CILONGESA 3
Mwakukolesela Bukalu
KUKOLESA KWAPWA KUKA?
Munu wa kukolesa akazanguluka bwasi munima ya kuliwana mu bukalu. Kukala neci cashu kwatonda kulizilisa. Mwanike kasa kulilongesa kwenda kwa kujeneka kuliwilawila ha bisimbu bimo. Mu ngila imo lika kasa kulilongesa mubwafwila buyoye nga kaliwana mu bukalu.
MWAFWA BIKA KUKOLESA KWAPWA KWA SEHO?
Banike bamo bakazeye nga banonwa kulinga byuma bimo, nga baliwana na bukalu nambe nga babanangula. Bakwabo co bakecela kukolesa. Oloni banapande kuzibuka ebi bisimpi binatako:
Tubaboshe tukalimbenje mu byuma bimo.—Yakomba 3:2.
Munu woshe woshe asa kuliwana na bukalu mu kuyoya.—Muka-kwambulula 9:11.
Twasa kunanguka hatunapande kupangela nga bakwetu batunangula.—Visimo 9:9..
Kukolesa kukwasa muneni asimpe omwo aliwana na bukalu.
MWAKULONGESELA MUNENI KUKOLESA
Nga muneni onwa kulinga byuma bimo.
CINANGULO CA MU MBIMBILIYA: “Nameme muka-busunga awa bisimbu bitanu na bibali, akatukamo lalo.”—Visimo 24:16.
Kwaseni muneni alilongese kwilula bukalu. Cakumwenako, alinga bati nga nafweluka ku sikola? Nasa kulikela na kwendeka ngwendi: “Nabimo binjasa kulinga mwamubwa byahi.”
Kwaseni muneni azibuke bya kulinga nga akafweluka simbu ikwabo lalo. Oku kumukwasa kumanesa buje bukalu na kujeneka kuliziba manene bubi.
Kesi mukwase muneni kumanesa bukalu bwendi. Oloni mukwaseni lika asinganyeke mwa kumanesela buje bukalu. Mwasa kumwihula ngweni: “Wasa kulinga bati mangana uzibisise mwamubwa byuma bibakulongesa?”
Nga tuliwana na bukalu.
CINANGULO CA MU MBIMBILIYA: “Yeni kumwazibukile ngweni mwonyo weni ukafwa bati ku litangwa lya imene.”—Yakomba 4:14.
Kutwasa kuzibukila cimweja bilingiwa mu kuyoya kwetu. Munu uje nafuku lelo, asa kupwa cihutu imene. Munu uje nalikangula lelo, asa kupwa mubezi imene. Mbimbiliya ngwayo: “Baka-kushatuka manene kubesi kuhyana kushatuka simbu yoshe, co baka-kusimpa kubesi kuhyana nzita simbu yoshe, . . Lubinda lukaija ku munu woshe iwoshe.”—Muka-kwambulula 9:11.
Ha kupwa cisemi mukalingi mumwasela mwoshe kunyungilila muneni ku bukalu. Oloni kumwasa ku munyungilila ku byuma byoshe byabibi.
Muneni hamo kanda aliwaneho laja na bukalu bwa kumutundisa cipangi nameme bukalu bwa kujeneka bimbongo. Oloni mwasa kutwalelelaho ku mukwasa akolese. Cakumwenako, nga nalipyakana na kabusamba kendi wa ha mbunge nambe kutsisa munu wa mu naanga.a
Nga muneni bamunangula.
CINANGULO CA MU MBIMBILIYA: “Nga utolilila ku bije bakunangula . . . co ukapwa muka-mana.”—Visimo 19:20.
Nga munu umo anangula muneni, katondo kumushendumuna nambe kumuzeyesa. Oloni ashaka kumukwasa amone hanapande kupangela.
Nga mulongesa muneni kutambula bibamunangula, mubaboshe mupwa ba kubwahelela. Cisemi umo wa lizina lya John wendekele ngwendi: “Nga mwamena muneni uje nabiisa, co kasa kulilongesaho cimo. Oloni abiisa byuma byabingi na kumyana cipangi ca kuya na kuzima tuhya twanai na kushwameka. Oku kuyandesa cisemi hamo lika na mwana.”
Mwasa kukwasa bati muneni kuwana bukwasi butunda mu binangulo? Nga bamunangula ku sikola nambe kwoshe kwoshe, keti mwendeke ngweni kubapandele kumunangula. Oloni mwihuleni ngweni:
“Usinganyeka ngwobe bika byalingisa mangana bakunangule?”
“Wasa kupangelaho bati?”
“Simbu ikwabo mubakakunangula ukalinga bati?”
Anukeni ngweni binangulo bikwasa muneni, kesi lika ha simbu ino, oloni na mu bukulunu bwendi.
a Kengeni cilongesa cili mu Kaposhi ka Kukengela ka Silozi ka October 1, 2008 ha mutwe wa “Mu Tuse Mwan’a Mina Ku Tiyela Masitapilu.”