4 Kuthambetha

KULUMBUNUNA VIKA?

Kulumbununa kukonekela munu uje natuvulumwina na kujeneka lalo kumuluvalela nambe kukala na likitikiti ku mbunge. Kukonekela kukulumbununa kwechelela vuvi, nambe kulitangetha ngwe vyahi vyanamiviyithila munu.

CHINANGULO CHA MU MBIMBILIYA: “Pweni vaka-kulimanena umo na mukwavo, cho lithambetheni umo na mukwavo, nga umo weni ali na kulinyenga hali mukwavo. Munapande kulithambetha umo na mukwavo.”—Kolose 3:13.

Aaron ngwendi: “Nga wathzema munu, kuwaka mbunge ku tupenga twendi, oloni waka mbunge ku vyuma vyavivwa vyakalingi.”

VIKWAPWILA KWA THEHO

Kukala na likitikiti ku mbunge kwatha kumithzeyetha na kutanganetha vulo vweni.

Julia ngwendi: “Litangwa limo munalume wange walombele ngwendi njimukonekele ha vyuma vyanjiviyithilile. Kwanjikaluwilile kumukonekela. Oku kwalingithile tujeneke kulithzivathana mwamuvwa mu vulo vwetu. Oloni mu kwita kwa thimbu njamukonekelele, cho njalithzivile kuvihya ha kujeneka kumukonekela vwathi.”

VIMWATHA KULINGA

LIHULENI NGWENI

Thimbu ikwavo yakamyendeka nambe kumilinga mwamuvi muka-limbo lyeni, mukalihule ngweni:

• ‘Njikaluvala vwathi ndi?’

• ‘Nanjivulumwina manene, cho napande kulomba likonekelo indi njivaleko lika?’

THIMUTWIYENI NA MUKA-LIMBO LYENI

• Tukambata thimbu ya kupwa hali mangana tulikonekele?

• Vika vitunapande kulinga mangana tulikonekele vwathi?

LINGENI EVI

• Nga veka vanakuluvaletha, kethi uluvalele muka-limbo lyove.

• Kethi wakele manene mbunge ku vyuma vyanaviyitha muka-limbo lyove mwafwa ‘tuvavoshe tukaviyitha vithimbu vyavingi.’—Yakomba 3:2.

Kimberly ngwendi: “Kwapwa kwakwathi kukonekela nga muvavoshe muli na mulonga, oloni kwapwa kwakukalu kukonekela nga umo weni ikeye ali na mulonga. Munu wa kulikehetha akakonekela na kulomba likonekelo.”

CHINANGULO CHA MU MBIMBILIYA: “Lithambethe vwathi na muka-ñole yove.”—Mateo 5:25.