MWASO WA SOLOMONI
1 Ou ukewo mwaso wa Solomoni uje unatubakana myaso yoshe:
2 “Njitsembe na kanwa kobe
Mwafwa cizemo cobe cacibwa kutubakana binyu.
3 Lwengo lwa mazi obe lwalubwa.
Lizina lyobe linapu ngwe lwengo lwa mazi abanetila.
Mukemwo bambanda bakuzema.
4 Ya nange, tuye tutewe.
Mwene nanjinene mu milili yendi ya mukati.
Tuye tubwahelele na kulisamba hamo.
Tuye tushangazale* cizemo cobe kutubakana binyu.
Mukemwo bakuzema.
5 Eni banakazi ba mu Jelusalema, nji wa kuzibala, oloni nji wamubwa,
Njinapu ngwe bitenti bya Keda, ngwe bitenti bya Solomoni.
6 Keti munjitale mwafwa njinazibala,
Mwafwa litanya linanjenyeka.
Bandolome bange banjilubalelele.
Banjangwile ngwabo njinyunge mahya a binyu,
Oloni kunjanyungile lihya lyange lya binyu.
7 Njileke yobe injazema manene,
Kuli kuukalisila bimuna bobe,
Kuli kuukababutamesela mutanya?
Bika binjendanganena mukati ka bimuna ba babusamba bobe
Ngwe munakazi uje nalifwiki nanga* ku mesho endi?”
8 “Obe munakazi wamubwa kutubakana banakazi boshe,
Nga kuuzibuka kwali, kaba myanja ya bimuna
Co ya ukalisile bana ba bimembe bobe kuyehi na bitenti bya tunyungi.”
9 “Obe injazema, unapu ngwe kabalu wa lwabo uje ali ku matemba a Falo.
10 Byuma biunalicakeya ku mesho* binalingisa binana byobe bisholoke mwamubwa.
Busanga bwobe bunalingisa singo yobe isholoke mwamubwa.
11 Tukupangela byuma bya kulicakeya bya goldi
Bije bili na siuva.”
12 “Ha simbu yanatumama mwene ku mesa,
Mazi ange atuhula lwengo lwalubwa.
13 Injazema napu lika ngwe kangonga ka mira ya lwengo lwalubwa
Kaje kali mukati ka mabele ange butsiki bwoshe.
14 Injazema napu ngwe bintemo bya hena
Bije bili hamolika mukati ka mahya a binyu a Eni-gedi.”
15 Obe injazema, uwamubwa.
Uwamubwa. Mesho obe anapu ngwe mesho a liyembe.”
16 “Obe injazema, uwamubwa, yobe ukanjizibisa kubwaha.
Mwela wetu unapu wa maputa.
17 Mikambo ya njibo yetu inapu ya miti ya sida.
Mashoko a ciluli cetu anapu a miti ya junipa.
2 “Yange njinapu lika ntemo ya safroni ije yakala mu cana ca ku ngenge ya ku kalunga-ndonga,
Nji ntemo ya lili ije yakala mu binema.”
2 “Ngwe ntemo ya lili ije ili hakati ka mingonga,
Ou injazema nendi mukemwo mwanapu hakati ka banakazi.”
3 “Ngwe muti wa apo uje uli hakati ka miti ya mu shwata,
Ou injazema nendi mukemwo mwanapu hakati ka banalume.
Njashungwiya manene kukala mu munzinze wendi,
Co bushuka bwendi njikabuzibi kutobala.
4 Wanjinenele mu njibo ya cilika,*
Co banu boshe bamwene ngwabo wanjizema.
5 Njishubulwise na makende a bushuka bwa binyu bwa kuma,
Njikutise na maapo
Mwafwa cizemo cili na kunjibinjisa.
6 Liboko lyendi lya cimoshwe linakwata mu mutwe wange,
Co liboko lyendi lya cilyo linanjibumbateya.
7 Eni banakazi ba mu Jelusalema,
Lisingeni ha bishonge na ha bimbambi ngweni
Kumwindula nambe kushangumuna cizemo muli yange kweta noho hacikalizila.
8 Njazibi injazema ali na kwija.
Taleni! Uje aija muje,
Ali na kulonda minkinda na kujombozoka malundu.
9 Injazema napu ngwe shonge, napu ngwe muna shonge.
Uje ali haje, nemana kunima ya cibumbe,
Ali na kushumbilila mu windo,
Ali na kushumbilila mu bimbengwa.
10 Uje injazema nanjileke ngwendi:
‘Katuka, obe injazema,
Ija tuye, obe wamubwa.
11 Tala, cisika* cineti.
Nyonzi inahu.
12 Bintemo binateme mu lifuti,
Simbu ya kutetela minango ya miti ya binyu inete,
Co mu lifuti muli na kuzibika myaso ya tutela.
13 Mikuyu inashangumuka kuhya,
Miti ya binyu inateme bintemo, co ili na kunika mwamubwa.
Katuka tuye, obe injazema,
Ija tuye hamo, obe wamubwa.
14 Obe liyembe lyange uli mu mako ya mu limanya,
Yobe uli mu bwina bwa ha munkinda,
Ija njikumone, njizibe na lijwi lyobe,
Mwafwa lijwi lyobe lyalibwa, co lalo sholwesi yobe yaibwa.’”
15 “Tukwateleni obo bimbanje,
Obo bana ba bimbanje bali na kubiisa mahya a binyu,
Mwafwa mahya etu a binyu ali na kushamwina bishani.”
16 “Ou injazema napu wange, co yange njinapu wendi.
Ali na kulisa bimuna mukati ka bintemo bya lili.
17 Simbu kanda lihunzi lishangumuke kuhuwa, simbu kanda minzinze iye,
Obe injazema, iluka bwasi,
Ngwe mwa shonge nambe muna shonge uje ali ha minkinda ije inatwangununa.
3 “Munjakele ha mwela wange butsiki,
Njatondatondele uje injazema.
Njamutondatondele, oloni kunjamuwanene.
2 Njendukile na kwendangana mu nganda,
Njendanganene mu bitapalo na mu myela ya mbunga,
Njatondatondele uje injazema.
Njamutondatondele, oloni kunjamuwanene.
3 Tunyungi mubakele na kuzenguluka mu nganda banjiwanene.
Co njabehwile ngwange, ‘Kumwanjimweneneneko ou injazema ndi?’
4 Munjabatubakanene lika
Njawanene uje injazema.
Njamukwatelelele, co kunjamwecelele
Kweta noho hanjamunenelele mu njibo ya nana,
Mu mulili wa mukati wa uje wanjikitile.
5 Eni banakazi ba mu Jelusalema,
Lisingeni ha bishonge na ha bimbambi ngweni
Kumwindula nambe kushangumuna cizemo muli yange kweta noho hacikalizila.”
6 “Bika ebi bili na kutunda mu mambo ngwe bwisi kondakani,
Bije bili na kunika lwengo lwa mira na isense ya kutoka,
Na bunga bwa lwengo lwalubwa bwa baka-mingoso?”
7 “Cinapu citwamo ca Solomoni.
Banalume ba nzili ba kupwa 60 banacizengeleka,
Banalume ba nzili ba mu Isalele,
8 Boshe bali na mikwale yabo,
Boshe banabalongesa kulwa nzita,
Umo na umo wabo ali na mukwale ha mbunda yendi
Mangana balinyungilile ku bushonde butsiki.”
9 “Cinapu citwamo ca bumwene ca Mwene Solomoni
Cije calishongelele babenya ha miti ya ku Lebanoni.
10 Bingunzi byaco wabipangele ha siuva,
Co maboko aco a goldi.
Hakutumama hali nanga ya pepo.
Co mukati kaco banacibwahesa mwamubwa
Banakazi ba mu Jelusalema.”
11 “Tuhukeni hanja eni banakazi ba mu Siyone
Taleni Mwene Solomoni,
Nazala cilongo ca ha cilika ca bulo cije camupangelele ina
Ha litangwa lya bulo bwendi,
Ha litangwa liyabwahelelele mbunge yendi.”
4 Obe injazema, uwamubwa.
Uwamubwa.
Mesho obe anapu ngwe mesho a liyembe omwo mu nanga muuli.
Binkambu byobe binapu ngwe butanga bwa bimembe
Baje bali na kusikumuka ha minkinda ya Giliyadi.
2 Mayo obe anapu ngwe butanga bwa bimanga baje batunda na kubatehula
Baje babanatanesa,
Boshe banaseme bampasa,
Co naumo wahi natsisa munendi.
3 Kanwa kobe kanapu ngwe mukole wa kubenga,
Co byendeka byobe byapwa byabibwa kubitolilila,
Binana byobe bili omwo mu nanga
Binapu ngwe mbazubwila ya mapomagraneti.
4 Singo yobe inapu ngwe kaposhi ka Devidi,
Kaje kabanatungu na mamanya mu kulilundakana,
Haje habanashukika bintelo byabingi,
Bintelo byoshe bya muzenguluke bya banalume ba nzili.
5 “Mabele obe abali anapu ngwe bana ba bishonge babali,
Anapu ngwe bampasa ba shonge
Baje bali na kulya mukati ka bintemo bya lili.”
6 “Simbu kanda lihunzi lishangumuke kuhuwa, simbu kanda minzinze iye,
Njiya ku munkinda wa mira
Na ku lilundu lya isense ya kutoka.”
7 “Uwamubwa manene, obe injazema,
Kuwesi na kapenga.
8 Tuye tutunde ku Lebanoni, obe shombolwa yange,
Tuye tutunde ku Lebanoni.
Sikumuka helu lya munkinda wa Amana,
Helu lya munkinda wa Seni, helu lya munkinda wa Hemoni,
Tunda okwo kubakala bindumba, okwo ku minkinda ya biingwe.
9 Unalukula mbunge yange, ndokazi yange, obe shombolwa yange,
Unalukula mbunge yange muunanjitala lumolika na mesho obe,
Unalukula mbunge yange na busanga bwobe bwa mu singo.
10 Cizemo cobe cacibwa manene, ndokazi yange, shombolwa yange.
Cizemo cobe citubakanena kulako binyu,
Co lwengo lwalubwa lwa mazi obe lutubakanena kulako cuma coshe-coshe ca lwengo lwalubwa.
11 Kanwa kobe obe shombolwa yange, kali na kundweka buki.
Buki na mabele bili kwisi ya ndaka yobe,
Co lwengo lwalubwa lwa bizalo byobe lunapu ngwe lwengo lwalubwa lwa ku Lebanoni.
12 Ndokazi yange, shombolwa yange, unapu ngwe lihya libanapata,
Unapu ngwe lihya libanapata, ngwe kabwelubwelu kabanaziki.
13 Minango* yobe inapu ngwe paradaisi* ya miti ya mapomagraneti
Ije ili na bushuka bwa bubwa manene, ije ili na hena, ije ili na bimena bya sipaikinadi,
14 Spaikinadi na safroni, mushati* na sinamoni,
Na miyati yoshe ya miti ya isense ya kutoka, na mira, na aloe,
Na mazi oshe a lwengo lwalubwa manene.
15 Unapu ngwe kabwelubwelu ka mu lihya, ngwe lisima lya mema amabwa,
Unapu ngwe bana ba bindonga baje bali na kutunda ku Lebanoni.
16 Induka, obe lihunzi lya ku kunto.
Ija, obe lihunzi lya ku mbwela.
Huwila mu lihya lyange.
Lingisa lwengo lwalubwa lwa mu lihya lyange lujalakane.”
“Obe injazema, ija mu lihya lyobe
Wakulye bushuka bwabubwa manene.”
5 “Njinakobela mu lihya lyange,
Ndokazi yange, obe shombolwa yange.
Njinambata lemba yange ya mira na byuma byange bya lwengo lwalubwa.
Njinali cintana cange na buki bwange.
Njinanu binyu byange na mabele ange.”
“Tulyeni babusamba bange.
Nweni na kupenda cizemo.”
2 “Njalalele, oloni mbunge yange yakele na kutona.
Njazibile uje injazema atota ha cikolo.”
Wendekele ngwendi, “Njishokolwele, ndokazi yange, yobe injazema,
Yobe liyembe lyange, yobe wange wa kujeneka kapenga!
Mwafwa mutwe wange unajulu na lime,
Binkambu byange binajulu na mbundu ya butsiki.”
3 “Njamukumbulwile ngwange, ‘Njinashulula laja bizalo.
Co njibizale lalo ndi?
Njinatana laja ku mendi.
Co njiwambundungiye lalo ndi?’
4 Uje injazema watundisile liboko lyendi mu mbengwa ya cikolo,
Co mbunge yange yamushungwiiye.
5 Njendukile ngwange njishokolwele uje injazema.
Maboko ange akele na kundweka mira,
Co minye yange yakele na kundweka mazi a mira,
Andwekelele ku mukota wa kapateso.
6 Njashokolwelele uje injazema,
Oloni uje injazema te neluka laja, te nai laja.
Njalizibile kubihya ku mbunge mwaile.*
Njamutondatondele, oloni kunjamuwanene.
Njamusanene, oloni kanjikumbulwile.
7 Tunyungi mubakele na kuzenguluka mu nganda banjiwanene.
Banjipupile, banjibulumwine.
Baje tunyungi ba ha cibumbe banjinyekele nanga* yange ya kulifwika.
8 Eni banakazi ba mu Jelusalema, lisingeni ngweni:
Nga muwana uje injazema,
Mumuleka ngweni cizemo cili na kunjibinjisa.”
9 “Obe munakazi wamubwa kutubakana banakazi boshe,
Ou iwazema natubakanena hali banalume boshe?
Natubakanena hali banalume boshe
Mangana utusingise ngacije?”
10 “Uje injazema wapwa wamubwa manene, co lalo wa kubenga,
Wa kulitila hakati ka banalume 10,000.
11 Mutwe wendi unapu ngwe goldi, ngwe goldi yaibwa manene.
Binkambu bya ku mutwe wendi binapu ngwe minango ya mashakabale ije ili na kuninganga na lihunzi,
Byapwa bya kuzibala ngwe likololo.
12 Mesho endi anapu ngwe mesho a mayembe baje bali kumukulo wa bana ba bindonga,
Baje bali na kutana mu mabele,
Baje bali kumukulo wa lishali lije linashulu mema.*
13 Binana byendi binapu ngwe mihanga ya bimena bya lwengo lwalubwa
Ngwe tumalundu twa bimena bya lwengo lwalubwa
Kanwa kendi kanapu ngwe bintemo bya lili bije bili na kundweka mazi a mira.
14 Minye yendi inapu ngwe goldi ije ili na krisoliti kushongo.
Lifu lyendi linapu ngwe mambinga a binjamba abanabwahesa mwamubwa aje abanakwiti safaya.
15 Mendi endi anapu ngwe bingunzi bya mamabor bije bibanashimbika mu mena a goldi yaibwa.
Sholwesi yendi inapu ngwe Lebanoni, ngwe miti ya sida yaibwa manene.
16 Kanwa kendi katobala.
Co wamubwa mu byoshe.
Ou ikeye wanjiya ku mbunge, ikeye injazema, eni banakazi ba mu Jelusalema.
6 “Obe munakazi wamubwa kutubakana banakazi boshe,
Nai kuli ou iwazema?
Natalesela kuli ou iwazema?
Tuye tukakutondeseye.”
2 “Injazema nai ku mahya,
Nai ku mihanga ya bimena bya lwengo lwalubwa,
Nakalisila ku mahya,
Nakukapotola bintemo bya lili.
3 Njinapu nji wa uje injazema,
Co injazema napu wange.
Ali na kulisa bimuna mukati ka bintemo bya lili.”
4 “Obe injazema, uwamubwa ngwe Tiza*
Uwamubwa ngwe Jelusalema,
Usholoka mwamubwa ngwe maswalale baje banalibwahesela kulwa nzita.
5 Keti unjitale,
Mwafwa uli na kulingisa mbunge yange ilukuke.
Binkambu byobe binapu ngwe butanga bwa bimembe
Baje bali na kusikumuka ha misikumuko ya Giliyadi.
6 Mayo obe anapu ngwe butanga bwa bimanga
Baje babanatanesa,
Boshe banaseme bampasa,
Co naumo wahi natsisa munendi.
7 Binana byobe bili omwo mu nanga
Binapu ngwe mbazubwila ya pomagraneti.
8 Kunasa kukala mashano 60
Na banakazi bakwabo 80
Na bambanda baje kutwasa kutanda,
9 Oloni umolika ikeye liyembe lyange, wa kujeneka kapenga.
Mwanamukitila likalyendi ina.
Ikeye yazema manene uje wamukitile.
Bana ba banakazi mubamumona bendeka ngwabo nabezika.
Mashano na banakazi bakwabo bamushangazala.
10 ‘Iya ou atwa ceke ngwe misha ya mutondo,
Wamubwa ngwe ngonde,
Wa kujela ngwe ceke ca litangwa
Asholoka mwamubwa ngwe maswalale banalibwahesela kulwa nzita.’”
11 “Njasikumukile ku lihya lya miti ije ikemi byelu
Mangana njikamone indi bimena binamene mu cinema
Mangana njikamone indi muti wa binyu unajobelela,
Na kukamona indi miti ya mapomagraneti inatuhula bishani.
12 Njikakasumuke,
Lishungu lyange lya kushaka kumona byuma lyanjilingisile njikaliwane
Ku matemba a banu betu ba bulemu.”
13 “Iluka, iluka obe kaShulamite!
Iluka, iluka
Mangana twakukumone!”
“Bika bimuli na kutalela ngacije kaShulamite?”
“Napu ngwe bibunga bibali bije bili na kukina.”*
7 “Obe mumbanda wa bulemu,
Mendi obe asholoka mwamubwa mu masanda,
Bintungi byobe binapu ngwe byuma bya senga bya kulicakeya,
Binapu bipangi bya muka-kupanga byuma bya maboko wa mutongwe.
2 Likolo lyobe linapu ngwe lilonga lya mubundungulu lya kuloba.
Binyu bibanashingi mwamubwa keti bihwemo.
Lifu lyobe linapu ngwe mutumbo wa tiliku
Ubanazengeleka na bintemo bya lili.
3 Mabele obe abali anapu ngwe bana ba shonge babali,
Anapu ngwe bampasa ba shonge.
4 Singo yobe inapu ngwe kaposhi ka kupanga ha mambinga a binjamba.
Mesho obe anapu ngwe mashali a ku Heshiboni
Aje ali ku cikolo ca Bathi-labimu.
Lijulu lyobe linapu ngwe kaposhi ka ku Lebanoni,
Kaje kanatala ku Damasika.
5 Mutwe wobe waubwa ngwe munkinda wa Kameu,
Binkambu byobe binapu ngwe bwanda bwa pepo.
Unalukula mbunge ya mwene mwafwa ya binkambu byobe bije binatepuka mwamubwa.
6 Uwamubwa, co ukanjizibisa kubwaha,
Obe mumbanda injazema kutubakana byuma byoshe byabibwa.
7 Citalamo cobe cinapu ngwe muti wa mashakabale,
Co mabele obe anapu ngwe binjomoto bya bushuka bwa muti wa mashakabale.
8 Njendekele ngwange, ‘Njilonda ku muti wa mashakabale
Mangana njikakwate ku mukota wa bushuka.’
Mabele obe apwe ngwe binjomoto bya bushuka bwa binyu.
Muku wobe wa mu kanwa upwe waubwa ngwe maapo.
9 Co kanwa kobe kapwe ngwe binyu byabibwa manene.”
“Bisikumuke mwamubwa ha milibu you injazema,
Biye kamandondo-kamandondo ha tunwa twa baje banalala.
10 Yange nji wa uje injazema,
Co uje injazema ali na kunjishungwiya.
11 Ija obe injazema,
Tuye hanja,
Tuye tukakale mukati ka bimena bya hena.
12 Tuye tulibange kwinduka mangana tuye ku mahya a binyu,
Tukamone indi miti ya binyu inajobelela,
Tukamone indi inatuhula bintemo,
Tukamone indi mapomagraneti anashamwina.
Kuje kukekwo kunjikakumwesela cizemo.
13 Mamandraki ali na kutuhula lwengo lwawo lwalubwa.
Ku bikolo byetu kuli bushuka bwabubwa bwa miyati yoshe.
Bwabuha nobu bwa laja,
Obe injazema, bwoshe njabutulikila yobe.
8 “Tawe ngwe wapwile ngwe ndolome yange,
Uje wajamwene ku mabele a nana,
Ngwe munjikuwana hanja, ngwe njikutsemba,
Co ngwe naumo wahi anjipaya.
2 Ngwe njikutwamenena.
Ngwe njikutwala mu njibo ya nana,
Uje wanjilongesele.
Ngwe njikwana binyu bya kwaka byuma bya lwengo lwalubwa,
Byakunwa bya mapomagraneti.
3 Ngwe liboko lyendi lya cimoshwe likwata mu mutwe wange,
Co liboko lyendi lya cilyo ngwe linjibumbateya.
4 Eni banakazi ba mu Jelusalema, lisingeni ngweni:
Kumwindula nambe kushangumuna cizemo muli yange kweta noho hacikalizila.”
5 “Iyou ali na kwija kutunda mu mambo,
Ou nasindamena uje yazema?”
“Njakwindwile mwisi ya muti wa apo.
Muje bene mukemwo muwamuwanenene noko mushongo wa kukita.
Uje wakukitile mukemwo bene muwamuwanenene mushongo wa kukita.
6 Njanuke simbu yoshe ngwe cizibukiso cije cili ha mbunge yobe,
Ngwe cizibukiso ha liboko lyobe
Mwafwa cizemo cili na nzili ngwe kutsa,
Co kulongwa cili na likakateya ngwe Cihilo.*
Milangi ya cizemo ili na kushukuma ngwe tuhya, cinapu mulangi wa Jah.*
7 Mankimba kuwasa kuzima cizemo,
Nambe bindonga kubyasa kucibombesa.
Nga munu ashaka kwana bufuko bwa mu njibo yendi bwoshe mwafwa ya cizemo,
Babwombwanesa.”*
8 “Tuli na ndokazi yetu wamundondo,
Co kesi na mabele.
Bika bitukamulingila
Ha litangwa libakamwendekeya?”
9 “Nga napu cibumbe,
Co helu lyendi tukatungilaho cilongo ca siuva,
Oloni nga napu cikolo,
Co tukamupata na libaya lya sida.”
10 Njinapu nji cibumbe,
Co mabele ange anapu ngwe tuposhi.
Ngeci mwanjitala amona
Ngwendi njili mu kwoloka.
11 Solomoni wakele na lihya lya binyu mu Bale-hamoni.
Wakele lije lihya mu maboko a baka-kunyunga.
Umo na umo wabo wakele na kufwetela bushuka bwa muje mu lihya mabundungulu a siuva a kupwa 1,000.
12 Yange njili na lihya lyange lya binyu.
Obe Solomoni, owo masauzandi a bimbongo bya siuva anapu obe,
Co bimbongo bya siuva 200 binapu bya baje bali na kunyunga bushuka bwa mu lihya lyobe lya binyu.”
13 “Obe wakala mu mahya,
Babusamba bashaka kuziba lijwi lyobe.
Nange njishaka kuliziba.”
14 “Zambula obe injazema,
Co shatuka ngwe shonge
Nambe muna shonge
Uje ali ha minkinda ya bimena bya lwengo lwalubwa.”
Nambe “twanuke.”
Nambe “nanga ya busiwa.”
Nambe hamo “Byuma bili ku binkambu byobe bya kubinda.”
Lijwi na lijwi “njibo ya binyu.”
Nambe “simbu ya nyonzi.”
Nambe hamo “cikoba.”
Nambe “lihya.”
Lihongo lya lwengo lwalubwa.
Nambe hamo “Mwonyo wange wahwile mwendekele.”
Nambe “shawelo.”
Nambe hamo “kumukulo wa kabwelubwelu.”
Nambe “Nganda Yaibwa.”
Nambe “kinisi ya ku Manahaimu.”
Nambe “Sheo,” kulumbununa bihilo mubakai banu boshe. Taleni Majwi Abanalumbununa.
“Jah” inapu kubatwila lizina lya Yehova.
Nambe hamo “bamulumbilisa.”