JOELE
1 Yehova wendekele kwitila muli Joele* muna Petwele ngwendi:
2 “Zibeni ebi byuma, eni bakulunu,
Akeniko mbunge, yeni boshe mwatunga mu lifuti.*
Kuma byuma bya cifweci byalingiwaho laja mu matangwa eni
Nambe mu matangwa a bakukulwila beni ndi?
3 Bilekeni bana beni,
Co bana beni babileke bana babo,
Co bana babo babileke cisemwa cinatako.
4 Bibasezele bimbimba baje batsa ha kulya, njame ya bimbimba inabili.
Co biyasezele ei njame ya bimbimba, bana ba bimbimba banabili.
Co bibanaseze aba bana ba bimbimba, bimbimba ba kutsa manene njala banabili.
5 Indukeni, eni bitakwa, mulile!
Mbolozokeni, eni baka-kunwa binyu,
Mwafwa binyu bya kupwelelela banabitundisa ku tunwa tweni.
6 Mwafwa muyati uneja mu lifuti lyange, muyati wa nzili uje kasa kutanda munu.
Mayo awo anapu ngwe mayo a ndumba, co bimbange byawo binapu ngwe bimbange bya ndumba.
7 Unabiisa muti wange wa binyu na kulya muti wange wa mukuyu, kuseza cimbundi lika,
Unaili na kuyumbila kuti yoshe kwau,
Unali byula bya minango yayo.
8 Mbolozoka ngwe mwakalingila mumbanda* oku nazala cikeleya
Mwafwa ya munalume uje natondele kumwambata.*
9 Banecela kwana bwana bwa binona na bwana bwa byakunwa ku njibo ya Yehova.
Tupilistu, baje bapwa baka-kupangela Yehova, bali mu busiwa.
10 Lihya banalibiisa, co libu lili mu busiwa,
Mwafwa binona banabibiisa, binyu byabiha binomu, mazi anahu.
11 Bandimi banalijujukila, baka-kunyunga miti ya binyu bali na kumbolozoka,
Mwafwa ya tiliku na mbali,
Mwafwa bimbuto binanyongo.
12 Muti wa binyu unomu,
Muti wa mukuyu unajujwama.
Muti wa mapomagraneti, muti wa mashakabale na muti wa maapo,
Miti yoshe ya mu lihya inomu,
Mwafwa kubwahelela kunatenguluka kupwa shwamwa hakati ka banu.
13 Zaleni bikeleya na kukala mu busiwa,* eni tupilistu.
Mbolozokeni, yeni baka-kupangela ku mutula.
Kobeleni na kuzala bikeleya butsiki bwoshe, yeni baka-kupangela Njambi yange,
Mwafwa bwana bwa binona na bwana bwa byakunwa kubwesi na kwija ku njibo ya Njambi yeni.
14 Aneni mutambi wa kulibindika kulya. Saneni banu baije ku ciwano ca kulitila.
Kungululeni bakulunu, hamolika na boshe batunga mu lifuti
Ku njibo ya Yehova Njambi yeni, na kulilila kuli Yehova, kulomba bukwasi.
15 Olyo litangwa likapwa litangwa lya lubinda!
Mwafwa litangwa lya Yehova lili muyehi.
Ha litangwa olyo, Muka-nzili Yoshe akanena kunyonga!
16 Kuma byakulya kubabyambatele oku tunatalelela ndi?
Co kuma kulisamba na kubwahelela kubabitundisile mu njibo ya Njambi yetu ndi?
17 Bimbuto binekwiya kwisi ya bifosholo byabo.
Binjibo bya kutulikila binapu bya mupulungwa.
Bishete banabisiula, mwafwa binona binomu.
18 Nameme bimuna bali na kuteta.
Matanga a bingombe ali na kuyebangela, mwafwa kuwesi na bulilo.
Co matanga a bimanga ali na kuyandelamo.
19 Njitambeka kuli yobe, obe Yehova,
Mwafwa tuhya tunenyeka bulilo bwa mu mambo,
Co mulangi unenyeka miti yoshe mu lifuti.
20 Nameme tusitu ba mu shwata banatalelela kuli yobe,
Mwafwa bana ba bindonga banomu,
Co lalo tuhya tunenyeka bulilo bwa mu mambo.”
2 “Ohyeseni limbinga mu Siyone!
Tambekeni mutambi wa nzita ha munkinda wange wa kujela.
Banu boshe bakala mu lifuti* bajaje,
Mwafwa litangwa lya Yehova lili na kwija! Lili muyehi!
2 Litangwa lya lisusulungu na kuzibala,
Litangwa lya mashelwa na lisusulungu lyakama,
Ngwe ceke ca kukya kwa litangwa cije cijalakana ha minkinda.
Kuli banu babangi ba nzili.
Kanda kukaleho laja banu ba cifweci,
Co kubakakalako lalo
Mu myaka ya bisemwa byoshe.
3 Kulutwe lwabo kuli tuhya tuje twenyeka,
Co kunima yabo kuli mulangi uje unyongesa.
Lifuti lili halutwe lwabo linapu ngwe lihya lya Edeni,
Oloni kunima yabo kuli mambo ya mupulungwa,
Co nacimo cahi coboka.
4 Basholoka ngwe mubakasholokela tubalu,
Co bashatuka ngwe tubalu ba nzita.
5 Cilumo cabo cizibika ngwe cilumo ca matemba omwo bali na kujombozoka helu lya minkinda,
Ngwe cilumo ca tuhya tundandama tuje tuli na kwenyeka bishati.
Ngwe cendo ca banu ba nzili baje bali na kuya ku nzita.
6 Mwafwa yabo, miyati ya banu ikalitetela.
Munu woshe akamoneka kulijujukila.
7 Balupukila mu nzita ngwe baka-kulwa,
Balonda ha cibumbe ngwe maswalale,
Umo na umo wabo enda mu ngila yendi,
Co kubatundu mu bingila byabo.
8 Kubalinakwozola umo na mukwabo.
Umo na umo wabo atwalelelaho kwenda mu ngila yendi.
Nga bitwa bilingisa bamo bawe,
Bakwabo kubelukila munima.
9 Balupukila mu nganda, bashatuka ha cibumbe.
Balonda ha binjibo, bakobelela mu mawindo ngwe mwizi.
10 Lifuti na lilu bijaja ku mesho abo.
Litangwa na ngonde binazibala,
Co bingongonosi kubyesi na kutwa ceke.
11 Yehova akatambeka kulutwe lwa cibunga cendi ca maswalale, mwafwa maswalale bendi babangi manene.
Uje alinga byanendeka ali na nzili.
Mwafwa litangwa lya Yehova lyakama, co lizibisa manene lyoba.
Iya asa kulikolesela?”
12 Yehova ngwendi: “Nameme hano, ilukeni kuli yange na bimbunge byeni byoshe,
Oku mulibindika kulya, oku mulila na kumbolozoka.
13 Tabuleni bimbunge byeni, keti bizalo byeni,
Co ilukeni kuli Yehova Njambi yeni,
Mwafwa wakala na mema ku mbunge,* wapwa muka-kutetela, kesi kulubala bwasi, co wakala manene na cizemo cije kucesi kutenguluka,
Co atengulula biyongola byendi bya kuminenela bukalu.
14 Iyajo azibuka? Hamo nasa kutenguluka na kutengulula biyongola byendi
Na kumisezela cibezikiso,
Mangana mwase kwana Yehova, Njambi yeni, bwana bwa binona na bwana bwa byakunwa.
15 Ohyeseni limbinga mu Siyone!
Aneni mutambi wa kulibindika kulya. Saneni banu baije ku ciwano ca kulitila.
16 Kungululeni banu. Jeleseni cikungulukilo.
Kungululeni banalume ba kukola.* Kungululeni banike na bimbututu baje bacijamwa.
Cambato atuhuke mu mulili wendi wa mukati, na shombolwa atuhuke mu mulili wendi.
17 Tupilistu, baje bapwa baka-kupangela Yehova
Balilile mukati ka mwela wa kwita wa ha bukobelelo na mutula, na kwendeka ngwabo:
‘Zibila banu bobe ngozi, obe Yehova.
Keti ulingise buswana bwobe bupwe cuma cibashendumuna.
Keti ulingise baka-mafuti babayule.
Bika bibalihwila banu ngwabo, “Njambi yabo ali kuli?”’
18 Co Yehova anyunga lifuti lyendi na ntwima
Na kuzibila banu bendi mema ku mbunge.
19 Yehova akumbulula banu bendi ngwendi:
‘Njimitumina binona, na binyu byabiha, na mazi.
Co mukuta mwamubwa.
Kunjilingisa lalo baka-mafuti bamishaule.
20 Njikashekela baka-kunto kulako nobe.
Njikabashandanganena ku lifuti lya kuma lije lyapwa ngundu,
Maswalale babo ba kulutwe njikabashekela ku kalunga-ndonga wa ku butuhukilo bwa litangwa,*
Co maswalale babo ba kunima njikabashekela ku kalunga-ndonga wa ku bulahukilo bwa litangwa.*
Cuku cacibi cikakakumuka hali bakebo,
Co kapeshi kabo kakatwalelelaho kukakumuka,
Mwafwa Njambi akalinga byuma byakama.’
21 Keti uzibe lyoba, obe lifuti.
Bwahelela na kulisamba, mwafwa Yehova akalinga byuma byakama.
22 Keti muzibe lyoba, eni tusitu ba mu shwata,
Mwafwa bulilo bwa mu mambo bukakala na mwila wa kuzibalela,
Co miti ikema bushuka,
Muti wa mukuyu na muti wa binyu ikema manene.
23 Eni bana ba Siyone, bwaheleleni na kulisamba mwafwa ya Yehova Njambi yeni,
Mwafwa akamyana nyonzi ya mashangumukilo mu seteko inapande,
Co akaminyokesela nyonzi yakama,
Nyonzi ya mashangumukilo na nyonzi ya mamaneselelo, ngwe mukwafwililile ha kulibanga.
24 Majungwilo akashula binona bibanajungula,
Co bitikilo bikashula na binyu byabiha na mazi.
25 Co njikamilwisila byuma binabihya kwesekesa na myaka
Iinabili njame ya bimbimba, ibanabili bana ba bimbimba, bimbimba ba kutsa manene njala, na bimbimba baje batsa ha kulya,
Baje bapwa cibunga cange cakama ca maswalale cinjatumine hakati keni.
26 Mukalya kukuta,
Co mukashangazala lizina lya Yehova Njambi yeni,
Uje namilingila byuma bya kukomokesa.
Banu bange kubakabazibisa lalo shwamwa.
27 Co mukazibuka ngweni njili hakati keni, eni baIsalele,
Co yange Yehova Njambi yeni, kukwesi weka lalo.
Banu bange kubakabazibisa lalo shwamwa.
28 Munima yebi, njiketila sipilitu yange ha miyati yoshe ya banu,
Co bana beni ba banalume naba ba banakazi bakapolofweta,
Tukulukazi beni bakalota bilota,
Co bakwenje beni bakamona bimona.
29 Mu matangwa owo, njiketila sipilitu yange
Na ha bindungo bange ba banalume na ba banakazi.
30 Njikanena bikomokeso* mwilu na hasi,
Ebi bikapwa maninga na tuhya na bwisi bwabwingi kondo.
31 Simbu kanda litangwa lya Yehova lyakama lya kutewesa lyete,
Litangwa likatenguluka kupwa lisusulungu, ngonde ikatenguluka kupwa maninga.
32 Co woshe asana ha lizina lya Yehova akoboka,
Mwafwa ha munkinda wa Siyone na mu Jelusalema kukakala baje bakoboka, ngwe mwanendekela Yehova,
Baje bakoboka, banasana Yehova.”
3 “Mwafwa taleni! Mu matangwa owo na mu simbu oyo,
Munjikelwisa bafunge ba mu Juda na ba mu Jelusalema,
2 Njikakungulula lalo baka-mafuti boshe
Njikabasompelamo
Mu kwimanenako banu bange baIsalele baje banapu buswana bwange,
Mwafwa babashandwelele hakati ka baka-mafuti,
Na kulitepela lifuti lyange.
3 Batelelele banu bange biñela,
Balandesele mwanike wa munalume mangana bakumune lihule,
Co balandakanene mwanike wa munakazi na binyu mangana banwe.
4 Bika lalo bimunjilwisila,
Obe Tile, nobe Sidoni, neni mitambela yoshe ya Filistiya?
Kuma muli na kunjilinga mwamubi mwafwa ya cuma cimo ndi?
Nga munjilinga mwamubi,
Mu simbu yaindondo lika, njimilwisila bubi bweni ha mitwe yeni bwasi-bwasi.
5 Ha kuwana ngwe munambata siuva yange na goldi yange,
Na kunena byuma byange bya seho manene mu bitempele byeni,
6 Co lalo banu ba mu Juda na mu Jelusalema munabalandesa ku baGriki,
Mangana mubatwale kulako na mutambela wabo,
7 Hano njibalingisa beluke kutunda ku mwela kumwabalandesele,
Co njimilwisila bubi bweni ha mitwe yeni.
8 Njilandesa bana beni ba banalume na ba banakazi mu liboko lya banu ba Juda,
Co babalandesa ku banu ba ku Sheba, ku lifuti lya kulako,
Mwafwa Yehova ikeye nendeka ngoco.
9 Ambululeni hakati ka baka-mafuti ngweni:
‘Libwaheseleni nzita! Kokweyeni banalume ba nzili!
Maswalale boshe bashwene muyehi, baye ku nzita!
10 Matemo eni a bikekele afuleni mikwale, co bimoko byeni bya kutetesa minango bifuleni makunga.
Uje nazeye endeke ngwendi: “Njili na nzili.”
11 Ijeni mwakulikwase umo na mukwabo, eni mafuti oshe anatuzengeleka, likungulwileni hamo!’”
Obe Yehova, sikumwisila baka-kulwa bobe ba nzili mu mwela uje.
12 “Mafuti oshe akatuke na kwija ku Cinema* ca Jehoshafati,
Mwafwa njitumama kuje na kusompa mafuti oshe anabazengeleka.
13 Kobeleseni bicekesi, mwafwa bimbuto binahi.
Sikumukeni mwakulyatangele, mwafwa citikilo ca binyu cinashulu.
Bitulikilo bya binyu binashulilila, mwafwa bubi bwabo bunatumu.
14 Mbunga yakama ili mu cinema* ca kusompela,
Mwafwa litangwa lya Yehova lya kusompela omu mu cinema lili muyehi.
15 Litangwa na ngonde bikazibala,
Co bingongonosi kubikatu ceke.
16 Yehova akabuluma mu Siyone,
Akatambeka mu Jelusalema,
Co lilu na lifuti-libu bikajaja.
Oloni Yehova akapwa butewelo bwa banu bendi,
Akapwa mwela wa kubanda wa kukola wa banu ba Isalele.
17 Co mukazibuka ngweni yange Yehova Njambi yeni, njakala mu Siyone, munkinda wange wa kujela.
Jelusalema akapwa mwela wa kujela,
Co kukwesi banu ba kweka* bakaitamo lalo.
18 Ha litangwa olyo, ha minkinda hakandweka binyu bya kupwelelela,
Ha malundu hakanjululuka mabele,
Co bana ba bindonga ba mu Juda boshe bakashula na mema.
Kabwelubwelu kakatuhula mema kutundilila mu njibo ya Yehova,
Co kakatwala mema mu Cinema ca Miti ya Akesha.
19 Oloni Ijipiti akapwa ngundu,
Co Edomu akapwa mambo,
Mwafwa ya bukenya bubanalingi ku banu ba Juda,
Baje babanetilila maninga a kujeneka mulonga mu lifuti lyabo.
20 Oloni mu Juda na mu Jelusalema mukakala banu simbu yoshe,
Kutunda ku cisemwa cimo kuya ku cisemwa cikwabo.
21 Maninga abo aje anjamwene ngwange ali na mulonga njikawamona kupwa a kujeneka mulonga,
Co yange Yehova njikakala mu Siyone.”
Kulumbununa “Yehova Ikeye Njambi.”
Nambe “ha lifuti-libu.”
Lijwi na lijwi “mumbanda uje kanda alilaleho na munalume.”
Nambe “munalume wendi.”
Nambe “kulipupa ha binulo.”
Nambe “ha lifuti-libu.”
Nambe “bubwa.”
Nambe “bakulunu.”
Kulumbununa, Kalunga-ndonga wa Kutsa.
Kulumbununa, Kalunga-ndonga wa Meditrenia.
Nambe “bimweso.”
Nambe “Cana ca Kunyekama.”
Kulumbununa “Yehova Ikeye Lyaako.”
Nambe “Cana ca Kunyekama.”
Nambe “cana ca kunyekama.”
Nambe “banu ba ku lifuti lyeka.”