Bikumbululo byabibwa binjawanene mu Mbimbiliya byanjetele ku mbunge

BUYOYE BWANGE BWA KUNIMA:

Njasemukilile mu mbongi ya Székesfehérvár, mu lifuti lya Hungary. Ei mbongi inakalako ha myaka ya kweta ku 1000. Oloni njicikanuka byuma mubyabihilile omu mu mbongi mu kwakele nzita ya kaye yamucibali.

Munjapwile mwanike bakuku bakebo bakele na kunjilela. Njabazemene manene, co njicikabanuka, maneneni bakuku ba banakazi ba Elisabeth. Banjikwasele kukulahela manene Njambi. Twakele na kulombelela hamo Lilombelo lya Mwene mangwezi na mangwezi kushwa lika hanjakelelele na myaka itatu. Nameme ngoco, kunjazibukile bilyalumbunwine eli lilombelo kubanga munjakele na myaka 20.

Bakuku bakele na kunjilela munjapwile mwanike mwafwa bisemi bange bakele na kupanga butsiki na mutanya mangana bawane bimbongo bya kulanda njibo yaibwa. Nameme ngoco, twakele na kuliwana hamo Lyasapalalo munima ya byalumingo bibali na kulila hamo byakulya. Njazemene manene ije simbu itwakele na kukala hamo.

Mu 1958, bisemi bange bawanene bimbongo bya kulanda njibo yaibwa muje mutwasele kukala tubatatu. Njabwahelele manene munjakakele na bisemi bange! Oloni munima ya bingonde 6 kwalingiwile cuma cije camanesele kubwahelela kunjakele nakwo. Batate batsile ku mushongo wa kansa.

Njazibile manene kubabala ku mbunge. Njalombelele kuli Njambi ngwange: “Njambi, njakulombele ngwange wobole batate. Njibatonda manene. Mwafwa bika kuwakele na kukumbulula malombelo ange?” Njashakele manene kuzibuka kubakele batate. Njakele na kulihula ngwange: ‘Banai kwilu ndi? Indi noku kubali bene kwahi, co kunjikabamono lalo?’ Njazibilile cipululu bakwetu banike baje bacikele na baishabo.

Ha myaka yaingi, njakele na kuya ku bihilo kushwa kumo. Njakele na kubulyama ha cihilo ca batate na kulombela ngwange: “Njambi, njikulomba unjikwase kuzibuka kubali batate.” Njakele na kumulomba lalo anjikwase kuzibuka binjili na kuyoyela.

Munjakele na myaka 13, njashangumukile kulilongesa Cijemani. Njasinganyekele ngwange nga njitanda mabulu a Cijemani a kutsimana hamo njasa kuwana bikumbululo ku bihula byange. Mu 1967, njashangumukile kulilongesela mu mbongi ya Jena ije yakele mu East Germany. Njakele na kutanda manene mabulu abasonekele baka-kulilongesa manene ba mu Germany, maneneni aje endeka bya buyoye bwa banu. Nameme njawanenemo biyongola byanjizibisile kubwaha, oloni kunjawanene bikumbululo ku bihula byange. Ngeci, njatwaleleleleho kulomba Njambi anjikwase kuwana bikumbululo.

MBIMBILIYA MUYATENGULWILILE BUYOYE BWANGE:

Mu 1970, njelukile ku Hungary kuje kunjakawanene Rose uje wakupwile munakazi wange. Ha simbu oyo mu Hungary mwakele ciyulo cije catondele ngwaco banu boshe bapwise hamo. Simbu yaindondo lika kutunda hatwalyambatelele, nange na Rose twajalukilile ku Austria. Cilengo cetu capwile ca kujalukila mu nganda ya Sydney, ku Australia kuje kubakele banananu.

Mu simbu yaindondo lika njawanene cipangi mu Austria. Litangwa limo, mukwetu injakele na kupanga nendi wanjilekele ngwendi njasa kuwana bikumbululo ku bihula byange byoshe mu Mbimbiliya. Wanjaneneko mabulu amo endeka ha Mbimbiliya. Njakatandele owo mabulu na kuwamesa mu simbu yaindondo lika, co njatondele kulilongesa byabingi. Ngeci, njasonekelele Bakaleho ba Yehova baje basonekele owo mabulu na kubalomba mabulu akwabo.

Ha litangwa lya kulibanga lya cilika ca kwanuka litangwa lya bulo bwetu, Mukaleho umo wa mu Austria watwendelele. Wanenele mabulu anjalombele na kunjilomba ngwendi njililongese nendi Mbimbiliya, co njatabele. Twakele na kulilongesa lubali mu calumingo ha maola awana mwafwa njashakele manene kuzibuka byabingi.

Byuma bibanjilongesele Bakaleho kutundilila mu Mbimbiliya byanjizibisile manene kubwaha. Mubanjimwesele lizina lya Njambi lya Yehova mu Mbimbiliya yange ya Cihungary, njakomokele manene. Ha myaka 27 injakele na kuya ku ceci kunjazibile lizina lya Yehova nameme lumo. Bikumbululo byabibwa binjawanene mu Mbimbiliya byanjetele ku mbunge. Cakumwenako, njalilongesele ngwange batsi na cimo cibazibuka cahi, banapu lika ngwe munu nalala tulo twakama. (Muka-kwambulula 9:5, 10; Yowano 11:11-15) Njalilongesele lalo bya cikulaheso ca mu Mbimbiliya ca kaye kakaha muje ‘kumukakala kutsa.’ (Kujombolola 21:3, 4) Njilabelela kukamona batate lalo, mwafwa mu kaye kakaha batsi “bakasanguka.”—Vilinga 24:15.

Rose nendi washangumukile kulilongesela hamo nange Mbimbiliya na mbunge yendi yoshe. Twashangumukile kukola bwasi ku sipilitu, co mu bingonde bibali lika twamesele libulu litwakele na kulilongesa! Twakele na kuya ku biwano byoshe bya Bakaleho ku Njibo ya Bumwene. Twabwahelelele manene mutwamwene mubalizemena Bakaleho ba Yehova, kulikwatasana na kulikwasa umo na mukwabo.—Yowano 13:34, 35.

Mu 1976, nange na Rose batutabesele kukobela mu Australia. Bwasi-bwasi twatondele kuje kwakele Bakaleho ba Yehova. Batutambwile mwamubwa, co twalizibile kushubuluka. Mu 1978, twapwile Bakaleho.

BUKWASI BUNJINAWANA:

Njinawanoni bikumbululo ku bihula binjinalifwiti kutonda ha myaka yaingi. Mwafwa ya kushwenya kuyehi na Yehova Njambi, njinawana Tate wa kulitila. (Yakomba 4:8) Co lalo lilabelo linjili nalyo lya kukamona batate ba kunjikita mu kaye kakaha, linapu lya seho manene kuli yange.—Yowano 5:28, 29.

Mu 1989, nange na Rose twelukile ku Hungary mangana tukalekeko babusamba betu, babushoko bwetu na baje boshe batuliwana nabo bitwakulahela. Twabezika manene kulongesa banu babangi Mbimbiliya. Co ba kutubakana 70 bali na kulemesela hamo netu Yehova, kwambateselela na banana.

Njalombele Njambi ha myaka ya kupwa 17 mangana anjikwase kuwana bikumbululo ku bihula byange. Kuneti oni myaka 39. Hanga njicili na kulombela kuli Yehova, oloni hano njili na kulombela ngwange, “Njakandelelako manene yobe Tate yange wa mwilu, ha kukumbulula malombelo ange a ku bwanike.”