Kuma Bakaleho ba Yehova Bakala na Mashiko a Mwakulitanekeyeya?
Bakaleho ba Yehova bakulahela ngwabo binangulo na mashiko a mu Mbimbiliya asa kutukwasa kwangula byuma bije bizibisa Njambi kubwaha na byuma bije bitukwasa. (Isaya 48:17, 18) Keti yetu twalimangela awa mashiko nebi binangulo, nameme ngoco tukabikabangeya. Tumoneni binangulo na mashiko anatako mwakatukwasela ha simbu itukalitaneya na munu itushaka kulyambata nendi.a
Bulo kubwapandele kutsa. (Mateu 19:6) Bakaleho ba Yehova bamona kulitanekeya kupwa cuma ca seho cije citwala mu bulo.
Kulitanekeya kwapwa kwa banu bakukola baje bashaka kukobela mu bulo. Banu bacifwa eci banapu baje ‘banatubakana ha ntwitwi ya bukwenje,’ nambe ngwetu baje banecela kukala na mashungu a kulilala a kutubakanesa.—1 Korinte 7:36.
Baje bashaka kulitanekeya banapande kupwa banu baje banazituka kukobela mu bulo. Nameme banu bamo banatsii bulo kwesekesa na mashiko a fulumende, oloni kuli Njambi kubazitukile kwambata nambe kushomboka mwafwa mashiko endi amwesa ngwawo cuma lika cinapande kutsiya bulo cinapu bupangala.—Mateu 19:9.
Baka-Kristu baje bashaka kukobela mu bulo banapande kwangula lika munu uje wapwa muka-kukulahela. (1 Korinte 7:39) Bakaleho ba Yehova bakulahela ngwabo eli lishiko kulitalesa ku munu uje asingimika lika bitwakulahela, oloni lyatalesa kuli munu uje akulahela byuma bitwakulahela na kubipangesa, co lalo napande kupwa Mukaleho wa kumbwitika. (2 Korinte 6:14) Kushwa lika kusañulu, Njambi natwalelelaho kuleka bangamba bendi ngwendi bakobele mu bulo na banu baje bakulahela byuma bibakulahela. (Genese 24:3; Malaki 2:11) Baka-kutondesesa ba matangwa ano nabo banawana ngwabo eli lishiko lya busunga.b
Bana banapande kwononoka bisemi babo. (Provebia 1:8; Kolose 3:20) Banike baje bacili mu maboko a bisemi babo, bamwesa ngwabo bali na kwononoka bisemi babo nga bakabangeya mashiko abanaka. Awa mashiko anasa kutalesa ku myaka yanapande kushangumuka kulitanekeya na munu na byuma bibamutabesa kulinga.
Mukaleho na mukaleho akatabesa mashiko a mu Mbimbiliya amutwamenene omwo angula munu yanapande kulitanekeya nendi na simbu yanapande kulinga ngoco. Oku kwalitombola na cinangulo cakwendeka ngwaco: “Munu na munu alyambatela citele cendi babenya.” (Galatiya 6:5, futunoti) Nameme ngoco, bandolome na bandokazi babangi nga bashaka kulitanekeya na munu bakehula tahi na kulomba binangulo kuli Bakaleho ba kukola ku sipilitu baje babaka mbunge.—Provebia 1:5.
Bilinga byabingi bibakamono banu ngwabo basa kubilinga ha simbu ya kulitanekeya binapu bubi bwakama. Cakumwenako, Mbimbiliya yatuleke kujenjuka ku bupangala. Bupangala kubulumbununa lika kulilala na munu, oloni bunambateselela bilinga bya kujwala bibakalingi banu baje kubalyambatele byakufwa ngwe, kwesesa ku bushwamwa bwa munu, kulilalela ku kanwa, kulilalela ku matako. (1 Korinte 6:9-11) Na byuma bibakalingi banu bije bindula mashungu a kulilala, nabyo binapu byuma bya “mazilo,” co bikazibisa Njambi kubihya ku mbunge. (Galatiya 5:19-21) Mbimbiliya lalo ili na kutunangula ngwayo kutwapandele kwendeka “byendeka bya shwamwa” bije bindula mashungu akulilala.—Kolose 3:8.
Mbunge ikakwisi. (Jelemiya 17:9) Yasa kulingisa munu alinge byuma byazibuka ngwendi binapu byabibi. Banu baje bali mu busamba banapande kujenjuka kukala likalyabo na kukala ku myela ije yasa kubakobelesa mu ceseko, mona balinga ngoco, co kubatabesa bimbunge byabo bibakwise. Banapande kulinga byuma bije bibanyungilila bya kufwa ngwe, kukala kuje kuli mbunga nambe kukala na munu wamucitatu. (Provebia 28:26) Bazike ba baka-Kristu baje bashakezeka munu wakulyambata nendi banapande kunyanyama kulitanekeya na munu kupangesa mawebusaiti aha intaneti, maneneni kubapandele kushangumuka kuzema munu uje kanda bazibuke manene byendi.—Samu 26:4.
a Kulitanekeya, mu bisemwa bimo kucakaleko, oloni mitambela imo kucakala. Mbimbiliya kuyatushikile ngwayo kubanga tulitanekeye tahi na munu itushaka kukobela nendi mu bulo nambe ngwetu ikeyo lika ngila itwala mu bulo.
b Cakumwenako, ñanda imo ya mu magazini ya Marriage & Family Review yamwesele ngwalyo “munima ya kutondesesa lutatu, bawanene ngwabo kakangi malo a banu bali mu bulombelo bumo na baje bakulahela byuma byakulifwa, akatwalelelaho kukalako simbu yailaha (myaka 20 na 50 nambe kutubakana).”—Volyumu 38, ñanda 1 liputa 88 (2005)
[CIPALO]