Yehova Wangwile Joshua

Munima ya kutwamenena baIsalele ha myaka yaingi, Mosesa wakele oni muyehi na kutsa. Yehova wamulekele ngwendi: ‘Keti yobe utwamenena baIsalele mu Lifuti lya Cikulaheso. Oloni njikumwesa Lifuti lya Cikulaheso.’ Mosesa walombele Yehova angule ntwama wamuha uje atwamenena banu bendi. Co Yehova wamulekele ngwendi: ‘Ya kuli Joshua ukamuleke ngwobe njinamwangula kupwa ntwama ya Isalele.’

Kutundaho, Mosesa walekele baIsalele ngwendi ololo atsa, co Yehova nangula Joshua abatwamenene mu Lifuti lya Cikulaheso. Mosesa walekele lalo Joshua ngwendi: ‘Keti uzibe lyoba mwafwa Yehova akukwasa.’ Kutundaho, Mosesa wakandukile ha Munkinda wa Nebo, co Yehova wakamumwesele lifuti lyakulahesele Abrahamu, Isaki na Jakobu. Mosesa wakele na myaka 120 mwatsile.

Yehova walekele Joshua ngwendi: ‘Jabuka Ndonga ya Jodani mangana uye mu Kanana. Njikukwasa ngecilika munjakwaselele Mosesa. Co unapande kutanda Mashiko ange ha litangwa na litangwa. Keti uzibe lyoba, simpa. Ya ukalinge byoshe binjinakushiki.’

Joshua watumine tunenga babali ku nganda ya Jeliko. Mu cilongesa cinatako, tulilongesa byuma byalingiwile omwo tunenga baile mu nganda ya Jeliko. Baje tunenga mubelukile bendekele ngwabo ije ikeyo yapwile simbu yaibwa ya kukobela mu lifuti lya Kanana. Lyamukwabo, Joshua walekele baIsalele ngwendi balongekeye. Co watwamekele tupilistu baje bambatele cikasha ca cikumiiyo mangana balibange kuya ku Ndonga ya Jodani. Ha simbu ei, ndonga te inajalela. Oloni tupilistu mubalyatele lika mu ndonga, mema ecelele kwenda, co omine. Tupilistu mubetele hakati ka ndonga bemanene kweta noho habajabukilile baIsalele boshe. Kuma musinganyeka ngweni eci cikomokeso canukisile baIsalele byalingile Yehova ku Kalunga-ndonga wa Kubenga ndi?

Munima ya kukala myaka yaingi mu mambo, baIsalele bakobelele oni mu Lifuti lya Cikulaheso. Basele oni kutunga binganda na binjibo na kulima mahya. Muje mu lifuti mwalisalele mabele na buki.