Liswalale na Mwanike wa Munakazi

Mu lifuti lya Siria mwakele mwanike wa kaIsaele wa munakazi uje wakele kulako na kwimbo lyendi. Maswalale ba Siria bakebo bamutwalele mu Siria. Co ha simbu ei, wapwile ngamba ya munakazi wa Namani uje wapwile muka-kushika maswalale. Ou mwanike wakele na kulemesa Yehova nameme banu baakele nabo kubalingile ngoco.

Namani wakele na kubinja mushongo wa mbumba, co wakele na kuziba kubabala simbu yoshe. Ou mwanike washakele manene kumukwasa. Ngeci, walekele munakazi wa Namani ngwendi: ‘Njizibuka munu asa kukangwisa munalume wobe. Mu Isalele muli kapolofweto ka Yehova, lizina lyendi ikeye Elisha. Co asa kukangwisa munalume wobe.’

Munakazi wa Namani walekele munalume wendi byamulekele mwanike wa kaIsalele. Namani washakele kukanguka, ngeci waile ku njibo ya Elisha mu Isalele. Namani wabandamenene ngwendi Elisha amutambula ngwe munu wa kulitila. Oloni Elisha kaile na kumutambula, watumine lika ngamba yendi ngwendi akamumeneke na kumuleka ngwendi: ‘Ya ukatane mu Ndonga ya Jodani lwa kupwa 7. Co ukanguka.’

Namani walubalele manene. Ngeci, wendekele ngwendi: ‘Njasinganyekele ngwange ou kapolofweto asana ha lizina lya Njambi yendi na kunjikwata ha mbumba mangana njikanguke. Oloni anjileka ngwendi njiye ku ndonga ili mu Isalele. Tuli na bindonga byabibwa mu Siria. Mwafwa bika kunjii lika na kutana mu bindonga byetu?’ Namani walubalele, co watundile ku njibo ya Elisha.

Bangamba ba Namani bamukwasele atengulule bisinganyeka byendi bya kuhenga. Bamulekele ngwabo: ‘Kuma kuwasa kulinga byuma byoshe-byoshe mangana ukanguke ndi? Byanakuleke ou kapolofweto byabyasi manene kubilinga. Mwafwa bika kuulingi byanakuleke?’ Namani watolililile bangamba bendi, co waile na kutana ku Ndonga ya Jodani lwa kupwa 7. Mwazimininine lwa bu 7, wakangukile. Namani wabwahelele manene, co waile na kukandelela kuli Elisha. Wendekele ngwendi: ‘Hanwoni njazibuka ngwange Yehova ikeye lika Njambi wa busunga.’ Musinganyeka ngweni uje mwanike wa kaIsalele walizibile bati Namani mwelukile oku nakanguka?