1 Chikumiyo

CHILUMBUNUNA VIKA?

Vanalume na vanakathzi vaje vanalikumiya mu vulo vwavo vakavumono ngwavo vunapande kutwalelelaho kukalako, cho valikulahela. Munu na munu mu vulo athzivuka ngwendi mukwavo atwalelelaho kukala mu vulo nameme vyuma vikaluwa.

Vaka-kulyambata vamo vakakala mu vulo mwafwa ya kutewa ngwavo vaka-nanga yavo nambe vavuthamba vavo kuvavatavetha kulikondola. Oloni chithzemo na kathingimiko vikevyo vinapande kukwatha vanu vatwaleleleho kukala mu vulo.

CHINANGULO CHA MU MBIMBILIYA: “Munalume kapandele kukondola munakathzi wendi.”—1 Kolinte 7:11.

Micah ngwendi: “Nga munu ashaka kutwalelelaho kukala mu vulo, kapandele kuluvala vwathi nga muka-limbo lyendi amuviyithila. Oloni napande kumuthambetha na kulomba vwathi likonekelo. Cho lalo nga kusholoka vukalu kuvapandele kuvumona ngwavo vunaija na kumanetha vulo, oloni ngwavo vukalu vwavo vuhwa.”

VIKWAPWILA KWA THEHO

Vaka-kulyambata vaje kuvethi kumona chikumiyo chavo kupwa cha theho muvakaliwana na vukalu, vakendeka ngwavo: ‘kutwalitombwele,’ ngechi, vakatondo vingila vya kulikondola.

Jean ngwendi: “Vamo vakakovela mu vulo oku vathinganyeka ngwavo nga vyuma kuvikavendela vwino mu vulo vwavo, cho vakathsiya vulo. Nga vanu vakovela mu vulo oku vathinganyeka vya kulikondola, cho chikumiyo chavo chinapu changocho.”

VIMWATHA KULINGA

LIHULENI NGWENI

Nga muli na kulichokota. . .

• Mukaliveye ngweni ngwe kumwalishombwele na muka-limbo lyeni ndi?

• Mukathinganyeka vya kushomboka nambe kwambata munu weka ndi?

• Mukendeka ngweni: “Njimithethza” nambe ngweni: “Njikawana mukwavo uje wanjithzema” ndi?

Nga mwakumbulula ngweni eyo ku vihula vili helu, lifwiteni kukanyametha chikumiyo cheni.

THIMUTWIYENI NA MUKA-LIMBO LYENI

• Chikumiyo chetu cha vulo chinathzeye ndi? Nga mukemwo, cho vika vinanenetha ngocho?

• Vika vitunapande kulinga mangana tukanyamethe chikumiyo chetu?

LINGENI EVI

• Thonekeleni muka-limbo lyeni tumikanda twa chithzemo

• Mwetheni ngweni mwathzema muka-limbo lyeni ha kwaka vikupulo vyendi ha metha ya ku vipangi

• Tumineni muka-limbo lyeni foni ha litangwa na litangwa nga muli ku vipangi nameme nga muli kweka

CHINANGULO CHA MU MBIMBILIYA: “Vanapandakana Njambi, munu kethi avangunune.”—Mateo 19:6.