje ha mamanya abali ngwe mwakacakwila cizibukiso, co aje mamanya ukawake mu bikwatelo bya goldi. 12 Unapande kwaka mamanya abali ha binanga bya ha bitsili bya efodi mangana apwe canukiso ku bana ba Isalele, co Aloni napande kwambata mazina abo ha binanga byendi bibali bya ha bitsili kulutwe lwa Yehova mangana apwe canukiso. 13 Unapande kupanga bikwatelo bya goldi 14 na malyenge abali a goldi yaibwa abanazenge ngwe mukole, co awa malyenge anapande kukwata ku bikwatelo.

15 “Muka-kutaleka napande kutonga kananga ka ha nulo ka kusompesa. Kanapande kupwa ngwe efodi. Napande kukatonga kupangesa goldi, na bwanda bwa blu, na bwanda bwa pepo, na bwanda bwa kubenga, na bwanda bwa kwosa bwa lineni yaibwa. 16 Kanapande kupwa hamolika mu bulaha na mu bwihi nga baketeka. Mu bulaha na mu bwihi, kanapande kupwa hamolika na bulaha bwa kutunda ku munye wakama kweta ku kamunye kakandondo nga liboko linajangumuka.* 17 Unapande kwakaho mamanya. Akale mu mikana iwana. Mu mukana wa kulibanga mukale limanya lya rubi na lya topazi na lya emarodi. 18 Mu mukana wamucibali mukale limanya lya takoizi na lya safaya na lya jasipa. 19 Mu mukana wamucitatu mukale limanya lya leshemu* na lya agate na lya amitisi. 20 Co mu mukana wamuciwana mukale limanya lya krisoliti na lya onikisi na lya jedi. Awa mamanya anapande kukala mu bikwatelo bya goldi. 21 Awa mamanya anapande kwendelela na mazina a bana ba Isalele ba kupwa 12. Unapande kucakula limanya na limanya ngwe mubakacakula cizibukiso. Lizina na lizina limanene muyati umo ku miyati 12 ya Isalele.

22 “Unapande kupanga malyenge a kuzenga a kwaka ha kananga ka ha nulo a kufwa ngwe mikole ya goldi yaibwa. 23 Unapande kupanga makulo abali a goldi a ha kananga ka ha nulo, co awa makulo abali a goldi uwake ku bishongo bibali bya kwilu bya kananga ka ha nulo. 24 Unapande kushomeka awa malyenge abali a goldi omu mu makulo abali ali ku bishongo bya kananga ka ha nulo. 25 Unapande kushomeka awa malyenge abali mu bikwatelo bibali, co unapande kubikwatesa kulutwe lwa kananga ka ha nulo ka ha efodi. 26 Unapande kupanga makulo abali a goldi na kuwaka mu bimbango bibali bya kwisi bya mukati ya kananga ka ha nulo oku analitala na efodi. 27 Unapande kupanga makulo akwabo abali a goldi halutwe lwa efodi, mwisi ya binanga bibali bya ha bitsili, hayehi na haje habanabinungakanena, helu lya mwiba wa ha efodi. 28 Unapande kukuta kaje kananga ka ha nulo na mukole wa blu mangana kakale mu mwela wako. Unapande kwitisa uje mukole mu makulo a ku kananga na mu makulo a ku efodi. Oku kulingisa aka kananga ka ha nulo katumame mu mwela wako, ha efodi helu lya mwiba.

29 “Aloni mwakobela mu mwela wa kujela napande kwambata mazina a bana ba Isalele ha mbunge yendi ha kananga ka ha nulo ka kusompesa mangana simbu yoshe kapwe canukiso ku mesho a Yehova. 30 Unapande kwaka urimu na thamimu* mu kananga ka ha nulo ka kusompesa, co binapande kukala ha mbunge ya Aloni mwaija ku mesho a Yehova. Co Aloni napande kwambata ebi byuma simbu yoshe ha mbunge yendi ku mesho a Yehova mangana abipangese mu kusompa bana ba Isalele.

31 “Unapande kutonga mukanjo wa kujeneka maboko uje wazala mukati ka efodi, co woshe unapande kuutonga na bwanda bwa blu. 32 Uje mukanjo unapande kukala na singo mwakutuhwisila mutwe. Co muka-kutonga napande kungunda ku singo, kuzengulwisa kwoshe. Ije singo napande kuingunda mangana ikanyame ngwe singo ya cizalo ca liswalale, mangana keti itabuke. 33 Ku mungundo wa kwisi wou mukanjo unapande kutongelako tuma tumo twa kufwa ngwe mapomagraneti. Ututonge na bwanda bwa blu, na bwanda bwa pepo, na bwanda bwa kubenga, co unapande kutushobasana na bingenjo bya goldi. 34 Kuje ku mungundo wou mukanjo wa kujeneka maboko unapande kwakako ngenjo ya goldi, co pomagraneti, ngenjo ya goldi, co pomagraneti, kuzengulwisa kwoshe. 35 Aloni napande kuzala ou mukanjo mangana apange cipangi cendi, co bije bingenjo binapande kwohya mwakobela mu mwela wa kujela kulutwe lwa Yehova nomu mwatuhuka mangana keti atse.

36 “Unapande kufula kacikubo ka kulipasha ka kubyakuma ka goldi yaibwa na kusonekaho ngwe uje asoneka ha cizibukiso ngwobe: ‘Kujela kwapwa kwa Yehova.’ 37 Unapande kukakutiiya ha nanga ya ku mutwe na mukole wa blu. Kanapande kutwalelela kukala halutwe lwei nanga. 38 Kanapande kukala ha luholo lwa Aloni, co Aloni akalitabela nga munu alinga bubi kutalesa ku byuma bya kujela bije bibanajelesa baIsalele mubabyana kupwa bwana bwa kujela. Simbu yoshe kanapande kukala ha luholo lwendi mangana Yehova ase kubatambula.

39 “Unapande kutonga mukanjo wa mifunda ya kulikikasana ha lineni yaibwa na kutonga nanga ya ku mutwe ha lineni yaibwa na kutonga lalo mwiba wa nanga.

40 “Unapande kutongela lalo bana ba Aloni bizalo na miba na bya kuzala ku mitwe byabibwa bije bibana bumpau. 41 Unapande kuzika ndolome yobe Aloni na bana bendi bizalo byabo, co unapande kubabwabesa na kubangula kupwa tupilistu na kubajelesa, co bakapwa tupilistu bange. 42 Unapande kubatongela tuputula* twa lineni mangana tufwike mibila yabo. Tunapande kutunda mu mbunda kweta na ha matafu. 43 Aloni na bana* bendi ba banalume banapande kuzala otu tuputula ha simbu ibaija mu tenti ya kuliwanena nambe nga bashwena ku mutula mangana bapangele mu mwela wa kujela. Banapande kulinga ngoco mangana keti bakale na mulonga na kutsa. Eli linapu lishiko lya myaka na myaka kuli ikeye na kuli bana bendi baje bakaija munima yendi.

29 “Unapande kulinga ebi kuli Aloni na bana bendi mu kubajelesa mangana bapwe tupilistu bange: Ambata muna ngombe wa nkomba na bimanga babali ba nkomba ba kujeneka kapenga, 2 na makende a kujeneka musima, na makende a muzenguluke aje ali na bwina a kutika na mazi, na makende a kujeneka musima a kulipasha a kukwita mazi. Unapande kubipanga na fulawa yaibwa ya tiliku, 3 co byake mu cizuma na kubinena kulutwe lwange oku bili mu cizuma, hamolika na ngombe wa nkomba na bimanga babali ba nkomba.

4 “Unapande kunena Aloni na bana bendi ba banalume ku cikolo ca tenti ya kuliwanena, co bajwelese na mema. 5 Co unapande kuzika Aloni mukanjo wa mifunda ya kulikikasana, na mukanjo wa kujeneka maboko uje ukala mwisi ya efodi, na efodi, na kananga ka ha nulo, co unapande kukuta mwamubwa mwiba wa efodi mu mbunda yendi. 6 Unapande kukuta nanga ya ku mutwe ku mutwe wendi, co haje ha nanga unapande kwakaho cizibukiso ca kujela ca kumwesa kulikundika. 7 Co ambata mazi a kupangesa mu kubwabesa uwetile ha mutwe wendi mangana umubwabese.

8 “Co nena bana bendi ba banalume kulutwe lwange mangana ubazike mikanjo 9 na kukuta Aloni na bana bendi miba na kubakuta bya ku mitwe, co bupilistu bukapwa bwabo myaka na myaka. Omu mukemwo muunapande kwangwila Aloni na bana bendi ba banalume mangana bapwe tupilistu.

10 “Unapande kunena ngombe wa nkomba kulutwe lwa tenti ya kuliwanena, co Aloni na bana bendi ba banalume bakakambeka maboko abo ha mutwe wa uje ngombe. 11 Ukatsiile uje ngombe ku mesho a Yehova, ku cikolo ca tenti ya kuliwanena. 12 Ukambwitike munye wobe mu maninga a uje ngombe na kukawakwita ku mambinga a mutula, co maninga oshe akasalaho ukawetile kwisi ya mutula. 13 Co unapande kwambata mazi oshe aje akafwiki ha mila, na mazi a ha lishuli, na binso bibali, na mazi aje akakala helu lyabyo, ubyenyeke mangana bwisi bwabyo bukakumuke ha mutula. 14 Oloni situ ya uje ngombe na cilambu cendi na tuzi twendi unapande kukabyenyekela hanja ya cilombo. Ebi binapu bwana bwa kufwika bubi.

15 “Kutundaho, ambatako umo kuli baje bimanga ba nkomba, co Aloni na bana bendi ba banalume bakambeke maboko abo ha mutwe wa uje manga. 16 Tsiya uje manga, co ambata maninga endi na kuwashamwina mu mitambela yoshe ya uje mutula. 17 Teta uje manga mu bipuka-bipuka, co kusha mila yendi na mendi endi na kwaka mwamubwa bije bipuka hamolika na mutwe. 18 Unapande kwenyeka uje manga woshe, co napande kukakumuka bwisi ha mutula. Napu bwana bwa kwenyeka bubana kuli Yehova bwa lwengo lwalubwa. Napu bwana bwa kwenyeka mu tuhya bubana kuli Yehova.

19 “Kutundaho, ambata uje manga mukwabo, co Aloni na bana bendi ba banalume bakambeke maboko abo ha mutwe wa uje manga. 20 Unapande kutsiya ou manga, co wambate maninga endi amo na kuwakwita ku shongo ya litwi lya Aloni lya ku cilyo na ku bishongo bya matwi a bana bendi a ku cilyo na ku minye yabo yakama ya ku maboko ya ku cilyo na ku minye yabo yakama ya ku mendi ya ku cilyo, co shamwina maninga mu mitambela yoshe ya mutula. 21 Co ambata maninga amo aje ali ha mutula na mazi amo a kupangesa mu kubwabesa, co ubishamwine hali Aloni na ha bizalo byendi na hali bana bendi na ha bizalo bya bana bendi, mangana ikeye na bizalo byendi na bana bendi na bizalo byabo bapwe ba kujela.

22 “Co kuli uje manga ambatako mazi. Ambatako mukila uli na mazi, na mazi aje anafwiki mila, na mazi aje anafwiki lishuli, na binso bibali na mazi aje aliho, na lindi lya cilyo, mwafwa napu manga wa kupangesa mu kwangula. 23 Ambata lalo likende lya mubundungulu, na likende lya muzenguluke lije lili na bwina lya kutika na mazi, na likende lya kulipasha, bije bili mu cizuma ca makende a kujeneka musima cije cili ku mesho a Yehova. 24 Co unapande kwaka byoshe ebi mu maboko a Aloni na mu maboko a bana bendi ba banalume, co unapande kubihwingisa noku-noku ha kupwa mulambu wa kuhwingisa ku mesho a Yehova. 25 Kutundaho, unapande kubyambata mu maboko abo na kubyenyeka ha mutula, helu lya bwana bwa kwenyeka mangana bipwe lwengo lwalubwa kuli Yehova. Binapu bwana bwa kwenyeka mu tuhya bubana kuli Yehova.

26 “Co ambata situ ya nulo ya uje manga wa nkomba wa kupangesa mu kwangula, uje ibananenako Aloni na kuihwingisa noku-noku ha kupwa mulambu wa kuhwingisa ku mesho a Yehova, co ikapwa yobe. 27 Unapande kujelesa situ ya nulo ije ibanana kupwa bwana bwa kuhwingisa, na lindi lije libanana kupwa mutamba wa kujela uje ubanahwingisa, uje lalo ubanambata kuli manga wa kupangesa mu kwangula, uje ibananenako Aloni na bana bendi ba banalume. 28 Ei mitamba ikapwa ya Aloni na bana bendi ba banalume, kwesekesa na lishiko lya myaka na myaka libanapande kwononoka baIsalele, mwafwa inapu mitamba ya kujela, co baIsalele banapande kwana ei mitamba ya kujela. Inapu mitamba yabo ya kujela ije ibanana Yehova kutunda ha milambu yabo ya kulila hamo.

29 “Bana ba Aloni baje bakamwinga bakapangese bizalo bya kujela bya Aloni mubakababwabesa na kubangula kupwa tupilistu. 30 Munendi uje akamwinga ha bupilistu, uje akaija na kupangela mu tenti ya kuliwanena mu mwela wa kujela, akazala ebi bizalo ha matangwa 7.

31 “Unapande kwambata uje manga wa kupangesa mu kwangula na kutelekela situ yendi mu mwela wa kujela. 32 Aloni na bana bendi banapande kulya ije situ ya uje manga, na makende aje ali mu cizuma ku cikolo ca tenti ya kuliwanena. 33 Banapande kulya byuma bije bibanapangesa kupwa mulambu wa kukonekela bubi mubanabangula kupwa tupilistu na kubajelesa, oloni munu uje kubatabesele* kapandele kulya ebi byuma mwafwa binapu bya kujela. 34 Nga situ imo ya mulambu wa kwangula isalako, na makende amo asalako kweta na mutondo, co munapande kubyenyeka mu tuhya. Kumwapandele kubilya, mwafwa binapu bya kujela.

35 “Omu mukemwo muunapande kulinga kuli Aloni na bana bendi kwesekesa na byuma byoshe binjinakushiki. Eci cipangi ca kubangula kupwa tupilistu cinapande kwambata matangwa 7. 36 Tangwa na tangwa unapande kwana ngombe wa nkomba kupwa bwana bwa kufwika bubi mangana ulombe likonekelo kuli Njambi, co unapande kujelesa mutula ku bubi ha kwana mulambu wa kukonekela bubi na kubwabesa uje mutula na mazi mangana uujelese. 37 Ha matangwa 7 ukana mulambu wa mutula wa kukonekela bubi, co unapande kuujelesa mangana upwe mutula wa kujela manene. Woshe akwata ou mutula napande kupwa wa kujela.

38 “Ebi bikebyo biukana ha mutula: unapande kwana bimanga babali ba nkomba ba mwaka umolika ha litangwa na litangwa. 39 Manga umolika ukamwane ku mutondo, co mukwabo ukamwane munima ya kulahuka kwa litangwa simbu kanda kuzibale. 40 Uje muna manga wa nkomba wa kulibanga unapande kumwanena hamolika na mutamba wa bu 10 wa efa* ya fulawa yaibwa ya kukumbasana na mutamba wamuciwana wa hini* ya mazi amabwa na mutamba wamuciwana wa hini ya binyu bya bwana bwa byakunwa. 41 Unapande kwana uje muna manga wa nkomba wamucibali mulilahuka litangwa simbu kanda kuzibale. Unapande kumwana hamolika na fulawa na bwana bwa byakunwa ngwe bije biunapangesele mutondo. Unapande kubyana kupwa bwana bwa kwenyeka mu tuhya bubana kuli Yehova, co lwengo lwabyo lukamuzibisa kubwaha. 42 Mu bisemwa byeni byoshe munapande kutwalelelelaho kwana obu bwana bwa kwenyeka ku cikolo ca tenti ya kuliwanena ku mesho a Yehova, kuje kunjikalisholwela kuli yeni na kwendeka neni.

43 “Njikalisholola kuli baIsalele oku ku mwela, co bumpau bwange bukalingisa uje mwela upwe wa kujela. 44 Njikajelesa ije tenti ya kuliwanena, na mutula, na kujelesa Aloni na bana bendi ba banalume mangana bakanjipangele cipangi ca bupilistu. 45 Njikakala hakati ka banu ba Isalele, co yange njikapwa Njambi yabo. 46 Co cili bene bakazibuka ngwabo yange Yehova Njambi yabo uje wabatundisile mu lifuti lya Ijipiti mangana njikale hakati kabo. Yange Yehova Njambi yabo.

30 “Unapande kupanga mutula kupwa mwela wa kwenyekela isense. Unapande kuupanga na muti wa akesha. 2 Ou mutula ukapwe hamo mu bulaha na mu bwihi. Kyubiti* imo mu bulaha, kyubiti imo mu bwihi, na makyubiti abali mu bulaha bwa kuya mwilu. Mambinga awo akapwe cuma cimolika na mutula. 3 Unapande kuukwita goldi yaibwa helu lyawo na mu mikulo yawo mwoshe na mambinga awo oshe, co kwilu yawo unapande kuzengulwisako mungilingili wa goldi. 4 Unapande kupanga lalo makulo abali a goldi mwisi ya mungilingili, co akale ku mitambela ibali you mutula, co omu mukemwo mubakashomeka biti bya kwambatesa mutula. 5 Unapande kushonga ebi biti bya muti wa akesha na kubikwita goldi. 6 Unapande kuwaka kulutwe lwa nanga ije ili kuyehi na cikasha ca Bukaleho, kulutwe lwa cifwiko cije cili helu lya cikasha ca Bukaleho, kuje kunjikalisholwela kuli yobe.

7 “Mutondo na mutondo, Aloni akenyeka isense ya lwengo lwalubwa haje ha mutula, co hakakakumuka bwisi ha simbu yakabwahesa bindeya. 8 Co lalo Aloni mwakashwameka bindeya munima ya kulahuka kwa litangwa simbu kanda kuzibale, akenyeke isense. Obu bunapu bwana bwa isense bumukana kuli Yehova mu bisemwa byeni byoshe. 9 Kuwapandele kwanenaho isense ije kunjatabesele, nambe bwana bwa kwenyeka, nambe bwana bwa binona, co kuwapandele kwitilaho bwana bwa byakunwa. 10 Aloni napande kukwita maninga amo a cimuna wa kupangesa ku bwana bwa kufwika bubi ku mambinga a mutula mangana aujelese. Napande kulinga ngoco lumo mu mwaka mu bisemwa byeni byoshe. Ou mutula unapu wa kujela manene kuli Yehova.”

11 Co Yehova walekele Mosesa ngwendi: 12 “Ha simbu iusoneka na kutanda bana ba Isalele, munu na munu napande kwana Yehova ndando ya kupatula kuyoya kwendi ha simbu iubasoneka. Banapande kulinga ngoco mangana keti bakobele mu bukalu mubalisonekesa. 13 Ebi bikebyo bibanapande kwana boshe baje banalisonekesa: hafu ya shekele* kwesekesa na kulema kwa shekele ya mu mwela wa kujela.* Shekele imo inapu hamo na magira* 20. Hafu ya shekele inapu mulambu wa Yehova. 14 Woshe ibanasoneka uje ali na myaka 20 kuya kwilu akana mulambu kuli Yehova. 15 Baka-kufuka kubapandele kwana byabingi bije bitubakana hafu ya shekele,* co na tuhutu nabo kubapandele kwana bije kubyete ha hafu ya shekele kupwa mulambu kuli Yehova, mangana mupatule kuyoya kweni. 16 Unapande kwambata bimbongo bya siuva kuli baIsalele bya kukonekela bubi bwabo, co ubyane mangana babipangese mu bipangi bya ku tenti ya kuliwanena. Ebi bimbongo bikapwa canukiso kuli yange Yehova hali baIsalele, co bikapatula kuyoya kweni.”

17 Yehova walekele lalo Mosesa ngwendi: 18 “Fula lilonga lya kopa lya kutanena na citumbikilo calyo, co lyake mukati ka mutula na tenti ya kuliwanena, co itilamo mema. 19 Kuje kukekwo kwakatanena Aloni na bana bendi ku maboko na ku mendi. 20 Mubakobela mu tenti ya kuliwanena, nambe mubashwena ku mutula mangana bapange bipangi, nomwo mubana bwana bwa kwenyeka mangana bwisi bukakumukile kuli Yehova, banapande kutana omu mu mema mangana keti batse. 21 Banapande kutana ku maboko na ku mendi mangana keti batse, co eli linapande kupwa lishiko lya myaka na myaka kuli bakebo, kuli Aloni na bana bendi mu bisemwa byabo byoshe.”

22 Yehova walekele lalo Mosesa ngwendi: 23 “Kutundaho, ambata mazi a lwengo lwalubwa manene, biseteko 500 bya mira ya kulikwata, na biseteko 250 bya sinamoni ya kupwelelela, na biseteko 250 bya kalamasi ya kupwelelela, 24 na biseteko 500 bya kashia bya kupima kwesekesa na kulema kwa shekele ya mu mwela wa kujela,* hamolika na hini* ya mazi a olive. 25 Co ha byuma ebi pangaho mazi a kujela a kupangesa mu kubwabesa. Byoshe unapande kubishinga mwamubwa. Binapande kupwa mazi a kujela akupangesa mu kubwabesa.

26 “Awa mazi unapande kuwapangesa mu kubwabesa tenti ya kuliwanena, na cikasha ca Bukaleho, 27 hamolika na mesa na bikwata byayo byoshe, na citumbikilo ca bindeya na bikwata byaco, na mutula wa isense, 28 na mutula wa kwenyekela bwana na bikwata byawo byoshe, na lilonga lyawo na citumbikilo calyo. 29 Unapande kubijelesa mangana bipwe bya kujela manene. Woshe abikwata napande kupwa wa kujela. 30 Unapande kubwabesa Aloni na bana bendi na kubajelesa mangana banjipangele cipangi ca bupilistu.

31 “Unapande kuleka baIsalele ngwobe, ‘Awa mazi ange a kupangesa mu kubwabesa atwalelelaho kupwa a kujela mu bisemwa byeni byoshe. 32 Awa mazi kumwapandele kuwakwita ha mubila wa munu, co kumwapandele kupanga mazi eka a kulifwa nawo. Anapu a kujela, co anapande kupwa a kujela kuli yeni. 33 Woshe apanga mazi a kulifwa nawa na kwambatako amo na kuwakwita munu uje kubatabesele,* banapande kumutsiya.’”

34 Co Yehova walekeke Mosesa ngwendi: “Ambata biseteko bya kupwa hamo bya awa mazi: stakiti, onika, kaubanamu ya lwengo lwalubwa na isense ya kutoka ya kujela. 35 Ebi byuma unapande kubipanga isense, ubishinge mwamubwa, wakeko mwongwa, bipwe byabibwa, bya kujela. 36 Unapande kutwako isense imo mangana ipwe bunga na kwambatako bumo mangana ubwake ha cikasha ca Bukaleho mu tenti ya kuliwanena kuje kunjikasholoka kuli yobe. Inapande kupwa ya kujela manene kuli yobe. 37 Kuwapandele kulipangela isense ya kulifwa nei ya kupangesa yobe babenya. Unapande kuimona kupwa ya kujela kuli Yehova. 38 Woshe alipangela isense ya kulifwa nei mangana alikuwe lwengo lwayo lwalubwa munapande kumutsiya.”

31 Yehova watwaleleleleho kuleka Mosesa ngwendi: 2 “Tala, njinangula Bezalele muna Uli, mutekulya Hule wa ku muyati wa Juda. 3 Njikamushulisa na sipilitu yange na kumwana mana, na kuzibisisa, na mangana a kuzibuka bipangi byoshe bya bangangula, 4 bya kutaleka mwamubwa byuma, na bya kupanga byuma bya goldi na siuva na kopa, 5 na bya kuteta na kushonga mamanya, na bya kushonga byuma bya biti bya miyati yoshe. 6 Njinangula Oholiyabu muna Ahisamaki wa ku muyati wa Dani mangana amukwase, co njili na kwaka mana mu bimbunge bya baje boshe bali na butongwe* mangana bapange byuma byoshe binjinakushiki. Bapange: 7 tenti ya kuliwanena, cikasha ca Bukaleho na cifwiko caco, na bikwata byoshe bya ku tenti, 8 na mesa na bikwata byayo byoshe, na citumbikilo ca bindeya ca goldi yaibwa na bikwata byaco byoshe, na mutula wa kwenyekela isense, 9 na mutula wa kwenyekela bwana na bikwata byawo byoshe, na lilonga na citumbikilo calyo, 10 na bizalo bya kutonga mwamubwa na bizalo bya kujela bya kapilistu Aloni, na bizalo bya bana bendi mangana bapange cipangi ca bupilistu, 11 na mazi a kupangesa mu kubwabesa, na isense ya lwengo lwalubwa ya mu mwela wa kujela. Bakalinge byuma byoshe binjinakushiki.”

12 Yehova walekele lalo Mosesa ngwendi: 13 “Leka baIsalele ngwobe, ‘Munapande kunyunga bisabata byange mwafwa binapu cimweso mukati kange neni mu bisemwa byeni byoshe mangana muzibuke ngweni yange Yehova, yange njili na kumijelesa. 14 Munapande kunyunga Sabata mwafwa inapu ya kujela kuli yeni. Woshe aijwalesa munapande kumutsiya. Nga munu apanga cipangi coshe-coshe ha litangwa lya Sabata, co owo munu munapande kumutsiya. 15 Mwasa kupanga bipangi ha matangwa 6, oloni litangwa lya bu 7 linapu sabata, linapu litangwa lya kuhwima lya kulitila, linapu lya kujela kuli Yehova. Woshe apanga bipangi ha litangwa lya sabata munapande kumutsiya. 16 BaIsalele banapande kunyunga Sabata. Banapande kunyunga ei Sabata mu bisemwa byabo byoshe. Inapu cikumiyo ca myaka na myaka. 17 Inapu cizibukiso ca myaka na myaka mukati kange na bana ba Isalele, mwafwa yange Yehova njatangele melu na lifuti-libu ha matangwa 6, co ha litangwa lya bu 7 njahwimine na kushubuluka.’”

18 Co Njambi mwamanesele lika kwendeka na Mosesa ha Munkinda wa Sinai, wanene Mosesa bimbazubwila bibali bya Bukaleho, bimbazubwila bya mamanya haje habanasoneka na munye wa Njambi.

32 Banu bamwene ngwabo Mosesa neshwala kutunda ku munkinda. Ngeci baje banu bazengelekele Aloni na kumuleka ngwabo: “Tupangele njambi uje atutwamenena, mwafwa kutuzibuka binalingiwa kuli Mosesa uje watutundisile mu lifuti lya Ijipiti.” 2 Aloni mwazibile ngoco, wabalekele ngwendi: “Ambateni masikiyo a goldi aje ali ku matwi a banakazi beni, na bana beni ba banalume, na bana beni ba banakazi muwanene kuli yange.” 3 Ngeci banu boshe batundisile masikiyo a goldi aje akele ku matwi abo, co bawanenele kuli Aloni. 4 Co wambatele goldi kuli bakebo na kupanga kamponya wa muna ngombe kupangesa shinjo. Bendekele ngwabo: “Obe Isalele, ou ikeye Njambi yobe uje wakutundisile mu lifuti lya Ijipiti.”

5 Aloni mwamwene ngoco, watungile mutula kulutwe lwa uje kamponya, co watambekele ngwendi: “Imene tulingila Yehova cilika.” 6 Ngeci, lyamukwabo banu bendukile mutondo-tondo, co banene bwana bwa kwenyeka na kunena milambu ya kulila hamo. Kutundaho, banu batumamene hasi na kulya na kunwa, co bakatukile na kulisamba.

7 Co Yehova walekele Mosesa ngwendi: “Sikumuka hasi mwafwa banu bobe bawatundisile mu lifuti lya Ijipiti banalijwalesa. 8 Banatundu laja mu ngila injabashikile ngwange bendemo. Banalipangela kamponya wa muna ngombe, co bali na kumutsikamena na kumwana milambu na kwendeka ngwabo, ‘Obe Isalele, ou ikeye Njambi yobe uje wakutundisile mu lifuti lya Ijipiti.’” 9 Yehova walekele lalo Mosesa ngwendi: “Njinamono ngwange aba banu banapu ba kutindibala. 10 Ngeci imana njibanyongese mu butenu bwange, co njikalingisa yobe upwe muyati wakama.”

11 Ngeci, Mosesa walambelelele Yehova Njambi yendi ngwendi: “Obe Yehova bika biwecelela butenu bwobe buwile banu bobe munima ya kubatundisa mu lifuti lya Ijipiti na nzili yobe yakama na liboko lyobe lya nzili? 12 Nga ulinga ngoco, co baka-Ijipiti bendeka ngwabo, ‘Njambi yabo nakala na biyongola byabibi mwanabatundisile muno. Nashakele kubatsiila mu minkinda na kubanyongesa hano ha lifuti-libu.’ Ngeci, tula matoto obe na kutengulula bisinganyeka byobe bya kushaka kwana banu bobe kashitiko. 13 Anuka muwalikumiiye na ngamba yobe Abrahamu, Isaki na Isalele ngwobe: ‘Njikatumisa bana* beni ngwe bingongonosi bya mwilu, co njikana eli lifuti lyoshe linjinangula kuli bana* beni mangana likapwe buswana bwabo myaka yoshe.’”

14 Ngeci Yehova watengulwile bisinganyeka byendi bya kunena kashitiko kendekele ngwendi anena hali banu bendi.

15 Co Mosesa watundile haje ha munkinda na kusikumuka hasi oku nambata bimbazubwila bibali bya mamanya a Bukaleho mu liboko lyendi. Ebi bimbazubwila bya mamanya babisonekele noku-noku. Byapwile bya kusoneka kulutwe na kunima. 16 Njambi ikeye wapangele awa mamanya a Bukaleho, co lalo ikeye wasonekele majwi akeleho. 17 Joshua mwazibile miyoyo ya banu bali na kutambeka, walekele Mosesa ngwendi: “Njili na kuziba ngwe banu bali na kulwa omu mu cilombo.” 18 Oloni Mosesa wakumbulwile ngwendi:

Oloni njili na kuziba miyoyo ya banu bali na kwimba mu cifwa ceka.”

19 Mosesa mwetele kuyehi na cilombo, wamwene uje muna ngombe wa kamponya na banu bali na kukina, co walubalele manene na kumbila bije bimbazubwila bya mamanya byakele mu liboko lyendi na kubitikila kuje ku munkinda. 20 Co wambatele uje kamponya wa muna ngombe ibapangele na kumwenyeka mu tuhya na kumutika bunga-bunga, co wombilile buje bunga mu mema na kunwisa baIsalele aje mema. 21 Co Mosesa wehwile Aloni ngwendi: “Aba banu banakungumuna bati mangana ubakobelese mu bubi bwakama ngacije?” 22 Aloni wakumbulwile ngwendi: “Keti ulubale mwata wange. Nobe uzibuka ngwobe aba banu bashaka kulinga byuma byabibi. 23 Ngeci bananjilekele ngwabo, ‘Tupangele njambi uje atutwamenena, mwafwa kutuzibuka binalingiwa kuli Mosesa uje watutundisile mu Ijipiti.’ 24 Mukemwo njinabalekele ngwange, ‘Woshe ali na cuma coshe-coshe ca goldi napande kucishulula na kunjanaco.’ Mukemwo njinombilile ije goldi mu tuhya, co mwatunda ou muna ngombe.”

25 Mosesa wamwene ngwendi aba banu bapwile ba kukaluwa bimbunge, mwafwa Aloni wabecelelele bakaluwise bimbunge byabo, ngeci balingile cuma ca shwamwa ku mesho a bitozi babo. 26 Co Mosesa wakemanene ku cikolo ca cilombo na kwendeka ngwendi, woshe ali ku mutambela wa Yehova aije kuno kuli yange.” Co baLevi boshe balikungulwilile kuli ikeye. 27 Co wabalekele ngwendi: “Yehova Njambi ya Isalele nendeka ngwendi, ‘Umo na umo weni ambate mukwale wendi, aite mu cilombo mwoshe, kutunda ku cikolo cimo kuya ku cikolo cikwabo, co atsiye ndolome yendi, munu yatunga nendi na kabusamba kendi wa ha mbunge.’” 28 BaLevi balingile byuma byabalekele Mosesa. Ngeci lije litangwa kwatsile banu ba kweta ku 3,000. 29 Co Mosesa wendekele ngwendi: “Lelo lijeleseni mangana mupange cipangi ca Yehova, mwafwa umo na umo weni nalwisi munendi na ndolome yendi. Lelo Njambi amibezikisa ha cuma cimunalingi.”

30 Lyamukwabo, Mosesa walekele banu ngwendi: “Munalingi bubi bwakama manene. Co hano njiya kuli Yehova mangana njikamone indi njasa kumulomba amikonekele bubi bweni.” 31 Ngeci Mosesa welukile kuli Yehova, co wakamulekele ngwendi aba banu banalingi bubi bwakama manene. Banalipangelele njambi wa goldi. 32 Oloni nga ushaka, konekela bubi bwabo. Nga nduma, co njikulomba utundise lizina lyange mu libulu lyobe liunasoneka.” 33 Oloni Yehova walekele Mosesa ngwendi: “Woshe nalingi bubi kuli yange ikeye injitundisa mu libulu lyange. 34 Yoni ukatwamenene banu ku mwela unjakulekele. Tala, kangelo kange akatwama kulutwe lwobe, co ha litangwa linjikasompa banu, njikabana kashitiko mwafwa ya bubi bwabo.” 35 Co Yehova wanene banu kashitiko mwafwa ya uje muna ngombe ibapangele, uje yapangele Aloni.

33 Yehova walekele lalo Mosesa ngwendi: “Katuka, tunda kuno hamolika naba banu bawatundisile mu lifuti lya Ijipiti. Yeni ku lifuti linjalisingile kuli Abrahamu na Isaki na Jakobu ngwange, ‘Njikalyana bana bobe.’ 2 Njikatuma kangelo kulutwe lwobe, co njikasheka baKanana, baAmoli, baHiti, baPerizite, baHivite, na baJebusi. 3 Yeni ku lifuti kuje kwalisala mabele na buki, oloni yange kunjii neni mwafwa mu banu ba kutindibala, co njasa kuminyongesela mu ngila.”

4 Banu mubazibile awa majwi a kutenuka, bazibile busiwa, co naumo wahi wazalele byuma bya kulicakeya.* 5 Yehova walekele Mosesa ngwendi: “Leka baIsalele ngwobe, ‘Mu banu ba kutindibala. Mu simbu yaindondo lika njasa kwita mukati keni na kuminyongesa. Ngeci, keti muzale byuma bya kulicakeya simbu njicisinganyeka binjilinga kuli yeni.’” 6 Ngeci, kutunda lika ku Munkinda wa Holebu, baIsalele kubazalele byuma bya kulicakeya.

7 Co Mosesa wambatele tenti yendi, wakaishimbikile hanja ya cilombo, halakoko na cilombo, co walukile ije tenti ngwendi tenti ya kuliwanena. Woshe washakele kwihula Yehova waile kuje ku tenti ya kuliwanena ije yakele hanja ya cilombo. 8 Mosesa mwakele na kuya kuje ku tenti, banu boshe bakele na kwimana ku bikolo bya bitenti byabo, co bakele na kumuyongola kweta noho hakobelelele muje mu tenti. 9 Mosesa mwakele na kukobela muje mu tenti, lishelwa lyakele na kwija na kwimana ku cikolo ca tenti oku Njambi endeka na Mosesa. 10 Banu boshe mubakele na kumona lije lishelwa* limana ku cikolo ca ije tenti, munu na munu wakele na kutsikama ku cikolo ca tenti yendi. 11 Yehova wendekele na Mosesa mesho na mesho ngwe munu endeka na mukwabo munu. Mosesa mwakele na kwiluka ku cilombo, Joshua muna Nuni, muka-kumupangela uje wapwile lalo mukwasi wendi, kakele na kutunda muje mu tenti.

12 Mosesa walekele Yehova ngwendi: “Tala, unanjileke ngwobe, ‘Twamenena aba banu,’ oloni kuwanjilekele iutuma ngwobe aye nange. Unendeka lalo ngwobe, ‘Njizibuka lizina lyobe,* co lalo unawana kutetela ku mesho ange.’ 13 Nga njinawana kutetela ku mesho obe, co njileke bingila byobe mangana njikuzibuke na kutwalelelaho kuwana kutetela ku mesho obe. Co lalo anuka ngwobe aba banu banapu banu bobe.” 14 Co Njambi wamulekele ngwendi: “Yange bene njiya nobe, co njikakuhwimisa.” 15 Co Mosesa wamukumbulwile ngwendi: “Nga kuui netu, co keti ututundise kuno. 16 Banu bakazibuka bati ngwabo yange na banu bobe tunawana kutetela ku mesho obe? Nga uya netu, co yange na banu bobe tukaliseza na banu boshe bali ha lifuti-libu.”

17 Yehova walekele Mosesa ngwendi: “Njilinga lalo neci cuma ciunalombo mwafwa unawana kutetela ku mesho ange, co njizibuka lizina lyobe.” 18 Co Mosesa wendekele ngwendi: “Njimwese bumpau bwobe.” 19 Oloni Njambi wendekele ngwendi: “Njikakumwesa bubwa bwange bwoshe, co njikambulula lizina lyange lya Yehova kuli yobe, co njikazibila ngozi woshe injishaka kuzibila ngozi, na kutetela woshe injishaka kutetela.” 20 Co wendekele lalo ngwendi: “Kuwasa kumona cihanga cange, mwafwa kukwesi munu anjimona atwalelelaho kuyoya.”

21 Yehova wendekele lalo ngwendi: “Kuli mwela ou uli hayehi nange. Imana aha ha limanya. 22 Munjikaita na kumwesa bumpau bwange, njikakwaka mu bwina bwa mu limanya, co njikakunyungilila na liboko lyange kweta noho hanjiketila. 23 Munima yebi, njikatundisa liboko lyange, co ukamona kunima yange, oloni kuukamono cihanga cange.”

34 Yehova walekele Mosesa ngwendi: “Shonga bimbazubwila bibali bya mamanya ngwe bije byakulibanga, co njikasoneka aha ha bimbazubwila majwi anjasonekele haje ha bimbazubwila byakulibanga biunatikile. 2 Libwahesele bya imene mwafwa mutondo uya ku Munkinda wa Sinai, co ukemana ku mesho ange helu lyou munkinda. 3 Oloni naumo wahi napande kukaya nobe, co kuje ku munkinda keti kukakale munu, nameme bene matanga a bimanga na bingombe kuwapandele kukalila kuyehi na uje munkinda.”

4 Ngeci Mosesa washongele bimbazubwila bya mamanya bibali ngwe bije byakulibanga, co wendukile mutondo-tondo na kuya ku Munkinda wa Sinai ngwe mwamushikile Yehova. Co wambatele bije bimbazubwila bibali bya mamanya mu maboko endi. 5 Co Yehova wasikumukile mu lishelwa, co wakwimanene nendi haje ha munkinda na kwambulula lizina lyendi lya Yehova. 6 Yehova wakele na kwita kulutwe lwa Mosesa na kwendeka ngwendi: “Yange Yehova, yange Yehova, Njambi muka-kutetela na mema ku mbunge, uje kesi kulubala bwasi, co wakala manene na cizemo cije kucesi kutenguluka, na busunga. 7 Njikamwesa cizemo cije kucesi kutenguluka ku banu babangi na kukonekela banu baje balinga milonga na kupokola mashiko na kulinga bubi, oloni kunjikecelela munu uje napande kutambula kashitiko kwa kujeneka kumwana kashitiko. Njikana kashitiko ku bana na batekulu na batekulwila mwafwa ya milonga ya baishabo.”

8 Co bwasi-bwasi Mosesa watsikamene na kukulamena hasi. 9 Co wendekele ngwendi: “Yehova, nga njinawana kutetela ku mesho obe, co njikulomba Yehova uye hamo netu nameme tu banu ba kutindibala, co konekela milonga yetu na bubi bwetu na kututambula kupwa banu bobe.” 10 Co Njambi wakumbulwile ngwendi: “Njili na kulikumiiya neni ngwange: Njikalinga byuma byabibwa ku mesho a banu bobe bije kanda bicilingiweho laja mu mafuti oshe a ha lifuti-libu, co banu boshe baje bamukatunga nabo bakamona bipangi byange Yehova mwafwa njimilingila cuma ca kukomokesa.

11 “Tolilileni binjimishika lelo. Njikasheka baAmoli, baKanana, baHiti, baPerizite, baHivite na baJebusi kulutwe lweni. 12 Nyanyameni mangana keti mukalikumiiye na banu batunga muje mu lifuti mumuli na kuya, keti ngoconi ukapwa muheto kuli yeni. 13 Oloni munapande kusiula mitula yabo na kutika bingunzi byabo bibakalemesa na kupokozola bisini byabo bibakalemesa. 14 Keti mukatsikamene njambi weka mwafwa yange Yehova njatonda* kunjilemesa angelika.* Nji Njambi uje watonda kumulemesa endilika. 15 Nyanyameni mangana keti mulinge cikumiiyo na banu ba muje mu lifuti mwafwa mubakalinga bupangala ha kulemesa binjambi babo na kwana milambu ku binjambi babo, bamo bakamilanya, co mukalya ku milambu yabo, 16 na kukambatela bana beni ba banalume bana babo ba banakazi, co bana babo ba banakazi bakalinga bupangala ha kulemesa binjambi babo na kulingisa bana beni ba banalume balinge bupangala ha kulemesa binjambi babo.

17 “Keti mukafule binjambi ba tumponya.

18 “Munapande kulinga Cilika ca Makende a Kujeneka Musima. Mukalya makende a kujeneka musima ngwe munjinamishiki. Munapande kukalinga ngoco ha matangwa 7 ha simbu injinangula mu ngonde ya Abibu,* mwafwa mwatundile mu Ijipiti mu ngonde ya Abibu.

19 “Bantwatwa boshe ba banalume banapu bange, kwambateselela na bimuna beni boshe, ipwe muna ngombe wa kulibanga nambe muna manga wa kulibanga wa nkomba. 20 Munapande kupatula donki* woshe wa kulibanga ha kumwingisa na manga. Nga kumumupatula, co munapande kumupokola singo. Munapande kupatula bana beni boshe ba banalume ba bantwatwa. Naumo wahi napande kwija kuli yange maboko-boko.

21 “Mukapanga ha matangwa 6, oloni ha litangwa lya bu 7 munapande kuhwima* nameme ha simbu ya kulima nambe ha simbu ya kuteja, munapande kuhwima.

22 “Co mukalinga cilika ceni ca byalumingo na tiliku imunateje ije inalibanga kuhya. Munapande kulinga lalo na cilika ca kukungulula* ku mamaneselelo a mwaka.

23 “Lutatu ha mwaka, banalume boshe hakati keni banapande kuya kuli Mwata wa busunga Yehova, Njambi ya Isalele. 24 Mwafwa njikasheka baka-mafuti kulutwe lweni na kwamesa mutambela weni, co naumo wahi akashungwiya lifuti lyeni ha simbu imukaija kuli yange Yehova Njambi yeni lutatu ha mwaka.

25 “Mumwana mulambu wa maninga kuli yange, keti muwane na cuma coshe-coshe cili na musima. Mulambu wa cilika ca Paseka kuwapandele kukala butsiki bwoshe kweta na mutondo.

26 “Munapande kunena bushuka bwabubwa ku njibo yange Yehova Njambi yeni buje bunalibanga kuhya mu mahya eni.

“Keti muteleke muna membe mu mabele a ina.”

27 Yehova walekele lalo Mosesa ngwendi: “Unapande kusoneka awa majwi mwafwa njili na kulinga cikumiiyo nobe na baIsalele kwesekesa nawa majwi.” 28 Co wakele kuje na Yehova butsiki na mutanya ha matangwa 40. Kalile cakulya nambe kunwa mema. Haje ha bimbazubwila bya mamanya wasonekeleho* majwi a cikumiiyo, Mashiko 10.*

29 Co Mosesa watundile haje ha Munkinda wa Sinai na bimbazubwila bibali bya mamanya bya bukaleho mu liboko lyendi. Mosesa mwashulukile haje ha munkinda, kazibukile ngwendi cihanga cendi cakele na kutuhula misha mwafwa nakala na kusimutwiya na Njambi. 30 Aloni na baIsalele boshe mubamwene Mosesa banangukile ngwabo cihanga cendi cakele na kutuhula misha, co bazibile lyoba kushwena kuyehi nendi.

31 Oloni Mosesa wabasanene, co Aloni na bamyata boshe ba mbunga ya Isalele bezile kuli ikeye, ngeci Mosesa washangumukile kusimutwiya nabo. 32 Munima yebi, baIsalele boshe bezile kuyehi nendi, co wabanene mashiko amwanene Yehova ku Munkinda wa Sinai. 33 Mosesa mwakele na kumanesa kusimutwiya nabo wakele na kufwika nanga ku mesho endi. 34 Oloni Mosesa mwakele na kuya kulutwe lwa Yehova na kukasimutwiya nendi, wakele na kutundisa ije nanga ku mesho endi kweta noho hakele na kutundilako. Kutundaho, waile kuli baIsalele na kukabaleka mashiko anatambula. 35 BaIsalele bamwene ngwabo cihanga ca Mosesa cakele na kutuhula misha, co Mosesa wafwikile ije nanga ku mesho endi kweta noho hailililile na kukasimutwiya na Njambi.*

35 Mu kwita kwa simbu, Mosesa wakungulwile mbunga yoshe ya baIsalele, co wabalekele ngwendi: “Yehova natushiki ngwendi tulinge ebi byuma: 2 Mwasa kupanga bipangi ha matangwa 6, oloni litangwa lya bu 7 linapu litangwa lya kujela kuli yeni, linapu sabata, linapu litangwa lya kuhwima lya kulitila lya kujela kuli Yehova. Woshe apanga bipangi ha litangwa eli bakamutsiya. 3 Keti mubweke tuhya mu myela yeni ha litangwa lya Sabata.”

4 Co Mosesa walekele mbunga yoshe ya baIsalele ngwendi: “Yehova natushiki ngwendi, 5 ‘Lambwileni Yehova. Woshe ali na mbunge ya kwana ane mulambu kuli Yehova: goldi, siuva, kopa, 6 bwanda bwa blu, bwanda bwa pepo, bwanda bwa kubenga, bwanda bwa lineni yaibwa, bwaka bwa bimembe, 7 bilambu bya bimanga ba nkomba bibanalombo bulombo bwa kubenga, bilambu bya binyundu, miti ya akesha, 8 mazi a mu bindeya, bosamu ya kupangesa mazi a kubwabesa na ya kupangesa isense ya lwengo lwalubwa, 9 na mamanya a onikisi, na mamanya akwabo abaka ha efodi na ha kananga ka ha nulo.

10 “‘Bitongwe boshe hakati keni baije bakupange byuma byoshe byanatushiki Yehova. 11 Ebi binapu tabanakele na tenti yayo na cibubo cayo, na bikwateso byayo na mafremu ayo, na mabalo ayo, na bingunzi byayo, na mena ayo, 12 Cikasha na biti byaco, na cifwiko, na nanga ya kwangunwisa, 13 na mesa na biti byayo na bikwata byayo byoshe na makende a kumwesa kuli Njambi, 14 na citumbikilo ca bindeya ca kutetekesa na bikwata byaco na bindeya byaco na mazi abyo, 15 na mutula wa kwenyekela isense na biti byawo, na mazi a kupangesa mu kubwabesa na isense ya lwengo lwalubwa, na nanga ya ha cikolo ca tabanakele, 16 na mutula wa kwenyekela bwana na cikubo ca kopa ca ku lishelasana ca ku mutula na biti byawo na bikwata byoshe, na malonga na citumbikilo cawo, 17 na binanga bya lilapa, na bingunzi byalyo na mena alyo, na nanga ya ku cikolo ca lilapa, 18 na bimbambo bya ku tenti ya ku tabanakele na bimbambo bya ku tenti ya ku lilapa na mikole yabyo, 19 na bizalo bya kutonga mwamubwa bya kupangesa mu mwela wa kujela, na bizalo bya kujela bya kapilistu Aloni, na bizalo bya bana bendi bya kupangesa mu cipangi ca bupilistu.’”

20 Ngeci, mbunga yoshe ya baIsalele yatundile ku mesho a Mosesa. 21 Co boshe baje bakele na bimbunge bya kwana na sipilitu ya kwana banenele milambu yabo kuli Yehova mangana baipangese ku tenti ya kuliwanena, na ku bipangi byayo byoshe, na ku bizalo bya kujela. 22 Batwaleleleleho kwija, banalume na banakazi, boshe bakele na bimbunge bya kwana banenele byuma bya kulicakeya, masikiyo, mariñi na byuma byeka bya senga, hamolika na byuma bya kuliseza-seza bya goldi. Boshe banene bwana* bwabo bwa goldi kuli Yehova. 23 Co boshe baje bakele na bwanda bwa blu, na bwanda bwa pepo, na bwanda bwa kubenga, na bwanda bwa lineni yaibwa, na bwaka bwa bimembe, na bilambu bya bimanga ba nkomba bya kulomba bulombo bwa kubenga, na bilambu bya binyundu, byoshe babinenele. 24 Boshe baje bakele na bwana bwa siuva na kopa babwanene Yehova, co lalo boshe baje bakele na miti ya akesha ya kupangesa ku bipangi byoshe nabo bainenele.

25 Banakazi boshe ba bitongwe bosele bwanda na maboko abo, co banenele bibosele: bwanda bwa blu, bwanda bwa pepo, bwanda bwa kubenga, na bwanda bwa lineni yaibwa. 26 Co banakazi boshe ba bitongwe baje bakele na bimbunge bya kwana bosele maka a bimembe.

27 Co bamyata banenele mamanya a onikisi na mamanya akwabo akwaka ha efodi na ha kananga ka ha nulo, 28 na bosamu na mazi a kupangesa mu bindeya na mazi a kubwabesa na mazi a kupangesa isense ya lwengo lwalubwa. 29 Banalume na banakazi boshe baje bakele na bimbunge bya kwana baneneleko byuma bimo bya kupangesa mu cipangi cashikile Yehova kwitila muli Mosesa ngwendi bacilinge. BaIsalele babinenele kuli Yehova kupwa bwana bwa kutundilila kwisi ya bimbunge byabo.

30 Co Mosesa walekele baIsalele ngwendi: “Yehova nangula Bezalele muna Uli mutekulya Hule, wa ku muyati wa Juda. 31 Namushulisa na sipilitu yendi na kumwana mana na kuzibisisa na mangana a kuzibuka bipangi byoshe bya bangangula 32 bya kutaleka mwamubwa byuma, na bya kupanga byuma bya goldi na siuva na kopa, 33 na bya kuteta na kushonga mamanya, na bya kushonga byuma bya biti bya miyati yoshe. 34 Co naka cashu ca kulongesa mu bimbunge byabo, mu mbunge ya Bezalele na mu mbunge ya Oholiyabu muna Ahisamaki, wa ku muyati wa Dani. 35 Nabana cashu ca kupanga bipangi byoshe bya bangangula, bya baka-kutaleka, na baka-kutonga kupangesa bwanda bwa blu, na bwanda bwa pepo, na bwanda bwa kubenga, na bwanda bwa lineni yaibwa, na cashu ca baka-kupanga binanga. Aba banalume bakapanga bipangi bya miyati yoshe na byuma bya butongwe* bya kuliseza-seza.

36 “Bezalele akapanga hamo na Oholiyabu na banalume boshe ba bitongwe baje babanana mana kuli Yehova na kuzibisisa mangana bazibuke mwakupangela bipangi byoshe bya kujela ngwe mwanatushiki Yehova.”

2 Co Mosesa wasanene Bezalele na Oholiyabu na banalume boshe ba bitongwe baje babanene mana kuli Yehova, baje boshe bakele na bimbunge bya kulyana kupanga cipangi. 3 Co bambatele bwana bwoshe kuli Mosesa buje bubanenele baIsalele ku cipangi ca kujela. Oloni baIsalele batwaleleleleho kunena bwana bwa kutundilila kwisi ya bimbunge byabo mutondo na mutondo.

4 Co mubashangumukile cipangi ca kujela, bitongwe boshe bashangumukile kwija umo na umo. 5 Bakele na kuleka Mosesa ngwabo: “Banu bali na kunena byuma byabingi kutubakana bije bitondeka mu cipangi canatushiki Yehova ngwendi tulinge.” 6 Ngeci Mosesa washikile ngwendi bane mutambi mu cilombo ngwabo: “Keti munene lalo milambu ya kujela.” Ngeci banu bababindikile kunena byuma bikwabo. 7 Ebi byuma byasele kumanesa cipangi coshe na kusalaho.

8 Ngeci bitongwe boshe bapangele tabanakele na binanga 10 bya tenti ya kutonga na bwanda bwa kwosa bwa lineni yaibwa, na bwanda bwa blu, na bwanda bwa pepo, na bwanda bwa kubenga. Co Bezalele watalekeleho bakerubi. 9 Nanga na nanga ya tenti yapwile makyubiti* 28 mu bulaha, co mu bwihi yapwile makyubiti awana. Binanga byoshe byapwile hamolika. 10 Co wanungakanene bitenti bya binanga bitanu hamolika na kunungakana lalo bitenti bya binanga bikwabo bitanu hamolika. 11 Munima yebi, watongelele tumakulo twa bwanda bwa blu ku shongo ya nanga imo ya tenti haje habiliwanena. Co walingile cuma ca kulifwa na ku shongo ikwabo ya nanga ya tenti haje habiliwanena. 12 Watongelele tumakulo 50 ha nanga imo na kutongela lalo tumakulo tukwabo 50 ku shongo ya nanga ikwabo haje habiliwanena. Tuje tumakulo twalitalele. 13 Mamaneselelo, wapangele bikwateso 50 bya goldi na kunungakana bije binanga kupangesa bikwateso. Ngeci tabanakele yapwile cuma cimolika.

14 Kutundaho, watongele binanga bya maka a bimembe bya kufwika ha tabanakele. Watongele binanga 11. 15 Nanga na nanga ya tenti yapwile makyubiti 30 mu bulaha, co mu bwihi yapwile makyubiti awana. Binanga byoshe 11 byapwile hamolika. 16 Kutundaho, wanungakanene binanga bitanu na kunungakana binanga bikwabo 6. 17 Co lalo watongelele tumakulo 50 ku shongo ya ije nanga haje habiliwanena na kutongela tumakulo 50 ku shongo ya nanga ikwabo ije yaliwanene nayo. 18 Co wapangele bikwateso bya kopa bya kupwa 50 bya kunungakanesa ije tenti mangana ipwe cuma cimolika.

19 Watongele cibubo ca bilambu bya bimanga ba nkomba na kucilomba bulombo bwa kubenga mangana acifwike hakamwa ya tenti. Co watongele lalo cibubo ca bilambu bya binyundu ca kufwika hakamwa.

20 Co wapangele mafremu a tabanakele a muti wa akesha aje emanene lwii. 21 Fremu na fremu yapwile makyubiti 10 mu bulaha bwa kuya mwilu, co mu bwihi yapwile kyubiti imo na hafu. 22 Fremu na fremu yakele na mendi abali abanungakanene. Omu mukemwo mwapangelele mafremu oshe a tabanakele. 23 Ngeci wapangele mafremu a ku mbwela* ya tabanakele. Wapangele mafremu 20 aje atalele ku mbwela. 24 Co wapangele mena a siuva a kupwa 40 muje mukobela aje mafremu 20. Mena abali a siuva akele mwisi ya fremu imo mangana mendi ayo abali akobelemo, co mena abali a siuva akele mwisi ya fremu na fremu inatako mangana mendi ayo abali akobelemo. 25 Ku mutambela ukwabo wa tabanakele, ku kunto,* wapangeleleko mafremu 20, 26 na mena awo a siuva 40. Co mena abali a siuva akele mwisi ya fremu imo, co mena abali a siuva akwabo akele mwisi ya fremu na fremu yateleko.

27 Co kunima ya tabanakele, ku bulahukilo bwa litangwa wapangeleleko mafremu 6. 28 Wapangele mafremu abali mangana apwe bingunzi mu bimbango bibali bya tabanakele bya kunima. 29 Awa mafremu apwile abali kutunda kwisi kutwala kwilu, co aketele na ku likulo lya kulibanga. Omu mukemwo mwapangelele bingunzi bibali bya mu bimbango. 30 Ngeci aje mafremu apwile 8 na mena awo a siuva 16, co mena abali a siuva akele mwisi ya fremu na fremu.

31 Co washongele mabalo a muti wa akesha. Atanu apangele ku mafremu a ku mutambela umo wa tabanakele, 32 co akwabo atanu apangele ku mafremu a ku mutambela ukwabo wa tabanakele, co akwabo atanu apangele ku mafremu a ku mutambela wa tabanakele wa ku bulahukilo bwa litangwa ku mutambela wa kunima. 33 Co washongele libalo lya hakati lije lyetile hakati ka mafremu kutunda ku shongo imo kuketa na ku shongo ikwabo. 34 Aje mafremu wawakwitile goldi, co wapangeleleho makulo a goldi muje mwakobelele mabalo, co aje mabalo nawo wawakwitile goldi.

35 Co watongele nanga na bwanda bwa blu, na bwanda bwa pepo, na bwanda bwa kubenga, na bwanda bwa kwosa bwa lineni yaibwa, co watalekeleho bakerubi. 36 Co waishongelele bingunzi bya akesha biwana na kubikwita goldi na kufula bimbambo bya goldi na kupanga mena abyo awana a siuva. 37 Kutundaho, watongele nanga ya ha cikolo ca tenti. Waitongele na bwanda bwa blu, na bwanda bwa pepo, na bwanda bwa kubenga, na bwanda bwa kwosa bwa lineni yaibwa. Wabitongelele hamolika. 38 Co lalo washongele bingunzi byayo bitanu na kufula bimbambo byayo. Wakwitile goldi kwilu ya bije bingunzi na bikwateso* byabyo, oloni mena abyo atanu apwile a kopa.

37 Co Bezalele wapangele Cikasha ca muti wa akesha. Capwile makyubiti* abali na hafu mu bulaha na kyubiti imo na hafu mu bwihi na kyubiti imo na hafu mu bulaha bwa kuya mwilu. 2 Wacikwitile goldi yaibwa mukati na hanja na kucizengulwisa na mungilingili wa goldi. 3 Kutundaho, wacipangelele makulo a goldi awana na kuwaka helu lya mendi awana a cikasha. Ku sambwa limo kwakele makulo abali, co ku sambwa likwabo nakwo kwakele makulo abali. 4 Mwamanesele, washongele biti bya muti wa akesha na kubikwita goldi. 5 Co washomekele bije biti bya kwambatesa Cikasha mu makulo aje akele ku mitambela ibali ya cije Cikasha.

6 Wapangele cifwiko ca goldi yaibwa. Mu bulaha capwile makyubiti abali na hafu, co mu bwihi capwile kyubiti imo na hafu. 7 Co wafulile bakerubi babali ba goldi na kubaka ku bishongo bibali bya cifwiko. 8 Kerubi umo wakele ku shongo imo ya cifwiko, co kerubi mukwabo wakele ku shongo ikwabo ya cifwiko. Wafulile bakerubi na kubaka ku bishongo bibali bya cifwiko. 9 Baje bakerubi babali bajangumwinine mambaba abo mwilu na kufwika cije cifwiko na mambaba abo, co balitalele oku banakulamena ha cifwiko.

10 Kutundaho, washongele mesa ya muti wa akesha. Mu bulaha yapwile makyubiti abali, mu bwihi yapwile kyubiti imo, co mu bulaha bwa kuya mwilu yapwile kyubiti imo na hafu. 11 Co waikwitile goldi yaibwa na kuizengulwisa na mungilingili wa goldi. 12 Kutundaho, wazengulwisile ije mesa na libaya lya kupwa hamo na mbanda ya liboko,* co lije libaya walizengulwisile na mungilingili wa goldi. 13 Co lalo wapangele makulo a goldi awana na kuwaka mu bimbango biwana bya mesa haje hawakwatelele mendi ayo awana. 14 Aje makulo akele hayehi na lije libaya mangana bashomekemo biti bya kwambatesa ije mesa. 15 Co washongele biti bya muti wa akesha na kubikwita goldi, co bikebyo bibapangesele mu kwambata mesa. 16 Kutundaho, wapangele bikwata bya ha mesa. Wapangele malonga ayo na binganja byayo na tumalonga twayo na binjaba byayo bije bibakapangesa ku bwana bwa byakunwa. Byoshe wabipangele na goldi yaibwa.

17 Wapangele citumbikilo ca bindeya ca goldi yaibwa. Walingile ca kufula. Lisanda lyaco na ngunzi yaco na bintemo byaco na matindi aco na bishani byaco byapwile cuma cimolika. 18 Eci citumbikilo ca bindeya cakele na minango 6 ije yatundile ha ngunzi yaco. Ku mutambela umo kwakele minango itatu, co lalo na ku mutambela ukwabo kwakele minango itatu. 19 Co munango na munango wakele na bintemo bitatu bya kulifwa na bintemo bya omondi, na matindi, na bishani mu kulishobasana. Co lalo munango na munango ku mutambela ukwabo wakele na bintemo bitatu bya kulifwa na bintemo bya omondi, na matindi, na bishani mu kulishobasana. Omu mukemwo muyafwile minango 6 ije yatundile ha ngunzi ya citumbikilo ca bindeya. 20 Ha ngunzi ya citumbikilo ca bindeya hakele bintemo biwana bya kufwa ngwe bintemo bya omondi, na matindi, na bishani mu kulishobasana. 21 Mwisi ya minango ibali ya kulibanga ije yatundile ha ngunzi ya citumbikilo ca bindeya, mwakele litindi, co litindi likwabo lyakele mwisi ya minango ibali ije yateleko, co litindi likwabo lalo lyakele mwisi ya minango ibali ije yateleko. Omu mukemwo muyafwile minango yoshe ije yatundile ha ngunzi ya citumbikilo ca bindeya. 22 Matindi na minango na citumbikilo ca bindeya, byoshe byapwile cuma cimolika ca kufula na goldi yaibwa. 23 Wacipangelele bindeya 7 na bimana* byaco na bilahwilo byaco bya tuhya, co byoshe byapwile bya goldi yaibwa. 24 Wapangele eci citumbikilo ca bindeya hamolika na bikwata byaco byoshe kutunda ha talenti* imo ya goldi yaibwa.

25 Co washongele mutula wa kwenyekela isense wa muti wa akesha. Wapwile hamolika mu mitambela yoshe. Mu bulaha wapwile kyubiti imo, mu bwihi wapwile kyubiti imo, co mu bulaha bwa kuya mwilu wapwile makyubiti abali. Mambinga a mutula apwile cuma cimolika nawo. 26 Waukwitile goldi yaibwa helu lyawo na mu mikulo yawo mwoshe na mambinga awo oshe, co kwilu yawo wazengulwisileko mungilingili wa goldi. 27 Wapangele makulo abali a goldi mwisi ya mungilingili, co wawakele ku mitambela ibali you mutula mangana bashomekemo biti bya kwambatesa mutula. 28 Kutundaho, washongele biti bya muti wa akesha na kubikwita goldi. 29 Co lalo wapangele mazi a kujela a kupangesa mu kubwabesa, na isense yaibwa ya lwengo lwalubwa. Byapwile bya kushinga mwamubwa.

38 Wapangele mutula wa muti wa akesha wa kwenyekela bwana bwa kwenyeka. Ou mutula wapwile hamo mu mitambela yoshe. Wapwile makyubiti* atanu mu bulaha, makyubiti atanu mu bwihi, na makyubiti atatu mu bulaha bwa kuya mwilu. 2 Kutundaho, wapangele mambinga awo mu bimbango byawo biwana. Awa mambinga apwile cuma cimolika na mutula, co uje mutula waukwitile kopa. 3 Kutundaho, wapangele bikwata byoshe bya ku mutula. Wapangele maleki na mafosholo na malonga na binguto bya mishomo na bilahwilo bya tuhya. Bikwata byoshe bya ku mutula byapangele byapwile bya kopa. 4 Co lalo wapangele bwalo bwa mutula, bwa mishele ya kopa ya kushelasana na kubushomeka mwisi ya mungilingili wa mutula hakati ka mutula. 5 Wapangele makulo awana mu bimbango biwana kuyehi na buje bwalo bwa mishele ya kopa ya kushelasana mangana bashomekelemo biti. 6 Kutundaho, washongele biti bya akesha na kubikwita kopa. 7 Washomekele bije biti bya kwambatesa mutula mu makulo aje akele kumikulo ya uje mutula. Wapangele mutula wa mabaya wa kufwa ngwe cikasha ca mupulungwa mukati.

8 Co wafulile lilonga lya kopa na citumbikilo calyo. Wabipangele ha biponi* bya banakazi baje bakele na kupangela ku cikolo ca tenti kwesekesa nomu mubabwaheselele.

9 Co watungile lilapa lya tabanakele. Ku mbwela,* eli lilapa lyakele na binanga bya kutonga na bwanda bwa lineni bwa kwosa, bije byapwile makyubiti 100. 10 Eli lilapa lyakele na bingunzi 20 na mena a kopa 20, co bimbambo bya bingunzi na bikwateso* byabyo byapwile bya siuva. 11 Co lalo mutambela wa ku kunto* wakele na binanga bya makyubiti 100. Bingunzi byabyo 20 na mena abyo 20 byapwile bya kopa. Bimbambo bya bingunzi na bikwateso* byabyo byapwile bya siuva. 12 Oloni ku bulahukilo bwa litangwa kwakele binanga bya makyubiti 50. Eli lilapa lyakele na bingunzi 10 na mena a kopa 10, co bimbambo bya bije bingunzi na bikwateso byabyo byapwile bya siuva. 13 Eli lilapa lyapwile makyubiti 50 mu bwihi ku butuhukilo bwa litangwa. 14 Ku mutambela umo kwakele binanga bya makyubiti 15 na bingunzi bitatu na mena a kopa atatu. 15 Co ku mutambela ukwabo wa cikolo ca lilapa nakwo kwakele binanga bya makyubiti 15 na bingunzi bitatu na mena a kopa atatu. 16 Binanga byoshe bije byazengelekele lilapa byapwile bya lineni yaibwa ya kwosa. 17 Mena a bije bingunzi apwile a kopa. Bimbambo bya bije bingunzi na bikwateso byabyo byapwile bya siuva. Kwilu wabikwitile siuva, co bingunzi byoshe bya lije lilapa byakele na bipatekeso bya siuva.

18 Nanga ya ha cikolo ca lilapa baitongele na bwanda bwa blu, na bwanda bwa pepo, na bwanda bwa kubenga, na bwanda bwa kwosa bwa lineni yaibwa. Ei nanga yapwile makyubiti 20 mu bulaha na makyubiti atanu mu bulaha bwa kuya mwilu. Yapwile hamo na binanga bya lilapa. 19 Bingunzi byalyo biwana na mena alyo awana byapwile bya kopa. Bimbambo byabyo byapwile bya siuva. Kwilu ya bije bingunzi na bikwateso byabyo babikwitile siuva. 20 Bimbambo bya ku tenti na bimbambo bya ku lilapa byoshe byapwile bya kopa.

21 Ebi byuma binatako bikebyo bibapangesele mu kutunga tabanakele, ije inapu tabanakele ya Bukaleho. Mosesa washikile baLevi ngwendi batande ebi byuma mu kubatwamenena kuli Ithama muna Aloni uje wapwile kapilistu. 22 Bezalele muna Uli mutekulya Hule wa ku muyati wa Juda walingile byuma byoshe byashikile Yehova kuli Mosesa. 23 Wapangele hamo na Oholiyabu muna Ahisamaki wa ku muyati wa Dani, uje wapwile ngangula na muka-kutaleka na muka-kutonga na bwanda bwa blu, na bwanda pepo, na bwanda kubenga, na bwanda bwa lineni yaibwa.

24 Goldi yoshe ibapangesele ku bipangi byoshe bya ku mwela wa kujela yapwile hamo na goldi ya bwana bwa kuhwingisa. Yapwile matalenti* 29 na mashekele 730, kwesekesa na kulema kwa shekele* ya mu mwela wa kujela.* 25 Co siuva ibanenele banu baje basonekesele mazina abo yapwile matalenti 100 na mashekele 1,775, kwesekesa na kulema kwa shekele ya mu mwela wa kujela. 26 Munu na munu uje walisonekesele uje wakele na myaka 20 kuya kwilu, wanenele hafu ya shekele, kwesekesa na kulema kwa shekele ya mu mwela wa kujela, co aba banu bapwile 603,550.

27 Mena a mwela wa kujela abafulile na mena a nanga apwile matalenti 100. Mena 100 apwile hamo na matalenti 100. Ha talenti na talenti bafulileho bwina bumo. 28 Ha mashekele 1,775 wapangeleho bimbambo bya bingunzi, co kwilu yabyo wakwitileko siuva, co lalo wabinungakanene.

29 Kopa ya bwana bwa kuhwingisa yapwile matalenti 70 na mashekele 2,400. 30 Aha ha kopa wapangeleho mena a ku cikolo ca tenti ya kuliwanena, na mutula wa kopa, na cikubo cawo ca kopa ca kulishelasana, na bikwata byoshe bya ku mutula, 31 na mena a lilapa, na mena a ha cikolo ca lilapa, na bimbambo byoshe bya ku tenti ya ku tabanakele, na bimbambo byoshe bya ku tenti na ku lilapa.

39 Buje bwanda bwa blu, na bwanda bwa pepo, na bwanda bwa kubenga babutongele bizalo byabibwa bya kupangesa mu mwela wa kujela. Batongelele Aloni bizalo bya kujela kwesekesa nebi byashikile Yehova kuli Mosesa.

2 Watongele efodi kupangesa goldi, na bwanda bwa blu, na bwanda bwa pepo, na bwanda bwa kubenga, na bwanda bwa kwosa bwa lineni yaibwa. 3 Bafulile bimbazubwila bya goldi na kubipasha, co wabitetangele mu bundondo mu bundondo ngwe tumikole na kubitongela hamo na bwanda bwa blu, na bwanda bwa pepo, na bwanda bwa kubenga, na bwanda bwa lineni yaibwa, co babitalekele. 4 Co bapangele mitamba ibali ya efodi ije ibanungakanene, co bainungakanenene ha bitsili. 5 Co lalo batongele mwiba wa bwanda bwa kulifwa. Bautongele kupangesa goldi, na bwanda blu, na bwanda bwa pepo, na bwanda bwa kubenga, na bwanda bwa kwosa bwa lineni yaibwa ngwe mwashikilile Yehova kuli Mosesa. Ou mwiba bautongelele ha efodi mangana mubaukuta, efodi ikale mwamubwa.

6 Co bakele aje mamanya a onikisi mu bikwatelo bya goldi, co basonekeleho mazina a bana ba Isalele ngwe mubakele na kusonekela ha cizibukiso. 7 Wakele aje mamanya ha binanga bya ha bitsili bya efodi mangana apwe canukiso ku bana ba Isalele ngwe mwashikile Yehova kuli Mosesa. 8 Co watongele kananga ka ha nulo mu butongwe ngwe muje mwakalingi muka-kutaleka, wakatongele ngwe mubatongelele efodi. Wakatongele kupangesa goldi, na bwanda bwa blu, na bwanda bwa pepo, na bwanda bwa kubenga, na bwanda bwa kwosa bwa lineni yaibwa. 9 Kapwile hamolika mu bulaha na mu bwihi mubaketekele. Batongele kananga ka ha nulo kaje kapwile hamolika mu bulaha na mu bwihi mubaketekele. Aka kananga kapwile hamolika na bulaha bwa kutunda ku munye wakama kweta ku kamunye kakandondo nga liboko linajangumuka.* 10 Bakeleho mikana iwana ya mamanya. Mu mukana wa kulibanga mwakele limanya lya rubi na lya topazi na lya emarodi. 11 Mu mukana wamucibali mwakele limanya lya takoizi na lya safaya na lya jasipa. 12 Mu mukana wamucitatu mwakele limanya lya leshimu* na lya agate na lya amitisi. 13 Co mu mukana wamuciwana mwakele limanya lya krisoliti na lya onikisi na lya jedi. Awa mamanya akele mu bikwatelo bya goldi. 14 Awa mamanya endelelele na mazina a bana ba Isalele ba kupwa 12, co aje mazina bawacakwile ngwe cizibukiso. Lizina na lizina lyemanenene muyati umo ku miyati 12 ya Isalele.

15 Co bapangele malyenge a kuzenga a kwaka ha kananga ka ha nulo a kufwa ngwe mikole ya goldi yaibwa. 16 Co bapangele bikwatelo bibali bya goldi na makulo abali a goldi na kwaka aje makulo abali ku bishongo bibali bya kwilu bya kananga ka ha nulo. 17 Kutundaho, bashomekele aje malyenge abali a goldi mu makulo abali aje akele ku bishongo bya kananga ka ha nulo. 18 Co bashomekele aje malyenge abali mu bikwatelo bibali, co babikwatesele kulutwe lwa kananga ka ha nulo, halutwe lwa efodi. 19 Kutundaho, bapangele makulo abali a goldi na kuwaka mu bimbango bibali bya kwisi bya mukati ya kananga ka ha nulo oku analitala na efodi. 20 Co bapangele makulo akwabo abali a goldi halutwe lwa efodi mwisi ya binanga bibali bya ha bitsili, helu lya haje habananungakanena mwiba ku efodi. 21 Mamaneselelo bakutile kaje kananga ka ha nulo na mukole wa blu. Betisile uje mukole mu makulo a ku kananga na mu makulo a ku efodi mangana aka kananga ka ha nulo katumame mu mwela wako ha efodi, helu lya mwiba, ngecilika Yehova mwashikilile Mosesa.

22 Co watongele mukanjo wa kujeneka maboko wa kuzala mukati ka efodi, co muka-kutonga watongele mukanjo woshe na bwanda bwa blu. 23 Uje mukanjo wakele na singo mwakutuhwisila mutwe ngwe singo ya cizalo ca liswalale. Singo yawo baingundile kuzengulwisa kwoshe mangana keti itabuke. 24 Kutundaho, ku mungundo wa kwisi wou mukanjo wa kujeneka maboko batongeleleko tuma tumo twa kufwa ngwe mapomagraneti. Batutongele na bwanda bwa blu, na bwanda bwa pepo, na bwanda bwa kubenga buje buboselele hamolika. 25 Co bapangele bingenjo bya goldi yaibwa na kushobasana bingenjo na mapomagraneti kuzengulwisa mungundo woshe wa uje mukanjo wa kujeneka maboko, mukati ka mapomagraneti. 26 Bashobasanene ngenjo na pomagraneti, ngenjo na pomagraneti, kuzengulwisa ku mungundo woshe wa kwisi ya uje mukanjo wa kujeneka maboko ubapangesele mu cipangi, ngecilika Yehova mwashikilile Mosesa.

27 Co batongele bizalo bya lineni yaibwa byatongele muka-kutonga. Babitongelele Aloni na bana bendi. 28 Batongele na nanga ya ku mutwe ya lineni yaibwa, na byakuzala ku mutwe byabibwa bibatongele ha lineni yaibwa, na tuputula twa lineni twa kutonga ha lineni yaibwa ya kwosa, 29 na mwiba wa lineni yaibwa ya kwosa, na bwanda bwa blu, na bwanda bwa pepo, na bwanda bwa kubenga bubanatongela hamolika ngwe Yehova mwashikilile Mosesa.

30 Mamaneselelo bafulile kacikubo ka kulipasha ka kubyakuma ka goldi yaibwa, kaje kapwile cizibukiso ca kujela ca kumwesa kulikundika. Co basonekeleho ngwe uje asoneka ha cizibukiso ngwabo: “Kujela kwapwa kwa Yehova.” 31 Co kuje ku kacikubo bakutileko mukole wa bwanda bwa blu mangana kakale ha nanga ya ku mutwe ngwe Yehova mwashikilile Mosesa.

32 Ngeci bipangi byoshe bya ku tabanakele, ije inapu tenti ya kuliwanena byahwile, co baIsalele balingile byuma byoshe byashikile Yehova kuli Mosesa. Balingile ngoco bene.

33 Co banenele byuma byoshe bya tabanakele kuli Mosesa, banenele tenti na bikwata byayo byoshe: bikwateso byayo, na mafremu ayo, na mabalo ayo na bingunzi byayo, na mena ayo, 34 na cibubo cayo ca bilambu bya bimanga ba nkomba bya kulomba bulombo bwa kubenga, na cibubo cayo ca bilambu bya binyundu, na nanga ya kwangunwisa. 35 Banenele cikasha ca Bukaleho, na biti byaco, na cifwiko caco, 36 na mesa, na bikwata byayo byoshe, na makende a kumwesa kuli Njambi. 37 Banenele citumbikilo ca bindeya ca goldi yaibwa, na bindeya byaco bije bili mu mukana, na bikwata byaco byoshe na mazi a mu bindeya, 38 na mutula wa goldi, na mazi a kupangesa mu kubwabesa, na isense ya lwengo lwalubwa, na nanga ya ha cikolo ca tenti, 39 na mutula wa kopa, na cikubo cawo ca kopa ca kulishelasana, na biti byawo, na bikwata byawo byoshe, na lilonga, na citumbikilo calyo. 40 Banenele binanga bya lilapa, na bingunzi byalyo, na mena alyo, na nanga ya ha cikolo ca ku lilapa, na mikole yalyo, na bimbambo byalyo, na bikwata byoshe bya kupangesa ku cipangi ca ku tabanakele, ije inapu tenti ya kuliwanena. 41 Banenele bizalo bya kutonga mwamubwa bya kupangesa mu mwela wa kujela, na bizalo bya kujela bya kapilistu Aloni, na bizalo bya bana bendi bya kupangesa mu cipangi ca bupilistu.

42 BaIsalele bapangele ebi bipangi byoshe kwesekesa na byoshe byashikile Yehova kuli Mosesa. 43 Mosesa mwelwile bipangi byabo byoshe wamwene ngwendi babipangele kwesekesa nomwo mwashikilile Yehova, co Mosesa wababezikisile.

40 Co Yehova walekele Mosesa ngwendi: 2 “Ha litangwa lyakulibanga, mu ngonde yakulibanga, unapande kushimbika tabanakele, ije inapu tenti ya kuliwanena. 3 Akamo cikasha ca Bukaleho na kubatula ije tabanakele na nanga mangana ishweke cije cikasha. 4 Unapande kwakamo mesa na kwaka mwamubwa byuma bya ha mesa, na kwakamo citumbikilo ca bindeya na kushwameka bindeya byaco. 5 Co aka mutula wa goldi wa kwenyekela isense kulutwe lwa cikasha ca Bukaleho, na kwaka nanga ku cikolo ca tabanakele.

6 “Unapande kwaka mutula wa kwenyekela bwana bwa kwenyeka kulutwe lwa cikolo ca tabanakele, ije inapu tenti ya kuliwanena, 7 co aka lilonga lya kutanena mukati ka mutula na tenti ya kuliwanena, co akamo mema. 8 Co tunga lilapa kuzengulwisa tabanakele na kwaka nanga ha cikolo ca lilapa. 9 Kutundaho, ambata mazi a kupangesa mu kubwabesa ubwabese tabanakele na byoshe bilimo, co ijelese na kujelesa bikwata byayo byoshe mangana ipwe cuma ca kujela. 10 Unapande kubwabesa mutula wa kwenyekela bwana bwa kwenyeka na bikwata byawo byoshe na kujelesa mutula mangana ou mutula upwe wa kujela manene. 11 Co bwabesa lilonga na citumbikilo calyo na kubijelesa.

12 “Co nena Aloni na bana bendi ba banalume kuyehi na cikolo ca tenti ya kuliwanena, co batanese na mema. 13 Co unapande kuzika Aloni bizalo bya kujela na kumubwabesa na kumujelesa, co akapwa kapilistu wange. 14 Muumanesa, nena bana bendi, co bazike mikanjo. 15 Unapande kubabwabesa ngwe muunabwabesa ishabo mangana banjipangele cipangi ca bupilistu, co oku kubabwabesa kuunababwabesa kukalingisa bupilistu bwabo butwaleleleho, kutunda mu cisemwa cimo kuya mu cisemwa cikwabo.”

16 Mosesa walingile byoshe byamushikile Yehova. Walingile bene ngoco.

17 Mu mwaka wamucibali, mu ngonde yakulibanga, ha litangwa lya kulibanga omu mu ngonde, bashimbikile tabanakele. 18 Mosesa mwashimbikile tabanakele, wakele hasi mena ayo a kufula na kwimika mafremu na kwaka mabalo na kwimika bingunzi byayo. 19 Wajangumwinine tenti ha tabanakele, co helu lya ije tenti wafwikileho cibubo ca bilambu, ngwe Yehova mwashikilile Mosesa.

20 Mwamanesele, wambatele mamanya a Bukaleho na kuwaka mu Cikasha, co washomekele biti ku cikasha na kufwika cifwiko haje ha Cikasha. 21 Wakele Cikasha mu tabanakele, co wabatwile ije tabanakele na nanga, co yashwekele cikasha ca Bukaleho ngwe Yehova mwashikilile Mosesa.

22 Wakele mesa mu tenti ya kuliwanena, ku mutambela wa ku kunto* wa tabanakele ku sambwa lya nanga. 23 Co wakele makende ha mesa haje hawapandele kukala ku mesho a Yehova, ngwe Yehova mwashikilile Mosesa.

24 Wakele citumbikilo ca bindeya mu tenti ya kuliwanena, kulutwe lwa mesa, ku mutambela wa ku mbwela* wa tabanakele. 25 Washwamekelele bindeya ha mesho a Yehova, ngwe Yehova mwashikilile Mosesa.

26 Kutundaho, wakele mutula wa goldi mu tenti ya kuliwanena, kulutwe lwa nanga, 27 mangana benyekeleho isense, ngwe Yehova mwashikilile Mosesa.

28 Co wakele nanga ya ha cikolo ca tabanakele.

29 Wakele mutula wa kwenyekela bwana bwa kwenyeka ku cikolo ca tabanakele, ije inapu tenti ya kuliwanena, mangana enyekeleho bwana bwa kwenyeka na bwana bwa binona, ngwe Yehova mwashikile Mosesa.

30 Co wakele lilonga mukati ka tenti ya kuliwanena, na mutula na kwakamo mema a kutana. 31 Mosesa na Aloni na bana bendi batanene muje mu lilonga ku maboko na ku mendi. 32 Hoshe habakele na kukobelela mu tenti ya kuliwanena nambe kushwena ku mutula, bakele na kutana, ngwe Yehova mwashikile Mosesa.

33 Mamaneselelo watungile lilapa kuzengulwisa tabanakele na mutula, co wakele nanga ku cikolo ca lilapa.

Ngeci Mosesa wamanesele bije bipangi. 34 Co lishelwa lyafwikile tenti ya kuliwanena, co bumpau bwa Yehova bwashulile mu tabanakele. 35 Mosesa kasele kukobela mu tenti ya kuliwanena mwafwa lishelwa lyafwikileho, co bumpau bwa Yehova bwashulile mu tabanakele.

36 Co lije lishelwa mulyakele na kutunda ha tabanakele, baIsalele bakele na kujalwisa cilombo cabo. Balingile ngoco mu bungenzi bwabo bwoshe. 37 Oloni nga lije lishelwa kulyatundileho, kubakele na kujalwisa cilombo cabo kubanga ha litangwa lilyatundileho lije lishelwa. 38 Mu bungenzi bwabo bwoshe, bakunjibo ya Isalele boshe bakele na kumona lishelwa lya Yehova lije lyakele ha tabanakele mutanya, co butsiki hakele na kukala tuhya.