AMOSI
1 Awa akewo majwi a Amosi,* umo wa baka-kulela bimanga ba mu Tekoa, atambwile mu cimona kutalesa kuli Isalele mu matangwa a Mwene Uziya wa Juda na mu matangwa a Jeloboamu muna Joashi, myaka ibali simbu kanda lindunduma likaleko. 2 Wendekele ngwendi:
“Yehova akabuluma mu Siyone,
Na kutambeka mu Jelusalema.
Bulilo* bwa tunyungi bukakala mu busiwa,
Co helu lya munkinda wa Kameu hakoma.
3 Yehova nendeka ngwendi,
‘“Omwo Damasika nanjitengulukila* lutatu, nanjitengulukila luwana, kunjitengulula binjinayongola,
Mwafwa banajungula Giliyadi na cilei ca cikubo ca kujungwisa.
4 Ngeci, njituma tuhya ha njibo ya Hazaele,
Co tunyongesa tuposhi twa kukola twa Beni-hadadi.
5 Njipokola tupateso twa bikubo twa Damasika,
Njinyongesa banu bakala mu Bikathi-aveni,
Na uje ali na kuyula* mu Bethi-edeni,
Co banu ba Siria baya mu bufunge ku Kile,” ngwendi Yehova.’
6 Yehova nendeka ngwendi,
‘“Omwo Gaza nanjitengulukila lutatu, nanjitengulukila luwana, kunjitengulula binjinayongola,
Mwafwa bambatele cibunga coshe ca bafunge na kucana kuli Edomu.
7 Ngeci, njituma tuhya ha cibumbe ca Gaza,
Co tunyongesa tuposhi twendi twa kukola.
8 Njinyongesa banu bakala mu Ashidodi,
Na uje ali na kuyula mu Ashikeloni.
Njilwisa Ekroni,
Co baFilistiya banasalaho banyonga,” ngwendi Mwata Wahakamwa ya Byoshe Yehova.’
9 Yehova nendeka ngwendi,
‘Omwo Tile nanjitengulukila lutatu, nanjitengulukila luwana, kunjitengulula binjinayongola,
Mwafwa banene cibunga coshe ca bafunge kuli Edomu,
Co kubanukile cikumiiyo ca bandolome.
10 Ngeci, njituma tuhya ha cibumbe ca Tile,
Co tunyongesa tuposhi twendi twa kukola.’
11 Yehova nendeka ngwendi,
‘Omwo Edomu nanjitengulukila lutatu, nanjitengulukila luwana, kunjitengulula binjinayongola,
Mwafwa wakilimisile ndolome yendi na mukwale,
Co wabyanene kumutetela.
Mu kutenuka kwendi, natwalelelaho kubasanyozola kwa kujeneka kwiluka munima,
Natwalelelaho kubalubalela simbu yoshe.
12 Ngeci, njituma tuhya mu Temani,
Co tunyongesa tuposhi twa kukola twa Bozila.
13 Yehova nendeka ngwendi,
‘“Omwo baAmoni bananjitengulukila lutatu, bananjitengulukila luwana, kunjitengulula binjinayongola,
Mwafwa batabwile hakati banakazi baje bakele na bikute mu Giliyadi mangana babwezelele ku mutambela wabo.
14 Ngeci, njishwameka tuhya ha cibumbe ca Laba,
Co tunyongesa tuposhi twendi twa kukola,
Na mutambi wa nzita ha litangwa lya kulwa nzita,
Na lihunzi lyakama lya kutenuka ha litangwa lya lihunzi lyakama.
15 Co mwene yabo akaya mu bufunge hamo na bamyata bendi,” ngwendi Yehova.’
2 “Yehova nendeka ngwendi,
‘“Omwo Mowabi nanjitengulukila* lutatu, nanjitengulukila luwana, kunjitengulula binjinayongola,
Mwafwa wenyekele bitsiya bya mwene wa Edomu mangana apangeho memba.
2 Ngeci, njituma tuhya mu Mowabi,
Co tunyongesa tuposhi twa kukola twa Keliothi.
Mowabi atsa ha simbu ibaliuya banu,
Oku batambeka mutambi wa nzita na kwohyesa limbinga.
3 Njitundisa muka-kuyula mukati kendi,
Co njitsiya bamyata bendi boshe hamo na muka-kuyula,”* ngwendi Yehova.’
4 Yehova nendeka ngwendi,
‘Omwo Juda nanjitengulukila lutatu, nanjitengulukila luwana, kunjitengulula binjinayongola,
Mwafwa banabyana lishiko* lyange Yehova,
Co kubanyungile mashiko ange.
Banongumuka mwafwa ya makuli a kulifwa abakabangeyeye bakukulwila babo.
5 Ngeci, njituma tuhya mu Juda,
Co tunyongesa tuposhi twa kukola twa Jelusalema.’
6 Yehova nendeka ngwendi,
‘Omwo Isalele nanjitengulukila lutatu, nanjitengulukila luwana, kunjitengulula binjinayongola,
Mwafwa balandakana munu wa kusungama na siuva,
Na kulandakana kahutu na masanda.
7 Balyatangela mitwe ya banu ba kwisi mu likungu,
Bazika ngila ya banu bababotsi.
Munu na ishe balilala na mumbanda umo,
Co bali na kujwalesa lizina lyange lya kujela.
8 Balala kumukulo wa mutula woshe ha bizalo bibanambatele kupwa cishimbikiya ca mukuli,
Co binyu bibanwila ku njibo* ya binjambi babo banabyambatele ku banu baje babanafwetesele.’
9 ‘Oloni yange njanyongesele baAmoli ku mesho abo,
Baje bapwile babalaha ngwe miti ya sida, co lalo ba kukanyama ngwe miti ya oke.
Njanyongesele bushuka bwabo na mizi yabo.
10 Njamitundisile mu lifuti lya Ijipiti,
Na kumilingisa mwende mu mambo ha myaka 40,
Mangana mwakuswane lifuti lya baAmoli.
11 Njangwile bana beni bamo kupwa tupolofweto,
Co bakwenje beni bamo njabangwile kupwa Banazalite.
Indi keti mukemwo, eni banu ba Isalele?’ mukemwo mwanendeka Yehova.
12 ‘Oloni mwatwaleleleleho kwana Banazalite binyu ngweni banwe,
Co mwashikile tupolofweto ngweni: “Kumwapandele kupolofweta.”
13 Ngeci, njimitikila mu mwela weni
Ngwe litemba lije linashulu binona bibanateje mulikatikila byuma bili mwisi yalyo.
14 Muka-lumbisi kakala noku kwakutewela,
Muka-nzili kakala na nzili lalo,
Co kukwesi muka-kulwa akasa kwobola mwonyo* wendi.
15 Muka-kwasha buta bwa lusipa kakemana,
Muka-kushatuka lumbisi kakasa kutewa,
Co uje akalonda ha kabalu kakasa kwobola mwonyo* wendi.
16 Nameme baka-kulwa ba kusimpa manene
Bakatewa mutotototo ha litangwa olyo,’ mukemwo mwanendeka Yehova.”
3 “Zibeni majwi anendeka Yehova kutalesa kuli yeni, eni banu ba Isalele, kutalesa ku naanga yoshe injatundisile mu lifuti lya Ijipiti:
2 ‘Yeni lika banjinazibuka hakati ka binaanga byoshe bya ha lifuti-libu.
Mukemwo njimisana mangana mulitabele milonga yeni yoshe.
3 Kuma banu babali basa kwenda hamo okuni kubalitabasanene ngwabo baliwane ndi?
4 Kuma ndumba asa kubuluma mu shwata okuni kukwesi kasitu yashaka kulya ndi?
Kuma muna ndumba* asa kwonena mu mwela wendi okuni kukwesi byanakwata ndi?
5 Kuma kazila asa kuwila mu muheto uli asi okuni kukwesi bibanamutelamo ndi?
Kuma muheto wasa kumwashuka okuni byahi biunakwata ndi?
6 Nga limbinga lyohya mu nganda, kuma banu kubalijajela ndi?
Nga bukalu buneja mu nganda, kuma keti Yehova nabunene ndi?
7 Mwafwa Mwata Wahakamwa ya Byoshe Yehova kalingi cuma cimo
Kubanga nga najombolwela bangamba bendi tupolofweto olyo lihungu.
8 Ndumba nabuluma! Iya kazibi lyoba?
Mwata Wahakamwa ya Byoshe Yehova nendeka! Iya kapolofweta?
9 ‘Byambululeni ha tuposhi twa kukola twa Ashidodi
Na ha tuposhi twa kukola twa mu lifuti lya Ijipiti.
Endekeni ngweni: “Likungulwileni hamo mulwise minkinda ya Samaliya,
Taleni liwayanga lili mukati kendi
Na kulyapula kuli mukati kendi.
10 Mwafwa kubazibuka mwakulingila byabibwa,” mukemwo mwanendeka Yehova,
“Mu tuposhi twabo twa kukola bali na kubwezelelamo bukenya na kubiisa byuma.”’
11 Ngeci, Mwata Wahakamwa ya Byoshe Yehova ngwendi,
‘Citozi akazengeleka lifuti,
Akamanesa nzili yeni,
Co tuposhi tweni twa kukola bakatupukula.
12 Yehova nendeka ngwendi,
‘Ngwe kanyungi mwakanyangwila mendi abali nambe mutamba wa litwi ku kanwa ka ndumba,
Mukemwo mubakanyangwila banu ba Isalele,
Baje banatumama mu Samaliya ha myela yaibwa na ha bitwamo* byabibwa.’
13 ‘Zibeni na kunangula* bakunjibo ya Jakobu,’ ngwendi Mwata Wahakamwa ya Byoshe Yehova, Njambi wa maswalale.
14 ‘Mwafwa ha litangwa linjikalingisa Isalele alitabele mwafwa ya kutengulukila kwendi* kwoshe,
Njikalingisa na mitula ya Betheu ilitabele.
Mambinga a mutula bakawateta, co akawila hasi.
15 Njikasiula njibo ya kukala ha simbu ya cisika na njibo ya kukala ha simbu ya ntondwe.’
‘Binjibo bya mambinga a binjamba bikanyonga,
Co binjibo byakama* kubikakalako lalo,’ mukemwo mwanendeka Yehova.”
4 “Zibeni awa majwi, eni bingombe ba ku Bashani,
Yeni muli ha munkinda wa Samaliya,
Eni banakazi muli na kulyapula banu ba kwisi na kulyatelela tuhutu,
Yeni muli na kuleka banalume* beni ngweni, ‘Tuneneleniko bimo bya kunwa!’
2 Mwata Wahakamwa ya Byoshe Yehova nalisingi mu kujela kwendi ngwendi,
‘“Taleni! Matangwa ali na kwija omwo akamijundula na tulobo twa kushukika situ,
Co yeni mukasalako akamijundula na tulobo twa kutsiisa bisi.
3 Mukatuhukila mu bimbengwa bya ha cibumbe, umo na umo hanasungama,
Co bakamyumbila ku Hamoni,” mukemwo mwanendeka Yehova.’
4 ‘Ijeni ku Betheu mwakupokole mashiko,
Ijeni ku Giugali mwakupokole manene mashiko!*
Neneni milambu yeni mutondo,
Na kunena byabulikumi byeni ha litangwa lyamucitatu.
5 Enyekeni mulambu wa kukandelela wa likende lya kwaka musima,
Ambululeni mu kutambeka bya bwana bweni bwa kulishakela!
Mwafwa bikebyo bimwazema kulinga, eni banu ba Isalele,’ ngwendi Mwata Wahakamwa ya Byoshe Yehova.
6 ‘Oloni yange njamilingisile mutse njala* mu binganda byeni byoshe
Na kumilingisa mujeneke byakulya mu binjibo byeni byoshe.
Nameme ngoco, kumwelukile kuli yange,’ mukemwo mwanendeka Yehova.
7 ‘Kunjaminyokeselele nyozi bingonde bitatu simbu kanda simbu ya kuteja yete,
Njailingisile inyoke mu nganda imo na kujeneka kunyoka mu nganda ikwabo.
Yanyokelele mu lihya limo,
Oloni mu lihya likwabo muje kuyanyokelele mwomine.
8 Banu ba mu binganda bibali nambe bitatu batalyangelelele ku nganda imo kukanwa mema,
Oloni kubawazibile.
Nameme ngoco, kumwelukile kuli yange,’ mukemwo mwanendeka Yehova.
9 ‘Njatuminine bimbuto byeni kushaluka na mbundu.
Mwabwezelelele ku bitungu byeni na mahya eni a binyu,
Oloni bimbimba balile miti yeni ya mikuyu na miti yeni ya olive,
Nameme ngoco, anga kumwelukile kuli yange,’ mukemwo mwanendeka Yehova.
10 ‘Njamituminine mushongo wa kulitambwisa ngwe uje unjatuminine lifuti lya Ijipiti.
Njatsiile bakwenje beni na mukwale na kufungulula tubalu beni.
Njalingisile cuku ca mu bilombo byeni cikakumukile mu majulu eni,
Oloni kumwelukile kuli yange,’ mukemwo mwanendeka Yehova.
11 ‘Njanenele kunyonga mu lifuti lyeni
Ngwe munjanyongeselele Sodoma na Gomola.
Co mwapwile ngwe cimbundi cibanakwebula ha liko,
Oloni kumwelukile kuli yange,’ mukemwo mwanendeka Yehova.
12 Co obyo bikebyo binjilinga kuli yobe, obe Isalele.
Libwahesele kuliwana na Njambi yobe, obe Isalele
Mwafwa ebi bikebyo binjilinga kuli yobe,
13 Mwafwa tala! Ikeye wamungile minkinda na kutanga lihunzi,
Aleka munu biyongola byendi,
Atengulula ceke ca kukya kwa litangwa kupwa lisusulungu,
Na kulyatangela myela ya kulunduka ya ha lifuti-libu,
Yehova Njambi wa maswalale likelyo lizina lyendi.”
5 “Eni bakunjibo ya Isalele, zibeni majwi a kumilwisa anjendeka kupwa ngwe mwaso wa busiwa:
2 ‘Isalele uje napu mumbanda uje kanda alilaleho na munalume, nau,
Kasa kwimana.
Banamuseze mu lifuti lyendi,
Wahi amwimika.’
3 “Mwafwa Mwata Wahakamwa ya Byoshe Yehova nendeka ngwendi:
‘Nganda ije iya ku nzita na maswalale 1,000 ikasala na maswalale 100,
Co nganda ije iya ku nzita na maswalale 100 ikasala na maswalale 10. Ebi bikebyo bikalingiwa ku bakunjibo ya Isalele.’
4 Mwafwa Yehova naleke bakunjibo ya Isalele ngwendi:
‘Njishakezekeni, co mutwalelelaho kuyoya.
5 Keti mushakezeke Betheu,
Keti muye ku Giugali nambe kujabuka nginga na kuya ku Bele-sheba,
Mwafwa Giugali aya mu bufunge,
Co Betheu anyonga.*
6 Shakezekeni Yehova, co mutwalelelaho kuyoya,
Mangana butenu bwendi keti bwepukile bakunjibo ya Jozefu ngwe tuhya,
Tuje twenyeka Betheu kwa kujeneka wakutuzima.
7 Kwakula mwamubwa munacipwisa ngwe cimena ca kulula,
Co munombila kusungama hasi.
8 Uje watangele cibunga ca bingongonosi cibasana ngwabo Kima na cibunga ca bingongonosi cibasana ngwabo Kesiu,
Uje alingisa lisusulungu lyakama lipwe mutondo,
Uje alingisa litangwa lizibale ngwe butsiki,
Uje asana mema a mu kalunga-ndonga
Mangana awetile hasi,
Yehova likelyo lizina lyendi.
9 Alingisa kunyonga kwizile banu ba kukanyama,
Na kunyongesa myela ya kukola.
10 Bazinda baje bendekela banu ku cikolo ca nganda,
Na kuzibila bunyengwe baje bendeka busunga.
11 Muli na kusindiya kahutu afwete mutelo wa lihya*
Na kwambata binona byendi kupwa mutelo.
Ngeci, kumutwalelelaho kukala mu binjibo bya mamanya a kushonga bimunatungu
Nambe kunwa binyu bitunda mu mahya eni amabwa a binyu amunakunu.
12 Njizibuka bwingi bwa bisimbu bimunanjitengulukila*
Na bukama bwa bubi bweni.
Muli na kupindisa banu ba kusungama,
Muli na kutambula mazika-kanwa,*
Na kulyatelela lisesa lya kahutu ku cikolo ca nganda.
13 Ngeci baje bapwa baka-kuzibisisa bakoloka ha simbu oyo,
Mwafwa ikapwa simbu ya bukalu.
14 Shakezekeni byabibwa, keti kushakezeka byabibi,
Mangana mutwaleleleho kuyoya.
Co Yehova Njambi wa maswalale akala neni,
Ngwe mumuli na kwendekela ngweni ali neni.
15 Zindeni byabibi na kuzema byabibwa.
Kwakula mwamubwa cikale ku cikolo ca nganda.
Hamo Yehova Njambi wa maswalale
Azibila ngozi baje banasalaho ku batekulwila ba Jozefu.’
16 “Ngeci, zibeni byanendeka Yehova Njambi wa maswalale. Yehova nendeka ngwendi:
‘Banu bakambolozoka mu myela yoshe ya mbunga,
Co mu bitapalo byoshe bakendeka ngwabo, “Tawe, tawe!”
Bakaleka bandimi ngwabo balile,
Co bakakumuna baje bazibuka manene kulila ngwabo bambolozoke.’
17 ‘Mu mahya oshe a binyu mukakala kumbolozoka,
Mwafwa njikaita mukati keni,’ mukemwo mwanendeka Yehova.
18 Banabindama baje bali na kubandamena litangwa lya Yehova!
Bika bikalingiwa ha litangwa lya Yehova?
Likapwa litangwa lya lisusulungu, keti lya ceke.
19 Kukapwa ngwe munu uje atewa ndumba, oloni aliwana na mbeya,
Co mwakobela mu njibo yendi na kusindamena ha cibumbe na liboko, linyoka amushuma.
20 Litangwa lya Yehova likapwa lya lisusulungu, keti lya ceke.
Likapwa lya lisusulungu lyakama, keti lya ceke cakama.
21 Njazinda bilika byeni, kunjabishakele,
Co lwengo lwalubwa lwa ha biwano byeni bya kulitila kubyesi kunjizibisa kubwaha.
22 Nambe munjane bwana bwa mutunu bwa kwenyeka na bwana bweka,
Kubunjizibisa kubwaha.
Co kunjitambula milambu yeni ya kulila hamo ya tusitu ba kununa.
23 Keti munjizibise cifwayoyo na myaso yeni ya kalwa,
Co kunjishaka kuziba myaso imwimba na bisanzi byeni bya mikole.
24 Kwakula mwamubwa kwite ngwe mema,
Co kusungama kwite ngwe muna-ndonga uje kesi kuma.
25 Eni bakunjibo ya Isalele, kuma mwakele na kunjinenela milambu na bwana
Ha myaka 40 imwakele mu mambo ndi?
26 Hano mwambata mwene yeni Sakuthi na Kaiwani,
Tumponya beni bamwalipangelele, baje bapwa ngongonosi ya njambi yeni,
27 Co njikamituma mu bufunge kutubakana Damasika,’ mukemwo mwanendeka uje wa lizina lya Yehova Njambi wa maswalale.”
6 “Lubinda lwa banu ba mu Siyone baje balikulahela bakebo babenya,
Baje baliziba ngwabo kubesi mu bushonde ha munkinda wa Samaliya,
Banalume ba kutsimana ba mu lifuti lije linatwama kulutwe lwa mafuti akwabo,
Baje kubaija bakunjibo ya Isalele.
2 Jabukileni ku Kaune mukamone.
Mumutundako, yeni ku Hamathi yakama,
Co sikumukeni ku Gathi ya baFilistiya.
Kuma ebi binganda byabibwa manene kutubakana obu bumwene,*
Nambe mutambela wabyo kuma wakama kutubakana weni ndi?
3 Kuma muli na kulibalesa litangwa lya bukalu
Na kunena ciyulo* ca bukenya ndi?
4 Balala ha myela yabo ya mambinga a binjamba na kutandabala ha bitwamo byabo,
Balya bimanga ba nkomba ha butanga na bana ba bingombe ba kununa.*
5 Bamanga myaso kwesekesa na cilumo ca kalyalya,*
Co bapanga byakwimbisa ngwe mwakele na kulingila Devidi.
6 Banwila binyu mu binganja byakama-kama
Na kulikwita mazi amabwa manene.
Oloni kubaka mbunge ku bukalu bwa Jozefu.
7 Ngeci, bakalibanga kuya mu bufunge hakati ka baje bakaya mu bufunge,
Co bilika bya kalwa bya baje banatandabala mu bitwamo bikahwa.
8 ‘Mwata Wahakamwa ya Byoshe Yehova nalisingi hali ikeye babenya,’* mukemwo mwanendeka Yehova Njambi wa maswalale ngwendi,
‘“Njazinda kulyalesa kwa Jakobu,
Njazinda tuposhi twendi twa kukola,
Co njana nganda na bije binashulumo ku bitozi.
9 “‘“Co nga mu njibo imo musala banalume 10, nabo batsa. 10 Kabushoko kabo* umo akaija na kubatuhula hanja umo na umo na kubenyeka. Akatuhula bitsiya byabo mu njibo, co akendeka kuli woshe-woshe ali mu milili ya mukati ka njibo ngwendi, ‘Kuma kucili bakwabo bauli nabo ndi?’ Co akamukumbulula ngwendi, ‘Naumo wahi!’ Co akamuleka ngwendi, ‘Oloka kulu! Mwafwa ino keti simbu ya kutumbula lizina lya Yehova.’”
11 Mwafwa Yehova ikeye ali na kushika,
Co akasiula njibo yakama kuipwisa mutumbo wa mazilo,
Na kusiula njibo yaindondo kuipwisa mazilo.
12 Kuma tubalu bakashatuka ha mamanya ndi?
Kuma munu asa kukekelaho na bingombe ndi?
Mwafwa kwakula mwamubwa munacipwisa ngwe cimena ca bushungu,
Co bushuka bwa kusungama munabupwisa ngwe cimena ca kulula.
13 Mubwahelela na byuma bya kujeneka seho,
Na kwendeka ngweni, “Kuma kutwakanyamene* mu nzili yetu ndi?”
14 Ngeci, eni bakunjibo ya Isalele, njikaminenela lifuti lije likamilwisa,’ mukemwo mwanendeka Yehova Njambi wa maswalale,
‘Co bakamilyatelela kutunda ku Lebo-hamathi* kusikumuka na ku Cinema ca Alaba.’”
7 Ebi bikebyo byanjimwesele Mwata Wahakamwa ya Byoshe Yehova: Taleni! Watumine njame ya bimbimba omwo bimbuto bya kukotokela* byashangumukile kumena. Ebi byapwile bimbuto bibakunine munima ya kukela mwila wa bimuna ba mwene. 2 Oyo njame ya bimbimba muyamanesele kulya bimena bya mu lifuti, njendekele ngwange: “Obe Mwata Wahakamwa ya Byoshe Yehova, shukulu-kambu konekela banu bobe! Jakobu oboka* bati? Mwafwa wapwa wa kuzeya!”
3 Ngeci, Yehova watengulwile biyongola byendi. Yehova wendekele ngwendi: “Ebi byuma kubilingiwa.”
4 Ebi bikebyo byanjimwesele Mwata Wahakamwa ya Byoshe Yehova: Taleni! Mwata Wahakamwa ya Byoshe Yehova washikile ngwendi lifuti balyane kashitiko ka tuhya. Twomisile nzinga ya mema na kwenyeka mutamba wa lifuti. 5 Co njendekele ngwange: “Obe Mwata Wahakamwa ya Byoshe Yehova, shukulu-kambu keti unene aka kashitiko. Jakobu oboka* bati? Mwafwa wapwa wa kuzeya!”
6 Ngeci, Yehova watengulwile biyongola byendi. Mwata Wahakamwa ya Byoshe Yehova wendekele ngwendi: “Ebi byuma nabyo kubilingiwa.”
7 Ebi bikebyo byanjimwesele: Taleni! Yehova wemanene ha cibumbe cibatungile na mukole wa kusetekesa, co wakwatele mukole wa kusetekesa mu liboko lyendi. 8 Yehova wanjihwile ngwendi: “Bika biuli na kumona Amosi?” Njendekele ngwange: “Njili na kumona mukole wa kusetekesa.” Co Yehova wendekele ngwendi: “Hano njiseteka banu bange baIsalele na mukole wa kusetekesa. Hano kunjibakonekela. 9 Myela ya kulunduka ya Isaki ikapwa ngundu, co myela ya kujela ya Isalele bakaibiisa, co njikalwisa bakunjibo ya Jeloboamu na mukwale.”
10 Amaziya kapilistu wa Betheu watuminine Mwene Jeloboamu wa Isalele ou muzimbu ngwendi: “Amosi nayongola kukutengulukila hakati ka njibo ya Isalele. Banu mu lifuti kubasa kutwalelelaho kutolilila majwi endi oshe. 11 Mwafwa Amosi ali na kwendeka ngwendi, ‘Jeloboamu atsa na mukwale, co Isalele atunda mu lifuti lyendi na kuya mu bufunge.’”
12 Co Amaziya walekele Amosi ngwendi: “Obe muka-kumona bimona, ya, tewela ku lifuti lya Juda, ukatondeleko byakulya byobe,* co wasa kukapolofwetelako. 13 Keti upolofwetele lalo mu Betheu mwafwa yapwa mwela wa kujela wa mwene, co lalo yapwa njibo ya bumwene.”
14 Co Amosi wakumbulwile Amaziya ngwendi: “Kunjapwile kapolofweto nambe muna kapolofweto. Njapwile kanyungi wa bimuna na muka-kunyunga miti ya mikuyu ya sikamole.* 15 Oloni Yehova wanjitundisile ku kukabangeya butanga bwa bimanga, co Yehova wanjilekele ngwendi, ‘Ya, ukapolofwete ku banu bange baIsalele.’ 16 Ngeci, ziba byanendeka Yehova: ‘Uli na kwendeka ngwobe, “Keti upolofwete byuma bya kulwisa Isalele, co keti wambulule byuma bya kulwisa bakunjibo ya Isaki.” 17 Yehova nendeka ngwendi: “Munakazi wobe akapwa lihule mu nganda, co bana bobe ba banalume na ba banakazi bakawa na mukwale. Libu lyobe bakalitepa na mukole wa kusetekesa, co ukatsila mu lifuti lya kujwala, co Isalele akatunda mu lifuti lyendi na kuya mu bufunge.”’”
8 Ebi bikebyo byanjimwesele Mwata Wahakamwa ya Byoshe Yehova: Taleni! Kwakele cizuma ca bushuka bwa ntondwe. 2 Wanjihwile ngwendi, “Bika biuli na kumona Amosi?” Njamukumbulwile ngwange. “Njili na kumona cizuma ca bushuka bwa ntondwe.” Co Yehova wanjilekele ngwendi: “Mamaneselelo a banu bange baIsalele anaija. Kunjibakonekela lalo. 3 ‘Ha litangwa olyo, banu bakambolozoka kutubakana kwimba myaso mu tempele,’ mukemwo mwanendeka Mwata Wahakamwa ya Byoshe Yehova. ‘Mu mitambela yoshe mukakala bibimbi bibanombila, co kukoloka kulu!’
4 Zibeni ebi byuma, yeni muli na kulyatelela tuhutu
Na kumanesa banu bababotsi mu lifuti,
5 Yeni muli na kwendeka ngweni, ‘Cilika ca kutenama kwa ngonde cihwa tangwa lika, tulandese binona byetu,
Co Sabata ihwa tangwa lika, tulandese binona byetu?
Mangana tutepulule seteko ya efa*
Na kubwezelela ku bulemu bwa shekele,*
Mangana tulyapule banu na bipeseleso byetu bya makuli,
6 Mangana tulandakane munu wa kukalekeya na siuva
Na kulandakana kahutu na masanda,
Na kulandesa binona bya kujeneka seho.’
7 Yehova nalisingi na Bumpau bwa Jakobu ngwendi,
‘Kunjibala bilinga byabo byoshe.
8 Ngeci, lifuti* likajaja,
Co munu woshe watungamo akakala mu busiwa.
Kuma lifuti kulikashulu ngwe ndonga ya Nailo,
Na kufwinina na kunyekumuka ngwe ndonga ya Nailo ya mu Ijipiti ndi?’
9 Mwata Wahakamwa ya Byoshe Yehova nendeka ngwendi, ‘Ha litangwa olyo,
Njikalingisa litangwa lilahuke mutanya,
Na kulingisa mu lifuti muzibale mutanya-mwelu.
10 Njikalingisa simbu yeni ya bilika ipwe simbu ya busiwa
Na kulingisa myaso yeni yoshe ipwe myaso ya busiwa.
Bintungi byoshe njikabizika bikeleya, co njikalingisa mitwe yoshe ipwe ya mabula,
Olyo litangwa njikalilingisa lipwe ngwe litangwa lyalila munu munendi umolika,
Co mamaneselelo alyo akapwa amabi.’
11 Mwata Wahakamwa ya Byoshe Yehova nendeka ngwendi, ‘Taleni! Matangwa ali na kwija,
Omwo njikanena njala yakama mu lifuti,
Keti njala ya byakulya nambe lihwila lya mema,
Oloni njala na lihwila bya kushaka kuziba majwi a Yehova.
12 Bakatalyangela kutunda ku kalunga-ndonga umo kuya ku kalunga-ndonga mukwabo
Na kutunda ku kunto kuya ku butuhukilo bwa litangwa.
Bakaya noku-noku mu kushakezeka lijwi lya Yehova, oloni kubakaliwana.
13 Ha litangwa olyo, bambanda bababwa bakalezumuka,
Na bakwenje nabo bakalezumuka mwafwa ya lihwila,
14 Baje balisinga na bubi bwa Samaliya na kwendeka ngwabo,
“Cakama lika Njambi yobe ali na kuyoya, obe Dani!”
Na kwendeka lalo ngwabo, “Cakama lika kuli ngila iya ku Bele-sheba!”
Bakawa, co kubakakatuka lalo.’”
9 Njamwene Yehova nemana helu lya mutula, co wendekele ngwendi: “Pupa mutwe wa ngunzi, co bipamba bininganga. Bitete ku mitwe, co njitsiya wamamaneselelo na mukwale. Uje ashatuka, noku kwaya kwahi, co uje atewa kasa kubanda.
2 Nga bainda Cihilo* na kubandamo,
Liboko lyange libatundisamo,
Co nga baya mwilu,
Njibasikumwisa hasi.
3 Nga babanda helu lya munkinda wa Kameu,
Njibatonda-tonda na kubambata.
Nga babanda kwisi ya kalunga-ndonga mangana keti njibamone,
Njishika linyoka mangana abashumineko.
4 Nga bitozi babo babatwala mu bufunge,
Njishika mukwale mangana ukabatsiye.
Njibatala shwi mangana njibalinge mwamubi, keti mwamubwa.
5 Mwafwa Mwata Wahakamwa ya Byoshe, Yehova wa maswalale, ikeye akwata lifuti,*
Mangana liyengunuke, co boshe bakalamo bakala mu busiwa.
Co lifuti lyoshe lishula ngwe ndonga ya Nailo,
Na kunyekumuka ngwe ndonga ya Nailo ya mu Ijipiti.
6 ‘Uje akatungu bindendelo byendi mwilu
Na kuzameka mutungo wendi helu lya lifuti-libu,
Uje akasana mema a mu kalunga-ndonga,
Mangana awetile ha lifuti-libu,
Yehova likelyo lizina lyendi.’
7 Yehova nendeka ngwendi: ‘Eni banu ba Isalele, kuma kumwapwile ngwe bana ba baKushi kuli yange ndi?
Kuma kunjatundisile Isalele mu lifuti lya Ijipiti,
Na kutundisa baFilistiya mu Krete, na kutundisa Siria mu Kile ndi?’
8 ‘Taleni! Mesho a Mwata Wahakamwa ya Byoshe Yehova anatala bumwene buje buli na bubi,
Co abunyongesa mu lifuti.
Oloni kunjinyongesa bakunjibo ya Jakobu boshe,’ mukemwo mwanendeka Yehova.
9 ‘Mwafwa taleni! Njili na kwana lishiko,
Co njiningangesa bakunjibo ya Isalele hakati ka baka-mafuti boshe,
Ngwe munu asefa,
Co kukwesi limanya liwila hasi.
10 Banu bange baje bapwa baka-bubi batsa na mukwale,
Baje bendeka ngwabo, “Bukalu kubutushwene nambe kutuwana.”’
11 ‘Ha litangwa olyo, njikemika lipapela* lya Devidi lije linau,
Njikazika bimbengwa,
Na kubwahesa haje hanabihya.
Njikalitungulula mangana lifwe ngwe mulyafwile mu matangwa a kunima,
12 Mangana baswane byuma binasalako mu Edomu,
Na mu mafuti oshe abanasanesa lizina lyange,’ mukemwo mwanendeka Yehova, uje ali na kulinga ngoco.
13 ‘Taleni! Matangwa ali na kwija,’ mukemwo mwanendeka Yehova,
‘Omwo muka-kukekela akatubakana muka-kuteja,
Co muka-kutika bushuka bwa binyu akatubakana uje nambata mbuto.
Ha minkinda hakandweka binyu bya kupwelelela,
Co bikanjululuka na ha malundu oshe.
14 Njikakungulula banu bange baIsalele baje bali mu bufunge,
Co bakatungulula binganda bije byapwile bingundu na kukalamo.
Bakakuna mahya a miti ya binyu na kunwa binyu byayo,
Na kulima bitungu na kulya bushuka bwabyo.’
15 ‘Njikabakuna mu lifuti lyabo,
Co naumo wahi lalo akabatukula
Mu lifuti lyabo linjinabana,’ ngwendi Yehova Njambi yobe.”
Kulumbununa “Kupwa Citele” nambe “Kwambata Citele.”
Kulumbununa mwela wa kulisila bimuna.
Nambe “ali na milonga.”
Nambe “uje nakwata mulamu.”
Nambe “ali na milonga.”
Lijwi na lijwi “lyaako.”
Nambe “bilongesa.”
Nambe “tempele.”
Nambe “kuyoya.”
Nambe “kuyoya.”
Nambe “muna ndumba wa kukola.”
Nambe “bitwamo bya ku Damasika.”
Nambe “kwana bukaleho bwa kulwisa.”
Nambe “milonga yendi.”
Nambe hamo “byabingi.”
Nambe “bashukulu.”
Nambe “mwakupwe baka-kutengulukila.”
Nambe “kunjamyanene byakulya.”
Nambe hamo “apwa mwela wa manseno.”
Nambe “libu.”
Nambe “bwingi bwa milonga yeni.”
Nambe “bimbongo bya kushweka mulonga.”
Cisholoka kulumbununa bumwene bwa Juda nobu bwa Isalele.
Lijwi na lijwi “citwamo.”
Nambe “bana ba bingombe ba nkomba.”
Nambe “cisanzi ca mikole.”
Nambe “ha mwonyo wendi.”
Lijwi na lijwi “Ndolome ya ishabo.”
Lijwi na lijwi “kutwalyambatelele mambinga.”
Nambe “ku bukobelelo bwa Hamathi.”
Kulumbununa bya mu ngonde ya January na February.
Lijwi na lijwi “emana.”
Lijwi na lijwi “emana.”
Lijwi na lijwi “ukalileko likende.”
Nambe “muka-kutiba mikuyu ya sikamole.”
Taleni Biñanda bya Kushongo ha B14.
Taleni Biñanda bya Kushongo ha B14.
Nambe “lifuti-libu.”
Nambe “Sheo,” kulumbununa cihilo ca cifwisa ca banu boshe. Taleni Majwi Abanalumbununa.
Nambe “lifuti-libu.”
Nambe “tenti; cipundo.”