Bupainiya

Kulyakela bilengo bya ku sipilitu inapu ngila yaibwa ya kupangeselamo simbu yetu. (1 Ko 9:26) Kulyakela bilengo kutukwasa tupangese mwamubwa simbu yetu muno mu matangwa a kukotoka (Efe 5:15, 16) Ha simbu ya kulemesa kweni kwa naanga, lyakeleni bilengo bimushaka kushulisilila mu mwaka wa cipangi wauha. Muno mu mukanda wa biwano banendekamo bilengo bya kulisezaseza bimwasa kulyakela. Ngeci, lombeleni na kusinganyekesesa ha cilengo cimwasa kushulisilila.—Yak 1:5.

Cakumwenako, kuma kuli umo mu naanga yeni imwasa kukwasa mubaboshe mangana alinge bupainiya bwa simbu yoshe ndi? Nga muliziba ngweni kumwasa kupwisamo maola atondeka, co ihuleni bapainiya bamo baje balizibile ngoco mangana muzibe byabakwasele. (Vis 15:22) Nga casiwa, mwasa kulanyako painiya umo ha simbu ya kulemesa kweni kwa naanga mangana mwa kusimutwiye nendi. Co sonekeniko binoneko bimikwasa mupange mwamubwa cipangi ca bupainiya. Nga mwalingileko bupainiya kunima, co singanyekeseseniho na kumona indi mwasa kulingako lalo.

Kuma kuli bamo mu naanga yeni basa kulingako bupaniya bwa kukwasa ha ngonde imo nambe kutubakana ndi? Nga kumwesi na nzili ya kulinga byabingi, co mwasa kwambulula-ambululako ha kasimbu kakandondo ha litangwa na litangwa mangana mwase kulingako bupainiya bwa kukwasa. Nga kumwasa kuya na kwambulula mukati ka calumingo mwafwa ya sikola nambe mwafwa ya cipangi ceni, co lingeniko bupainiya mu ngonde ili na byalumingo bitanu nambe mu bingonde bimukahwimi ku bipangi nambe ku sikola. Ha kalenda yeni, sonekeniho bingonde bimushaka kulingako bupainiya bwa kukwasa na kunoneka mwamubwa simbu.—Vis 21:5.

KENGENI VIDIO YA PWENI . . . BAPAINIYA BA KUSIMPA. KUTUNDAHO, KUMBULULENI CIHULA CINATAKO:

• Byaliwanene nabyo ndokazi Aamand bitulongesa ngwabyo Yehova akakwasa bati baje balyana kulinga bupainiya?