Mukanda wa Kutunda ku Mbunga ya Kutwamenena

Kuli Vandolome na Vandokathzi:

“Thimbu yoshe tukakandelela kuli Njambi hali yeni voshe, cho thimbu yoshe tukamitumbula mu malombelo etu. Omwo tukanuka ku mesho a Njambi yetu na Tatetu vipangi vya kukulahela kweni na kuundangana kwa chithzemo na chinyangavili cha kukola mbe muli Mwene yetu Yesu Kilisitu.” (1 Tes. 1:2, 3) Awa majwi amwetha kuvwahelela kutukathzivi hali yeni. Tukandelela Yehova hali yeni na ha vipangi vyeni vyavivwa vimuli na kupanga. Mwafwa vika?

Mwakawali, mwathzethzamene manene mu “vipangi vya kukulahela” na “kuundangana kwa chithzemo” mu vipangi vya Vumwene. Vungi vweni mwashakathzekeleko vingila vya kuvwethzelela ku chipangi cheni cha kwambulula. Vamo vanajalukilile ku vyela nambe mafuti eka kuje kuli vujene vwakama vwa vaka-kwambulula vya Vumwene. Vamo vavwethzelele ku chipangi chavo cha kwambulula mu kwambulwila ku mbunga. Vavangi valingile vupainiya vwa kukwatha mu vingonde vya Chanukitho na mu ngonde ya ivavendelelele kuli ntwama wa kuthzenguluka, na mu thimbu ya kampeni ya kulitila ya mu August 2014. Nambe vuyoye vweni vunapu vwa kulithethzathethza, oloni tunamono ngwetu muli na kupangela Yehova na mbunge yeni yoshe, cho tuli na kumishangathzala. (Kol. 3:23, 24) Tuli na kukandelela kuli Yehova mwafwa ya “vipangi” vyeni “vya kukulahela.”

Twamikandelela lalo ha“kuundangana” kweni “kwa chithzemo” mu vipangi vya kutunga myela yayingi ya chipangi cha Njambi mu kaye koshe. Eyi myela ili na kushakewa vwathi vwathi mwafwa vanu va Yehova vali na kutuminako. (Isa. 60:22) Mwakawali, vaka-kwambulula vatumine kweta ku 8,201,545, cho avalenji ya vilongetha vya Mbimbiliya ha ngonde na ngonde inapwile 9,499,933. Ha kuwana ngwe chipangi chili na kuya kulutwe, maofisi a minango amangi ashakahala kuwametha nambe kuwatungulula. Oku kulumbununa ngwe na Vinjuvo vya Vumwene lalo vanapande kutungilako vyeka. Kuli na kushakewa lalo maofisi a kutengulwila mikanda ku myela yaingi ya mu kaye mangana vaka-kutengulula vakakale na kupangela mu myela muvendeka lilimi lyavo.

Twatha kulihula ngwetu, ‘Vika vinjinapande kulinga mangana njikundwiye chipangi cha kutunga evi vinjuvo?’ Yetu vamo tunatha kulyana mu chipangi cha kutunga. Nambe tuthzivuka kutunga nambe kututhzivukamo, oloni tuvavoshe twatha kwana vyuma vyavivwa ku chipangi echi cha kulema. (Vis. 3:9, 10) Ha thimbu ya kutunga mbalaka, va Isalele vanene mavwana kweta noho vavavy

anethele ngwavo kunahu anapumo. (Kut. 36:5-7) Evi vyakumwenako vya mu Vithoneka, vikatuthzivitha kuvwaha na kutukanyametha. Tukandelele lalo Yehova ha “kuundangana” kweni “kwa chithzemo” mu vipangi evi vya kujela.

Tunavwahelela ha kumona lukakateya lwa vandolome vetu. Chakumwenako, achithinganyekeni hali vandolome vetu va ku South Korea. Kushwa mu 1950, vakwenje va muje mu lifuti, vanavakoveletha mu vinjele mwafwa ya kujeneka kukundwiya viñanda vya kaye ha kupwa vaka-Kilisitu. Vandolome vetu vavangi vanavayandetha mu ngila eyi, oloni kuvombilile likulahelo lyavo embwe. Lukakateya lwavo lunakanyametha likulahelo lyetu.

Mu Eritrea, vandolome vetu vatatu vanavakutu mu njele ha myaka ya kutuvakana 20. Cho vandolome veka lalo na vandokathzi na vana vavo, vanavakutu ha myaka yayindondo. Vanetheka vingila vyavingi vya kuvapatula, oloni vyoshe kuvyapangele. Nambe ngocho, vandolome vetu kuvombilile likulahelo lyavo. Vanamwetha kulongwa kwavo mu vithimbu vya vikalu. Ava vandolome vetu va kulongwa kutwethi kuvevala mu malombelo etu.—Lom. 1:8, 9.

Vavangi hali yeni kumwethi mu vinjele mwafwa ya likulahelo lyeni, oloni muli na kulipika na vukulukathzi, mishongo, na kumilwitha kuli vaka-njuvo yeni, nambe va vushoko vweni va kujeneka kukulahela, na vukalu vukwavo vwa kuthzivuka eni vavenya vumuli na kwitamo. Nambe ngocho, hanga muchili na kupangela Yehova mu kulongwa. (Yak. 1:12) Tuli na kumishangathzala manene. Lukakateya lweni lutulingitha tukandelele lalo Yehova.

Vipangi vyeni vya kulongwa, na kuundangana kweni kwa chithzemo, na lukakateya lweni, vitulingitha ‘tukandelele kuli Shukulu Kalunga omwo ikeye wapwa wamuvwa.’ (Mya. 106:1) Twamithzema manene muvavoshe, ngechi tulombela ngwetu Yehova amikanyamethe, aminyunge na kumivethzikitha mangana mumupangele myaka yoshe.

Yetu vandolome veni,

Mbunga ya Kutwamenena ya Vakaleho va Yehova