“Munu Muka-Mema ku Mbunge Akavethzika”

VANU va Njambi vanatwalelelaho kwana viñombelo mu vulombelo vwa vuthunga. Vaisalele vakele na kulambula tuthitu, cho na vaka-Kilisitu vanatwalelelaho kwana “ñombelo” ya kushangathzala Njambi. Oloni kuli viñombelo vikwavo lalo vije vikathzivitha Njambi kuvwaha ku mbunge. (Heve. 13:15, 16) Evi viñombelo vikanene kuvwahelela na vivethzikitho ngwe muimwethela eyi myanja inatako.

Hana, ngamba ya Njambi wa kulongwa wa kuthañulu washakele kukala na mwana, oloni wapwile mumba. Hana wakulahethele Yehova mu lilombelo ngwendi nga akita mwana, cho ‘akamukundika kuli Njambi mu kuyoya kwendi kwoshe.’ (1 Samwe. 1:10, 11) Mu kwita kwa thimbu, Hana wakele na limo, cho wakitile mwana wa munalume. Lithzina lyendi Samwele. Omwo Samwele washumukile, Hana wamutwalele ku Mbalaka, ngwe mwakulahethelele. Yehova wavethzikithile Hana omwo ya sipilitu yendi ya kulyana. Njambi wavethzikithile lalo Hana ha kukita vana vatanu, cho Samwele wapwile kapolofweto na muka-kuthoneka Mbimbiliya.—1 Samwe. 2:21.

Vaka-Kilisitu ano matangwa vakapangetha thimbu na ndthzili yavo mu kupangela Ishamatanga yavo, ngwe mwalingilile Hana na Samwele. Yesu wakulahethele lalo ngwendi nga tulyana kupangela Yehova, cho tuwana vivethzikitho vyavingi.—Mako 10:28-30.

Mu chita cha myaka cha kulivanga, Ndokasi uje wapwile muka-Kilisitu “wakele na kulinga vyavivwa na kukwatha tuhutu.” Oloni chaluvinda, “wavinjile, cho wathsile,” cho chikungulukilo chakele mu vuthiwa vwakama. Omwo vandongethi vathzivile ngwavo Petulu ali muyehi, vamuthanene. Achithinganyekeni kuvwahelela kuvathzivile vandongethi omwo Petulu wathangwile Ndokasi ku vathsi. Ou ikeye wapwile kapositolo wa kulivanga kuthangula muthsi. (Vili. 9:36-41) Njambi kevalele vipangi vyalingile Ndokasi. (Heve. 6:10) Vipangi vyalingile vavithoneka mu Lijwi lya Njambi mangana netu tulilongetheho chimo.

Kapositolo Paulu nendi natwakela mwanja wauvwa ha kulyana kupangetha thimbu na ndthzili yendi mwamuvwa. Wathonekelele vandolome vendi va ku Kolinte ngwendi: “Njikavwahelela manene na kwana vije vyoshe njili navyo, hamo nange vavenya vene.” (2 Koli. 12:15) Paulu wanangukile ngwendi kulyana kukwatha vakwavo kwamuthzivithile kuvwaha na kuthzivitha lalo Yehova kuvwaha, cho oku kwamunenelele vivethzikitho.—Vili. 20:24, 35.

Yehova akathzivi kuvwaha nga tupangetha thimbu na ndithzili yetu mu vyuma vya Vumwene na kukwatha vakwetu vaka-kukulahela. Kuma kuli vingila vikwavo lalo vitwatha kupangetha mangana tukundwiye chipangi cha kwambulula vya Vumwene ndi? Eyo. Twatha lalo kuthingimika Njambi ha kumulambwila vyuma vituli navyo. Milambu itukana ikakwatha mu chipangi cha kwambulula, kwambatethelela na vamishinali na vakwavo vaje vali mu chipangi cha kulitila cha thimbu yoshe. Cho lalo eyi milambu ikakwatha mu chipangi cha kulumbununa mavulu na mavindiyo na kukwatha vaje vali mu vukalu vwa chishitumukila na kutunga Vinjuvo vyaviha vya Vumwene. Anukeni ngweni “munu muka-mema ku mbunge akavethzika.” Cho lalo, nga twana Yehova vyuma vyavivwa vituli navyo, cho tumwetha ngwetu twamuthingimika.—Vithi. 3:9; 22:9.

Vingila Vivakalambwilamo Vanu Vamo Mu Kukundwiya Chipangi Cha Mu Kaye Koshe

Mu matangwa a kapositolo Paulu vanu vakele na kwana vwana. Na matangwa ano lalo vanu ‘vakaka kumukulo vimbongo vimo,’ cho vakavyaka mu chikasha cha chikungulukilo chivanathoneka ngwavo “Chipangi cha mu Kaye Koshe.” (1 Koli. 16:2) Vikungulukilo vikatumu eyi milambu ku ofisi ya munango ya Vakaleho va Yehova ya mu lifuti lyavo ngonde na ngonde. Mwatha lalo kutuma milambu ku ofisi ya Vakaleho va Yehova ya mu lifuti lyeni kupangetha keyala ivathoneketha kuli vaka-mashiko. Nga kumuthzivuka keyala ivakapangetha Vakaleho va Yehova va mu lifuti lyeni, cho ihuleni ofisi ya munango. Vikeyala mwatha lalo kuviwana ha www.jw.org, kwetheketha nokwo kumwakala, mwatha kulambula kupangetha evi vingila vinatako:

MILAMBU YA KULYANUKILA

Mwatha kutuma milambu kutunditha mu akaunti yeni na kuitwala mu akaunti yeka nambe kuituma kupangetha debit card nambe credit card. Mu mafuti amo, vamo vakalambula kupangetha jw.org nambe wembusaiti yeka ivanatavetha.
Mwatha kulambula vimbongo nambe vyuma vivanapanga ha mamanya a theho nambe vikwata vyeka vya ndando yakama. Thonekeni mukanda uje umwetha ngwavo vimbongo nambe vyuma vyeka vimunatumu vinapu lika milambu ya kulyanukila.

MILAMBU YA LITHZIVATHANO

Evi vinapu vimbongo vimulambula, cho vanatha kumilwithilavyo nga mushaka.
Thonekeni mukanda uje umwetha ngwavo vimbongo vimunalambula vinapu vya lithzivathano.

VINGILA VIKWAVO VYA KULAMBWILAMO

Nameme twatha kwana vimbongo na vyuma vyeka, oloni kuli vingila vikwavo lalo mutwatha kulambwilamo ku chipangi cha Vumwene cha mu kaye koshe. Mwatha kupangetha vingila vili muno mu chipalo. Thimbu kanda mulambule kupangetha ngila yoshe yoshe, ihuleni tahi ku ofisi ya munango ya mu lifuti lyeni mangana vamileke vya kulinga. Kunapu kwakuvwa kwihula vanu vaje vathzivuka mwamuvwa vya mitelo thimbu kanda mulambule, mwafwa mashiko a mitelo alithethzathethza.

Vimbongo vya Insurance na Litayamende: Munu natha kuthoneketha kuli vaka-Insurance ngwendi nga nathsi, cho vimbongo vyendi vavyane ku Vakaleho va Yehova kupangetha keyala ivanathoneketha kuli vaka-mashiko. Natha lalo kulambula vimbongo vyendi vya litayamende nambe vya penshini.

Ma akaunti a ku chishete cha vimbongo: Kwetheketha na mashiko a ku vishete vya vimbongo, munu natha kuthoneketha ngwendi nga nathsi, vimbongo vili mu akaunti yendi vavyane ku Vakaleho va Yehova kupangetha keyala ivanathoneketha kuli vaka-mashiko.

MaStock na MaBond: Mwatha kwana MaStock na MaBond kuli Vakaleho va Yehova nambe kuthoneka ngweni nga munathsi, cho vimbongo vavyane ku Vakaleho va Yehova kupangetha keyala ivanathoneketha kuli vaka-mashiko.

Kwana Livu Nambe Vinjuvo: Munu natha kwana vyuma vyendi vije vivatha kulandulula, ipwe vinjuvo nambe livu lyendi thimbu achiyoya. Natha lalo kuthoneka ngwendi, nga nathsi vavyane ku Vakaleho va Yehova, kupangetha keyala ivanathoneketha kuli vaka-mashiko.

MaWill na MaTrust: Evi vinapu vikwata nambe vimbongo vije vyalambula munu. Natha kuthoneketha ngwendi nga nathsi vavyane Vakaleho va Yehova kupangetha keyala ivanathoneketha kuli vaka-mashiko. Kulinga ngocho kunatha kutepulula ku kufweta mitelo.

Evi “vingila vikwavo vya kulambwilamo” vimwetha ngwavo munu napande kuthinganyekethetha thimbu kanda angule ngila yalambwilamo. Kuli mbuloshuwa ivanathoneka ije ili mu ndaka ya Vundele na Spanish, ije ili na mutwe wendeka ngwawo: Charitable Planning to Benefit Kingdom Service Worldwide, ije ikwatha vaje vashaka kukundwiya chipangi cha Vakaleho va Yehova cha mu kaye koshe. Omu mu mbuloshuwa vanamwethamo vingila vya kulithethzathethza vya kulambwilamo ha thimbu ino nambe kulutwe nambe nga munu nathsi. Vyuma vimo vivanathoneka omu mu mbuloshuwa, hamo kuvyatha kupanga mu lifuti lyeni mwafwa mashiko a mitelo analithethzathethza. Vanu vavangi vaje vanapangetha evi vingila, vanakwatha mu chipangi cha Njambi na kukwatha vanu vaje vali mu vukalu na kufwetela mitelo. Nga eyi mbuloshuwa muili mu lifuti lyeni, cho mwatha kuilomba kuli muka-kuthoneka wa mu chikungulukilo cheni.

Nga mushaka kuthzivuka vyavingi, yeni ha jw.org, cho nyatekeni ha “Make a Donation to Our Worldwide Work” nambe kuthonekela ku ofisi ya munango.