Bulo Bwapwa bwa Myaka Yoshe

Baka-Kilistu bakapangesa binangulo bya mu Mbimbiliya mu bulo bwabo, bakana bumpau kuli Yehova, co lalo nabo bakapu bakubwahelela. (Mak 10:9) Nga baka-Kilistu bashaka ngwabo bapwe ba kubwahelela mu bulo, co banapande kupangesa binangulo bya mu Mbimbiliya omwo bangula munu ibashaka kulyamba nendi.

Kwapwa kwakubwa kujeneka kushatukila kukobela mu bulo oku munu acili mwanike. Mwafwa mashungu akulilala asa kumwonowesa kwangula mwamubwa munu wa kulyambata nendi. (1 Ko 7:36) Kanyameseni busamba bweni na Yehova na kukala na bifwa bya ku sipilitu simbu mucili bazike. Kulinga ngoco, kukamikwasa mukakanyamese bulo bweni.

Simbu kanda mulikumiiye kulyambata, munapande tahi kukala na simbu yakupwamo ya kuzibuka mwamubwa “munu wa mukati.” (1 Pe 3:4) Nga munanguka ngweni byuma bimo kubyesi bwino, co bisimutwiyeni na munu imushaka kulyambata nendi. Ngeci lika mwa babusamba, banu baje bashaka kulyambata nabo banapande kwaka mbunge ku byuma bibalingila munu ibashaka kulyambata nendi keti lika ku byuma byabalingila. (Fil 2:3, 4) Nga mupangesa binangulo bya mu Mbimbiliya ha simbu imulitonda, co kukamipwila kwakwasi kukabipangesa ha simbu imukalyambata.

KENGENI VIDIO YA KULIBWAHESELA BULO—MUTAMBA 3: TONDESESENI MANGANA MUMONE INDI MWASA. KUTUNDAHO, KUMBULULENI BIHULA BINATAKO:

• Ndokazi washangumukile bati kulizibuka na Shane?

• Bika byanangukile mu kwita kwa simbu?

• Bisemi bendi banamukwasele bati, co byuma muka byabibwa byanangwile kulinga?