Jakobu Wambatele Buswana

Isaki wakele na myaka 40 mwambatele Rabeka. Wamuzemene manene. Mu kwita kwa simbu, bakele na bampasa ba banalume babali.

Munabo wa mukulunu wapwile Isau, wa mwanike wapwile Jakobu. Isau wazemene manene kuya mu shwata, co lalo wazibukile mwamubwa kuyomba. Oloni Jakobu ikeye wazemene kukala hembo.

Ha simbu ije, nga cisemi wa munalume atsa, munendi wa ntwatwa wa munalume bakele na kumwana mutamba wakama wa libu lyendi na bimbongo byendi. Ebi byuma babitumbwile ngwabo buswana. Mu naanga ya Isaki, buswana bwambateselele kutambula bikulaheso byakulahesele Yehova kuli Abrahamu. Isau kakele manene mbunge ku bikulaheso bya Yehova, oloni Jakobu wazibukile ngwendi byapwile bya seho manene.

Litangwa limo, Isau welukile kwimbo oku najuka manene mwafwa wayombele litangwa lya mutunu. Wawanene Jakobu ali na kuteleka byakulya byabibwa, co wendekele ngwendi: ‘Njinatsi njala, njaneko owo makunde a kubenga.’ Jakobu wamukumbulwile ngwendi: ‘Njikwana, oloni tahi njikulahese ngwobe unjana buswana bwobe.’ Co Isau wendekele ngwendi: ‘Buswana bunjikwasa bika? Wasa kubwambata. Yange njitonda byakulya.’ Musinganyeka ngweni byuma byalingile Isau byapwile byabibwa ndi? Embwe. Isau wanesele byuma bya seho manene mwafwa ya lilonga lya makunde.

Isaki mwakulubalele, simbu yetele oni ya kubezikisa munendi wa ntwatwa. Oloni Rabeka wakwasele Jakobu munabo wa mwanike mangana bamubezikise mu mwela wa yayendi. Isau mwazibukile byalingile shongo yendi, walubalele manene, co wayongwele kumutsiya. Isaki na Rabeka bashakele kunyungilila munabo Jakobu, ngeci bamulekele ngwabo: ‘Ya ukakale kuli nyokono Labani, kweta noho Isau akatula matoto.’ Jakobu watolililile bisemi bendi, co watewele mangana obole mwonyo wendi.