Baka-kutanda Behula Ngwabo . . .

Kuma Kuli Bakaleho ba Yehova ba Banakazi Baje Bapwa Baka-kwambulula Ndi?

Eyo. Mu kaye koshe mwakala Bakaleho ba Yehova ba banakazi babangi baje bapwa baka-kwambulula. Bapwa mbunga yakama ya baka-kwambulula muzimbu waubwa wa Bumwene bwa Njambi. Mukanda wa Myaso 68:11 unendeka hali aba baka-kwambulula ngwawo: “Shukulu Kalunga washikile lishiko, co banakazi babangi bambulwile muzimbu [waubwa.]”

Oloni Bakaleho ba Yehova ba banakazi baje bapwa baka-kwambulula kubalifu na bantwama ba bulombelo ba banakazi. Kuli byuma bimo bibalingisa baliseze. Byuma muka byene obyo?

Banu babakambulwila banaliseze. Bantwama ba bulombelo ba banakazi bakatwamenena mu bikungulukilo byabo, co bwingi bwa banu babakalongesa bapwa banu ba mu bulombelo bwabo. Oloni Bakaleho ba Yehova ba banakazi baje bapwa baka-kwambulula bakebo bakambulwila baje bali hanja ya cikungulukilo, babakaliwana nabwo omwo bambulwila ha njibo na njibo na mu mitambela yeka.

Ngila ikwabo ibanalisezelamo Bakaleho ba Yehova ba banakazi baje bapwa baka-kwambulula na bantwama ba bulombelo ba banakazi inapu bipangi bibakapanga mu cikungulukilo. Bantwama ba bulombelo ba banakazi bakatwamenena na kulongesa banu boshe ba mu bulombelo bwabo bilongesa bya bulombelo bwabo. Oloni Bakaleho ba Yehova ba banakazi baje bapwa baka-kwambulula bakebo kubesi kulongesa mu cikungulukilo nga banalume ba kumbwitika kubali. Banalume babanangula bakebo lika bakalongesa.—1 Timateo 3:2; Yakomba 3:1.

Mbimbiliya imwesa ngwayo banalume lika bakebo banapande kutwamenena mu cikungulukilo. Nangukeni byendekele kapositolo Paulu kuli Tito uje wapwile kanyungi ngwe ikeye. Wamusonekelele ngwendi: ‘Ebi bikebyo binjakusezelele mu Kelete ngeci . . . wangule bakulunu mu bikungulukilo mu nganda na nganda.’ Paulu wendekele lalo ngwendi munalume woshe ibangwile wapandele ‘kupwa wa kujeneka mulonga, munalume wa munakazi umolika.’ (Tito 1:5, 6) Paulu wanene binangulo bya kulifwa kuli Timateo. Wasonekele ngwendi: ‘Nga munu ali na kupanga na nzili mangana apwe kanyungi, co ali na kushungwiya cipangi cacibwa. Kanyungi napande kupwa munu wa kujeneka mulonga, munalume wa munakazi umolika, . . . uje asa kulongesa bakwabo.’—1 Timateo 3:1, 2.

Mwafwa bika cipangi ca kutwamenena mu cikungulukilo capwa lika ca banalume? Paulu ngwendi: “Kunjitaba ngeci banakazi balongese nambe kushika hakati ka banalume embwe, banapande kwoloka kuluu. Omwo Adama ikeye batangele ha kulibanga, co asinoni Eva.” (1 Timateo 2:12, 13) Ngeci, Njambi mwatangelelemo byuma kumwesa byananena banalume cipangi ca kulongesa na kutwamenena.

Bangamba ba Yehova boshe bakakabangeya mwanja wa Ntwama yabo Yesu Kilistu. Ndongesi Luka wasonekele kutalesa ku cipangi ca Yesu ca kwambulula ngwendi: “Waile na kwendangana mu binganda na mu membo, na kwambulula biñanda byabibwa bya Bumwene bwa Njambi.” Mu kwita kwa simbu, Yesu watumine baka-kumukabangeya balinge cipangi ca kulifwa. Nabo “baile, bendanganene mu membo oshe na kwambulula biñanda byabibwa.”—Luka 8:1; 9:2-6.

Ano matangwa, bangamba ba Yehova boshe, ipwe banakazi nambe banalume, bali na kulinga cipangi capolofwetele Yesu ngwendi: “Ebi biñanda byabibwa bya Bumwene bakabyambulula mu kaye mwoshe ngwe kupwa bukaleho ku miyati yoshe, co asinoni kukotoka kwa kaye kukaija.”—Mateo 24:14.