“Hano Kunjesi na kuliziba ngwange njinapande kutengulula kaye”

BUYOYE BWANGE BWA KUNIMA:

Kushwa lika ku bwanike bwange, njazema byuma bya kutanga. Naanga yetu yazemene manene kuya na kukenga bishwata na mashali aje azengelekele mbongi yetu ya Jyväskylä mu Central Finland. Njazema lalo tusitu. Ku bwanike, kunjakele na kumona kangatwa nambe katali kubanga njamubumbateya. Munjakele na kukola, kunjakele na kuliziba bwino munjakele na kumona banu bayandesa tusitu. Mu kwita kwa simbu, njalikwatasanene na munga ije yakele na kunyungilila tusitu, co njakawanene banu baje bazema tusitu ngwe yange.

Twashakele kunyungilila tusitu. Twakele na kuleka banu bya kunyungilila tusitu. Co lalo twakele na kumunga bibunga na kunena mpindangano kuli baka-bintolo baje bakele na kulandesa maka a tusitu na baje bakele na kulilongesela ha tusitu mangana tumwese kulubala kwetu. Twamungile munga ikwabo lalo ya kunyungilila tusitu. Kakangi twakele na kulilwisa na baka-fulumende, mwafwa twakele na kulinga byuma mu kutubakanesa. Ha bisimbu byabingi, bakele na kunjikuta na kunjitwala ku nkuta.

Byuma byakele na kulingiwa mu kaye nabyo byakele na kunjizibisa kubabala ku mbunge. Mu kwita kwa simbu, njalikwatasanene na bimunga byabingi bya kufwa ngwe munga ya Amnesty International na munga ya Greenpeace. Njakundwiiye byoshe bibakele na kulinga. Njakele na kwendekelako tuhutu na banu boshe ba kwisi.

Nameme njalifwitile, oloni njanangukile ngwange kunjasa kutengulula kaye. Nameme bije bimunga byasele kumanesako bukalu bumo bwabundondo, oloni bukalu bwakama bubakele na kuliwana nabwo banu bwatwaleleleleho kulibwezelela. Co lalo mwafwa ya bubi bunatumu manene mu kaye, banu kubakele na kwaka mbunge ku byuma. Ngeci, njazeyele.

MBIMBILIYA MUYATENGULWILILE BUYOYE BWANGE:

Munjanangukile ngwange kunjasa kutengulula kaye, njashangumukile kusinganyeka bya Njambi na Mbimbiliya. Kunima, njakele na kulilongesa Mbimbiliya na Bakaleho ba Yehova. Njazibukile ngwange Bakaleho bapwa banu bababwa, co lalo banjakele mbunge, oloni kunjatengulwile futisi yange. Nameme ngoco, byuma byatengulukile.

Njambatele Mbimbiliya yange na kushangumuka kuitanda. Biñanda binjatandelemo byanjizembelekele manene. Cakumwenako, mukanda wa Visimo 12:10 ngwawo: “Muka-busunga anyunga mwamubwa bimuna bendi.” Njalilongesele lalo ngwange Njambi keti ikeye ali na kunena bukalu bubali na kuliwana nabwo banu. Oloni obu bukalu buli na kulibwezelela mwafwa banu babangi kubesi na kukabangeya mashiko endi. Njabwahelelele manene munjalilongesele ngwange Yehova wakala na cizemo, co lalo wakala na mbunge ya kubandamena.—Myaso 103:8-14.

Njawanene lipapelo lije linjapangesele mu kulomba libulu lya Byuma Muka Mpundu Biilongesa Mbimbiliya? Co njalitumine. Munima ya simbu yaindondo lika, Bakaleho babali bezile, munu na munakazi wendi, co twashangumukile kulilongesa Mbimbiliya. Njashangumukile na kuya ku Njibo ya Bumwene. Ngeci, njashangumukile kuzibisisa mwamubwa binjakele na kulilongesa.

Mbimbiliya yanjikwasele njitengulule byuma byabingi mu kuyoya kwange. Njecelele kusipa na kunwa manene bwala. Njatengulwile sholwesi yange na kwecela kupangesa majwi amabi. Co lalo njashangumukile kusingimika baka-fulumende. (Loma 13:1) Kutundaho, njashangumukile kukabangeya biyendeka Mbimbiliya ha kujeneka kukala na mapangala.

Oloni cuma canjikaluwilile manene capwile kwecela kulikwatasana na bije bimunga. Ha kulibanga njalizibile ngwange kunjipu wa kulongwa nga njecela kulikwatasana na bije bimunga. Oloni njalilongesele ngwange Bumwene bwa Njambi bukebwo lika bwasa kumanesa bukalu bubali na kuliwana nabwo banu mu kaye. Ngeci, njashangumukile kukundwiiya Bumwene bwa Njambi na kukwasa bakwetu mangana nabo babuzibuke.—Mateo 6:33.

BUKWASI BUNJINAWANA:

Ha kupwa muka-kulwila bibatonda banu, njakele na kwangununa banu. Bamo njakele na kubamona ngwange babibi, bakwaboco njakele na kubamona ngwange bababwa. Co njakele na kulwisa baje banjamwene ngwange banu bababi. Oloni Mbimbiliya yanjikwasa njitundise cizindo cakele mu mbunge yange. Co hano njili na kulinga mwoshe munjasela mangana njizeme banu boshe. (Mateo 5:44) Ngila imo injashaka kumweselamo ngwange njazema bakwetu inapu kubambulwila muzimbu waubwa wa Bumwene bwa Njambi.

Kwaka byuma mu maboko a Yehova kwanjikwasa njipwe wa kubwahelela. Njizibuka ngwange Yehova ha kupwa Ishamatanga kakecelela tusitu na banu batwaleleleho kubayandesa nambe kwecelela lifuti-libu balibiise. Bumwene bwendi bukabwahesa byuma byoshe bibanabiisa banu. (Isaya 11:1-9) Kuzibuka busunga bwa mu Mbimbiliya na kukwasa bakwetu nabo babuzibuke, kwanjilingisa njipwe wa kubwahelela. Hano kunjesi na kuliziba ngwange njinapande kutengulula kaye.