Donki ya Balamu Endeka

BaIsalele bakele mu mambo ha myaka ya kweta ku 40. Bafungulwile binganda byabingi bya kukanyama. Co mubakele mu cana ca Mowabi, ku butuhukilo bwa litangwa bwa Ndonga ya Jodani, simbu yetele oni ya kukobela mu Lifuti lya Cikulaheso. Oloni Balaki mwene wa Mowabi wazibile lyoba mwafwa wasinganyekele ngwendi baIsalele bamunyeka lifuti lyendi. Ngeci, wasanene Balamu aije ku Mowabi mangana akusinge baIsalele.

Oloni Yehova walekele Balamu ngwendi: ‘Keti usinge baIsalele.’ Ngeci, Balamu wabyanene kuya ku Mowabi. Mwene Balaki wasanene lalo Balamu na kumuleka ngwendi amwana byuma byoshe byashaka. Balamu anga bene wabyanene kuya. Co Njambi walekele Balamu ngwendi: ‘Wasa kuya, oloni ukendeke lika binjikakuleka.’

Balamu walondele ha donki yendi na kuya ku mbwela ya Mowabi. Wayongwele kukasinga baIsalele nameme Yehova wamulekele ngwendi keti alinge ngoco. Ngeci, kangelo ka Yehova washolokele kuli Balamu lutatu mwakele mu ngila. Oloni Balamu kamwene uje kangelo, donki yendi ikeye lika wamumwene. Hakulibanga donki watundile mu ngila na kuya mu lihya. Kutundaho, waile ku cibumbe ca mamanya na kukasindakana lindi lya Balamu. Mamaneselelo, ndoki watumamene lika mu ngila. Ha bisimbu byoshe ebi, Balamu wakele na kupupa donki yendi na citi.

Balamu mwapupile donki yendi lwamucitatu, Yehova walingisile uje donki endeke na kwihula Balamu ngwendi: ‘Bika biuli na kunjipupila ngacije?’ Balamu wamukumbulwile ngwendi: ‘Unanjimono bulema. Ngwe njili na mukwale ngwe njinakutsii.’ Co donki wakumbulwile ngwendi: ‘Unanjilondo ha myaka yaingi, kuma njakulingaho laja muje ndi?’

Yehova walingisile Balamu amone kangelo. Co kangelo wendekele ngwendi: ‘Yehova nakulekele ngwendi keti usinge Isalele.’ Balamu wendekele ngwendi: ‘Njinabiisa, njiluka kwimbo.’ Oloni kangelo wendekele ngwendi: ‘Wasa kuya ku Mowabi, oloni ukendeke lika byakuleka Yehova.’

Kuma Balamu walilongeseleko bimo ndi? Embwe. Munima yebi, Balamu anga washakele kusinga Isalele lutatu, oloni Yehova wakele na kulingisa Balamu abezikise baIsalele. Mu kwita kwa simbu, baIsalele balwile na Mowabi, co Balamu bamutsiile mu nzita. Kuma Balamu walingile mwamubwa kubyana kutolilila byamulekele Yehova ndi?