ZEFANIYA
1 Yehova wendekele na Zefaniya* muna Kushai, muna Gedaliya, muna Amaliya, muna Hezekiya mu matangwa a Josiya muna Amoni mwene wa Juda.
2 Yehova nendeka ngwendi: “Njikakomba byuma byoshe bili ha lifuti-libu.”
3 Njikakomba banu na tusitu.
Njikakomba tuzila na bisi ba mu kalunga-ndonga,
Njikakomba bitanwiso* hamolika na banu bababi,
Njikatundisa banu hasi omwo njikabanyongesa,” mukemwo mwanendeka Yehova.
4 “Njikolola liboko lyange na kulwisa Juda
Na banu boshe bakala mu Jelusalema,
Co njikatundisamo byuma byoshe binasalako bya kukundama kuli Bale.
Njikanyongesa mazina a tupilistu ba binjambi beka hamolika na tupilistu bakwabo ba makuli,
5 Na baje batsikamena byuma bya mwilu ha biluli byabo,
Na baje batsikama na kumwesa ngwe bapwa ba kulongwa kuli Yehova
Okuni bapwa ba kulongwa kuli Maukamu.
6 Njikanyongesa baje becela kukabangeya Yehova,
Baje kubashakezeka Yehova nambe kulomba ngwabo abatwamenene.”
7 Olokeni kulu ku mesho a Mwata Wahakamwa ya Byoshe Yehova, mwafwa litangwa lya Yehova lili muyehi.
Yehova nabwahesa mulambu, najelesa baje banalanya.
8 “Ha litangwa lya kwana Yehova mulambu njikalingisa bamyata balitabele,
Njikalingisa bana ba mwene, na baje boshe banazala bizalo bya ku lifuti lyeka balitabele.
9 Ha litangwa olyo, njikalingisa baje bakalondo ha butenda* balitabele,
Baje bakashulisa njibo ya shukulu yabo na bukenya na makuli.
10 Yehova nendeka ngwendi, “Ha litangwa olyo,
Kukakala cilumo ca banu bali na kulila ku Cikolo ca Bisi,
Kukakala cilumo ca banu bali na kumbolozoka mu mutamba wamucibali wa nganda,
Na cilumo cakama ca byuma bili na kutikika ku malundu.
11 Mbolozokeni, yeni mwatunga mu Makiteshi,*
Mwafwa baka-mingoso* boshe banabatundisako,*
Baka-kupeselesa siuva boshe banabanyongesa.
12 Ha simbu oyo, njikatondesesa mwamubwa mu Jelusalema kupangesa bindeya,
Co njikalingisa baka-kulikulahela balitabele. Baje bendeka mu bimbunge byabo ngwabo,
‘Yehova kalingi byuma byabibwa, co lalo kalingi byuma byabibi.’
13 Bufuko bwabo bakabupukula, co binjibo byabo bakabibiisa.
Bakatunga binjibo, oloni kubakakalamo,
Co bakakuna mahya a miti ya binyu, oloni kubakanu binyu byayo.
14 Litangwa lya Yehova lyakama lili muyehi!
Lili muyehi, co lili na kwija bwasi-bwasi!
Cilumo ca litangwa lya Yehova citewesa.
Ha litangwa olyo, muka-kulwa akambolozoka.
15 Olyo litangwa likapwa litangwa lya butenu,
Litangwa lya bukalu na bishoti,
Litangwa lya lihunzi lyakama na kubiisa,
Litangwa lya lisusulungu na kuzibala,
Litangwa lya mashelwa na lisusulungu lyakama,
16 Litangwa lya cilumo ca limbinga na mutambi wa nzita,
Mutambi wa kulwisa binganda bibananyungilila na tuposhi twatulaha twa mu bimbango.
17 Njikanenela banu bukalu,
Co bakenda ngwe tupuputwa,
Mwafwa Yehova ikeye ibanabiisila.
Maninga abo bakawetila, co akapwa a kujeneka seho ngwe likungu,
Co situ* yabo ikapwa ngwe tuzi.
18 Siuva yabo nambe goudi yabo kubikasa kubamena ha litangwa lya butenu bwa Yehova,
Mwafwa butenu bwendi bupwa ngwe tuhya tuje tunyongesa lifuti-libu lyoshe.
Akanyongesa boshe baje batunga ha lifuti-libu mu ngila ya kutewesa.”
2 Likungulwileni hamo, eyo, likungululeni,
Eni muyati wa kujeneka shwamwa.
2 Simbu kanda lishiko lishangumuke kupanga,
Simbu kanda eli litangwa lite ngwe lijungu,
Simbu kanda butenu bwa Yehova buje bushukuma bwije hali yeni,
Simbu kanda litangwa lya butenu bwa Yehova limizile,
3 Shakezekeni Yehova, yeni boshe bababotsi* muli ha lifuti-libu,
Yeni muli na kwononoka mashiko endi* a kusungama.
Shakezekeni kusungama, pweni bababotsi* simbu yoshe.
Hamo mukoboka ha litangwa lya butenu bwa Yehova.
4 Mwafwa Gaza ikapwa nganda ibanaseze,
Co Ashikeloni ikapwa ngundu.
Ashidodi bakaisheka mutanya-mwelu,
Co Ekroni bakaitukula.
5 Lubinda lwa baje batunga ku ngenge ya kalunga-ndonga, muyati wa baKeletite!
Lijwi lya Yehova limipaya.
Obe Kanana, obe lifuti lya baFilistiya, njikunyongesa,
Mangana keti kusale nameme umo ku banu batunga muli yobe.
6 Co ngenge ya kalunga-ndonga ikapwa bulilo bwa bimuna,
Buje buli na masima a tunyungi na malimba a mamanya a bimanga.
7 Ikapwa mutambela wa baje banasalaho ku bakunjibo ya Juda,
Kukekwo kubakalila.
Mangwezi bakalala mu binjibo bya Ashikeloni.
Mwafwa Yehova Njambi yabo akabaka mbunge,*
Co akakungulula banu babo baje bapwile bafunge na kubelwisa.”
8 “Njinazibi kushaula kwa Mowabi na matuka a baAmoni,
Baje banashendumuna banu bange na kulishashela mutambela wabo.”
9 Yehova wa maswalale, Njambi ya Isalele nendeka ngwendi, “Cakama lika njili na kuyoya,
Mowabi ipwa ngwe Sodoma,
Co Amoni ipwa ngwe Gomola,
Ipwa mwela wa mingonga na bwina bwa mwongwa, na kupwa ngundu myaka yoshe.
Baje banasalaho ku banu bange bakapukula aba banu,
Co baje banasalaho ku muyati wa banu bange bakatunga mu mutambela wabo.
10 Ebi bikebyo bilingiwa kuli bakebo mwafwa ya kulyalesa kwabo,
Mwafwa bashendumwine banu ba Yehova wa maswalale na kulijundula mu kubalwisa.
11 Bakazibila Yehova lyoba na kulikasamena,
Mwafwa akanyongesa binjambi boshe ba ha lifuti-libu,
Co mañanda oshe a mafuti akamutsikamena,*
Limo na limo mu mwela walyo.
12 Eni baka-Ithopia, neni mukatsa ku mukwale wange.
13 Akolwela liboko lyendi ku kunto* na kunyongesa Asiria,
Co Ninive akaipwisa ngundu na kuyumisa cau ngwe mambo.
14 Matanga a tusitu akabutamamo, miyati yoshe ya tusitu ba mu shwata ikabutamamo.
Butsiki, limbondo na ciningi bakakala mukati ka bingunzi byayo bije binasiuka.
Lijwi likemba mu windo.
Ha cikolo hakakala mutumbo wa bije binabujozoka,
Mwafwa akalingisa bingunzi bya sida bisale hashandangala.
15 Ei ikeyo nganda ya kulyalesa ije yakele kwa kujeneka bushonde,
Ije yakele na kwendeka mu mbunge yayo ngwayo, ‘Yange lika, kukwesi weka.’
Hano inapu cuma ca kukomokesa,
Inapu mwela wa kulala tusitu ba mu shwata.
Woshe aita kumukulo wayo akumba mulozi na kupikisa mutwe.”
3 Lubinda lwa nganda ya kutengulukila, nganda ibanajwalesa, ije inalyatelela banu bayo!
2 Kuyatolililile, kuyatabele kuinangula.
Kuyakulahelele Yehova, kuyashwenene kuli Njambi yayo.
3 Bamyata bayo bapwa bindumba baje babuluma.
Maako bayo bapwa tungunga butsiki,
Kubesi kuseza citsiya cibambulukuta kweta mutondo.
4 Tupolofweto bayo bakala na likamba, bakakwisi.
Tupilistu bayo bajwalesa byuma bya kujela,
Bombwanesa lishiko.
5 Yehova wapwa wa kusungama omwo ali mukati kayo, kesi kulinga byakuhenga.
Mutondo na mutondo ambulula bya kusompa kwendi,
Kuje kukwesi kwonwa ngwe kukya kwa litangwa.
Oloni munu wa kujeneka kusungama kesi kuziba shwamwa.
6 Njanyongesele baka-mafuti, co tuposhi twabo twa mu bimbango twasalele mupulungwa.
Njabiisile bitapalo byabo, co naumo wahi wakele na kwitamo.
Binganda byabo byapwile bingundu, kumwakele munu, naumo wahi watungilemo.
7 Njendekele ngwange, ‘Cili bene munapande kunjizibila lyoba na kutaba kuminangula,*
Mangana mwela weni keti baunyongese.
Njinapande kumilingisa mulitabele* mwafwa ya byuma byoshe ebi.
Oloni mubaboshe anga mwashakele manene kulinga byakuhenga.
8 ‘Ngeci, twaleleleniho kunjilabelela,’* mukemwo mwanendeka Yehova,
‘Kweta na litangwa linjikatuka na kupukula byuma,*
Mwafwa njinakula ngwange njikungulula baka-mafuti, njikungulula bumwene,
Mangana njibetile butenu bwange, na kulubala kwange kwoshe,
Mwafwa butenu bwange bupwa ngwe tuhya tuje tunyongesa lifuti-libu lyoshe.
9 Mwafwa ha simbu oyo njikatengulula ndaka ya banu kuipwisa ndaka ya kujela,
Mangana boshe base kusana ha lizina lya Yehova,
Na kumupangela* mu kulikwatasana.’
10 Banu bange baje banalishandoka, baje bali na kunjilambelela, bakanjinenela bwana,
Kutunda ku mutambela wa bindonga bya mu Ithopia.
11 Ha litangwa olyo, kuukazibi shwamwa
Mwafwa ya bilinga byobe byoshe bya kunjitengulukila,
Mwafwa njikatundisa baka-kulishasha ba kulyalesa muli yobe,
Co kuukalyalesela lalo ha munkinda wange wa kujela.
12 Njikatabesa banu ba kwisi ba kulikehesa bakasale muli yobe,
Co bakabanda mu lizina lya Yehova.
13 Bana ba Isalele baje banasalaho kubakalingi byuma bya kujeneka kusungama,
Kubakendeka makuli nambe kukwisa na bindaka byabo,
Bakalya na kulala, co naumo wahi akabazibisa lyoba.”
14 Tambeka mu kubwahelela, obe muna Siyone wa munakazi!
Tambeka mu kulisamba, obe Isalele!
Bwahelela na kulisamba na mbunge yobe yoshe, obe muna Jelusalema wa munakazi!
15 Yehova natundisako kashitiko kanakwanene.
Nasheke citozi cobe.
Yehova, Mwene wa Isalele, ali nobe.
Kuutewe lalo bukalu.
16 Ha litangwa olyo, Jelusalema bakamuleka ngwabo:
“Keti uzibe lyobe, obe Siyone.
Keti wecelele maboko obe azeye.
17 Yehova Njambi yobe ali nobe.
Akwobola, mwafwa wapwa Muka-nzili.
Alisamba mwafwa yobe na kubwahelela manene.
Njambi oloka kulu* mwafwa ya cizemo cendi.
Alisamba mwafwa yobe na kutambeka mu kubwahelela.
18 Njikakungulwila hamo baje bali mu busiwa mwafwa ya kujeneka kukala ku bilika byobe.
Kubakele hamo nobe mwafwa bakele mu bufunge muje mubakele na kubashendumuna.
19 Tala! Ha simbu oyo njikalwisa baje bali na kukulyatelela,
Njikobola uje ali na kunjalikita,
Co njikakungulwila hamo baje banalishandoka.
Njikabalingisa babashangazale na kubatsimanesa
Mu lifuti lyoshe muje mubabazibisile shwamwa.
20 Ha simbu oyo njikamilwisa kwimbo,
Ha simbu injikamikungulwila hamo.
Mwafwa njikamilingisa bamitsimanese na kumishangazala hakati ka miyati ya banu boshe ba ha lifuti-libu,
Munjikakungulula na kwilwisa banu beni baje bali mu bufunge oku mulimwena,” ngwendi Yehova.
Kulumbununa “Yehova Nashweke (Natulika).”
Cisholoka ebi binapu byuma nambe bilinga byakundama ku kulemesa tumponya.
Nambe “cipamba.” Hamo kulumbununa butenda bwa litanda lya mwene.
Cisholoka ngwe ou mutamba wa Jelusalema walyatele na Cikolo ca Bisi.
Nambe “baka-kulandulula.”
Lijwi na lijwi “banabolwesa.”
Lijwi na lijwi “mila.”
Nambe “ba kulikehesa.”
Lijwi na lijwi “kusompa kwendi.”
Nambe “ba kulikehesa.”
Nambe “akabanyunga.”
Nambe “akamulemesa.”
Nambe “north.”
Nambe “kumyolola.”
Nambe “kumyana kashitiko.”
Nambe “kunjibandamena na mbunge imo.”
Nambe “linjikatuka kupwa mukaleho.”
Nambe “kumulemesa.”
Nambe “awa mbunge; ajauka.”