Kuvwethzelela ku Vutongwe Vwetu vwa mu Lihya—Kwambulwila mu Chitingitingi cha Mingotho

Vichapwila cha Kulema: Vanu vavangi vanathzethzama na vipangi vya ku muvila, cho twatha kuvaleka muthzimbu wa Vumwene nga tuvaila ku vipangi vyavo. Kwambulwila mu chitingitingi cha mingotho kwakuvwa manene mwafwa twatha kuwana na vanu vaje kuvethi ha vinjuvo. Vaka-mingotho vakavwahelela muvakamono munu uje asholoka ngwe ashaka kulanda. Ngechi, vaka-kwambulula vanapande kunyanyama na kuthzala mwamuvwa mangana vambulule na ntwima. (2 Koli. 6:3). Ntwama wa vipangi napande kwangula mwamuvwa vanu vaje vakapangela mu chitingitingi cha mingotho na matangwa avayamo.

Mwakulingila:

Livwahetheleni kukambulula mu kavatu. Kethi mukendeke vyavingi, mwafwa munatha kuviyithila munu thimbu cho kulutwe kakamyana lalo thimbu ya kwendeka.
Vendeleni ha thimbu inapande, ya kufwa ngwe chimene haje kanda vachithzethzame manene.
Vangeleni kulomba lithetha kuli mukulunu wa chipangi. Pweni na ndthzandthzu. Munatha kwendeka ngweni: “Tuli na kwendela vanu mu mitambela yavo ya vipangi na kuthimutwiya navo mu kavatu, mwafwa chinapu chachikalu kuvawana ha vinjuvo.” Cho thimutwiyeni navo mu kavatu na kuvana tilakiti, nambe mangazini, nambe mikanda yeka. Kumwapandele kutumbula vya milambu, mwafwa munatha kutanganetha vaka-kulandetha. Kuvanga umona vamihula muikapangela milambu mu chipangi chetu.
Nga mukulunu wa chipangi ali na ndthzandthzu, cho munatha kumulomba muthimutwiye na vaje vakapanga navo. Munatha kumulomba lalo ngweni muthethzeko mikanda ya kutanda mu mulili wa kuhwimina.
Pweni vakwononoka na kukwata mbunge. Chakumwenako, nga muka-kulandetha nathzethzama, munapande kuvandamenako kamandondo mangana amanethe vyali na kulinga athinoni muthimutwiye nendi.

Kavangeyeni Vyuma Vino mu Ngo nde Ino:

Mu kulemetha kweni kwa nanga, livwahetheleni kwambulula mu kavatu. Lingeni gwe muli na kupangela mu chitingitingi cha mingotho.