Manthseno Na Vulothzi Vyapwa Vyavivi

Satana ashaka ngwendi mulinge manthseno. Vanu vavangi vakana viñombelo kuli vakukulwila vavo, nambe kuli vakulu mangana valivingilikiye ku vushonde. Vakalingi vyuma evi mwafwa vatewa vakulu. Vakathzala tundthzeya nambe vuthanga vwa vyemba. Vakanu nambe kulikwita “vumbanda” ha mivila yavo vuje vamona ngwavo vwakala na ndthzili yakuvavingilikiya. Vanu vamo vakashweke vyuma vimo mu vinjuvo vyavo, nambe kuvishitika mu livu, hakukulahela ngwavo vili na ndthzili yakuvavingilikiya. Vamo vakapangetha “vumbanda” mwafwa vakulahela ngwavo vwatha kuvakwatha mu chipangi chakulanda nakulandulula, nambe ku sikola, nambe ku vanu vaje vashaka kulyambata.

Mulivingilikiya kuli Satana nga Yehova apwa kavuthamba keni. Yehova Njambi na tungelo twendi vapwa vandthzili manene kutuvakana Satana na vandemona vendi. (Yakomba 2:19; Kujombolola 12:9) Yehova washaka manene kusholola ndthzili yendi mangana akwathe vavuthamba vendi vaje vamukulahela na vimbunge vyavo vyoshe.—2 Mizimbu 16:9.

Lijwi lya Njambi lyendeka ngwalyo: ‘Kesi mukalinge maseno.’ Yehova wathzinda manthseno na vulothzi mwafwa evi vilinga vyatha kwaka munu mu mavoko a Satana Liyavolo.—Valevi 19:26.