Byahi Byabonowesele Kwambulula

Kwakele ciyanga umo uje wakele na kutumama ku cikolo ca tempele ha litangwa na litangwa oku alomba bukwasi. Litangwa limo mutanya, wamwene Pita na Iwano bakobela mu tempele. Co wabalekele ngwendi: ‘Shukulu-kambu njilombako bimuli nabyo.’ Pita wamukumbulwile ngwendi: ‘Njili na byuma byabibwa binjishaka kukwana bije bitubakana bimbongo. Mu lizina lya Yesu, enda!’ Co Pita wamukatwile, haje bene washangumukile kwenda. Mbunga yabwahelelele manene ha byuma bibalingile, co bwingi bwa banu bapwile baka-kutaba.

Oloni tupilistu na Basaduki balubalele. Bakwatele tupositolo na kubatwala ku nkuta na kukabehula ngwabo: ‘Iya namyana nzili ya kukangwisa ou munalume?’ Pita wabakumbulwile ngwendi: ‘Tunatambula nzili kutunda kuli Yesu Kristu uje imwatsiile.’ Bantwama ba bulombelo babayalumukilile ngwabo: ‘Eceleni kwendeka bya Yesu!’ Oloni tupositolo bendekele ngwabo: ‘Kutwecela mwafwa tunapande kwendeka byendi.’

Pita na Iwano mubabapatwile, baile kuli bandongesi bakwabo na kukabaleka byuma byoshe byalingiwile. Balombelele hamo kuli Yehova ngwabo: ‘Tukwase tupwe ba kusimpa mangana tutwaleleleho kupanga cipangi cobe.’ Yehova wabanene sipilitu yendi ya kujela, co batwaleleleleho kwambulula na kukangwisa banu. Banu babangi batengulukile na kupwa baka-kutaba. Basaduki bazibile cipululu, co bakwatele tupositolo na kubaka mu kamenga. Oloni ku butsiki, Yehova watumine kangelo, co washokolwele bikolo bya kamenga na kubaleka ngwendi: ‘Yeni ku tempele mukalongese.’

Lyamukwabo mutondo, nkuta ya Sanihedrini ya bantwama ba bulombelo bailekele ngwayo: ‘Kamenga kakupata mwamubwa, oloni banalume bamunakutile bahimo! Bali mu tempele, bali na kulongesa banu!’ Ngeci tupositolo babakwatele lalo na kubatwala ku nkuta ya Sanihedrini. Kapilistu wahakamwa wendekele ngwendi: ‘Twamishikile ngwetu keti mulongese lalo bya Yesu!’ Oloni Pita wakumbulwile ngwendi: “Tunapande kwononoka Njambi ha kupwa ikeye muka-kuyula kutubakana kwononoka banu.”

Bantwama ba bulombelo balubalele manene, co bashakele kutsiya tupositolo. Oloni Kafalisi umo wa lizina lya Gamaliele, wemanene na kwendeka ngwendi: ‘Nyanyameni! Hamo Njambi ali naba banalume. Kuma mushaka kulwisa Njambi ndi?’ Ngeci batolililile ku cinangulo cendi. Co bapupile baje tupositolo na kubashika ngwabo balikele kwambulula. Kutundaho, babecelele baye. Oloni ebi byuma kubyabonowesele kwambulula. Batwaleleleleho kwambulula muzimbu waubwa mu kusimpa mu tempele na ha njibo na njibo.