Cikomokeso ku Kalunga-ndonga wa Kubenga

Falo mwazibile lika ngwabo baIsalele banatundu mu Ijipiti, watengulwile biyongola byendi bya kubapatula. Co washikile maswalale bendi ngwendi: ‘Bwaheseni matemba ange a nzita oshe mangana tubakabe. Twabiisa kubapatula.’ Ngeci, Falo na banu bendi bashangumukile kusheka baIsalele.

Yehova wakele na kutwamenena banu bendi kupangesa lishelwa mutanya na tuhya ku butsiki. Wabatwamenenene ku Kalunga-ndonga wa Kubenga, co wabalekele ngwendi batunge cilombo.

BaIsalele bamwene Falo na maswalale bendi bali na kubakaba munima. Kubakele noku kwa kutewela mwafwa kunima kwakele na kwija cibunga ca maswalale ba Ijipiti, co kulutwe kwakele kalunga-ndonga. Batambekele kuli Mosesa ngwabo: ‘Lelo tutsa! Ngwe watusezele ngano mu Ijipiti.’ Oloni Mosesa wabalekele ngwendi: ‘Keti muzibe lyoba. Bandameneni mumone mwatwobwela Yehova.’ Mosesa wakulahelele manene Yehova, indi bati?

Yehova walekele baIsalele ngwendi batwaleleleho na bungenzi bwabo. Buje bene butsiki, Yehova walingisile lishelwa limane mukati ka baka-Ijipiti na baIsalele. Co ku mutambela wa baka-Ijipiti kwakele lisusulungu. Oloni ku mutambela wa baIsalele kukekwo kwakele ceke.

Yehova walekele Mosesa olwele liboko lyendi ha kalunga-ndonga. Co Yehova walingisile lihunzi lyakama lihuwe butsiki bwoshe. Ngeci, mema a mu kalunga-ndonga alyangunwine, co hakele ngila hakati. BaIsalele babangi-bangi betile ha libu lya kuma, mukati ka bibumbe bya mema na kuya musambwa.

Cibunga ca maswalale ba Falo cakabele baIsalele haje ha masima a kalunga-ndonga. Oloni Yehova wabatanganesele. Mawili a matemba abo ashangumukile kushomozoka. Ngeci, maswalale batambekele ngwabo: ‘Tuteweniko kuno! Yehova ali na kubalwila.’

Yehova walekele Mosesa ngwendi: “Olwela liboko lyobe ha kalunga-ndonga.” Ngeci, bije bibumbe bya mema byawililile maswalale ba Ijipiti. Falo na banu bendi boshe batsile. Naumo wahi wobokele.

Mbunga ya banu yakele hasambwa likwabo lya kalunga-ndonga, yembilile Njambi mwaso ngwayo: ‘Twimbila Yehova, mwafwa banamuzumbangeya manene. Nombila kabalu na muka-kulonda kabalu mu kalunga-ndonga.’ Banu mubakele na kwimba, banakazi bakele na kukina na kwimba tungoma. Banu boshe babwahelelele mwafwa bapatukile.