Twatha Kulithambetha Vati na Ndolome Yetu?

Lingeni ngwe neni muli mu Ngalileya ha thimbu yayoyele Yesu. Cho mushaka kwana Yehova ñombelo. Ngechi, mwambata membe yeni imushaka kukana ñombelo na kushangumukako vungendthzi vweni vwavulaha. Munende vungendthzi vwa kuya ku Yelusalema ku Chiwano cha Mapapela, cho omwo mweta mu Yelusalema muwana vanu vavangi mu tapalo ije iya ku tembele. Mu nganda mwoshe mwashulu vakweni vaka-kukulahela vaje vanatundu ku mitambela ya kulyala. Omwo mweta ku tembele muwana vakweni vavangi navo vali na kuvandamena kwana viñombelo vyavo. Thimbu yeni ya kwana ñombelo yeta, cho mwana membe weni imuneja nendi kuli kapilisitu. Ha thimbu oyo vene, mwanuka ngweni kumwalithambethele na ndolome yeni. Yesu nalumbununa vitunapande kulinga. (Tandeni Mateo 5:24.) Vika vimunapande kulinga mangana yeni nowo ndolome imunalithevuka nendi mukale mu kwoloka ngwe mwendekele Yesu? Ha mikana eyi inatako, fundikeni ha chikumbululo chachivwa.

MUNAPANDE . . .

• kuthimutwiya lika na ndolome yeni nga mumona ngweni kuli vyuma vyamulingitha aluvale

• kumuleka ngweni atengulule vithinganyeka vyendi mangana vilitombole na vyeni nga mumona ngweni natuvakanetha kuluvala nameme nga nendi namiviyithila

• kutolilila mwamuvwa omwo ndolome yeni endeka, nameme kumwathzivithithile mwamuvwa vyuma vyamuluvaletha na kulomba likonekelo ha vyuma vimunalingile vije vinamuthzivithile kuvavala ku mbunge

NDOLOME YENI NAPANDE . . .

• kuleka vanu voshe va mu chikungulukilo vyuma vimunamuviyithila mangana vamwamwene

• kumitenukila na kusholola vukalu vwoshe na kuvandamena ngwendi mulitavele mulonga

• kunanguka kulikehetha na kuthimpa kweni ha kwija na kulomba likonekelo, cho napande kumikonekela kutundilila kwithi ya mbunge

Nameme ano matangwa kutwethi kwana viñombelo vya tuthitu, oloni Yesu walongethele vika ha kulitombola kuli mukati ka kushakethzeka kwoloka na vandolome vetu na kulemetha kuje kukathzivitha Njambi kuvwaha ku mbunge?