Mu Bumwene bwa Njambi Mukakala “Kwoloka Simbu Yoshe”

Bumwene bwa Njambi buje bubanabandamena banu ha simbu yailaha, ololo bunena kwoloka na likwatasano mu kaye. Obu Bumwene bunapu fulumende yanashimbika Njambi. Ku mukanda wa Myaso 72:7 ngwabo: ‘Kukakala kwoloka simbu yoshe.’ Obu Bumwene bukashangumuka tangwa lika kuyula kaye koshe? Bukashangumuka bati kuyula kaye koshe? Tunapande kulinga bika mangana tukakale mu Bumwene bwa Njambi?

BUMWENE BWA NJAMBI BUKAIJA TANGWA LIKA?

Mbimbiliya yapolofwetele ha byuma bili na kulingiwa bije bimwesa ngwabyo Bumwene bwa Njambi ololo bushangumuka kuyula hano ha kaye. Ebi byuma byoshe binapu cizibukiso, co binambateselela binzita, njala ya lyangengela, mishongo ya kulitambwisa, mandunduma na kujeneka kwononoka mashiko.—Mateo 24:3, 7, 12; Luka 21:11; Kujombolola 6:2-8.

Bupolofweto bukwabo bwa mu Mbimbiliya ngwabo: “Anuka ngwobe kukakala kukaluwa ha simbu ya matangwa a kukotoka. Mwafwa banu bakapwa baka-kulizema bakebo babenya, baka-kuzema bimbongo, . . . baka-kujeneka kwononoka kuli bisemi babo, baka-kujeneka kukandelela, ba kujeneka kulongwa. Baka-kujeneka kuzema bakwabo, baka-kujeneka kulizibasana na bakwabo, baka-kubangeya bakwabo, baka-kujeneka kukwata mbunge, baka-kukenyuka, baka-kuzinda byabibwa, . . . baka-kushula na kulyalesa, baka-kuzema manene senga kutubakana kuzema Njambi.” (2 Timateo 3:1-4, NWT) Ebi bifwa byabibi na kunima kubyakele, oloni ano matangwa binalibwezelela manene.

Obu bupolofweto bwashangumukile kulishulisilila mu 1914. Baka kutondesesa byuma bya kusañulu, baka-bupolitiki na baka-kusoneka mizimbu banendeka ngwabo kushwa lika mu mwaka wa 1914 byuma binatenguluka manene. Cakumwenako, Peter Munch muka-kutondesesa byuma bya kusañulu wa ku Denmark, wasonekele ngwendi: “Kushwa lika ha nzita ya kaye ya mu 1914, byuma byabingi binatenguluka manene mu kuyoya kwa banu. Simbu kanda ou mwaka wete, banu bamwene ngwe byuma mu kaye byashangumuka kukakala mwabubwa, . . . oloni byuma bya kufwa ngwe mandunduma, bizindo, na byuma bikwabo bya kutewesa byalibwezelela manene.”

Oloni, kuli byuma bitulingisa tukale na lilabelelo. Byuma byabibi bije bili na kulingiwa bimwesa ngwabyo Bumwene bwa Njambi ololo buyula kaye koshe. Ou unapu muzimbu waubwa, mukemwo Yesu wendekele ngwendi mu simbu ino ya kukotoka, “biñanda byabibwa bya Bumwene bakabyambulula mu kaye mwoshe ngwe kupwa bukaleho ku miyati yoshe, co asinoni kukotoka kwa kaye kukaija.”—Mateo 24:14.

Muzimbu wa kwija kwa Bumwene bwa Njambi ukewo ubakambulula manene Bakaleo ba Yehova. Mukemwo mangazini ibakapangesa manene yakala na mutwe wa kwendeka ngwawo: Kaposhi ka Kukengela Kali na Kutambeka Bumwene bwa Yehova. Ha simbu ino, eyi mangazini ili mu bindaka bya kutubakana 338, Kaposhi ka Kukengela kakasimutwiya ha byuma byabibwa bibukatulingila Bumwene bwa Njambi hano hasi.

BUMWENE BWA NJAMBI BUKASHANGUMUKA BATI KUYULA?

Cikumbululo cinemana ha bisimpi biwana binatako:

1. Obu Bumwene kubukayulu kwitila mu bantwama ba bifulumende bya banu.

2. Bantwama ba bifulumende bya banu kubakashaka kubecelesa kuyula, co mu kujeneka kuzibuka bakalwa nzita na Bumwene bwa Njambi.—Myaso 2:2-9.

3. Bumwene bwa Njambi bukanyongesa bifulumende bya bupolitiki bije bishaka kutwalelelaho kuyula banu. (Ndanyele 2:44; Kujombolola 19:17-21) Eyi nzita ya mamaneselelo ya kaye koshe banaitumbula ngwabo Alamangindone.​—Kujombolola 16:14, 16.

4. Baje bakundwiya Bumwene bwa Njambi bakoboka nzita ya Alamangindone na kukayoya mu kwoloka mu lifuti lyaliha. Mbimbiliya ngwayo bakapwa “mbunga yakama.” Kulumbununa ngwabo banu babangi manene bakoboka.—Kujombolola 7:9, 10, 13, 14.

TUNAPANDE KULINGA BIKA MANGANA TUKAKALE MU BUMWENE BWA NJAMBI?

Chuma ca kulivanga citunapande kulinga mangana tukakale mu Bumwene bwa Njambi, cinapu kulilongesa mashiko endi. Yesu walombelele kuli Njambi ngwendi: “Mwonyo wa myaka yoshe ukewo ou, ngeci bakuzibuke yobe Njambi umolika wa busunga, co na kuzibuka Yesu Kilisitu, uje iwatumine.”—Yowano 17:3.

Nga banu bazibuka mwamubwa Yehova Njambi, co bawana bukwasi mu bingila byabingi. Tucisimutwiyeni lika ha bingila bibali: Ngila ya kulibanga, likulahelo lyabo kuli Njambi likanyama manene. Likulahelo lya kukanyama lije lyemana ha bukaleho libalingisa bakulahele ngwabo Bumwene bwa Njambi buli na kuyula mwilu, co ololo buyula hano hasi. (Vahevelu 11:1) Ngila ya mu cibali, kuzibuka Njambi kubalingisa bamuzeme manene na kuzema bakwabo banu. Kuzema Njambi kubalingisa bononoke mashiko endi na bimbunge byabo byoshe. Kuzema bakwabo banu kubalingisa bononoke majwi a Yesu uje wendekele ngwendi: “Byuma byoshe bimushaka ngeci bakweni bamilingilebyo, mukemwo bene, neni lalo balingilenibyo.”—Luka 6:31.

Ngwe mwa cisemi wa cizemo, Ishamatanga yetu washaka ngwendi tuyoye mwamubwa. Washaka ngwendi tuyoye buyoye bubanatumbula mu Mbimbiliya ngwabo: “Mwonyo uje unapu wa busunga, nambe ngwetu kuyoya kwakubwa.” (1 Timateo 6:19) Ano matangwa kuyoya kwakubwa kesi kwakwasi. Banu babangi bali na kuyanda. Tucisimutwiyeni ha byuma bibakalikuwa banu baje bakakala mu Bumwene bwa Njambi mangana tuzibisise byuma byalibungila mu kuyoya kwakubwa.