Waneni Kuvwahelela mu Kwambulula Muthzimbu Wauvwa

Kwamipwilaho laja kwakukalu kwambulula ndi? Vungi vwetu twatha kukumbulula ngwetu eyo. Mwafwa vika? Hamo mu chitingitingi mutukambulwila vanu vamo vatuthzinda veka vakatushendumuna nambe hamo tukathzivi lyova kwendeka na vanu vaje kututhzivuka. Evi vyuma vyatha kututhzeyetha. Oloni Njambi itukalemetha wapwa wa kuvwahelela, cho lalo washaka ngwendi netu tupwe va kuvwahelela. (Mya 100:2; 1Ti 1:11) Vyuma muka vitatu vyatha kutukwatha kupwa va kuvwahelela omwo twambulula?

Cha kulivanga tukambulula viñanda vije vikanene lilavelelo. Nameme ngwavo lilavelelo lya vanu lili na kuthzimangana matangwa ano, twatha kushulitha vimbunge vya vanu na “viñanda vyavivwa.” (Isa 52:7) Evi viñanda vyavivwa netu vyatha kutunenela kuvwahelela. Thimbu kanda tuye na kwambulula tunapande kuthinganyekethetha ha vyuma vivukanena Vumwene vwa Njambi.

Cha mu chivali, viñanda vyavivwa vitukambulula vikakwatha vanu ku muvila na ku sipilitu. Vakathethze vyuma vyavivi vivakele na kulinga, cho vakala na lilavelelo lya kukayoya myaka yoshe. (Isa 48:17, 18; Lom 1:16) Tuchithinganyekeni ngwe tuli mu chipangi cha kushakethzeka na kwovola vanu vaje vali mu monde. Nameme ngwavo vamo vanu kuvatondo kuvovola, oloni yetu tutwalelelaho kushakethzeka vaje vatonda kwovoka.—Mat 10:11-14.

Cha mu chitatu, chipangi chetu cha kwambulula chikashangathzala Yehova. Wachimona kupwa cha theho. (Isa 43:10; Hev 6:10) Cho lalo akatwana sipilitu yendi ya kujela itukwathe mu chipangi chendi. Ngechi tulombeni sipilitu ya Yehova itukwathe kupwa va kujolela. (Nga 5:22) Yehova atha kutukwatha kukanyamena vishoti vitukaliwana navyo, na kutukwatha twambulule mu kuthimpa. (Vil 4:31) Nameme ngwavo vamo mu chitingitingi vatha kuvyana kutolilila muthzimbu wauvwa, Yetu tutwalelelaho kupwa va kujolela mu chipangi chetu cha kwambulula.—Eze 3:3.

KENGENI VINDIYO YA WANENI KUVWAHELELA MU KULILONGETHA NA KUTHINGANYEKETHETHA, KUTUNDOHO, KUMBULULENI EVI VIHULA:

• Mwafwa vika tunapande kwaka mana ku kulilongetha kwetu kwa ha kapandi nameme tukapanga thimbu yakama mu lihya?

• Twatha kutembwinina vati Mary?

• Thimbu muka imukathinganyekethetha ha Lijwi lya Njambi?

• Vika vikaminenela kuvwahelela omwo mwambulula muthzimbu wauvwa?