Muzibuka Ndi?

Munyau wa cifwa muka wapangesele munalume umo wa bulemu wa ku Ithopia omwo Filipu waliwanene nendi?

LIJWI lyakulibanga libananungulula ngwabo “litemba” mu Mbimbiliya ya Kaye Kakaha lyasa kulumbununa miyati ya kuliseza-seza ya matemba. (Bili 8:28, 29, 38) Cisholoka ngwe uje munalume wa ku ithopia wapangesele litemba lyakama kutubakana aje abapangesele mu nzita nambe mu bweho bwa kushatuka. Tucisimutwiyeni ha byuma bimo bitulingisa twendeke ngoco.

Munalume wa ku Ithopia wapwile munalume wa bulemu uje wendele bungenzi bwa bulaha. Ikeye “wakele na moko yakama mu ciyulo ca Kandasi, mwene wa munakazi wa baka-Ithopia. Ou munalume ikeye wakele na kutala bufuko bwoshe bwa mwene.” (Bili 8:27) Ithopia ya kusañulu yambateselele lifuti lya Sudan liliko ano matangwa na mutambela wa ku mbwela manene ya Ijipiti iliko ano matangwa. Nameme hamo ou munalume kapangesele munyau umolika mu bungenzi bwendi bwoshe, hamo wambatele byuma bimo bya seho. Imo ya minyau ibapangesele mu simbu ya tupositolo mu kwambata banu yakele na mawili awana, co lalo yapwile ya kufwika. Libulu limo linendeka ha mukanda wa Bilinga ngwalyo, “Matemba a cifweci apwile akama, co akele na mwela wakama ha kwaka bingonga na byuma byeka bikwabo. Oku hamo kwalingisile banu bende mwamubwa na kwenda nunda yailaha.”

Munalume wa ku Ithopia wakele na kutanda omwo Filipu wezile kuli ikeye. Mbimbiliya imwesa ngwayo, “Filipu washatukilile ku litemba, co wazibile uje munalume [wa bulemu] ali na kutanda mukanda wa kapolofweto Isaya.” (Bili 8:30) Matemba a kwendela kuakele na kuzambula manene. Oku kwalingisile uje munalume wa bulemu ase kutanda mwamubwa na kulingisa Filipu uje wakele na kwenda ha mendi amuwane.

Munalume wa ku Ithopia “walombele Filipu alonde mu litemba atumame nendi.” (Bili 8:31) Mu matemba abakele na kupangesa mu bweho bwa kushatuka, baka-kuendesa bakele na kwimana. Mu litemba libakele na kupangesa mu kwenda hamo mwakele citwamo hatumamene uje munalume wa ku Ithopia na Filipu.

Kwesekesa na majwi abanahwiminina ali ku mukanda wa Bilinga capita 8 na mizimbu yendeka ha biñanda bya kusañulu iliko ano matangwa, mabulu etu ano matangwa ali na kumwesa munalume wa ku Ithopia oku nalondo mu litemba lyakama, keti litemba lyalindondo libapangesele mu nzita nambe mu bweho bwa kushatuka.