Muka-Kilisitu Amwetha Ngothzi
VAISHE ya John vavambwitikilile mu mbonge yaindondo ya mu Gujarat, ije yakala mu India mu ma 1950. John na yayendi na vishongo vendi vawana hamo lika na vaina vakele na ntwima ku vulombelo vwa Katolika, cho vathzindile manene vulombelo vwa vaishe.
Litangwa limo, vaishe ya John vamutumine ngwavo atwale mukanda ku njuvo ya ndolome umo wa mu chikungulukilo. Ha litangwa lije vene ku mutondo, John walivulumwine manene ku munye wendi omwo wakele na kuteta mungomo. Mu kushaka kwononoka vivamulekele vaishe, John wakutile nanga ha mbandu yendi ije yakele na kundweka maninga, cho watwalele uje mukanda uvamwanene.
Omwo waketele ku njuvo ya uje ndolome, wawaneneko lika munakathzi wendi, uje wapwa Mukaleho wa Yehova. Omwo uje munakathzi watambwile uje mukanda, wanangukile ngwendi John navulumuka ku munye, cho wa mukwathele. Wakushile ha mbandu ya John, cho wakeleho vumbanda vuje vwakele mu chikasha cha kutulikila vumbanda na kukuta ha mbandu yendi. Kutundoho, uje munakathzi wapangelele John tiyi oku vali na kuthimutwiya mu chithzemo ha viñanda vya mu Mbimbiliya.
Ha thimbu eyi John washangumukile kukala na vithinganyeka vyavivwa ha Vakaleho. Wehwile ha kulithethza kwa vyuma vivakulahelele vaishe na vyuma vyakulahelele ikeye vije vimwetha ngwavo Yesu wapwa Njambi, cho vaka-Kilisitu vanapande kulombela kuli Maliya. Uje ndokathzi wathzivukile kwendeka ndaka ya John ya chithemwa ya Chigujarati, cho wamukumbulwile kupangetha Mbimbiliya na kumwana kalivulu ka “This Good News of the Kingdom.”
Munima ya kutanda kaje kalivulu, John wamwene ngwendi vyuma vyatandele vyatundile vene mu Mbimbiliya. Waile kuli kapilisitu wavo na kukamwihula vije vene vihula. Kapilisitu waluvalele manene na kumwasha Mbimbiliya na kumuyalumukila ngwendi: “U Liyavolo yove. Njimwethe havanathoneka mu Mbimbiliya ngwavo Yesu kapwile Njambi, njimwethe lalo havanendeka ngwavo kutwapandele kulombela kuli Maliya. Njimwethe ngwange.” Vyuma vyalingile uje kapilisitu vyakathamethele manene, ngechi John wamulekele ngwendi: “Kunjikelukila kukovela mu chechi ya vaka-Katolika lalo.” Cho chili vene kelukilileko.
John washangumukile kulilongetha Mbimbiliya na Vakaleho, cho wathzivithithile vyuma vyalilongethele na kushangumuka kupangela Yehova. Mukwita kwa thimbu, vaka-nanga yendi vamo navo vashangumukile kulilongetha vuthunga. John hanga achili na chiveve cha mbandu ije yalivulumwine ku munye myaka 60 kunima. Achanuka ngothzi yamumwethele uje muka-Kilisitu ije yanenethele ngwavo ashangumuke kulilongetha vuthunga.—2 Koli. 6:4, 6.