Thona Imo Yaindondo ya Chihevelu Ije Itakametha Likulahelo

Twatha kukulahela ngwetu Njambi akashulithilila vikulahetho vyendi ndi? Yesu wakulahelele ngocho, cho lalo watakamethele na likulahelo lya vaka-kumutolilila. Ku mukanda wa Mateo 5:18, vamwetha chithimo chatele Yesu mu Ñanda yendi ya ha Munkinda ngwendi: “Mwa vuthunga njimileka ngwange, kuvanga lilu na hathi vineti, oloni ku majwi a Lishiko kukukatundu kalilaka [kathona] kamo, nambe kakandondo kuvanga vyoshe vanavishulitha.”

Thona yaindondo manene ku vithona vyoshe vya Chihevelu yapwa י (yod) ije yapwa ya kulivanga ha vithona viwana vya Chihevelu vije vimanena lithzina lya kujela lya Njambi, lya Yehova.a Cho lalo Vafaliseo na valongethi va majwi a Lishiko, vamwene vithona na majwi a mu Lishiko lya Njambi kupwa vya theho. Nameme “kalilaka” kamo ka mu Lishiko kapwile ka theho manene.

Yesu wendekele ngwendi lilu na kaye vinatha kwita, oloni ije thona imo ya mu Lishiko kuyatha kwita kuvanga vyuma vyoshe vyalishulithilila. Oloni Vithoneka vimwetha ngwavo lilu na kaye vije vituli na kumona vikalako myaka yoshe. (Myatho 78:69) Ngechi, awa majwi amwetha ngwavo nameme vyuma vyavindondo vivathoneka mu Lishiko vikalishulithilila.

Kuma Yehova akaka mana ku vyuma vije visholoka kupwa vyavindondo ndi? Eyo. Chakumwenako, Vaisalele va kuthañulu vavalekele ngwavo kuvapandele kupokola vithsiya vya muna manga wa ha chiwano cha Pasovala. (Kutuhuka 12:46) Eli lishiko mpamo lyasholokele ngwe lyalindondo. Kuma vathzivithithile vivavavindikilile kupokola vithsiya ndi? Mpamo kuvathzivithithile. Oloni Yehova Njambi wathzivukile ngwendi eli lishiko lyapwile vupolofweto. Lyamwethele ngwavo na Mesiya omwo vakamushukika ha chiti cha kuyandethela, na chimo chahi cha vithsiya vyendi chikapokoka.—Myatho 34:20; Yowano 19:31-33, 36.

Vika vitulilongetha ku majwi a Yesu? Twakulahela ngwetu vyuma vyoshe vyanakulahetha Yehova Njambi vikalishulithilila. Thona yaindondo manene ya Chihevelu ikanyametha likulahelo lyetu.