Muthzivuka Ndi?

Kuma vaje vakele na kulandetha tuthitu mu njuvo ya Shukulu Kalunga twatha kuvatumbula ngwetu vapwile “vethzi” ndi?

MUKANDA wa Mateo wendeka ngwavo: “Yesu wakovelele mu njuvo ya Shukulu Kalunga washekelemo voshe vaje vakele na kulanda na kulandulwilamo. Cho wafulumikile vimetha vya vaje vakele na kulandakana vimbongo na vitumbamo vya vaje vakele na kulandetha mayembe, cho wendekele kuli vakevo ngwendi: ‘Vathoneka mu Vithoneka ngwavo Njambi wendekele ngwendi, “Njuvo yange vakaitumbula Njuvo ya kulombelela,” oloni yeni munaipwitha mwela mwakuvanda vethzi.’”—Mateo 21:12, 13.

Mithzimbu ya Vayunda ya kuthañulu imwetha ngwavo vaje vakele na kulandetha mu njuvo ya Shukuku Kalunga vakele na kulandetha vyuma vyavo ha ndando yakama manene. Chakumwenako, mithzimbu ya Vayunda ya kuthañulu imwetha ngwavo mu chita cha myaka cha kulivanga C.E. ndando ya mayembe va kukombelela ya londele manene. Eyi yapwile hamo na fweto ya muka-kupanga uje wapangele ha matangwa a kupwa 25. Mayembe nambe tutela tuketwo tuvalikwathethele tuhutu mu kwana ñombelo, oloni vaje vakele na kulandetha mu njuvo ya Njambi vatulandethele ha ndando yakama. (Levi. 1:14; 5:7; 12:6-8) Mulongethi Simeon ben Gamaliel, kalithzivile mwamuvwa omwo ya kulonda kwa vindando vivalandele vaje tutela vavalambwile, ngechi watepulwile ku ndando ya tutela vavali.

Ha kukala na cheke ha vyuma evi Yesu, watumbwile vaje vakele na kulandetha mu njuvo ya Shukulu Kalunga ngwendi “vethzi” mwafwa vakele na linyanyamena.