Yehova Wanene Samsoni Nzili Yaingi

BaIsalele babangi bashangumukile lalo kulemesa tumponya, ngeci Yehova watabesele baFilistiya babayule. Oloni kwakele baIsalele bamo baje bazemene Yehova. Manowa nendi wakele na kulemesa Yehova. Ikeye na munakazi wendi kubakele na bana. Litangwa limo, Yehova watumine kangelo kuli munakazi wa Manowa. Co kangelo wamulekele ngwendi: ‘Ukakita mwana wa munalume. Akapatula Isalele kuli baFilistiya. Co akapwa Kanazalite.’ Kuma muzibuka banu babatumbwile ngwabo Banazalite ndi? Bapwile bangamba ba Yehova ba kulitila. Banazalite kubabatabesele kutehula binkambu.

Mu kwita kwa simbu muna Manowa wa munalume wasemukile, co bamulukile lizina lya Samsoni. Samsoni mwakolele, Yehova wamwanene nzili yaingi. Watsiile ndumba kwa kujeneka kupangesa citwa. Simbu imo, Samsoni watsiile baFilistiya 30 likalyendi. Ngeci, bamuzindile, co bakele na kushaka kumutsiya. Litangwa limo butsiki, Samsoni mwalalele mu nganda ya Gaza, baFilistiya baile kukamubandamena ku cikolo ca nganda mangana bamutsiye mutondo. Oloni Samsoni wendukile hakati ka butsiki na kuya ku cikolo ca nganda, co wakasokwele lipito na kulyambata. Wakulikile lije lipito ha citsili kuketa kuyehi na Munkinda wa Hebroni.

Co baFilistiya baile kuli Delila munakazi yashakele kwambata Samsoni na kukamuleka ngwabo: ‘Tukufweta bimbongo byabingi bya siuva nga utuleka hemana nzili ya Samsoni. Tushaka tumukwate na kumwaka mu kamenga.’ Delila watondele bimbongo, ngeci watabele. Hakulibanga, Samsoni wabyanene kuleka Delila byamulingisile akale manene na nzili. Oloni watwaleleleleho kumwihula kweta noho walangulwile byuma byamulingisile akale manene na nzili. Samsoni wamulekele ngwendi: ‘Binkambu byange kanda babitehuleho kushwa ku bwanike bwange mwafwa njapwa Kanazalite. Nga binkambu byange babitehula, co nzili yange ihwa.’ Samsoni wasebukile manene mwalekele Delila hemana nzili yendi, indi bati?

Co haje bene Delila wakalekele baFilistiya ngwendi: ‘Njizibuka hayemana nzili ya Samsoni. Wamulalesele ha mendi endi ngeci aye mutulo, co wasanene munalume umo akutehule binkambu byendi. Co Delila watambekele ngwendi: ‘Samsoni baFilistiya baneja!’ Samsoni mwendukile, walizibile ngwendi nzili yendi inahu. BaFilistiya bamukwatele na kumutiba mesho na kumutwala mu kamenga.

Litangwa limo, baFilistiya balikungulwile mu tempele ya njambi yabo Dagoni, co bakele na kutambeka ngwabo: ‘Njambi yetu nana Samsoni mu maboko etu. Muneneni mangana twakumushendumune.’ Bamunenele na kumwimika mukati ka bingunzi bibali, co bashangumukile kumushendumuna. Samsoni watambekele ngwendi: ‘Yehova njikulomba njane nzili yange lalo.’ Ha simbu ei, binkambu byendi te byashangumuka lalo kukola. Co wasindikile bingunzi bya tempele na nzili yendi yoshe. Uje mutungo wawile na kutsiya banu boshe bakele muje mu tempele, co Samsoni nendi watsile.